مسلسل الرعب : الدائره " اقل من 18 ممنوع "

[دلع العتبان]

استغرب من جدتي فضه دايما ساكته ودايما حزينه جدتي فضه من اهل الله فقيره مير صوتها مانسمعه غير يوم تخلص من الصلاه وتقعد تدعي وترفع ايدها

جدتي فضه ماعندها ايد ايدها مقطوعه ويوم اسال امي : يمه ليش جدتي فضه ماعندها ايد مثلنا

كانت ترد امي :

ياامج من ولدت اهي جذي ؟

وتروح وتخليني امي وانا واقروني افكر وانا توني صغيره واقول شمعنى جده فضه ماعندها ايد من دون هالناس ؟

العب بحوش البيت انا واختي وتطلع جده فضه من دارها واهي ماسكه عصاها ومحودبه واخلي اللعب واقعد اناظرها واقول : يويلي جده فضه مسكينه ماضاقت الاكل دوم عشانها ماعندها ايدين !


كبرت وكبر سؤالي المتكرر معاي الي الزمن يكبره لي ويخليه يدور ببالي

" جده فضه ليش ماعندها يد غير وحده مسكينه ؟"


وماتت جده فضه وانا لحد الحين ماعرفت ليش ماعندها يد يوم بيوم من الايام يوم تزوجت وجبت عيال وانا ازور امي العجوز واقعد اتقهوى معها واقول :

- يمه بسالج مير احلفج بالله الا تردين علي تراني كبرت وصار عندي عيال ؟

- امي : وشو يمج قولي ؟

- يمه جده فضه الله يرحمها ليش ماعندها يد ؟

سكتت امي ونزلت راسها : وراج قلنالج ياخزنه جدتج انولدت مالها يد ؟

- يمه قوليلي الصج تراني صرت حرمه واعرف اميز ؟

سكتت امي وقالت :

يمج سالفتن طويله والله اني مااحب اذكرها بس بقولج مير افتك من حنتك وبربرتك


جدتج فضه دارت عليها الدنيا وسرقت من ذهب حماتها والكل عباله سرقت وحكم الشيخ عليها بقص يدها ومن يومها جدتج فضه سكوتيه ومنزله راسها موطيته ويوم نقولها قولي الصج ياعمه انتي صج سرقتي ذهب حماتج كانت تسكت وبيوم من الايام القاها تدعي وتقول

" ياربي ادري انك عاقبتني بالظلم الي صارلي "

ويوم واجهتها واصريت تقولي قالتلي " يوم كنت صغيره بسن الطيش سرقت واتهموا اختي عمشه ظلم وزور وقطعوا يدها ودارت علي الدنيا واتهموني زور "

انتهت القصه ،،


................................................................

"دقه بدقه لو زدت لزادت السقه "​

تذكري : لو بيوم غازلتي وتعرفتي وسويتي وشفتي وعلاقات ووو وقلتي يالله بتزوج ونسيتي هالامور والله سلط عليج زوجج يطقج او يغازل او مطلع عينج هذا موظلم هاذي الدائره ردت عليج ​

،،،،،،،​

تذكري : بيوم من الايام لو ظلمتي احد بشغلج وسويتي له وسويتي وغربلتي حياته وبالاخير فنشتيه ونسيتي وجا اللي اكبر منج وظلمج واتهمج بالغش والاحتيال وبالاخير فنشج ظلم هذا مو ظلم هاذي الدائره درت عليج ​

،،،،،،،،​

تذكري : بيوم من الايام لو نفرتي بوجهه امج وتامرج وتنصحج تنافخين بوجهها وتدعين عليها وتقولين ليتني يتيمه وولا عندي ام واكبرالعقوق تسوينه معاها وجا يوم من الايام وجبتي عيال وعيالج قطوج قطه الجلب ظلم هذا موظلم هاذي الدائره ردت عليج ​

،،،،،،​

تذكري : بيوم من الايام لو حسدتي وحده وقلتي موكفو اصلا تحصل على هالشي وشلون صارلها هالخير ووماشيه حسد عليها يوم المره تغربلت، وعشتي حياتج وجا يوم من الايام ولدج او بنتج ينسحرون او ينضربون عين ظلم هذا موظلم هاذي الدائره ردت عليج ​

