محتاجتكم بنات ابي اتغير ..

[حـور ~..!]

السلاام عليكم ..

الموضوع نفس ما قريتوا عنوانه ابي اتغير ..

انا عمري 22 سنه ..

وزني كان 72 وكنت ابي انزله اوصل الوزن المثالي بس الي صار انه وزني صار 85 .. باجر ان شاء الله اول يوم النادي اشتركت بنادي رياضي وببلش اخفف اكلي وآكل اكل صحي اي اوصل للوزن المثالي ان شاء الله ..

المشكله الثانية الي عندي شعري يا بنات صاير جنه محترق دايم كشه ومطاير لفوق جنه متكهرب :S وخشن حيييل حتى لو يتمشط يرد يعكش حتى لو استشورته 10 مرات ولا كاني مستشورته احترت فيه مادري ليش صار جذي و خفييييييف حيل استخدمت خلطه عضوة اسمها ليبرا يزاها الله خير من شهر 2 للحين وانا مستمره عليها اهيا خليط زيوت الحمدلله تعدل شوي وما يتساقط نفس قبل بس للحين جنه محترق ودايم خشن ومتقصف قصيته مرتين شهر 4 وشهر 5 قلت يتعدل شوي بس للاسف الحين رد نفس قبل مادري شنو احط عليه عشان يصير ناعم وما يكون نفس الحين والله تعقدت منه


المشكله الثالثه ويهي أنا اشتغل وميك أب من الصبح وعارفين جو الديره والشمس شلون تلعب بالبشره ..

ويهي صاير كله مقشر واحس القشور كلها كريمات اساس وبقايا مكياج ..

للامانه انا ما استخدم ولا منظفات ولا شي .. قبل ايام الثانوية كنت استخدم كريم مجك عجيييب بس الحين مو لاقيه الكريم الاصلي كله التقليد ..

يبت كريم رويال مزيل مكياج بس يحرق ويهي وبصراحه انا وايد مهمله البشره ليما تعبت وايد لدرجة اني الحين اذا غسلت ويهي يحرقني واذا حطيتت فونديشن يحرقني .. صار ويهي حساس بدرجه يبت منظفات كلنك جربته يومين بس احس ويهي قب ويحرقني ومبقع احمر لما اغسله بماي ..

صرت حتى المكياج اغسله ماي بس وادري ما ينظف ويهي ..


المهم بناات انا ابي اتغير ابي اهتم بنفسي اكثر ..

محتاجه نصايحكم بليز ..

شنو استخدم لشعري عشان تنحل مشكلته .. وشنو تنصحوني بافضل كريمات ومنظفات لويهي ومن وين اييبهم تراني حدي اي شي بهالسوالف ..

ما اطلع اسواق وايد وجذي لأن ما عندي وقت ضغط دوام وجامعه ..

ابيكم ادلوني عالاسواق الي الاقي عندها الي ابيه وشنو احسن شي ..



ومشكوورييين بنات مقدما .. صج محتاجتكم من زمان بنزل موضوع واستشيركم بس تونا خلصنا فاينل قلت اتفرغ لنفسي بالصيف واصير نيولوك


:eh_s(7)::eh_s(7)::eh_s(7)::eh_s(7):

 

[حـور ~..!]

12 مشاهده ولا ربع رد

شهالاحباط :'(

 

[~*~الملكة~*~]

بالنسبه لي شعري مايعدله الا الحنه جربيها مرتين بالشهر وان شاءالله شعرج يتعدل

واذا ماتحبين الحنه استخدمي بدالها السدر + الاستمرار على الزيوت

بشرتج حساسه ومحتاجه تراجعين دكتور جلديه ترا موشرط خاص راجعي بالحكومه

في بنات يمدحون زيت الزيتون في مسح الميكب ماجربته جربي يمكن ينفع معاج

بس ضروري تراجعين دكتور جلديه حق بشرتج

 

[omsalman87]

