مساج التخسيس بsuger fiteness

[الجازي2000]

السلام عليكم شلونكم خواتي كل عام وأنتم بخير ومبارك عليكم الشهر
خواتي الحلوين بغيت آخذ رايكم بشغلة شرايكم بمساج التخسيس هل فعلا يخسس مع الرياضة ولا اهوا ضياع فلوس على الفاضي
بيني وبينكم انا تحمست له اكثر شي من خلال الانستغرام ومن خلال متابعتي لحساب suger fiteness وتحمست أكثر من خلال البوستات اللي يحطونها لكن انصدمت من السعر طلبت كورس مساج تخسيس 10 جلسات بعد الخصم ب300 دينار صراحة انا اشوف المبلغ حيل اووفر وخلاني اتردد عدة أسباب
أولا أنا مو عارفة هل مساج التخسيس يضعف صج ولا جذبة يبوقون فيها فلوسنا :bbbiu:
ثانيا الحجز بعد مدة طويلة والمندوب ياخذ نص المبلغ قبل الحجز بشهر ونص :bbbiu:
ثلاثا خدمتهم منزليا وصراحة مالهم مقر والواحد يخاف يطلعون نصابين بعدين شلون ارد فلوسي لا سمح الله
رابعا اختي مشتركة بنادي بيلاتس اند موور وقالتلي عندهم مساج تخسيس بس مو مجربته
فاللي ابيه منكم خواتي اللي مجربة مساج التخسيس عند شوقر فتنس أو بيلاتس اند موور تكتب تجربتها وتنصحني ولها مني كل الشكر والتقدير

 

[الجازي2000]

بليز حبيباتي ساعدوني
ويارب الكل ان شاء الله يصير جسمه رشيق وسمبتيك

 

[الجازي2000]

الله يسامحكم بنات بس تطلون وما تردون بليز الله يخليكم اللي مجربة عندهم ابي منها النصيحة اشترك معاهم ولا مع بيلاتس أند مور

 

[M!SS.LOBY]

اب اب اب

 

[أميرة-]

وييه من صجج ماعندهم مكتب ولا شي ويبون نص المبلغ .. 150 مو شوية


اقولج شي قبل الرمضان انتشر برودكاست عن مكتب خدم يوفر طباخات بس بالرمضان وسعرها 250 دينار والمندوب يجيج لي البيت يسوي العقد وياخذ فلوس .. يوم وصلنا البيت ووقعدنا العقد عطانا فاتورة انهم مكتبهم بالعقيلة بمجمع مادري شسمه مجمع كبير .. طلعوا نصابين وراحت فلوسنا علينا ويوم رحنا طلع مالهم مكتب ولا شي وفلوسنا رااااحت

لا تدفعين نص المبلغ اذا ماعندهم مكتب حتى لو عطوج فاتورة وعقد ..

 

[الجازي2000]

مشكوووورة اختي أميييرة ما قصرتي انتي ومس ليبو
رفع الله قدركم
الله يسامح باجي البنات 170 مشاهدة وبس ثنتين اللي ردوا
عاد والله بوستاتهم تشجع وبعض اابنات بالانستغرام بحسابهم مطيرينهم بس على قولتج بمشي بنصيحتج وبهون عنهم والله هذا شوور خواتي علي لان المبلع موو هين

 

[حنانو 89]

والله ما ادري بس اكيييد لو ماعندهم مكان ثابت هذا يخلي الواحد يشك وبعدين لو الكل مطيرهم ومجربهم وياخذون بعد نص الفلوس ليش مو مبطلين مركز او مكتب ليش ماني فاهممه احس لا لاتسوين احسن

 

[cup-cacke]

اييييييييييي هم انا اتابعهم بالانستقرام وكنت مفكره ادق اسال

بس صراحه وايد 300 على 10 جلسات..يعني ما اتوقع ان الجسم كله كله راح يشد ويوصل للشكل اللي انا ابيه بهال10 جلسات

 

[д7βk βşķάť]

اب اب

 

[M!SS.LOBY]

الله يعينج

 

[M!SS.LOBY]

الله يكتب لج اللي فيه خيررررر

 

[الجازي2000]

مشكووورين خواتي كلكم الللي رديتوا وعسى ربي يحقق كل أمانيكم
ما قصرتوا صراحة وانا خلاص كنسلت موضوع شوقر فتنس لان صراحة مثل ما قلتوا المبلغ مو شوية وصراحة بالانستغرام سالتها عن مكانهم عشان امر اشوف وسالتها اذا يصير اجرب اول جلسة وبعدين احطيهم فلوسهم
جان تعطينا بلوووك
فقلت الظاهر خيرة اني ما اشترك معاهم
انزين خواتي شرايكم بمساج نادي بيلاتس اند موور او اي مساج تخسيس بالمنطقة العاشرة