،،،،،،،،،،،،،​

تذكري : لو بيوم من الايام طقيتي الخدامه ونقصتي عليها بالاكل والنوم وغربلتي عيشتها يوم جت عندج وسفرتيها وجا يوم من الايام وجتج خدامه تخونج مع ريلج او تحط شي لعيالج ظلم هذا مو ظلم هاذي الدائره ردت عليج ​

تذكري وتذكري انه الدائره ترد وماكو احد مظلوم بدنيا ​

وماكو احد انقرد وصار فيه الي صار الا لان الدائره ردت عليه ​

وان اي واحد استمتع بظلم او حرام ​

الدائره راح ترد عليه ​

وان اي احد يتمصخر او يتشمت باحد ​

مصير الدائره ترد عليه ​

لكل واحد مننا دائره وماكو احد انظلم ​

ماكو احد انظلم ولله ابتلاه الا الانبياء والصالحين ​

وانتي الله رد عليج الدائره عشان يخفف ذنوبج ​

مو لانه ظلم لانه كما تدين تدان ​

وبما تعمل تجازى ​

وبم تفعل لغيرك يصير لك مهما كان فعل خير او فعل شر ​

والدائره تدور .... تدور ..............تدور​

تدور ​

تدور وماتوقف​

،،،​

،،،،​

 

[مس تسذآ]

يعطييج العافيه عالموضوع بس شدتني هالعباره

تذكري وتذكري انه الدائره ترد وماكو احد مظلوم بدنيا ​

^^^^^^^

اعتقد في ناس وايد مظلومين بدون اي ذنب سووه و حتى ما بدت دائرتهم عشان تدور

الدنيا فيها الظالم و فيها المظلوم ,,


و الظالم اهو اللي بتدور عليه الدائره

اما المظلوم اللي انظلم فهو ماغلط لكن امر الله

,,

مشكووره و يعطيج العافيه و عنوانج يشوق صراحه .

 

[وردة-الكويت]

ياليت الناس تعتبر وتعرف ان الدنيا سلف ودين وتدور الدوائر وياما وياما شفنا قصص وعير بس الناس بعضهم يطغون

في وحده اعرفها حماتها وام زوجها يقولون حق زوجها طلقها طلقها خل جلدها يخيس عند اهلها وفعلا البنت تطلقت

وسبحان الله حماتها الكبيره الي تقول خل جلدها يخيس تطلقت وهم حموتها ال 2 الصغار تزوجو وتطلقو مع بعض

والبنت الحمدالله تزوجت وتسترت ومرتاحه الله سبحانه مايرضى بلظلم

 

[جلكسيه اس 3]

حلو. الموضوع


صح كلامج هذي دائره تدور

شوفي انا
طليقي وامه ما انصفوني
بس ماقدر اقول غير حسبي الله و نعم الوكيل
و ان شاء الله اشوف الدائره اتدور عليه

 

[بنوتة كول]

والله في وحدة وصل عمرها 80 او 90
وظلمت ظلم مو طبيعي
كللللللللللللل انواع الظلم سوته
وما اشوف الدائرة ردت عليها بالعكس اشوف الكل يتكسر علشانها وعلشان رضاها
والدائرة ردت علينا واحنا مظلومين والله الشاهد بهالشي
ودايما اقول متى الله ياخذ لنا حقنا منها وعمرها قرب يخلص؟؟؟
والسؤال متكرر من سنييييييييييييييين... بس املي بالله كبير
اللهم اجرنا في مصيبتنا واخلف لنا خيرا منها يا رب

 

[miss_whitemocha]

الدنيا تدور على الظالم يا حبيبتي.. ومو كل مظلوم كان ظالم.. يعني انا لما كان عمري 5 سنين انظلمت ظلم ما يعلم فيه إلا ربج من زوج أمي..هل معناها إني ظلمت من قبل؟؟؟
انا كثر ما شفت ظلم بحياتي دايم أقول الله بيعوضني بشي كبييييييييير ما كنت أحلم فيه..وإنشالله يكون اللي في بطني هو عوض ربي لي..​

 

[Tom ♥ Jerry]

,

اي والله معآج حق الدنيا دوآره
و كل الي يسويه بني آدم بحياته رآح يشوفه على عياله :*
و رآح يقول صج انا سويت هالشي :/ !
سبحآن الله يا ليت كل الناس تعرف هالشي و تتعض ,،

