مشكلتي اطفالي والخدم

[al3asl]

مرحبا خواتي
اليوم بنفجر عدل
اولا مشكلتي اني طيبه وكل شي عندي عادي
عيال4 الله يحفظهم
بنتي الكبيره 6 سنين وهي الي مجننتني بطلعني من طوري
ماااا تستوعب وعناديه اجي بدرسها ما تجي ابدا الا اذا وعتها بطلعها
ولا اوديها بيت فلان وعلان
غير جذي تخرب وتحوس بس عادي هذا كل الجهال
ولدي الي تحتها يسمع الكلام بس يغلد ويتحرش بالي اصغر منه
المشكله مووو قاده اسيطر
وكله يسفهوني الا بتهديد
المشكله الاكبر خداماتي اثنين ومايصدقون ادخل لدري بعد الغدا
يرحون ينامون والجهال الي جايه من المدرسه والروضه البيت اذا هدو نامو
اليوم طلعت لهم وعصب لاتنامون الظهر شفو بيبي نام ( خل اشوف ينامون ولا لا )
زوجي بتسمع يقول ما يصلح تاهوشين انتي )
قبل جم يوم ضاق خلقي علي بس دخلت ساعه ارتاح عقب الدوام بداري الا ناموو الخدامات ومطفين اليتات الظهر
والجهال نامو ولا قامو الا بعد المغرب واقعد يالام بليل للوحده ويا الاجهال لين ينامون
واعلم زوجي عشان يكلمهم
وقلعم فلانه علانه لاتنامون الظهر عشان بيبي ما ينام وهذا الي قدر عليه
اليوم ردو ينامون وطلعت لهم وهاوشت من حرتي

 

[queen92]

والله مادري شقولج لاني مادري شنو المشكله اصلاً وبعدين خل ينامون الخدم اذا يقعدوتن من الصبح مع اليهال اكيد يتعبون وتقدرين تكلمينهم بالهداوه مو صراخ جذي بيعاندون اكثر

 

[الهما]

مادري احس المشكله عندج
لا تنامين بعد الداوام قعدي مع عيالج او انسدحي بالصاله وعيالج تحت عينج
انت تحاتين انهم ينامون و اذا نامو سهروج بالليل ..خافي من اشياء ثانيه شيسون بالوقت اللي انت فيه نايمه؟؟؟؟
الخدامة ولا همها مو ضناها
غيري نظامك
و بنتج اللي تسويه مو عادي ما تمشي الا بالتهديد غلط
دخلي سمعي طارق الحبيب و مصطفى ابو سعد
و بتعرفين شنو اقصد
و بالتوفيق حبيبتي

 

[banota_kuwaitya]

حبيبتي هدي أعصابج، الخدم بشر مثلي مثلج، واهم اهني يساعدونا، دورهم يساعدونا ما يقومون بواجبتنا، انتي تداومين الصبح وتردين تعبانة واهم نفس الشي يبتدي دوامهم الصبح معاج وقبلج ويخلص تالي الليل، من حقهم يرتاحون، انتي عشان ترتاحين سويلهم جدول يمشون عليه، عندج ماشاءالله ثنتين، مثلا قوليلهم وحدة فيكم ترتاح الساعه 2 والثانية تمسك اليهال، وبعدين العكس، وشاركيهم بوقتج في المجابل، ولا تعصبين عليهم في النهاية حرام اهم ابعاد عن أهلهم ويحسون بغربة ويكرفون ليل نهار، وتعليمهم أقل منج فصعب يفهمونج عدل، سوي جدول وصدقيني بتلاقين فرق، والله يسهل عليج

 

[((البرنسيسا))]

