مشاركة الفائزة الأولي بمسابقة منيو كويتيات الرمضاني

[<< أزيان >>]

(ارغب بالاشتراك بالمسابقة)

 

[<< أزيان >>]

رد: (طلب اشتراك في مسابقة منيو كويتيات الرمضاني)

السلام عليكم

حبيت اشارك معاكم بسفرتي الرمضانيه

وكان تجهيزها لأربع اشخاص انا وزوجي وعيالي 2 صغار

يعني الاكل كل طاح ابطني انا وزوجي لووووووول لأن بصراحه الكميه كبيره على شخصين

بس لزوم المشاركه والتصوير لازم ازيد الجيله

واللحين نبدي بالمينيو وبعدها صور السفره كامله بعدة لقطات

وهذي طاولة الشاي والحلويات

 

[<< أزيان >>]

رد: (طلب اشتراك في مسابقة منيو كويتيات الرمضاني)

واللحين نبتدي بالوصفات وبالخطوات المصوره


اولا السلطه

وكانت من ابتكاري


نبدأ بالمقادير

مكعبات بيديان مقلي + مكعبات او شرايح كوسا مشوحه عالنار + ملفوف احمر + خس + طماط + بقدونس + جرجير

عنب + فراوله + فلفل بارد بجميع الالوان

ملاحظه : الجرجير والطماط نيست اصورهم مع المقادير

مقادير الصلصه

2 روب + 3 ملاعق مايونيز + 2 ملعقه لبنه + قليل من الخل وزيت الزيتون والملح والثوم


حطيت بالبدايه البيديان

وبعده الملفوف

وبعده الفليفله وانتي كيفج ممكن تختارين اللون اللي تبينه

وبعدين قمت احط الخضار بالتدريج مايفرق اي ترتيب انتي تحبينه

وبالاخير حطيت مقادير الصلصه بالخلاط وضفت معاهم الفراول عشان تعطي طعم ولون

ترا لون الصلصه وردي بس ماني عارفه ليش مومبين بالصور لوووووووووول

صبيت الصلصه على السلطه وزينتها بالعنب

وهذا شكلها النهائي يمي يمي طلعت حدددددددددها لذيذه

 

[<< أزيان >>]

رد: (طلب اشتراك في مسابقة منيو كويتيات الرمضاني)

(( شوربة الجرجير ))

المقادير :

2 حبه بطاط + شدة جرجير + بصل وثوم + مكعب ماجي + 4 كوب من الماء

الطريقه :

نحمس البصل والثوم بقليل من الزيت

وبعدها نسكب الماء ونضيف عليه البطاط ونخليه يغلي لمدة 10 دقايق طبعا بالصوره كان البطاط مفيوج :dddds:

لأني قلت لخدامتي قصيلي مكعبات بطاط عشان افوحها راحت قصتها وفاحتها نسيت ان الخدم غلط تعطينهم

امرين بوقت واحد الميموري مالهم مايتحمل هالحجم خخخخخ

المهم عقب مايفوح البطاط 10 دقايق نسكب الجرجير عليه ونخليه يفوح 10 دقايق ثانيه وماننسى نحط مكعب الماجي

وبعد ماانتهت ال 20 دقيقه ناخذ الخليط كامل ونحطه بالخلاط نضربه ضربا مبرحا لحد مايصير مثل العصير

ونرجعه للجدر عشان يسخن وانتي ورغبتج اذا حابه تضيفين فلفل وملح وكمون او تخلينه وقت التقديم للي يبي

وهذا شكلها بعد التقديم زينتها بنجوم البف باستري المحمصه

(( الخبز المحمص ))

واهو تغميسه للشوربه او تمسحينه بذبده او زبدة الزيتون ويكون نوع من المقبلات


المقادير :

خبز صمون اي نوع انتي تفضلينه انا اخترت اللي بالسمسم + زيت او زبده حسب الرغبه

الطريقه :

انقطع الصمون مكعبات ونحطه بصينيه فيها زيت او زبده نقلب الصمون عشان يتشرب من الزيت

وندخله الفرن ونخليه يتحمر من كل النواحي

وهذا شكله النهائي يمي يمي ريحته تفتح النفس

 

[<< أزيان >>]

رد: (طلب اشتراك في مسابقة منيو كويتيات الرمضاني)

(( لفائف الكوسا ))


المقادير :

شرايح كوسا + جرجير + جبن كيري + اعواد خشبيه + صلصة الرانش

الطريقه :