يزآج الله خير :*

 

[تحت ظلك]

طرح رائع
وسبحان الله احيان نحس ان الي ظلمنا ماعاقبه الله بس تلقين نفسيته مو زينه وفعذاب ولو مو بالدنيا بالآخره

 

[NEW WOMEN]

ربي اغفر وارحم شقوتاً بلغت مداها انك انت البر الرحيم
موضوعج ينن ماكان ودي ارد عشان الف اللي وصلتها بس موضوعج خورافي تسلمين غلاي

ربي يجعلج مع السيده مريم عليه السلام والسيده عائشه والسيده خديجه وفاطمه رضي الله عنهما

 

[مُخملْ]

هلا عزيزتي ،

فعلا الحياة ماشية ، وآلدائرة تدور ،
ومَرَد اللي ظلم ينظلم من اللي اكبر عنه
بس استوقفتني هالجملة :تذكري وتذكري انه الدائره ترد وماكو احد مظلوم بدنيا
في المظلوم في هالدنيآ ، آللي راح حقه ، ولاتبَلّى عليه احد ، ولاطعنه اقرب الناس له !
مثل مآفيه ظآلمْ فيه مظلوم ، ومثل ماالظآلمْ يظلم بتدور هالدنيآ ويصبح مظلوم ْ
لكن مآبآلج باللي ماله فالظلمْ وينظلمْ ؟
حبيبتي هذي آلحيآة ، مثل مافيه ظآلم فيه مظلومْ ، مبْ دآيماً آلظلم يكون دآير ، آنآ آنظلمتْ لآني ظلمت
قبل لآ ، ممكنْ الف سبب وسبب حد يظلمني فيه بدون حق، مب شرطْ !

،
يعطيج العافية (f)
ومآفهمت سبب ان الموضوع ممنوع على اقل من 18 ،
آحسه عآم وآلكلْ ممكنْ يستفيد ، ويتفآدى غلطآت وآيد ممكن تصير له.

مشكوورة وآيد ع اللي كتبتيه =)

 

[مكسورة الخاطر]

طريقة سردج للموضوع روعة
يعطيج الف عافية

 

[أم توتو]

يعطيج العافيه دلع مواضيعج دايما مميزة فعلا انا شفت من اللي تشمت فيني وتكلم علي الحمد الله دارت الدايرة عليهم كلهم وحده وحده الله يسامحهم

 

[lulwa-q8]

خوش حجي

و طرحج رائع

و يعطيج العافيه

 

[امل وكلي آمآل]

بالانتظار----بالانتظار
ابي اشوف بعيني الي ظلمني وانا بزر وخلاني مثل الشغاله
عجزت اسامحه - عجزت احلله- والله عجزت-
ابيه ينذل مثل ماذلنا يارب,

 

[✿ячǿőƒ✿]

ياليييييت النااس تفهم هالحجي والله بعضهم لا حياة لمن تنادي بس الله يستر علينا ويهدينا يارب

وماقصرتي ع هالموضوع وعلى هالقصه ويعطيج الف عافيه
​

 

[أم فـرح الحلوه]

تذكري وتذكري انه الدائره ترد وماكو احد مظلوم بدنيا ​

^^^^^^^

اعتقد في ناس وايد مظلومين بدون اي ذنب سووه و حتى ما بدت دائرتهم عشان تدور

الدنيا فيها الظالم و فيها المظلوم ,,


و الظالم اهو اللي بتدور عليه الدائره

اما المظلوم اللي انظلم فهو ماغلط لكن امر الله

,,

مشكووره و يعطيج العافيه و عنوانج يشوق صراحه .
[/quote]

معاها 100%​

 

[الجوري511]

مشكوورة ويعطيج العافيه

​

 

[(كويتيه عسل)]

ذكرتيني باللي ظلموني حسبي الله ونعم الوكيل على كل اللي ظلموني ماني محللتهم لي يوم الدين

 

[khawla&tito]

رووووووووووووووووووووووووعه يادلع

 

[غناتي و حياتي]

سبحان الله وبحمده سبحان الله العظيم
استغفر الله .. استغفر الله .. استغفرالله