حبيبتي هدي أعصابج، الخدم بشر مثلي مثلج، واهم اهني يساعدونا، دورهم يساعدونا ما يقومون بواجبتنا، انتي تداومين الصبح وتردين تعبانة واهم نفس الشي يبتدي دوامهم الصبح معاج وقبلج ويخلص تالي الليل، من حقهم يرتاحون، انتي عشان ترتاحين سويلهم جدول يمشون عليه، عندج ماشاءالله ثنتين، مثلا قوليلهم وحدة فيكم ترتاح الساعه 2 والثانية تمسك اليهال، وبعدين العكس، وشاركيهم بوقتج في المجابل، ولا تعصبين عليهم في النهاية حرام اهم ابعاد عن أهلهم ويحسون بغربة ويكرفون ليل نهار، وتعليمهم أقل منج فصعب يفهمونج عدل، سوي جدول وصدقيني بتلاقين فرق، والله يسهل عليج

معاها بكل حرف :eh_s(15):

 

[al3asl]

الله يريح بالكم وشكرا لمرروكم
برنسيسا فعلا هذا الي صار قلت اذا انتي قعتي الظهر اليوم باجر هذي تقعد
انا بيتي شقه حتي داري ماينضفونها انا انظفها بروحي
بس انصحكم لحد يحط للخدم تلفزيون لان غلطتي هذي

 

[عـيّــآره]

شسالفه !!!​

 

[Shinexo]

بدآل مآتنآمين قعدي على بنتج آم 6 سنين آحسن لج ولغيرج , دآمهآ مب سآمعه كلآمج آنتي تسمع كلآم من ؟ تعآملي ويآهآ بآلحرمآن عشآن تمشي سيدآ مب هي تمشيج .. وآلخدم مو لآزم ينآمون آلظهر بس خلينآمون آلسآعه 10 ع آلآقل بآلليل .. مآتقدرين تآمرين آلخدم مآينآمون وتعطين نفسج آلرآحه آن آنتي تنآمين وغيرج لآء ترى هم يتعبون آكثر منج ومحتآجين هآلفتره آكثر منج آنتتي .. و لآء آليهآل مآيخربون في يهآل يسمعون آلكلآم و مآدبين حدهم بعد غيري شخصيتج عشآن بنتج تتعدل و ولدج و آلبيت كله

 

[ام القمرات]