نشوح الكوسا مع زيت زيتون وفلفل اسود على النار لحد ماتلين وتحسونها استوت ولكن من غير ماتتحمر

وتكون بهالشكل

ناخذ شريحه ونحشيها قطعه من جبن الكيري وورقه جرجير او اي نوع خضار تحبينه

نلفها ونسكرها عدل بعود خشبي

وبعدها نرشها بصلصة الرانش

وهذا شكلها النهائي

 

[<< أزيان >>]

رد: (طلب اشتراك في مسابقة منيو كويتيات الرمضاني)

(( الجاتوه المالح ))


المقادير :

توست + جزر مبشور + بقدونس مفروم + زعتر + سماغ + دجاج مسحب


مقادير الصلصه البيضه للتغطيه :

2 روب + 3 ملعقه لبنه + 3 ملعقه مايونيز

الطريقه


نقطع التوست دوائر او مربعات حسب الرغبه ونمسحه بالخلطه البيضه وبعدها نمسحه بالدجاج المسحب

الدجاج المسحب ماصورت تحضيراته لأن كان زايد من فطورنا امس وقلت استغله بطبخه

نكرر العمليه لحد مايصير عندنا 3 طبقات توست وبعدين نغطيه بالخلطه البيضه

ونغطي اطرافه مره بالبقدونس ومره بالجزر

وازين السطح بالزعتر والسماغ بستخدام الة تقطيع البسكوت والبيتي فور

وراح يكون عندنا هذا الشكل النهائي لذيذه ومفيده وتفتح نفس اليهال هالاكل

(( المجدره ))

المقادير :

نص كوب عدس اخضر+ 2 كوب برغل خشن + جوانج بصل مقلي + مكعب ماجي + كمون + ملعقه بهار

الطريقه :

نغسل العدس عدل وثم نغليه بماء فقط لحد مايستوس نص استوى

بعدها نضيف الملح وزيت وملعقة كمون وملعقة بهار ونسكب البرغل بعد ماغسلناه ونقعناه نص ساعه ومكعب الماجي

ونخلي الماي يغطي البرغل بشوي بس مثل ماتشوفون بالصوره نخليه يغلي على نار عاليه لحد ماينشف الماي

وبعدها نوطي على النار ونخليه لحد ماينشف الماي تماما

يسكب بصحن التقديم ويزين بجوانح البصل المقلي

وهذا الشكل النهائي

 

[<< أزيان >>]

رد: (طلب اشتراك في مسابقة منيو كويتيات الرمضاني)

(( الدجاج بالخردل ))


المقادير :

افخاذ دجاج + بصل + وفلفل اخضر + جزر + ذره + حبوب الخردل + بهارات مشكله + صلصة الصبار

صلصة الباربيكيو مع العسل + معجون طماط

[/IMG]
الطريقه :


نقلي افخاذ الدجاج مثل لحد مايصير لونه مثل ماشفتوه بالصوره السابقه

نضع زيت ونضيف له الخردل ثم نضيف البصل فورا

[/IMG]

[/IMG]
ثم نقوم بإضافة افخاذ الدجاج

[/IMG]
نضيف الفلفل الاخضر

[/IMG]
وبعدها نضيف البهارات المشكله وملعقتين من كل الصلصات والمعجون

[/IMG]
نضيف ربع كوب ماء وملح وبعدها نضيف الجزر والذره ونخليهم على نار هاديه لحد ما الطبخه تستوي

[/IMG]
وهذا الشكل النهائي

[/IMG]

 

[<< أزيان >>]

رد: (طلب اشتراك في مسابقة منيو كويتيات الرمضاني)

(( ششبرك ماركيه ))

طبعا هالاكله شاميه معروفه بس انا غيرت فيها عشان جذي سميتها بأسمي لوووووووووول

والتغيير كان بأن الاصليه تكون محشيه لحم فقط ولكن انا حشيتها مشروم فريش وداخل المشروم لحم


المقادير :

لحم مفروم معمول بالطريقه التقليديه +طحين اسمر + مشروم فريش + ثوم + روب + ماء

الطريقه :

نقوم بعمل العجين ناخذ كميه من الطحين انا اخذت كاس واحد فقط بعد ماننخل الطحين نقوم بإضافة الماء حسب حاجة الطحين

