وَ للخلطات الطَبيعية بَموضوعنا نَصيب , لأن بمَوضوع العَرق بنات كَثير طَلبوا مني وَصفات طَبيعيه
لكن آوعدكم بَموضوع آخر أتكلم عن مُشكلة سواد الأبط وَ المنطقة الحَساسه بالإضافة للحَلول , بس حبة حَبه , لأن مَنب من النَوع إللي أذكر نتفه من شيء لازم آذكر كَل شيء بالتَفصيل
أختكم في الله كسوله لأبعد حد فيما يتعلق بالماسكات الطبيعيه ، ممكن أقعد أربع ساعات أزين طبخه ، بس ماعندي إستعداد أصلح ماسكات طبيعيه , بالرغم إني أشوف مفعول الماسكات الطبيعيه ولا أروع .
[ جَميع الخَلطات بالتَعاون مع آختي المَوسوسة , هي دآيم تَخلط لي وَ أنا أستَخدم , وآآآه الله يَخليها لي ]
راح أذكر لكم ثلاث وصفات من الوصفات إللي تقريباً من مراهقتي وَ أنا أستخدمها ، سهله وَ موجوده بكل بيت .
طبعاً من الماسكات إللي أستخدمها دايم ماسك الطين مع ماء الورد بس راح أفصل فيه بموضوع الحمام المغربي ، لذلك بعطي الفرصه لغيره من الماسكات .
والمسكاات أنواع ، منها المرطب ، وَ القابض وَ المنقي ، طبعاً بما أن بشرتي دهنيه أميل للمنقي وَ القابض أكثر شي .
ماسك الخميرة ||
مهم لتضييق المسام وَ تنظيف البشره وَ تخفيف الإفرازات الدهنيه دون تجفيف البشره
من أفضل الماسكات عندي وَ مستحيل يمر شهر وَ ما أزينه ، وَ تقريباً كل خبراء التجميل ينصحون به.
نحتاج ~
ملعقة طعام خميره جافه مذوبه في ملعقتين طعام حليب فاتر
ملعقة طعام نشاء الذره مذوبه في ملعقتين طعام ماء ورد
عصرة ليمون ( 3 نقاط كافيه )
دقيق إن لزم الأمر
نخلط مزيج النشاء + مزيج الخميره وَ نعصر عليهم الليمون وَ نخلط ، لازم يتكون خليط سهل مده على الوجه ، إذا تحسين االماسك رخو نزيده دقيق عشان يمسك ، وَ إذا كان عادي مانضيف له شي .
مبين بالصوره سائل بينما هو بالحقيقه يميل إنه يكون زلالي أو بالأصح غليظ يعني قوامه مثل العسل تقريباً ، ولاحظوا على طول يتضاعف حجمه .
راح أقولكم طريقه سهله لمد الماسك ، هي ممكن صعبه بالمد ، بس سهله بالإزالة ، بالإضافه الى إنها ماتخلي الماسك ينقط وَ انتِ منسدحه .<-------- أكثر شي يكرهني بالمساكات الطبيعيه الريحه وَ التنقيط , من فوائد الشاش أيضاً يساعد على تغلغل خوآص الماسك دآخل البشرة بشكل مثالي
راح نحتاج شاش طبي .
سعر الشاش الطبي مايتجاوز 7 ريال
ممكن تستخدمون الشاش اللي يجي على شكل قطعه مربعه وَ تقصون مكان لعينكم وفمكم ، وَ تمدون بالفرشه الماسك .
أو تستخدمون لفة الشاش
وراح تقطعونه لثلاث قطع أو أربع .
قطعه عرضيه على كامل الجبهه .
وَ قطعه عرضيه على الخدود ماره بالخشم ، يعني من الاذن للأذن
وَ قطعه من الاذن للأذن بس ماره بالذقن
قطعه حول الرقبه
يعني بختصار بتصيرين مومياء فرعونيه
والصوره توضح المطلوب <----------- طولتها وَ هي قصيره
وغالبا مأتبع الطريقه الأخيره , مَثال حَي
يترك على الوجه وَ الرقبه من 5 إلى 7 دقائق ثم يغسل بالماء الفاتر ثم البارد .
وَ أسهل طريقه لإزالة الماسك إستخدام الإسفنجه
طبعا ًضروري تغسلون الأسفنجه وتتركونها تنشف ,
سعر الأسفنجة يمكن 7 ريال أو 15 ريال ناسية بالضبط كَم بس رَخيصة
تَحصلونها بذا بودي شوب , وَ لو لقيتي بغيرها من مَحلات خَير وَ بركه
ماسك الزبادي وَ العسل وَ النعناع ||
هالماسك أستخدمه من المراهقه ، الماسك لوحده من صديقاتي ، ينعش البشره وَ يعطيها نظاره وحيويه وَ يناسب جميع أنواع البشرة , أنا لما أستخدمه آحس أني أبيض آشوف مَفعوله مثل آحماض الفواكه بالتبييض لكن مَفعوله جداً بطيء , مع الإستمرارية يبين الفَرق
نحتاج ~
ملعقة طعام زبادي
ملعقه صغيرة عسل نحل أصلي
[ صراحة آوصي عليه مَخصوص من اليمن السعيد يَهمني يكون عسل سدر مو عسل من زهور أو غيره , إذا ماتوفر ألجأ للعسل الكشميري , عسل العلب ذا خرطي كله سكر مامنه خير للبشرة ]
ورقتين اإلى ثلاث أوراق نعناع
ملعقة صغيره دقيق إن لزم الأمر
نحط المقادير في الخلاط الصغير وَ نخلط ، وَ نمده على الوجه , على فكره الخلط بالخلاط يخلي الماسك رخو فيحتاج دايماً طحين .