حبيباتي اول شي اسمحولي حنا لما نجيب المساعدات نجيبهم عشان حنا نرتاح وهم يساعدونا بهالشي ,موعشان انا اكرف وهم يرتاحون ,بعدين حبيبتي صاحبة المشكله انا ماعرف بالنسبه لبيتك كيف هو كبير والشغل يستدعي مساعدتين والا بس للاطفال ,يعني البيت عالاقل بكون 2 من الاطفال موموجود الصبح اللي مدرسه واظن بيكون عندك روضه ,حق شنو مساعدتين؟؟؟؟؟ الشي الثاني بالنسبه لبنتك انتي عودتيها هذا الطبع وهذا خطا انا اعلمها انك اذا مابتدرسي انا بزعل عليك وبالتالي بتدخلين النار لانك زعلتي ماما وبهالطريقه تتعلم ان زعلك موشي عادي وحاولي تخاصمينها بس بلطف واذا لقيتيها اعتذرتلك او جات حبتك سامحيها .وحسسيها دايما بحبك وحنانك ولميها واحضنيها اذا سوت اللي تبينه المردود لازم معنوي بينك وبين بنتك مو مادي حتى لاتكبر البنت وتكون علاقاتها معاكم سطحيه وماديه . وبهالطريقه عاملي كل عيالك وهي يمكن تعاند اولها لكن لمن تشوف اخوها لما يطيع شلون تلمينه وتخلينه يحبك راح تغار وتحرص على هالشي صدقيني الطفل في داخله مايبي الا الامان واحضان امه والحنان ,وبالنسبه للمساعدتين اللي عندك لازم تقلصيهم يعني وحده تكفي لاتجاملي ولا تطلبي السمعه على حساب بيتك شوفي احسن وحده فيهم من ناحية الشغل والكرف وحنانها عالاطفال وخذيها بعدالاستخاره وارجعي الثانيه وبهالطريقه تكوني علمتيهم الثنتين الدرس وراح تخاف منك المساعدة اللي بتبقى وتسويلك حساب والامر الاخر قوليلها اذا نمت الظهر ترى بخصم عليك كل يوم بدينار بالمقابل عامليها باحترام وبحسن عشرة وانتبهي للساعات اللي تشتغل فيهم يعني اعذريني مومعقوله تصحيها الساعه 5 او6 الصبح وتبيها على وقفه وحده للساعه 12 بالليل !!!! لازم تخليها شوي ترتاح ومافي مانع اذا ماتقدرين تغيرين الساعات اللي تشتغل فيهم انك الظهر تنامون كلكم شوي لكن مثلا نامو الساعه 3 قوميهم الساعه 5او حدهم 6 وبهالطريقه الجميع ارتاح وما خربت نومتهم انا كذا اسوي مع عيالي ينامون بس ييجون من المدرسه الساعه 3 واصحيهم الساعه 6 وان ما قامو صراحه احاول ادغدغهم الاعبهم اشوقهم والا..... امسح وجهم بماي بس لاااااازم 6 يكونوا قاعدين واسم الله عليهم الساعه 11 ميتين نعس كل واحد يقضب جدار وينام ويقومون الساعه 6 الصبح,لازم تلاقيلك طريقه لتنظيم وقتك ونفس الوقت الدلال الزايد للمساعدة موزين يعني اذا المساعدة الثانيه مثلا تمسك عندك الطبخ حاولي تعطين هذه زياده عشرين دينار عشان تمسك الطبخ والثانيه رديها المكتب الا اذا البيت كبير والشغل مايخلص ماادري انتي ادرى بظرفك بس صراحه مساعداتك لازمهم شدنظمي وقت النومه مالتهم وهدديهم بالخصم بعد ماتكوني عطيتيهم 7 ساعات نوم باليوم وهذه كفايه لهم وان مااستجابو اخصمي عليهم ومرات تلاقين المساعدات اللي صارلهم وقت تعودوا هذا الطبع بالنسبه لي اذا صارلهم وقت ومارضوا ينصلحو اطلب ثانيه ولما تجي ارد هذولا للمكتب واعلم الجديده طبعي والله يوفقك حبيبتي

 

[ناتشوو]

انا اشوف المشكلة فيج
شخصيتج ضعييييفة
لا عيال ولا خدم
محترمين كلمتج

شالسالفة
اترجى البنت تدرس!!
والخدماقول لهم لا تنامون الظهر
ويحقروني!!!
لا مو لازم ينامون الظهر
ينامون مبچر
ويقعدون مبچر
حسب كل بيت ومتطلباته
مو لدرجة النوم للمغرب!!!
منو المعزبة ؟؟؟

وانت عيالج صغار
يعني ينامون مبچر بالليل
فالاحسن الخدم بعد ينامون مبچر

المشكلة فيج
والخدم مو مشكلة
بطو جبدي
وديتهم وجبت غيرهم
بس العيال
اشلون؟
مثل مو محتاجين لحناننا
محتاجين للحزم
ديري بالج ع عيالج

 

[مذهلة2013]

حبيبتي المفروض تقولين وتامرين على عيالج والخدم ماتخلين السالفه سايبه

ربي يوفقج

 

[تحت ظلك]

الله يعين ,,

 

[ريم العرب]

ولله الخدم هم يتعبون يعني شنوو ما ينامون استغفري ربك بس.. انتي ماجبتي الخدم الا لانك تعبتي من شغل البيت والعيال بس نظمي نفسك وكل شي يصير تمام !!!

 

[fatma A]

انزين مافيها شي يقعدون مع اليهال العصر وبعدين اذا الخدم ينامون العصر واليهال ينامون العصر متى ينامون الليل ما يصير انزين لا ينامون العصر وخليهم ينامون ساعه 7 العشا مره وحده لي اليوم الثاني ونومي عيالج امبجر هم وياهم

 

[Um Tuki]

يعني تبين انتي تردين من الدوام تنامين و الخدم و اليهال لا ؟؟

بالعقل .. !

