ما أقدر أنام إلا على...

[Satanicly]

السلام عليكم و رحمة الله و بركاته.. شلونكم بنات شخباركم؟؟

الصراحة أنا قاعدة أعاني من مشكلة خايفة منها لي بعدين.. إلي إهي إدماني عال (Panadol night).. و صايرة ما أقدر أنام إلا على هالحبوب.. لأن أنا فيني أرق حاد و ما أنام بالليل من التفكير إلي ذابحني!!
و قاموا يخرعوني إلي يقولون إن هالحبوب تموت و تجعد الويه و و و.. فأبي أعرف منو مجرب هذي الحبوب و شنو عوارضها, و هل إيهي زينه حق حالتي؟؟ و شنو في أشياء بديلة زينة تساعد عالنوم غير هالحبوب؟؟

 

[ريمه الكويت]

هلا اختي اهي ماتموت ولاتجعد احنا ساعات وقت الظروره والمرض نستخدمها بس لاتتعودين عليها بعدين ماتقدرين تنامين الا عليها
والبنات الله يعطيهم العافيه علموني وصفات حلوه للنوم مثل شربي بابونج بالليل وتوضي واستغفري قبل النوم واشتري عطر من الافنيوز الي على الافندر رشيه على السرير يعطيج راحه وتدوخين وتنامين انشالله

 

[Satanicly]

مشكورة ريم الكويت عالرد.. قاعدة أحاول إني ما أخذهم بس صعبة شوي.. فبجرب هذا العطر إلي قلتي عنه يمكن يفيدني

 

[dantella]

حبيبتي باندول نايت له فتره معينه اذا اخذتيه اكثر من سبوع تالي جسمج تصير عنده مقاومه تقومين تاخذينه ولا يستفيد منه ماتنامين واذا شفتي نفسج نمتي عقب ماتاخذينه فهذا لان الشغله صارت عندج نفسيه فحاولي تتركينه بس عشان تجنبين جسمج هالمواد الضاره الي راح تترسب داخلج ... كوب حليب دافي ممكن ينفع بالليل او مثل ماقالو الخوات جربي الاعشاب او الزيوت العطريه المهدئه احسن من هالمواد السامه والضاره

 

[:: عائشه بقلبي ::]

اول شى

توضى وصلى بالليل وادعى الله يفرج همك بتحسين براحة عظيمه جدا
وتالى اخذى روبك واخذيلج دش دافي وربطى براس الدش اعشاب بابونج وزعتر ولافندر واذا ما حصلتى لافندر ميخالف زين لافندر وشغلى شموع لافندر بدارك قبل النوم وخليها ظلمة الدار ماكو ليت يساعد عالنوم
وشربي كوب حليب ساخن قبل النوم وفرشى اسنانج وسوى مساج لرسج واستغفري وايد وايد وايد الله يفرج همك ويريح بالج وانا جربت اللبن وايد يدوخ وينوم
بس تجنبي المنبهات من المغرب والحلويات لانها تنشط الدماغ
وجربي التنفس العميق وايد بترتاحين

وممكن تطرشين لى عالخاص مشكلتج اذا اقدر اساعدك مراح اقصر معك والله يوفقك ويفرج همك

 

[Satanicly]

مشكورين وايد وايد عالمرور.. و قمت أشرب حليب قبل النوم و فعلا يدوخ و يريح الأعصاب

 

[softlady]

اشوه انج حاطه صوره مارلين لاني كنت بقولج عنها

شوفي الصدف سبحان الله


اسمله عليج تدرين مارلين اشلون ماتت

انا سمعت قصتها كامله بالتلفزيون

ماخذه منومات قبل النوم

وهالشي يخفض من تدفق الدم للقلب لان يسوي خمول عام بالجسم

اسمله عليج

ترى مو زين القلب يوقف !!!!!!

ديري بالج

اقري المعوذات واقري قرآن وايد

ونصيحه بعد بذلي مجهود زياده عشان اذا صار بليل تكونين تعبانه

لعبي رياضه مثلا

واذا طلعتي من البيت وهالكلام عن تجربه حطي التلفزيون على قناه المجد للقرآن وعلي الصوت

انا مجربتها هالطريقه


ماتشوفين شر



بعد قلبـ قلبكمـ

مع تحياتيـ softlady


.

 

[Dloool_q8]

اانا كنت مدمنه عليها وما انام الا عليها نفسج بس ريلي شالها عني لمن قمت بالغصب انام 3 او 4 لمن قدرت اعدل نومتي وما استعمله لانها مضره اهي للضروره والشي لا زاد عن حده ينقلب ضده

 

[القطانيه]

حبيبتي استغفري لين تدوخيين مجربه

 

[NoWay2know]

صح كلامهم، الادمان مضر للصحة، وحاولي تبذلين جهد كبير حتى تقدرين تنامين، يعني حاولي اتعبين روحج سوي اعمال اشتغلي تلقين روحج تعبتي، مثلا بدال ما تفكرين ومضايقج التفكير،، اقري قرآن يهدي نفسج، اقري قصة
حاولي تلهين نفسج

 

[letayef_q8]

لا ديري بالج حبيبتي انا كنت مدمنه بندول مو زين ترى كثرته صج يقولون نص حبه باليو مفيده بس الدكتور يقول مو زين للكلى وللمخ










ويعطيج الف عافيه