لحد ماتصير عندنا عجينه متماسكه مثل الفطاير والقبوط


افرد العجينه واقطعها دوائر بستخدام القطاعه او الكوب

احشيها قطعة مشروم مزال مابداخله واحشي بداخل المشروم اللحم المفروم

اسكر العجينه لتصبح عندي دوائر مثل ماشايفين بالصوره

اغلي 4 اكواب ماء وبعد مايغلي اسقط دوائر العجين حبه حبه عشان مايلزقون ابعض

بعده عشر دقايق اضيف 5 علب روب واخليه يغلي لحد مايستوي العجين على نار هاديه

وبعدها احمس شوية ثوم لحد ماتطلع ريحته واضيفه للخليط

وعند التقديم زينته بالنعناع الجاف والصنوبر المقلي


وهذا شكله النهائي

 

[<< أزيان >>]

رد: (طلب اشتراك في مسابقة منيو كويتيات الرمضاني)

سقط سهوا لوووووووووول

(( اللحم المفروم اللي حشيت في الششبرك ))

المقادير :

لحم مفروم + بصل + ثوم + كزبر مفروم + بهارات مشكله

الطريقه :

احمس البصل والثوم
وبعدها اضيف اللحم واحرك لما يشرب مايه

بعدها اضيف البهار وشوية ماي

 

[<< أزيان >>]

رد: (طلب اشتراك في مسابقة منيو كويتيات الرمضاني)

(( التشريبه ))


المقادير :

لحم + خضار حسب الرغبه انا حطيت ( بطاط وقرع وجزر وباميا ) بصل وثوم + كزبر مفروم

بهارات مشكله + عصير طماط فريش + فلفل اخضر بارد او حار + معجون طماط + ماء + خبز رقاق

الطريقه :

نحمس البصل ثم الثوم وبعدها نضيف لهم اللحم ونحرك لحد مااللحم يشرب مايه وينشف تماما

اضيف الفلفل والكزبر والبهار وعصير الطماط والمعجون واقلب لحد ما اللحم يتشبعهم

بعدها اضيف له ماي مغلي واخليه يطبخ لحد مااللحم يستوي نص استوى

بعدها اضيف الملح والخضار بالتدريج اول على حسب منو ياخذ وقت اكثر بالاستوى الجزر يطول عشان جذي حطيته اول شي وبعد 10 دقايق ضفت البطاط وبعدها الباميه والقرع

بعد مااستوى المرق حطيت خبز رقاق بصحن التقديم وصبيت فوقه المرق بدون خضار لحد ماتأكدت ان الخبز

كله اتشرب من المرق بالكامل عقب حطيت عالوجه اللحم والخضار

وهذا الشكل النهائي

 

[<< أزيان >>]

رد: (طلب اشتراك في مسابقة منيو كويتيات الرمضاني)

(( حلو من ابتكاري ))


المقادير :

3 علب قيمر + 2 ظرف دريم ويب + 2 علبه كريم كراميل + بف باستري

الطريقه :

فردت البف باستري وحمصته بالفرن

جهزت الكريمه بخلط كل من القيمر والكريمه والكراميل بخلاط الكيك

اول طبقه حطيت كريمه


وبعدها افتفت البف باستري عدل وارش على الطبقه كامله ومااكثر واصب عليها من صوص الكراميل

اكرر العمليه لحد ماينترس الصحن واكون حاطه بالاطراف شرايح فراوله واذا حبيتو تحطون بالنص

مثل ماانا سويت

بعد ماكمل عندي الطبق دخلته الثلاجه يبرد

واللحين صار وقت التزيين حمرت سكر عالنار لحد ماصار كراميل اخذته وصبيته بصينيه على اي شكل ابيه

انا رشيته عشوائي وبعد مابرد كسرته وزينت في الحلو وكنت مجهزه بف باستري على قلوب حب قطعتهم بالقطاعه

وكان هذا الشكل النهائي والطعم خيال نفس حلويات الفنادق يمي يمي

 

[<< أزيان >>]

رد: (طلب اشتراك في مسابقة منيو كويتيات الرمضاني)

(( اللقيمات ))

المقادير :

1 كوب طحين ابيض + 4 ملاعق نشا + 1 ملعقه خميره + علبة روب + ربع كوب ماء واذا احتاجت ممكن تزيدونه

هيل وزعفران + شيره للتحليه

الطريقه :

تخلط جميع المقادير

ثم تخلط باليد او باستخدام ملعقه تغطى جيدا وتترك حتى تتخمر لمدة ساعه

وهذا شكلها بعد ماتخمرت شوفو شلون تضاعف حجمها وكلها مسامات اتينن

اصبها بستخدام الملعقه واقوم بتحريكها باستمرار على نار متوسطه

وبعد مايصير لونها ذهبي اشيلها من الزيت واحطها مباشره بالشيره

وهذا شكلها النهائي قبل مااوزعها بصحون التقديم وعلى فكره هذا تقريبا المقدار كله انا متعمده اختار طريقه مقدارها صغير