بعدين خل ينامون ساعه وحدة الظهر بعدها يقومون

عشان نفسيتهم

و الخدم ينامون بغرفتهم

شكو يصكون الليتات

خل وحده منهم تنام والثانية اتم مع اليهال

بعدين العكس النايمة تقوم و اللي تمت مع اليهال تروح تاخذ قيلولة

مهما يكون هذيلا ااوادم

ويتعبون اكثر منج بشغل البيت و اليهال

 

[حبيبي مالكني]

انتي اسبوع واحد لا تنامين وقعدي لهم
خل يعرفون انج قد كلمتج
خلي لج شخصية على الخدم
لا تعطينهم ويه
والله زين يرقدون الظهر

 

[بنت الوفا]

انتى طول بالج مع عيالج اطفال هذولا ي

ام الخدام شكلهم مدلعتهم تقول لهم ويطنشونج شكو

الظهر لا ينامون بس ينامون بالليل مبجر

حاسه فيج والمفرضون يحسبون لج حساب خدمتين اذ شفتى مافيه فايده نقي الزينه و غير الثانيه وراح تتعدل وتخاف منج


وانتي طول بالج اهم شى صحتج

 

[انصاريه قمره]

ترا العيال مسؤوليتج مو مسؤوليه الخدامه انا عيالي اغط عنهم وقت الدوام اموت واحس الذنب لا وابوهم وقتها يكون معاهم بالبيت لانه دوامي عصر وكاني اقعد من الصبح يبدلون واجابلهم عالريوق لانه ما اضمن البومه اللي عندي اذا تريقهم ولا لاء وبعدها يلعبون وعالساعه وحده ونص يتغدون وينامون انا اروح اتسبح والبس واقعدهم قبل لا اروح الدوام واحرص عليها ما تنومهم كللللش دوامي من ال4 لي 8ونص _9 بليل وبعدها ارد البيت يتعشون شي خفيف يبدلون وينامون وانا اتسبح وانام والحمدالله اشبع نوم نايمه طول الليل واذا كنتي تعبانه سحبي كمبلج وانسدحي بصاله لا تغطين عن اليهال والله ما يندرا هالملاعين شيسوون بعيالنا ما اقول الا عسى ربي يحفظهم ويكفينا شر هالخدم اللي مجبورين نيييبهم ونتحمل غثاهم

 

[ReD&FoSHia]

معروف البيت اللي فيه يهال تحت ال 10 سنين .. خدمهم ماينامون الظهر يادوب بريك ساعة و نص اتسبح و اتريح جسمها شوي بعد غسال المواعين وبعدين اترد
وانتي ثنتين يعني وحدة اتجابل اليهال .. ووحدة اتسبح اتخلص تطلع اتجابل اليهال الثانية اتروح اتسبح
معروفة هالشغلة مافيها كلام .. وليش مايسمعون كلامج الخدم

 

[shak!shoka]

شوفي
حزت الي تروحين دوامج و اليهال بعد
يعني س 7 ونص البيت فاضي


يرتبون و ينظفون واهم 2 يعني بسوعه يخلص الشغل
ينامون لي الساعه 10


يقعدون يجابلون المطبخ او مثلا ترتيب الغرف


بحيث انج ترجعين تتغدين و تنامين والخدم مرتاحين

وعيالج ما ينامون ابدا العصر

الساعه 7 ونص بليل او 8
ينامون لي ثاني يوم و الخدم اذا ما عندهم شغل
غسيل ملابس او كوي


ينامون ع الساعه 10




وبجذي انتي الربحانه ترتاحين من ازعاج اليهال بليل
والخدم
كل الاطراف مرتاحه

يبيلج بس تنظمين وقتج و تكونين حازمه