اول شي من ناحية جسمج لازم تكون عندج ارادة انج بتضعفين ، يعني تمسكين نفسج عن الاكل ، وانتي دخلتي نادي ومع التمارين راح تيوعين ديريبالج تزيدين بالاكل راح تخربين ع نفسج وراح يزيد وزنج اكثر ، كل ماحسيتي بيوع وماكليتي راح تكونين بالسليييم ، جربي مع الرياضه ريجيم التمر واللبن والروب من اكتيفيا هذا ريجيم صحي ووايد ضعفوا عليه ، ولا تحطين ببالج ان قلة الاكل اهيا اللي تضعفج لاااا شوفي هالاكل اللي تاكلينه يمكن يكون قليل لاكن يمتن ، اكلي اكل واااااايد ويكون بدون سعرات يعني كثري سلطااات ، الخس معروف ينزل الدهون ، كثري شرب ماي، ودايما باكلج ضيفي فلفل اسود وفلفل ابيض مفيدين حقج وهم يضعفونج بشكل رهييب ، شربي يوميا كوب زنجبيل وضيفي كمون وشربي ليمون .

بالنسبه حق شعرج الحمدلله وقف التساقط والحين يبيلج اشياء ترطبه وتنعمه ، ليش ماتجربين زيت باراشوت يرطب شعرج ، وروحي اخذيلج كريمات مغذيه كل ما تسبحتي رطبي شعرج فيهم ، ولا تستشورينه حطي الكريم وخليه ينشف .

بالنسبه حق بشرتج انتي هملتيها وايد وحرام وعدمتيها بالمكياج اللي تحطينه يوميا ، روحي حق اخصائية بالبشرة تشوف بشرتج والتزمي بالكريمات وقطعي كريم الاساس واهتمي حطي واقي من الشمس ورطبي بشرتج عدل حرام انتي توج صغيره وبشرتج جذيه؟ او روحي الصيدليه وخليه يشوف بشرتج واهوا راح يعطيج بس ديريبالج روحي صيدلية ثقه مو يقصون عليج .

 

[حـور ~..!]

مشكورين بنات ما قصرتوا ربي يوفقكم يا رب ..

الملكه انا الحنه وايد ينشف شعري والسدر نفس الشي حتى الصالونه لما رحت اقص شعري قبل لا ابدا استخدم الزيوت قالت حرام عليج قلتلها احطله حنه وما يفيد قالت وقفي الحنه لأن شعرج جاف والحنه ينشفه اكثر وللسدر جربت خلطه شامبو السدر الي حطتها ليبرا ان شاء الله برد عليها مع زيوت مرطبه ومثل ما قالت زهوور بستخدم زيت البراشوت ..


ولبشرتي ان شاء الله بمر دكتور جلدية حق بشرتي ..

مشكووريين وايد بنات يا ريت الي عندها نصايح ثانية وخلطات لا تحرمني منها فديتكم والله :$

 

[الشوق انت]

شوفي حبيبتي بالنسبه للبشره روحي اي صيدليه ثقه او دكتوره جلديه تنصحج وتعطيج اشياء تفيدج الا البشره لاتسكتين عنها وبالنسبه لشعرج انتي نفس معاناتي جربت ماسك من ماركة فيتو تلاقينه بالصيدليه سعره ب8 حلوووو حيييييييل انا اصبغ شعري ومحترق حده وهذا عجيييييييييييييب للشعر بس تسبحي وخليه عشر دقايق وغسليه شوفي شعرج بعدها واذا تامرين بشي انا موجوده خيتوووو

 

[الشوق انت]

نسيت اقووولج قلبي لازم تعتنين بشعرج يعني حطيله زيت براشوت خليه يتغذا وبعدها غسليه وحطي فوقه الماسك وغسليه وادعيلي الله يرزقني الذريه الصالحه عاجلا غير اجلا يااااارب

 

[ReeM ^ Style]

البنات ماقصروا

 

[حـور ~..!]

مشكورين بنات ما قصرتوا ..

حبيبتي الشوووق ربي يرزقج الذريه الصالحه الي تفرح قلبج وتريحج ياااااا رب ..