ما هي ردة فعلك لو شتمك زوجك؟؟

[sallyq8]

السلام عليكم

خواتي حابه أعرف آراؤكم بخصوص هالموضوع

يعني لو زوجك بيوم سواء من باب المزح أو بسبب غضبه وعصبيته سبّك أو جرحك بكلمة سواء بسيطه أو جارحه أو قوية

شنو ردة فعلك؟؟ ولأهل الخبرة ما هو التصرف السليم؟؟

مثلاً لو مزح بيوم بالموبايل وقال اشفيك ثولة أو اشفيك ما تفهمين أو غبيه وجاهله تسكتين وتتقبلين؟؟

أو لو ظن أنه عادي بمجرى الحديث يقولك وعفواً على هالكلمة (أيا الكلبه) ويكمل كلامه تقبلين مثل ما بعض الصديقات أو
الخوات في مابينهم يقولون لبعض من باب الميانه شنو رايكم وتصرفكم وهل يكون تصرفكم فوري وتعصبون ومثلاً تسكرين
التلفون بوجهه؟؟؟ ولا تسكتين من المفاجأة وتبكين ولما يرجع يكلمك كأنه ما قال شي وهو يضحك ويكلمك عادي تطوفينها له؟؟

هذي الشتائم ولن أخوض بالشتائم الأكبر والأقوى لأنها أكيد مرفوضه لو تمس الأخلاق والشرف ولكن ما قصدته التجريح
وتقليل القيمة والإساءات مثل ما سبق 0

بانتظار مشاركاتكم خواتي جميعاً ولتعم الفائدة علينا جميعاً من آرائكم وتجارب الصديقات والمعارف وغيرها...

ولكم مني كل الود.......

 

[غلا مشاري]

كل شي له حدود مثل ماهو مايرضى اقوله هالكلام حتى انا ما ارضى يقولي بعدين بصراحه احس هيبته او هيبتي تطيح اذا نرضى نسمع الشتايم ونسكت عادي

 

[كتكات احمر]

قلة ذوق وادب وتربية لو سواها ..
طبعا لابد من الاحترام المتبادل بين الزوجين ..
والتعامل برقي الاخلاق وغير جذي مرفووض ..
والله يعين الي ترضى ان ريلها يشتمها او يطقها او يهينها واهي ساكته
لا من الدين ولا من العادات ولا من الرجولة في شي ولا هي مفخرة ان الواحد يمد ايده او يشتم !!

 

[سااااااارونه]

باقولك موقف صار معي مره كان يشرب ماي وانا جيت افتح الفريز وصكعت في الكاسه واسنانه وسبني سب اول مره اسمعه وعصب علي بس سكت الاني انا الغلطانه بعدين حسييته انحرج من نفسه يوم قالي الالفاظ

 

[sallyq8]

تسلمون حبايبي على ردودكم

آنا كتبت الموضوع لأني تفاجأت من كلمة قالها لي اليوم الصبح وهو ماخذها على ضحك وحسباله عادي وأقبلها منه
ومن المفاجأة والصدمة سكتتتتتتت بس طلعتعيوني وويهي احتقن ومشيت عنه!!
بس لحد ألحين متضايقه ومقموت قلبي وحتى من رجعت من دوامي حطيت راسي ونمت
لا كلمته ولا شفته ولا كليت شي (مس دايموند) سوري ببتدي بالبرنامج من الخميس لأني مغثوثه

اهو حاس بعمره بس ما قرب صوبي ولا قعدني يطلب مني أي شي وعنده دوره فطلع وأدري اليوم ديوانيه وعلى وشك
يرجع بس بصراحه ما أدري شسوي ما ودي أشوفه لأني معصبه!!
آنا بعد مسكره موبايلي بحجة إني كنت نايمه ومالي خلق وساعات أسويها ولحد ألحين مغثوثه وما أدري اشلون أواجهه
وأكلمه لأني ودي أصارخ من الحين لي باجر عليه وما أطوفها له من كثر ما آنا معصبه لأنها أول مره وأبيها آخر مره
ويكون ندمان عليها حده حده ومستحي مني بعد

 

[Spoildish]

والله ما ارظا يسبني حتى لو بغشمرة مرة سواها و قالي شفيج اتغشمر وانا رديت عليه بنفس الكلمه وقلتله اتغشمر ماقام يقولي جذي بعد