ومشكووورين ما قصرتوا فديييبتكم

 

[Pink_Roses]

احد جربهم والا لا ؟؟؟؟ دقيت قالتلي 10 جلسات مساج و10 جلسات رياضة ب 500 دينار

وايد غالي الصراحة اشترك بنادي حق سنة ما يطلع هالمبلغ

وبعدين اللي عندها من الصور جم سيلانية وجم فليبينية وما كو مواعيد لا حق شهر 9 ولا 10 كله فل


واشوف وايد كومنت من الناس يمدحونهم ما ادري صج والا اهي تسوي دعاية حق نفسها

ياليت اذا احد مجربهم يقول لنا

 

[نوف الصقعبي]

تبين نصيحتي ليش هالعيز؟!

عيزانه تمشين كل يوم ساعه !!!
عيزانه تكثرين من شرب الماي كل يوم بطلين ماي كبار هذا اقل شي مع المشي
عيزانه تستغنين عن وجبة العشا وتبدلينه بصحن سلطه او علبة روب خالي الدسم
عيزانه الصبح اول ماتقعدين من النوم تشربين عصير برتقال طازج فرش انتى تعصرينه بالبيت مو شغل مطاعم
عيزانه تشوفين نفسج مثل باجي البنات الحلوين واللي اجسامهم تخلي الواحد يستخف

لا اقط 300 ولا 500

بإرادتي إن شاء الله بكون حلوه ورشيقه​

 

[Mrs_Efron]

لا لهم مقر بالصالحيه كاتبين بالانستقرا م!

 

[زوزووا]

ادري وايد متاخرة بالرد بس اتمنى الي تدور معلومات عن شوقر قتنس
وحابة تشترك معاهم، نصيحة عن تجربة والله شاهد على كلامي
نصابين، اشتركت ودفعت عربون وماقامو يردون علي
وقبل موعدي معاهم دزيت مسج قلتلهم ردو عربوني اذا بدايتكم جذي ماكو اهتمام
وبلشت اول جلسةغلط كنت طالبة رياضة ويولي مساج والموعد الي بعده عدلو غلطتهم اخذت بالضبط 4 جلسات من اصل 12 بالخناق طبعا ، وكل جلسة باسبوع يعني مااستفدت شي، وكل يوم اتخانق معاهم ومابردون علي الا اذا دقيت من خط غير خطي! مااطول عليكم وايد تعبت معاهم نفسيا وكله يقولولي راح يدق عليج المسؤول ومحد دق ليمن هددت بالمباحث الالكترونية دق مسؤولهم نفس اليوم، شهر كامل نكلم صاحب الشركة وعايلته من العوائل المعروفة بالكويت، وكان يماطل وايد والحمدلله رديت فلوسي بمساعدة زوجي عقب شهر بالضبط
يقولون مكتبهم بالصالحية والصج ان مكتبهم عبارة عن شقة بدون اسم باحد عمارات شارع بن خلدون
الحذر يابنات مو كل شي تشوفونه بالانستقرام تتحمسون حقه وتصدقونه ترا كله نصب بنصب

(والله على مااقوله شهيد)

 

[اميره بكلمتي]

انا اقوول رايي بصراحه دشي نادي ويكون معاه مساج تخسيس افضلج الاثنين ويا بعض وتخففين اكل وتكثرين ماي بغضون مده تصيرين سمبتيك

 

[ورود الجوري]

انا اشتركت معاهم دفعت 400 دينار و الله والله ما تغير شبر بجسمي و خرابيط تجي مالت المساج مو عارفه شنو اشتراكج و خرابييط

 

[جنة الورد]

تبين نصيحتي ليش هالعيز؟!

عيزانه تمشين كل يوم ساعه !!!
عيزانه تكثرين من شرب الماي كل يوم بطلين ماي كبار هذا اقل شي مع المشي
عيزانه تستغنين عن وجبة العشا وتبدلينه بصحن سلطه او علبة روب خالي الدسم
عيزانه الصبح اول ماتقعدين من النوم تشربين عصير برتقال طازج فرش انتى تعصرينه بالبيت مو شغل مطاعم
عيزانه تشوفين نفسج مثل باجي البنات الحلوين واللي اجسامهم تخلي الواحد يستخف

لا اقط 300 ولا 500

بإرادتي إن شاء الله بكون حلوه ورشيقه​

صح لسانك اختى والله انك صادقه

 

[دلال كووول]

مشكوره الله يعطيج العافيه