مدرسة وصوتج مبحوح ... تعالي هني نحافظ على اصواتنا من الضياع :)

[hugo]

السلالالالالالالالالالالالالالام عليكم












بنات يا قلبي يا مدرسات صوووووووووووووووتي انبح من الصراخ عالبنات والشرح
ابي طريقة نحافظ فيها على اصواتنا بدل ما نفقدها للابد ....
عطونا من خبراتكم شتسوون لا تبخلون علينا خلو الكل يستفيد)))))))))

 

[doooora]

أضم صوتي لصوتج ،،،انتي بنات اللي ضيعوا صوتج أنا شقول من الصبيان ،،،، بس الحمدلله شكله صوتي رد والسبب اجازة الوضع

 

[hugo]

يالله بنات همتكم معانا

عطونا تجاربكم

 

[غنوة ستايل]

انا مو مدرسه بس صوتي مرات ينقطع

 

[WaRDiaH]

آنا بتليقف و أقول رايي مع إني طالبة بالجامعه
يقولون الحليب الدافي مع شوية عسل زين للحنجرة
و السوائل الدافية الثانية مثل الحليب مع الهيل
أو جاي مع زعفران
و يفضل إنكم ما تكثرون من الحوامض مثل عصير الليمون و البرتقال
لأنها تهلك الصوت هلاااااااك
و أتمنى إني فدتكم
وسوري عاللقافة

 

[james546613]

على حد قرأتي -هنالك اعشاب وبعض من المأكولات توثر على الحنجرة - ياليت تتمرونون على تخفيض الصوت واستخدام مؤثرات اخرى لتوصيل المعلومة وعوامل اخرى للجذب -ترى المدارس الاهلية يستخدمون العقاب والثواب المكافات والرحل والمشاركة بالانشطة المختلفة للحد من الشغب والاهمال -لاحضوا ترى الصراخ ماييب نتيجة وياحلو برانامج ناني واسليب التفاهم مع العيال بس نسيت باي قناة

 

[(كويتيه عسل)]

ديريبالج لايصير فيج التهاب بالحنجره

انا لما كنت ادرس ابتدائي لازم كل اسبوعين يصير فيني التهاب بالحنجره وغصب اطيب

والله كنت اسخن وحرارتي ترتفع وكلا دايخه وجنج منشوله وماكو صوت

واذا تكلمتي وسولفتي حتى لو بصوتج العادي حنجرتج تحرقج

والله تذبح تحسين بلاعيميج تبي تتشقق

واحبالج الصوتيه تبي تنقطع الله لايوريج العذاب يذبح وماتقدرين تتكلمين ولا تاكلين

وواااااااااي اذا شربتي ماي بارد يطلع من جبدج تموتين من التعب

عاد انا مااحب اشرب الا ماي بارد لازم كلا اشياء دافيه الحار موزين ولا البارد موزين

ولما اقول للطبيب انا ابله ههههههههه :krkrkr:يضحك علي

لما رحت متوسطه الحمد الله ارتحت شخبااااااااااااري الصرلخ

المهم الحل : انج تشرحين بطبقه صوتج العاديه والنقاط المهمه تعلين صوتج

مو دايما تستخدمين الطبقه العاليه من الصوت بس اذا تبين تركزين على نقطه مهمه في الشرح

و تحاولين كثر ماتقدرين تقضبين اعصباج وتخلين بالج وسيع على الطلبه

الطلبه يخافون من الابله الحليمه اللي ماتصارخ وماتعصب

موكل شي تعصبين عليه في اشياء ماتستاهل ولا تسوى الصراخ والحمقيه والعصبيه

في شغلات طوفيها موكل شي تدققين عليه

ترى اليهال ماينفع معاهم الصراخ هذول يهال ومايفتهمون اذا صرختي عليهم

ممكن يسكتون بس بعد خمس دقايق يردون على الشطانه ولا جنج زافتهم

مره كنت قاعده مع طلبه اسولف معاهم لو تسمعينهم شقولون عن الابلات اللي يصارخون اول

شي مايحترمون الابلات اللي يصارخون وينضرون لها انها ابله شخصيتها ضعيفه

يقولون الابله اللي تصارخ تونيس يستمتعون بمضايقتها ويتعمدون يطفرونها

ويخططون علشان يطفرونها علشان يضحكون عليها

انا انصدمت من كلامهم نرفزوني وزفيتهم

معنى اهما يهال برابعه ابتدائي بس شوفي شقولون وشسوون

 

[**ام حموود**]

ان الحمدالله لحد الحين صوتي ما نقطع مني بس يقولون الماء الحار زين حق الي صوتها منقطع منها