لأني مثل ماقلت لكم عايله صغيرونه

(( الخشاف ))

من الاطباق المشهوره في مصر برمضان ويحتوي على قدر كبير من الالياف والفيتامينات المفيده


المقادير :

قمردين + مشمش مجفف + تين مجفف + قراصيه مجففه +ماء + ملعقة سكر اختياري حسب الرغبه

الطريقه :

ينقع القمردين بماء اللي يغطيه فقط ليله كامله وتنقع الفواكه المجففه على حدى ليله كامله

بعد ان يذوب القمردين يخلط بخلاط العصير مع اضافة ملعقة سكر

وبعدها تصفى الفواكه المنقوعه من الماء تماما وتضاف في عصير القمر دين

وهذا شكلها وقت التقديم لذيذ ومفيد وحلو تاكلونه على السحور يشبع ومايخليكم تحسون بالجوع لفترات طويله

وهذي صورة المشروبات البارده وكانوا نوعين

عصير رمان وعصير ليمون

واللحين بعد ماانتهيت ولله الحمد اقولكم على التعب والصعوبات والظروف اللي صارت لي

ماتوقعت اني اقدر اكمل بالمشاركه لدرجة اني ماصورت سفرتي الا اخر ايام رمضان

لكن الحمدلله اني عشت هالتجربه واتمنى تعبي مايضيع واني افوز :ggdw:

 

[منوووووله]

رد: (طلب اشتراك في مسابقة منيو كويتيات الرمضاني)

الف الف مبروووووووووك ياقلبي


وماشاءالله عليج 100% عالاكلات يوعتيني هههههههههههه

 

[ABEER FLOWER]

رد: (طلب اشتراك في مسابقة منيو كويتيات الرمضاني)

ما شاء الله تبارك الله

سفرة عااااااااامرة دووووووووم يارب
كل طبق أحلى من الثاااااااني
شهادتي فيج مجرووووحة يا قلبي
ألف ألف مبرووووووووك لج​

 

[@ام ضاري@]

رد: (طلب اشتراك في مسابقة منيو كويتيات الرمضاني)

الف مبروووووووك ابدااااااااااع فعلن تستاهلين ماركيه

مشاءلله تبارك الرحمن تسلم ايدينج على الاطبااق السنعه سفره عاامره ياقلبي

 

[عروس الدنيا]

رد: (طلب اشتراك في مسابقة منيو كويتيات الرمضاني)

ماركيه ... اول شي الف مبروك ... ثاني شي و الله لو مو انتي الاولى جان زعلت انا .... صج صج صج صج موضوعج متعوب عليه
و مبين انج تعبتي علييه و خذا من وقتج ... يعطيج الف عافيه ... و هذي هديه بالدنيا و هديتج بالاخره انشالله على اهتمامج بزوجج و عيالج الله يخليهم لج يا رب و يفرح قلبج دوم ... تستاهليين الخير كله

 

[نور قلبة]

رد: (طلب اشتراك في مسابقة منيو كويتيات الرمضاني)

مبروووك الف مبروك
اطباق رووعه وتقديم اروع

 

[ايمانو حلوة]

رد: (طلب اشتراك في مسابقة منيو كويتيات الرمضاني)

الف مبرووووووووووووووك

تستاهلين كل خييير حياتي

وصفاات وااااو والتصوير اينن تبار ك الرحمن

موفقة ياقلبي وانشالله منها للاحسن

شوقتوني جان زين انا اشتركت

ماعليه نكست تايم

 

[أم ريوف 1400]

رد: (طلب اشتراك في مسابقة منيو كويتيات الرمضاني)

ألف مبرووووووووووووك يااااااااااا عسولة

بالفعل ارووووووووع منيو وبصرااااااااااحة مرجع لكل مبتدئة بالاكل


عاااااااشت لنا مااااااااركية أي والله رفعتى رااس الديواااانية ياقلبي

:33_1185028183::q8::33_1185028183:

 

[Stylista_Q8]

رد: (طلب اشتراك في مسابقة منيو كويتيات الرمضاني)

مشالله صج روووووووووووعه

عزميـناا عاد على يووم ناكل من سفرتج الحلووة << لوول اتغشمر

وعساها سفره عاامرة ان شالله والف مبرووك الفوووز حبيبتي صج صج تستااااااهلين :*