 

[قمردين]

انا اضحك

 

[واصله]

اكيد ما ارضى
اهم شي الاحترام بين الزوجين
واذا سواها ازعل
بس اذا كانت على غشمرة ممكن اتقاضى

 

[اكسبلانكا]

امي لا عاد انا مشخووووطه الا الغلط ما ارضى فيه ولو بيوم بيغلط علي او بيسبني اتوقع ردت فعلي بتكون بالمثل لاني بهالسوالف ما امسك اعصابي ابد لو منو جدامي على قوله ابوي اول ما ملجنا قال حق زوجي الله يعينك خذيتلك وحده (( باقدير )) هذا بدال لا يمدحني فضحي لووووووووول

 

[توكااا]

ياعزي لحالي ياما وياما غلط علي بس كل اقول عادي خليج انتي الكبيره العاقل الثاقل ومشي الامورياعزتيليييييييييييييييييييييي

 

[om-HaSsoOon]

اذا غشمره عادي بس تره حتى الغشمره لها حدود ، خاصه اذا كانت جدام الناس

يعني لو بينج وبينه ممكن تطوف بس جدام الناس لا ابدا مستحيل

يعني وايد تصير معاي جدام الناس يتغشمر اهوو غشمرته جذي صايره يقط حجي مو حلو فلما نقعد بروحنا اتوحد فيه اقوله تره هالكلمه اجرحتني واحرجتني وكيت كيت لا تعيدها لو سمحت وفعلا مايعيدها لان عرف انها جرحتني

 

[لوكي 22]

غشمره عادي بس بحدود
بعصبيه لا بكلمه بعقل يعني اسكه بعقلانيه

 

[sereen]

عاد اصدقون ان فى بنات يعجبووووونى يتغشمرون مع ازواجهم بكلام انا حواجبى تصعد فووووووووووووووووق ماتزل مرة قاعدة قبال وحدة تتكلم مع زوجها على ان الكلام على ضحك وغشمرة جان اتقوله هااااى انت طبعا انا بالنسبه لى ووووويه قويه , ولا يالحمار وانتوا بكرامه كلشى ولا ليه صار سب بينهم واى واى امبيه موووحلو احس جنهم بتهاوشووون يمكن ليش انا ماسمع هالكلام بين امى و ابوى ولا احنا متعودين عليه .

لو يقولى والله موبس طناقير الا اتكلم واصيح على طووووووول الدمووووع اربع اربع احس جنه طعنه بقلبى ماتحمل احد يسبنى لو اهو زوجى شنو يعنى ترى السب يعور النفسسيه ديورو بالكم

 

[&شوارفسكيه&]

اجذب عليج اذا قلت زوجي عمره ما سواها
لا سواهااااااا كذا مره
وكانت ردت فعلي تدرين شنو
كنت اطالعه بنضره وما انزل عيني عنه
وبعدها اطلع واخليه
واذا كانت في التلفون كنت اسكت وما ارد عليه ويناديني ويقول انتي تسمعيني وانا ساكته وما ارد
وعقبها اقوله مقدر اجرحك واقولك كلمه تضيق خلقك لاني بالاول مو من تربيتي هالكلمات وثانيه ما احب اجرح اي احد
واقوله فمان الله واسد الخط
وفي كلا الحالتين يعتذر ويحس بالذنب ويدري انه اهوه الغلطان علي ويتاسف
بس عن مرادد انا مستحيل ارادد لاني بالاساس ما اعرف وحدي حدي طيوبه من اي كلمه عيوني تغرق دموع علشان جذيه تشوفيني بهذا الموقف التزم الصمت وبالنهايه الاقيه يتحسف ويراضيني ويدري انه حيل غلط

وسلامت عمرج حياتي

 

[ترووفه]

انا وحده مااحب اي شخص يقلل من قيمتي ويضحك على او يسبني سواء عن ضحك او جد

انا موقفه الكل عند حد

مهما يكون لي احترامي وتقدري سواء عن زوجي او اهلي اهله ورفيجاتي والكل


في ضحك باشياء غير السب والشتم والتقليل من القيمه

في ناس عادي عندهم

بس انا لاااااااااااااااااااااا

وزوجي مره ضحك معاي وقالي اشفيج هبله ماتفهمين

وزعلت عليه

انا مااحب احد يتكلم علي لاني جد حساسه من اي كلمه