مدري خبله ولادعله؟؟!!

[الا يامطول صبري]

السلام عليكم
خواتي امس رحت لبيت هلي ابسلم علا اخواني حجاج مع اني انا الكبيره
اول ماناديتهم قالوا لي اشعندج جايه قلت ابسلم عليكم ؟! قال الثاني كان جاي من شقته قال اشعندج قلت ابسلم عليكم اشفيكم؟؟؟؟
قال اي الله يسلمج بكل برووووود. والله ماكلفوا نفسهم يسلمون علي وراحوا شققهم
والله يابنات برد وجهي ومت حره
اقسم بالله ماعمري ضايقتهم بس ولا حريمهم وانا الوحيده البنت بينهم
والله اني ماقصر معاهم قمت بعرسهم من فلوس وديون وغيره وعيالهم كل صبح امرهم لانهم معاي بالمدرسه واردهم مع عيالي !!ولما نزلوا حريم اخواني والله شوووي ويبوسون روس الحريم من الفرحه!!!

والله يابنات رجعت بيتي وانا منهاره ليش انا جذيه؟؟
حسيت اني خبله ودعله وقطه وجهه
الله يسامحهم حجاج وجذيه !؟!

ابي اشلون اتصرف مع مواقف جذيه لما اقط نفسي على ناس مايبوني وانا ابيهم؟؟

 

[є 3 τ и α q]

يَ حياتي عادي لآ تتضايقين
واحتسبي الاجر ب اللي سويتيه لله

بَ العكس ..
اللي سويتيه يدل على محبتك لهم
و اهتمامك فيهم ..


الله يعطيك على نيتك ..
ويحفظك

 

[الا يامطول صبري]

جزاج الله خير عالرد
لكن تحسين نفسج صغييييييييير

 

[أميرة الحور]

أي شي يضايقج ادعي ربج
شتسوين بعد؟؟؟

اذا هم مومقدرين الأخوة إنتي سويتي اللي عليج
وربي مغنيج عنهم الحمدلله ..انتي بس واصليهم واستمري جذي وعملج لوجه الله وأجرج عند ربج
موعلشان ربي حطهم اخوان لازم يكون فيهم اخوة ممكن يكونون ألد الخصام
وهم فتنة لج ... بس استمري على الدعاء اما ربي يصلحهم ولا امرهم لله المهم انتي بغنى عنهم

 

[shak!shoka]

الله يهديهم

انتي ما قصرتي و سويتي الي عليج و زود

الله يردهم لج بالسلامه بس خلج رسميه و حسسيهم انج خذيتي بخاطرج منهم
انتي اختهم الكبيره ما يصير هالتعامل الجاف وانتي وحيده بينهم


الله الهادي

 

[شباصـه فرنسيــه]

شئ يقهر
المهم انتي سويتي اللي عليك ولك الاجر ان شاء الله

 

[قــل مـا تـشـاء]

الله يهديهم

انتي ما قصرتي و سويتي الي عليج و زود

الله يردهم لج بالسلامه بس خلج رسميه و حسسيهم انج خذيتي بخاطرج منهم
انتي اختهم الكبيره ما يصير هالتعامل الجاف وانتي وحيده بينهم


الله الهادي

رايي من رايها ,,
الله يهدي النفووووس

 

[rwn 92]

سو خير وقطه بحر..

هالشي معروف ...

لا تتضايقين ... وكل شي سويتيه اعتبريه لوجه الله ... والدنيا دواره ... والحريم مو دايمين لهم ... وعيال اخوج الحين صغااار... باجر يكبرووون ويذكرووونج ويذكرون طيبج معاهم....

نصيحه مني لج... كملي اللي انتي عليه مهما كان هذيل عزوتج بالدنيا وزوووجج مو دايم لج كثر اخوانج... الظفر عمره ما يطلع من اللحم... غير جذي كسبي عيال اخوانج من صوووبج... حببيهم فيج... حتى لو كان ما كان...

الحريم اهم اللي يقسووون الرياييل ... انا ما احط بذمتي بس هذا الواقع

تقبلي مروري حبوووبه

 

[أعشقه]

ياشيخه اهم شي سويتي الي عليك وسلمتي عليهم لانهم حجاج
وحركتهم هذي لاتخلينها تاثر عليك مع انها تزعل وانا معك فيها
بس خلي عملك هذا لوجه الله .. وبراحتهم .. ومردهم يعرفون قيمه الاخت

 

[Tom ♥ Jerry]

,


آنتي سويتي الي عليج و كثر الله خيرج !
بس خليهم مآ يشوفون شر
حجاج المفروض آخلاقهم و اسلوبهم يكون آرقى من جذي :*

 

[بحر الرمال]

موقف يحر صج
خلاص بردي قلبج و لا توجبينهم و لا شي عامليهم مثل ما يعاملونج, و اهما الغلطانين لان اسلوبهم حيل منفر

 

[قسوة الزمن]

خلاص قطعتج فيهم دام عندج ريلج هاي اهم شي

 

[روانتي 12]

طيب ليش ما سألتي أمج عنهم ..؟؟

يمكن تقدر تعرف شالسبب ..,*

 

[FeShinGoOo]

مره ثانيه دقي عليهم قبل لاتروحين اذا حسيتي ماله نفس او ردو عليج ابرود طنشي فيهم ولاتحرجين وتحرين روحج .!!

 

[ابيك لي بروحي]

ماعليه ياقلبي انتي ماقصرتي
على قولتهم سو خير وقطه بحر

 

[منيرة خالد]

حبيبتي لا تزعلين الحريم مو مثل الرياجيل

احنا عندنا لازم تسلمين واهم لا عندهم رحلة عشر ايام ورادين شي عادي


واخوانج من ارحامج لا تقطعين فيهم ولا تزعلين من برودهم وبنفس الوقت انتي مو ملزومه تضغطين على نفسج بمسئوليات مو انتي المفروض تسوينها وانتي مو مكلفه فيها


والخير اذا سويتيه لا تتحسفين عليه اتركي جزاه عند رب العالمين

 

[Vdieta]

ماعليه يمكن صار وياهم شئ بالطريج ومعصبين مهما كان هذول اخواانج

 

[Tulips]

سو خير وقطه بحر

فوضي امرج لله و دام علاقتهم معاج جذي مايشوفون شر

بعض الاخوان من يتزوج ينقلب فوق تحت وينسى اخوانه وخواته

الله يهدي الجميع

 

[_كلي دلع_]

خلاص قطعتج فيهم دام عندج ريلج هاي اهم شي

من رـآـآيهآآ ..

بس صج شيء يقهــر ..’’

 

[ما كو اسم]

راي انج ادوسينهم واعيالهم تعذري منهم لا اتصيرين مداس وخدامه اذا ما عزيتي نفسج منو يعزج صدقيني اخوانج مو عزوه لج الا اذا دستيهم نوعيتهم جذيه . الا اذا كنتي نفس طبع اخوانج اللي يدوسج تتعدلين له . واذا جو من الحج لا اتروحين هم ما راح يفقدونج راح يفقدونج لمن اعيالهم ما يلقون اللي وصلهم المدرسه حزتها لا تتراخين واتقولين ميخالف وسوي خير ومن هالكلام اللي للي ماله حيله ويقص على نفسه وكيفج ................... لاني جايفه مثل حاتلج وايد ومدتهم فوق ال40 سنه الاخوان اذا كانوا جذيه لا اترخين تكسبينهم تصيرين انتي السنعه والفاهمه