و بما أني كسوله مو دايم أستخدم الخلاط ، تقدرين تضيفين للزبادي عسل وَ تخلطينه زين ثم تفرمين النعناع زين وَتضيفينه للخليط ، وَتخلينه بالثلاجه شوي عشان يصير بارد وَ منعش وَتنزل خلاصة النعناع فيه , ثم تمدينه على وجهك
ملاحظه :
غلظ الماسك يعتمد على نوع الزبادي وَ لعسل ، لذلك إذا حسيتوه خفيف زيدوه طحين ، لأن الزبادي من الماسكات المزعجه اللي تظل تنقط وَ توسخ المكان , بحال كان الزبادي من المَزرعه وَ مصنوع بدائياً راح يَجيك غَليظ لما يجيني من المَزرعه آتنقع فيه هذاك مو طبيعي حتى آحماضه مُو طبيعيه غير عن زبادي المراعي وَ الصافي وَ طقته لأن نسبة الحَموضه عالية يَساعد عالتَفتيح , فلي يتوفر لها فلا تضيع عليها الفُرصه
طبعاً تمدينه على كامل الوجه وَ الرقبه ، وتتركينه من 15 الى 20 دقيقه ثم تغسلينه بماء فاتر وبعده ماء بارد .
الماسك جدا مُنعش خاصه في الصيف وَ يهدي البشره إذا كان فيها حساسيه .
ماسك النشاء ( مهلبية الكسلانين) ||
هالماسك عشقي بأيام الحر وخاصه بعد التعرض للشمس أيام الدراسة
أستخدمه من 4 مرات لمرتين بالأسبوع , وَ يناسب جَميع آنواع البشرة خاصة الحساسة
طبعاً من المفترض تخلطين كميه متساويه من النشاء وَ ماء الورد وَ تحطينه بوجهك يضيق المسام وَ ينعش البشره وَ يعطيها نظاره ، وطبعاً اختكم في الله مافيها شده على الخلط غير إن الماسك صعب المد شويه ينشف على طول لازم تمدينه بقطنه مبلوله
قامت أختي قالت ورى مانطبخه وَ نصلحه مثل المهلبيه , عاد مادري مدى فعالية الوصفه قياساً بالوصفة الغير مطبوخه ، لأن فعلاً مو أنا اللي أزينه ، دايم أختي هي اللي تزينه لي ، وسبق وَ نزلت طريقته بأحد المنتديات
عموماً الوصفه منعشه للغايه وَ مبرده على الآخر وَ غير كذا تعطي البشره تورد ، بالإضافه إلى أنها تفتحه وَ تشده ( طبعاً مع المداومه )
فصلحوا إللي يعجبكم . شخصياً احبه مطبوخ .
نحتاج ~
نصف كأس ماء نقي بارد
ملعقة طعام نشاء الذره .
من ملعقتين طعام إلى ثلاث ماء ورد
الطريقه ~
نذوب النشاء في الماء البارد ، وَ نرفعه عالنار مع الخلط ، لين يغلظ قوامه ، تراه يغلظ بسرعه دقايق بس لاتطولون راح يصير مثل المطاط , بعد مانطفي نضيف ماء الورد وَ نخلط .
نعبييه في علبه نظيفه وَ نحطه بالبراد لين يبرد وَ يصير مثل المهلبيه , ونصير كل مانبي ناخذ منه , يقعد تقريباً أسبوع بالثلاجه وَ يمكن أكثر .
نمده على الوجه وَ نسترخي وَ نتركه لين ينشف , لمدة عشر دقايق ، وَ بعدها نغسل وجهنا بالماء البارد
راح تحوسون شوي بالماسك لين تضبطون الوزنيه اللي تناسبكم
تَنويه/
أشوف كثير يسأل عن ماء الوَرد الأصلي , ما يحتاج كل هالحوسة أقري المَكونات إذا مخلوط مع شيء فهو غير مُناسب للوجه , جربت ماء الورد إللي مكتوب عليه طائفي وَ شيء الظاهر حق المدينه , وإللي علبته صفراء وَ إللي خضراء وَ إللي مَدري من وَين جاي , مافي شيء ما جَربته
آخرتها ما أقتنعت إلا بماء ورد بيدر موجود بالسَوبر ماركت
آهم شيء يكتب عليه ماء ورد صافي أو نقي , البعض تلقين مَكتوب مضاف له كرآميل
وَ البعض مكتوب مع النكهات الصَناعية إنتبهوا مَنها
يتبع }
الأمانة العَلمية مَطلوبة ,, فراح تَنغثون من سوآلفي
الأمانة العَلمية مَطلوبة ,, فراح تَنغثون من سوآلفي
