مشكلتي مع بنتي

[شيهانه شماليه]

السلام عليكم ورحمة الله وبركاته

مبارك عليكم الشهر مقدما ..

بنات ..

انا مشكلتي مع بنتي الوحيده مشكللله:eh_s(10):

صج صج متأزمه انا منها

ابي منكم اللي عندها خبره تقول لي شسوي معاها

بنتي عمرها 4 سنين مشكلتها عنيده واللي تبيه الا تمشيه والا مو ضروري يصير
يعني مثلا لمن اقوب لها لبسي البدله الفلانيه وتكون ماتبيها تقول مابي واذا لبستها غصب خلاص ماتطلع من الغرفه اهي مو حنانه بس انا تكسر خاطري عاد احاول اني ما اغير رايي علشان ماتحس انه هذا الاسلوب الصحيح لتنفيذ طلباتها بس احاول احط حل وسط بين اللي قلته وبين رايها
حتى شعرها لمن اسويلها شغلان حلوه وفناتق تقعد عندي تقول افتحيه مابي احذ يشوفني جذي مع انه حيييل حلو ولمن اجبرها ويشوفها احد والله حيل يمدحونها وانها كشخه وستايل بس جننتني:eh_s(14):

هم مرات يطري علي اقول مابي البسها ع ذوقي كل شي واجبرها تطلع فيه وبعدين يصير ماعندها ثقه بالنفس اذا كبرت

الموضوع حيل مضايقني لانها الحبن والله وانا اكتب قاعده تبجي عشان رفعت شعرها تبيه مفتوح


للعلم هي حياويه فيها حيا حلو مع خوف حلو بعني مو من البنات الجريئات

تكفون ابي من اللي عندهم بنات تقولي شلون تعاملت معاهم:bbbiu:

 

[دلع86]

نفس حاله بنتي جنج تتكلمين عنها
الله يهديييييهم يااااااارب

 

[Omali835]

الله يخليها لج روحي مكتبة جرير تلاقين كتب وايد حلوة تعلمجً اشلون تعاملين معاها وتكسبينهاً

 

[@الياسمين@]

والله نفس الحاله ونفس المعاناة
بنتي كبر بنتج ونفسها بالظبط

 

[شيهانه شماليه]

امبيه يعني مو بس بنتي جذي


عاد والله اشوف بنات رفيجاتي موووو حذي كلش وكبر بنتي ماشاء الله عندهم ثقه بنفسهم لو تلبس مقطع وشعرها كششششششه عااادي تطلع وتروح واذا احد علق عليها ترد عليه او تكمل طريقها ماتهتم بكلامه

انا بنتي لو احد يقول لها شي لزقت فيني

يارب القى حل عند اهل الخبره من البنات

 

[أم حورية]

انا ساعات امر بنفس الموقف مع بناتي

بس المفروض الوحدة ما تشد ولا ترخي

بعني احيانا اخليهم يختارون اذا بنروح مكان عادي

بس احيانا انا لازم اختار اذا بنروح حق مناسبة ولا بيت اهل بعاد

ووقتها اقنعهم بالحوار ان هالوقت لازم نلبس هاللبس ونسوي شعرنا بطريقة معينة

يعني بعمر 3 سنين ينفع معاهم الكلام والمسايس والتشجيع

وكرة وحدة تشتكي نفس الحالة حق دكتور قالها مو المهم تسمع الكلام بنفس الوقت المهم تقنعينها

لان مرة ع مرة بتقتنع بس الاجبار ما ينفع

 

[أم حورية]

وفي نقطة تفيد

اذا بتطلعين طلعيلها كذا بدلة تناسب المكان وخل تختار منهم جذي انتي ويخا راضيين

 

[شيهانه شماليه]

ام حوريه فديتج مشكوره

 

[WAAAW]

وااااااااااااااااااااااي بنتي جذييييييييييييييييي........ تينني والله امووووووووووت من الحره.. اكون مكشختها حيل ومسويه شعرها .. تقول لي ماااااااابي بطلي شعري ... وتبي تروح تلبس اللي يعجبها ...... واكلمها وافهمها بهدووووووووووء .... بس الا تخليني اصرخ عليها عشان تفهم وتخاف وما تعاند

 

[أنا عسولة]

انا بنتي نفس بنتج ونفس عمرها ويننتني على هالسالفة لقيت انه احسن حل مثل ما قالت اختي ام حورية تعطينها اختيارات ... قمت اعطيها اختيارين او ثلاثة واخليها تختار منهم ونفس الشي شعرها .. جذي اهي تحس انها اختارت وانتي بنفس الوقت مشيتي كلامج ...انا جربت معاها والحمدالله اتفقنا جربي انتي وقولي لنا شنو يصير معاج