ماما غيرت كلامها فجأه !!

[دلوعةمآمآ]

السلام علييكم ورحمة الله وبركاته

حبيباتي كويتياات انا اعتبركم مثثل خواتي

بقولكم موقف صاارلي امس مع ماما صدعت من كثثر مافكرت بكلامها

البارح اسولف مع ماما عاادي وتناقش بكذاا ساالفه قالت ماما اذا انخطبتي وشفنا الرجال كوييس راح اخليك تتزوجين

طبعاً استغربت هيَ قبل كانت ترفض الخطاب عششان اكمممل دراستي

وهذا كان شرط لي مافيه زواج إلا بعد ما اخلص دراسه وكانت قبل مأيدتني لأن اخاف اتزوج واحد يكره اللي تدرس او اخاف ينزل مستواي لأن كثيير احب العلم

بس فجأه تغير رأيها !! لما عصبت وسألت لييه ؟

قالت ياحبيبتي ماايعز الحُرمه إلا الرجال مو الشهاده بُكره تعلقيها على الحيط مثل فلانه وفلانه <قامت تذكر لي اساامي بنات ماتوظفوا وهُم معاهم اعلى الشهادات

وشوفي فلانه معاها اعلى شهاده ولاهي متزوجه وكانت ترفض الخطاب عشان الدراسه والحين عمرها في الثلاثين ولاتزوجت ! وشوفيها الكل ينظر لها بشفقه !! تقولي الحُرمه لو معها اعلى الشهادات وبدون زوج مسكيينه!!

تقولي بكره لاسمح الله نموت انا و ابوك ِ واخوانك يتزوجون راح تكونين خدامه عند زوجاتهم لازم يكون لك زووج يحمييك ويكون سند لك وبيت مُستقل يغنييك عن كل شيء

وتقولي لاتخافين بحط من شروط الزواج انك تكملين دراستك <اعرف كثثيير من صديقاتي حطوا الشرط ذا لكن بعد الزواج ,ازواجهم رفضوا يكملون دراستهم!

ومابي يصيير لي اللي صار لهم

اتذكر قبل لما انخطب كانوا الخطاب يشرطون اني مأكممل دراسه !!

وكانت امي ترفضهم تقول مستقبلك اهم من الزواج

لأنها تعرفني راح اهممل الرجال وانشغل بدراستي لأن كل شيء ولا الدراسه عندي


بناات انا انصدمت بكلامها وانو تغير عن قبل ! أخاف انها ملت مني وانا وحيدتها ماعندها غيري شلون تممل !!؟

مدري اييش غير رأيها !! خوفتني مرره

طيب صبايا الحق مع ميين انا ولا هي

الله لايحرمني ويسخخرها لي يارب

ارائكم خوواتي

 

[M!SS.LOBY]

لا حول ولا قوة الا بالله

 

[M!SS.LOBY]

الحق مه أمج لان لها نظرة بالبيئة اللي عايشين فيها
لا تحاتين احساس ام ومشاعرها تفكر بمصلحتج ومصيرج الله يحفظها لج يارب

 

[عـيّــآره]

الحق مع امج طبعا الزمن الحين تغير وايد وفرص الزواج قلت وطموحج باصرارج ​

توصلينه يعني لما تتزوجين وماتقصيرن بدورج ك زوجه مستحيل يوفق زوجج ​

بطريقج وبعدين امج ما ملت منج بالععكس من كثر حبها لج تبي تامن مستقبلج ​

بحياتها عسى الله يطول بعمرها اللي غير راي امج فجاه امور الدنيا الغريبه ​

وصدقيني الام لها نظره لحياة بنتها ولها نظره بالعايله كامله يعني الام والاب يحسون ​

بالمستقبل يعرفون انه بعد عينهم كل واحد من اخوانج اشلون بيتصرف معاج فهي ​

شافت انه من صالحج تتزوجين وهذا قلب الام مايختار ومايقرر الا الشي اللي فيه ​

صالحج وخير لج ​

وبعدين لاتتوقعين بتزوجج اي واحد والسلام عاد انتي دلوعتها اكيد بتختار لج ريال ​

كفوو بمعنى الكلمه ​

(( دلوعه ماتخيلج منزله موضوع بعد الزواج اشلون اسووي ليله حمرا حق زوجي ​

ولا موضوع ريلي نسى عيد زواجنا وما جاب لي هديه هههههههههههههه ياربي ​

بضحك عليج ضحككك ))​

حبيبة ألبيييييييييي​

 

[مودي كويتي]

الامهات كل ماتقدم فيهم العمر يحاتون اكثر واكثر وتتغير ارائهم طيب انتي أي مرحله الحين ؟ عادي تقدرين تتزوجين وتكملين ياكثرهم المتزوجات اللي يدرسون ومتفوقات وموشرط اللي تتزوج تهمل الدراسه او العكس بالنهايه يرجع لشطارتك وتنظيم وقتك موفقه/

 

[عـيّــآره]

لا حول ولا قوة الا بالله

^^

مس لوووبي عندي استفسار صغيرون بس اخاف تزعلين

:eh_s(22):

​

 

[Pinky -cat]

اامج تاثرت بالمحيط اللي انتو عايشين فيه ، شافت امثله ومرت عليها نماذج جبرتها توجه تفكيرها لصوب ثاني ، وطبعا االلي
اهوا الزواج اذا انتي مو صغيره تزوجي بس اذا حيل صغيره لا حبوبه درسي وكل مرحلة لها جمالها ولها اهميتها في حيات
البنت.

