مشكلتي مع ولدي عويصه

[مشاعر أمرأه]

السلام عليكم ورحمة الله وبركاته


انا عندي مشكله مع ولدي عمره خمس سنين ونص واهو البجر

على بنات

اهو يدرس بمدرسه اجنبيه بالتمهيدي

اهو واااااااااااااايد حنون وحساس

انا حبيت اعطيكم فكره عنه قبل لااتكلم

لاني بموت من القهر موقادره انام

اليوم دخلت ولدي واخته الغرفه عشان ينامون للمدرسه

المهم كنت شوي زعلانه منهم متهاوشين

فقلت لولدي انت روح نام بسريرك ورحت نمت يم بنتي الصغيره بسريرها

وقعدت اقولهم الدعاء واقرى معاهم القرآن بس تره دايم انا احطهم معاي بنفس السرير اقرالهم وبعدين كل واحد ينام بسريره

بس اليوم ما سويت جذي

المهم وانا اقرى جان اسمع صوت ولدي واهو يبجي

جا ن اقوله شفيك

جان ينفجر علي بجي بطريقه مو طبيعيه بصوره تقطع القلب ويقول انا محد يحبني

مو انتي بس تره المدرسه اذوني كل ماابي العب وياهم مايخلوني مايحبون يلعبون معاي

محد يحب يلعب معاي حتى يوم قلت للتيشر جان اتقول خل اشوفهم وماسوت شي ويوم رحتلها مره ثانيه

جان تعاقبني

صراحه عور قلبي ويقولي تعالي المدرسه وكلميهم

وتره هذي مو اول مره يقول هالكلام مو بس بالمدرسه حتى من عيال عمامه يشكي نفس السالفه

والله مادري شسوي انا قلتلكم قصتي بالتفصيل لاني والله ابي المساعده من اللي عندها حل بهالخصوص

والله قطع قلبي هالولد وعلى فكره تره شخصيته قويه ومتحدث وماشاء الله وايد ذكي

مو لانه ولدي هذا كلام الكل عنه المدرسه وخواله ومعارفنا وكل من يحتك فيه

ويحب يلعب مع اللي اكبر من سنه بس لمن اتعاملينه تدرون انه واااااااااااايد بيور قلبه وايد طيب​

 

[مشاعر أمرأه]

ليش محد رد والله محتاره

 

[حضاره]

رفع رفع رفع

يالغاليه برد عليج بعد شوي بروح اخذ باتي من المدرسه 00لاتحاتين شغله ان شاءالله سهله سهله

 

[مشاعر أمرأه]

مشكوره حبوبه

والله احاتيه هالولد

 

[زوزو الحلوه]

حبيبتي ولدي قبل سنه تقريبا سنه وشي كان يقولي مابي اروح المدرسه لانه محد يلعب وياي واهو اسم لله عليه مثل ولدج حنون وذكي وحساس وماعنده سوالف شطانه ...فهمته انك لا تقط روحك على احد ولا تغصب احد يلعب معاك اهو هم بمدرسه انجليزيه اقوله بالبلي تايم اذا ما في احد يبي يلعب معاك انتي لا تتلزق في احد روح عند التيشر اهي على طول تقعد بالصف.. اقعد وياها ساعدها سولف معاها اقا شي معاها وشوف اذا ما يو الصبيان من روحهم يبون يلعبون وياك..خليه دايما واثق من نفسه..على طول قوليله ..الي يبي يلعب معاك اهو ايي من روحه واذا ما يبون كيفهم اهم الخسرانين ..والله عقبها سوى الي انا قتله يقولي اللحين شفتي فلاان ذاك اليوم ابي العب وياه اهو ما يبي ذكرته بكلامي جان ذاك اليوم يا يقولي ماما انا قاعد بالبلي تايم جان ايي فلان وفلان واحد يايب وياه كوكيز يبي يعطيني والثاني يقول تعال العب وياي ..جربي طريقتي يمكن تنفع...وانتي جم عمر ولدج ..انا ولدي عمره 6سنين الشهر الياي انشالله يكمل 7 سنين يعني يفهم اللي اقوله اياه وانا اسم الله عليه فطين الحمدالله من جذيه فهمني انا شقصد..وخلي ولدج مميز علشان الكل اييله اهو مايروح حق احد..والله يحفظه انشالله ويخليه لج