 

[ام هزاع]

انا صوتي حاليا يختلف عن صوتي قبل لا ادش التدريس

حسبي الله ونعم الوكيل .... الحين احس صوتي فيه بحه من الصراخ مع اني ادرس بنات ...... والبنات اللي نايمه واللي سرحانه فتضطرين انج تلعبين بالصوت ترفعينه وتنزلينه .... عشان ينتبهون .... بس شالفايده اصواتنا ذهبت ادراج الرياح



انا عندي حل وبطبقه من باجر ... راح اتكلم بصوت منخفض .... والبنات اللي يسولفون راح يسكتون عشان يسمعون الابله شتقول

ماكو الا هالحل ... او نصرف عالحكومه ونجيب مايك نشرح فيه




مشكووووووووووووووووووره اختي على هالطرح

 

[بدوره 22]

انا احس ان صوتي تغير عقب التدريس

بس الحين هذي اول سنه لي بالثانويه

الحمدلله افتكيت من المتوسط

احس اريح ما قمت اصارخ

 

[tintinti]

اي ي ي ي ي ي !! شقول! انا ريلي ما حبني الا لنه صوتي حلو وكنت اغنيله الاخوه! عقب ما صرت مدرسة من الصراخ صوتي خشن وصار عالي لدرجة ما تتصورونها في مكان عام لمن اسولف وياه الناس كلها تسمع سالفتنا واذا بغبيت اسولف وياه يقولي ليش تصارخين شفيج معصبه اقوله مافيني شي انا قاعده اتكلم عادي يقولي قصري صوتج اتكلم يقولي قصري بعد اتكلم يقول ما قصرتي اقوله يبا انا مدرسه تعب وياي ليمن رضا بالامر الواقع الحين!! وين ايام الاخوه ليت الصوت الرقيق يعود يوما صرنا رياييل السبا التدريس لازم يعطونا بدل صوت الصراحه .. اعرف وحده لمن كانت تصرخ بمدرسة اولاد طلع من بلعومها دم قالها الطبيب ان الحبال الصوتية تجرحت في بعضها بعدها صوتها ما كان يطلع الصراحه احنا معاناة! الله يكون بعونا..

 

[رضاهم جنه]

المفروض يعطونا بدل صوت!!!!

وشوفي اي وحده تشوفينها برى المدرسه تمشي باستعجال وصوتها عالي ابصمي بالعشر انها ابله !!! التدريس خشنا حسبي الله عليه

 

[mi corazon]

أخ

يبتوها عالجرح

بنات آنا صوتي مو ناعم بالأساس جني بياع بنك

والحين بالتدريس صار جني مقاول معصب يشتغل بارت تايم بسوق السمج

شوفولي حل وياكم

الكورس الأول ياني التهاب بالحنجرة وصوتي راح راح .. ماكو صوت بالمرة .. فقمت أشد صوتي حيييييييل وبلاعيمي تحكني من الشده .. بس علشان أطلع كلمة ..

رحت الدكتور قال اخذي راحه .. ولا تتكلمين لأن صوتج راح يتأثر وايد

بعدها بيوم كنت قاعده أدرب بنات على برنامجي الاذاعه ما بقى عليه الا يومين .. وابلات المناوبه كانوا كاشتين بمناوبتهم

وصوتي انشرخ لمن صرخت عالبنات بالساحه .. لأنهم قاموا يتحرشون ببناتي

والله وكيلكم يا بنات صوتي الحين ... مال اوقف تدريس واشتغل طقاقه

ممممممم هم مو شينه .. طقاقة ... ممممم 800 دينار ولا 500 بالليله!!!! .... ممممم أكل ووناسه

اعوذ بالله منك يا ابليس .. تف تف تف


اي ارد للسالفه

شنو الحل؟

مفكره من الشهر اللي طاف اروح دكتور أنف واذن وحنجرة اعدل احبالي .. يشدهم شوي .. عيب ماكو انوثه .. وتوني ماتزوجت

بنات مالقيت ولا شي عن هالعملية بالنت كلش ملش

فيني بجوه شنووووووو الحللللللللللل ؟؟؟

 

[أماني1987]

:0bee2e8d89::0bee2e8d89::0bee2e8d89:
أنتوا من صجكم لهدرجة ... يعني صج الصوت يتغير قبل وبعد ؟؟
أذكر العملي الكورس اللي فات غبت مرة .. صووووت مافي بس همس ..
يعني شنو أسوي إذا درست :0bee2e8d89::0bee2e8d89:
التدريس تحطييييييييييييييييييييييييييييييم ..

