مشكلة ولد خالتي وشلون نتعامل معاه؟؟ بليز ساعدوني

[بنت الشامية]

السلام عليكم و رحمة الله و بركاته

اول شي ولد خالتي كان مسوي حادث قبل اربع سنوات و تم عقب هالحادث بغيبوبة خمسة اشهر ...
بعد ما صحى من الغيبوبة اكتشنا ان ما يمشي و لا يتحرك ولا يتكلم وعقب مابدا يتكلم شوي شوي تفاجئ من خبر صحته , كلمناه مني مناك مو راضي يقتنع بأمر الله و ما يبقى احد ما كلمه بالموضوع آخرتها اقترح عليه ابوه ان يروح يعالج بالخارج و طبعا بعد معاناة اقنعناه ان يروح, قعد بره ما يقارب السنة و نص بين المانيا و بريطانيا و امريكا ...

و الحمدلله تشافى بما يقارب ال50% بس , رجع الكويت مع العلم ان بوقت الحادث اختبار النهائي للثانوية العامة و الحمدلله الله سبحانه و تعالى منعم عليه بالبال النظيف و الذكاء و كان تقديرة امتياز بس تدرون انتوا بالصبيان و ثقالة دمهم واهوا كل مايشوف احد يطالعه ويضحك عباله يضحك على حالته الصحيه .. الولد بعد الحادث وايد وايد تأزمت نفسيته و قام يتأثر بشكل مو طبيعي لدرجة ان يبجي على اي كلمة تنقال .. حتى اهله قام يفهمهم غلط و يقول ان اهما يعاملونه كمعاق لان عقب الحادث مشيتة مو عدله و كلامه مو مفهوم لان كان مأثر على احباله الصوتيه !!

فأنا الحين ابي اعرف شلون نتعامل معاه و احنا اهله؟؟
علما اني عرفت بالأخير ان يعالج عند دكتور نفسي بس مادري منو اهوا , يا ريت تساعدوني بأقرب وقت , الصراحة كنت وايد متردده من كتابة الموضوع ولو سمحتوا ابي وحده متخصصه عشان اكلمها بالخاص ماقدر اكتب كل شي اهني .. بس قلت خلاص الشي وصل حده و لازم نحل الموضوع و نساعده بإلي نقدر عليه .

 

[Ghreba eb derty]

الله يشافيه ويعافيه يارب


حبيبتي إهو حاشته صدمه نفسيه ..


أنا أقول أحسن حل الدكتور النفسي عشان يعالجه ودامج عرفتي إنه يراجع عند دكتور فخلاص لا تحاتين أن شاء الله بيتحسن حالته والدكتور ابخص بالمواضيع هذي


الله يخفف عليكم ويعينكم أن شاء الله

لا بأس طهور أن شاء الله

 

[ولااء]

الحمدالله على سلامته والحمدالله على كل حال اكيد يبيله وقت علشان يتقبل الوضع وبالذات انه صغير بالسن صعب يقتنع بسرعه ويكون حساس لما يقارن نفسه باللي من عمره لكن مفروض دايم تذكرونه بفضل الله وانه مطلوب منه يحمد ربه ليل نهار اللي طلع من الحادث وربي كتب له عمر يعني خل يشوف ان ربي كتب له عمر ثاني ليش ركز على ان مشيته صارت شوي صعبه ودام انه يعالج عند دكتور ان شاءالله راح يتجاوز هالفتره الصعبه والله يعين اهله عليه هالفتره لان تقولين صاير حساس بس مع الوقت كل شي راح يتعدل طبعا مع دعواتكم له عسى الله يحفظه ويحفظنا ياكريم

 

[مصرقعه رايقه]

حمدلله ع سلامته

صح كلام اختي ( ولااء)
بهالفتره بيكون واييد حسااس انتوا لا تحسسونه انه غير عن اللي بعمره لين يتجاوز هالفتره

 

[عادت ذكرياتي]

الحمدلله على كل حال ....


ذكروه بنعم الله وإن كل ابتلاء يصيب العبد فيه تكفير للذنوب وإن كل شي بإذن الله له علاج


اللهم اشفه شفاء لا يغادره سقما ...آمييييييييييين

 

[بنت الشامية]

مشكورين والله وماقصرتوا

 

[ثلج احمر]

يحتااج لطبيب نفسي و بيرجع مثل اول و احسن

 

[el.mlkaa]

يممكن نفسيته تعببانه من الي شافه بالحادث اهوآ يمكن يحس انكم تعطفون عليه وطالعونه بنظره الي يسمونها نظرة العططف على المعاق او شي ججذذي كلمووه طبيعي صدقيني بعدها بتتحسسن نفسيته انتو لاتظغطون عليه شوي مصدوم

 

[ماكواسم2]

اشوف احسن حل اذا يقدر يتزوج ووحده تحبه علشان يعدي هالازمه .

مو يقولون وراء كل رجل عظيم امراة

 

[تعبت اداري...~]

وعليكم السلام ورحمة الله وبركاته
الله يشافيه امين

​

 

[سيكلوجيه]

بنت الشاميه صدقيني اهو بحاجة حق الدعاااااا ( طبعا الهمزة ماتنكتب لا خربانه عندي فلح يستغرب هههه ) انا اشوف ان اهلج قايمين بالواجب وبالامور الي المفروض يسوونها، وبنفس الوقت الوضع الي يمر في الولد طبيعي ترا، بس الي ينقصه قوة الايمان وتقبل قضائه وقدره، ادعوله ادعوله وصدقيني راح تشوفون الفرق باذن الله، خلوه يروح المسجد، خل يقعد مع بعض المشايخ الثقة، وصدقيني لي صار في الرضا من داخله بقضائه وقدره بتنحل اموره.

 

[.Cute_mamy.]

الله يكون في عونه بس أختي ليش وين ربعه ليش مايطلعونه من هالحاله صدقيني شوفوا منو رفيجه الي حيييل معاه خليه يطلعه دايماً وخلوا يكون طبيعي معاه لا يحسسه انه اهو متعاطف وهم انتو حاولوا تكونون طبعيين ولا تعاملونه ع أنه مريض وأن شاءالله يتجاوز هالمرحله ويتقبل هالوضع

والله يشفيه يارب

​

 

[عويتقة]

لا اله الا الله ياااااااااااااااااااااااارب اشفيه وهدي باله وسره وفرح والديه بشفائه نفسيا وجسديا ياريت لو كان يقرا قرأن ويسغفر واايد ياريت تخلوه بهادي الفنرة يتقرب من رب العالمين هو وحده قادر يشفيه

 

[عسل حدي]

للرفع

 

[divaness Q8]

الله يشافي ان شاءالله حبيبتي انتي كلمي امه خليها تنصحه تقوله انت لازم يكون عندك ثقة اب نفسك لازم مو على أي شي تتأثر