ما تغيرت الا لانها شافت هالشي لمصلحتج وافضل لج لانها تخاف عليج

 

[smo0o]

يمكن امك معاها حق

اعرف بنات كثير تزوجو و هم يدرسون و تخرجو و أخذوا أعلى الشهادات

البنت الذكيه تقدر توفق بين بيتها و دراستها

 

[طموح دائم]

من خوفها عليج صدقيني والزمن صار يخوف لاتلومينها تري كلنا تتغير افكارنا وآرائنا بعد مده حسب الظرف والتغيرات المحيطه فينا وانا باعتقادي اهي معاها الحق واللي مصره علي الدراسه تكمل مايهما شي كانوا بنات معاي شكثر متزوجين وحوامل بعد مامنعهم شي بالعكس كانوا قمه في الاجتهاد والمثابره والحين تري الزوج يبي المتعلمه عشان تتوظف وتساعده منو ملحق علي المعيشه الحين

 

[Canon~]

عادي اذا جاك واحد ماينرد

ويبي الزواج وانتي تدرسين


عادي اخذيه ،،،ماتوقع مافي احد مايحب الدراسه


انا تزوجت وانا بالجامعه وقسمي صعب والحمدلله نجحت ورفعت معدلي بعد<بطله


ونصيبك حصيبك سواء تدرسين او مخلصه


وامك معها حق تبي توفيقك وسعادتك...

 

[مدّهره !]

أشووف أمك معاهاا حق الزمن والظروف تخلي الواحد يتغير

وأنتِ بس صدعتِ لأنك كنتِ ضاامنه راايهاا معاك ولماا تغير راايهاا إنقهرتِ ههههه

 

[الغضى]

لا بالعكس راي أمج صحيح
اذا تقدم لج واحد زين وعادي تكملين دراستج عنده
مو تتركينها لازم توافقون اشحقة ترفضينه ماكو سبب
ويكون زواجكم ع اخر الدراسة وبس.

 

[طريق السعاده]

البنات قالو الي بقوله ولا رح اكرر كلامهم خصوصا عياره وكلهم نفس الراي تقريبا

دلوعه ماما الله يوفقك يارب ويكتب لك الخير وامك ماملت منك كل المساله انها تبيك تفكرين بنفسك ومستقبلك وتبي لك الزين

مستقبلك كحياه زوجيه ومستقبلك المهني والدراسه مو متعارضه تقدرين توصلين للي تبين بعد الزواج اذا انتي قلبك بالدراسه وتحبينها
لاتقارنين نفسك بصحباتك لان اغلب البنات تتكسل وتصير تحط اولوياتها زوجها وحياتها الزوجيه وتنسى نفسها وتصير تقول ودي ادرس بس ماحصل

 

[امـ خــزامـى]

بالنسبه لي الزواج قسمه ونصيييييييييييب

انا كنت ارفض رفضا قطعيا اتزوج وخبط لصق تزوجت

كل شي مكتوووب لك بيصير لك

انت وكلي امرك لربك واستخيري بكل خطووه

وربي يكتبلك الخير

 

[ترف بابا]

ماما صح

 

[مذهلة2013]

ربي يوفقج حبيبتي
وكلام امج صحيح ترا فرص الزواج قليله وحتى لو جاتك فرصه ماتظمن الريال زين
استخيري قبل كل شي
موفقه

 

[عبوه]

عآدي أنا تزوجت وكنت آدرس ..

و زوجي ساعدني بفترة دراستي كثيير الحمدلله كان من حظي هههههههه ..

آذا تقدم لك شخض كفوآ و يستحقك وآفقي ، وعشان تضمنين حآولي يكون فيه حوار وتفاهم بينكم وبينه على دراستك .


الله يوفقك و يسهل لك ..

 

[عبق الزمن الجميل]

شوفي حبيبتي الزواج مهم الشهادة مهمة
امك معها حق تحاتيك بكرا لما تتزوجين وتر بين ببنات راح تعرفين الإحساس بالقلق والخوف
اذا جاءك ابن الحلال المناسب لاترفضيه اقبلي وأشرطي عليه انك تكملين دراستك
هذي أنا عندك خريجة هندسة تزوجت بعد ما خلصت دراستي مباشرة وربي كتب لي الحمل مرت الايام وصارت بنتي سنه قلت بشوف لي شغل لكن ربي أراد لي بحمل ثاني وبعدها بدئت انشغل بعيالي وفضلت أني ابقي معهم واربيهم بنفسي وشهادتي بالدولاب بس اقول الحمد لله أني حققت أمنيتي بالدراسة وب الزواج والأطفال وكله فيه خير من الله والحمد لله فتحت لي شغلي الخاص في بيتي من سنتين والحمد لله ربي بارك لي في كل شي
امك لولا محبتها لك ما كانت قالت لك الكلام هذا
اسأل الله ان يوفقك ويسعدك

 

[granted]

اييي
انا اقولج ليش غيرت كلامها فجاة
شكله في حد يالج لقطه مثل مايقولون وماتبي يروح عليج
يلله بالمبارك الله يوفقج لا ترفضين

 

[Patcholli]

كله نصيب

رايج ولا راي امج اثنينهم ماراح يفيدون لان نصيبج مكتوبلج من يوم نولدتي فيه حبيبتي