 

[الأميرة نوونه]

هههههههههههههههههههههههههههههههههههههه
الله يعين معاناة المدرسه


وعلى شنو يحسدونا


الله يعينا مالنا الا الاشياء الدافيه

 

[أحلى استاذه]

[

color="darkorchid"]

السلام عليكم ورحمة الله وبركاته


كيف تحافظ على صوتك وتخليه بنبرة أحسن



1 - الماء هو أفضل مشروب للصوت لأنه يرطب الحنجرة ويقوي الأحبال الصوتية ويمنع جفاف هذه المنطقة.

2 - يجب تناول 8 أكواب يوميا على أن يكون معتدل الحرارة.

3 - تجنب الماء المثلج ، لأنها تحدث انقباضاً للأحبال الصوتية وتجعله متوتراً ومجهداً.

4 - ينصح بتناول ما بها نسبة عالية من المياه لترطيب الحنجرة مثل الخضروات الخس والخيار والحبحب (البطيخ)

5 - العرقسوس والمشمش والقرفة تؤثر إيجابياً على صحة الصوت

6 -عدم الإفراط في تناول عصائر البرتقال والليمون والجريب فروت ، لأنها تجفف الحلق من رطوبته ممايضر بالصوت.

7 - تفاد حدوث الإرتجاع الحامضي التي تنعي تحرك حامض المعدة إلى أعلى واتجاهه إلى المريء مما يحدث ضرراً بالصوت.

8 - يبنصح بتقليل حجم كل وجبة وتناولها ببطء على أن تكون الوجبة الرئيسية في منتصف اليوم، ووجبة العشاء خفيفة وقبل موعد النوم بثلاث ساعات.

9 - قلل من تناول الأغذية التي تزيد من إنتاج حامض المعدة مثل الأغذية الدهنية المحمرة والدهنية والغنية بالتوابل.

10 - عدم الإفراط في تناول الشوكولاته والقشدة والكريمة والزبدة والآيس كريم ، لأنها تزيد من الإفرازات المخاطية التي تغطي الحنجرة وتؤثر في الصوت وتسبب إجهاداً للأحبال الصوتية.

11 - يجب تناول وجبة خفيفة قبل ساعتين من موعد الأداء الصوتي في حالة إلقاء محاضرة أو تسجيل مقطع إنشادي ، لإعطاء القوة والحيوية لنغمة الصوت.​

[/color]​

 

[^^نـــواره^^]

و ازيد على اختي غريبة ان شرب اليانسون واااااااااااايد زين حق الاحبال الصوتية يلينها

 

[mi corazon]

بنات آنا اخذت بنصيحة ابلة ويانا اني آخذ وياي ماي صحة اشرب جقمة كل 10 دقايق .. يعني والبنات مشغولين بالكتابة

شوي احسن

اشرب قلاص حليب عالريج مع قفشة عسل قالولي لا الحليب بالليل لازم لأنه عالريج يخمل العقل وينوم


يزاكم الله خير عالنصايح الحلوه

 

[كولوراديه]

انا صوتي تغير صار فيه بحه فشنو قمت اسوي ؟ اخز إلي تتشيطن خزه ليمن تنزل راسها واكمل ريلاكس بس في صف ما ينفع فيه لا الخز ولا بطيخ

 

[@ نجمة العطااا @]

انا هذا الكورس اول تعيين لي متوسط البنات صج حلوين لكن ازعاج مو طبيعي وحركة بالصف تضطرين انج تصارخين عشان ينتبهون مثلا مرة انا كنت اشرح وصلنا لحقيقة كتبتها على السبورة الا وحده ناطة من ورا الى قدام تتمشى وما ادري شتسوي قلت لها شفيج؟؟ ردي مكانج وكلمت الشرح الا وترد تطمر قدام واقفه وارد اقولها جذيه على هالحال يمكن 5 مرات اخر مرة صرخت فيها وبعدييييييييييييييين؟؟؟؟؟؟؟؟
ووقفتها ورا ووجهاا على الطوووفة خخخخخخ كسرت خاطري بس شسوي اذية وربي واول ما طلعت من الحصة بلاعيمي تعورني ما عني ما صرخت الا لما قلت لها وبعديييين؟؟ وبس قررت اني اتخذ الفعل واما الصوت لا للمغامرة فيه واشرح بصوتي العادي والحمدلله مشت اموري ولازم قبل كل حصة قلاص ماي اشرب وبعد الحصة قلاص ماي واحيانا شاي او حليب دافي والله يعينا يارب