ماعندي غير الله ثم انتو. (ابي حل)

[بحور الذكريات]

السلام عليكم ورحمة الله وبركاته

مرحبا يا الحبيبات بعد الله مالي غيركم
ابي حل بمشكلة ولدي وكره للمدرسه ؟
والله يابنات لدرجة اني احس راح اموت من قهري منه :eh_s(11):
اهو بمدرسه خاصه (اجيال ) لو عاديه والله ما اوديه لانه روضه
على طول يبجي واذاكلمته وتفاهمت معاه تعرفون اللي مو مهتم يسمع لكلامي . مره وحده من الخوات عطتنا فكره وسويتها يومين اوكي وبعدها ولا كاني سويت شئ
والله لدرجة بس يصير الليل يقعد يبجي اذا قتله ليش يقول اخاف انام وبعدين توديني المدرسه
الله يخليكم :yaaaaaarb:عطوني حل اسحب اوراقه وتروح نص لفلوس ولا عادي كل الجهال جذي
والله ان صار يومنا كئيب بسبته ابوه مسافر بره والحمل علي بروحي مع انه مسكين كل يوم الصبح يدق ويقنعه
ولا فيه امل

 

[قانونية]

ترى عاااااااااادي كل الجهال جذي

بس انتي حاولي اذا رجع من الروضه تمرين محل الالعاب وتشترين له هديه عشان يستانس ومره وديه الجمعيه
ومره مطعم
ودايما اشتري له العاب من ابو 100 وغلفيه قولي هذا من ابلتك الي بالروضه

وترى عااادي بعدين يتعود

 

[شيري]

وعليكم السلام ورحمة الله وبركاته

ولدك بأي مرحله دراسيه؟

لابد من وجود سبب لكره الولد للمدرسه ..يمكن
1-طلاب بصفه أو أكبر منه مأذينه .
2- أبله شاده عليه وكره المدرسه بسببها .
3-ينام متأخر ومايشبع نوم فيقوم تعبان ومعصب وما يرضي يداوم .
4- ماده صعبه عليه وكارههالنه موفاهمها فكره المدرسه منها .

شوفي اي سبب ممكن يكون بولدك واتجهي للأخصائيه النفسيه بالمدرسه وشرحيلها المشكله واطلبي منها انها تراقب ولدك وتشوف شنو مشكلته ..هذه شغلتها وولدك بمدرسه خاصه وهذا من حقك ومن حق الفلوس اللي تدفعينها لهماخذي ولدك وطلعي معاه الالعاب ولما يخلص لعب ويستانس قصيله قصه ولد كان مايحب المدرسه لأنه عنده مشكله فيها وما علم امه وبعدين قال حق أمه مشكلته وساعدته وصار يحب المدرسه ومستانس ...وممكن تجهزيله علبه كاكاواو العاب من ابو 100 بعدد الطلاب وتخلينها للصبح واليوم اللي يتعسر فيه ومايرضي يداوم قوليله اخذ هالكاكاواو الالعاب ووزعه علي الطلاب بالصف راح يستانس ويقوم وبلغي ابلة الصف

الله يهديه لك ويحببه بالمدرسه:aha:​

 

[بحور الذكريات]

رد : ماعندي غير الله ثم انتو. (ابي حل)

اهو بkg1
والله بالعكس مدرساته وايد حبوبات بس اهو طبعه ملول
يبي بس اوديه شوي واطلعه مايبي يتاخر
ومشكورين ياالغاليات على اهتمامكم بموضوعي وماتقصرون وعسى الله يفرج عليكم

 

[ام زهره]

انا بنتي كانت نفسه ماكنت ادري شسوي لمن عرفت السبب
كان في مساعده الابلة شديدة ووقت الاكل تجبر اليهال ياكلون فاهيا تقعد تبجي وما ارتاحت الا لما وصيت الابلات (وغيرت صفها )
ونصيحة لاااااااتتاخرين عليه كوني اول وحده تاخذ ولدها عشان لايخاف
واهم شي توصين الادارة يعاملونه معاماه خاصة عشان يحس بالامان

سوري طولت عليج

 

[شيري]

بحور الذكريات...أنا أبله روضه سابقا وأقولك ولدك عنده مشكله بالروضه مافي شي اسمه طفل ملول ..الطفل لو حب الروضه بيحب انه يداوم ويلعب كلمي أبلاته ونبهيهم ماتدرين يمكن جدامك شي ومن وراك شي يمكن شادين عالولد أو أحد من الأطفال مضايقه ..أنا اقترح عليك أنك تنقلين ولدك من صفه واعتقد انه بيتغير للأفضل ..جربي ماراح تخسرين شي اذا تبين اي مساعده تواصلي معاي بالخاص:aha:

 

[بحور الذكريات]

رد : ماعندي غير الله ثم انتو. (ابي حل)

جزاكم الله خير والله اني انا بيدي اوديه وبيدي ارده
انا اروح اشوفه بشاشات عرض حاطينها عند خصائيه مادري منو
واشوف الوضع طبيعي

 

[الفتاة السماوية]

نصيحة لوجه الله لا تستسلمين أبداً لان اذا ما خذى عالوضع الحين راح تتعبين معاه وااااااااايد بالابتدائي

انا بقترح عليج هالخطوات وربي يفرجها عليج :

1) لما يكون رايق ومرتاح لميه وحبيه وقوليله حبيبي ليش ما تحب المدرسه شنو اللي مو عاجبك فيها ، واسترسليه بالكلام عشان تعرفين وترتاحين.

2) اذا طلع السبب تافهه وبس جذي يدلع وماله خلق المدرسه حبيبيه بالمدرسه وكل يوم قوليله قصه عن المدرسه ووناستها ولعب الاصدقاء مع بعض، انا كنت اسوي جذي اخليه قبل لا ينام واحنا بالفراش يندمج ويقعد يتخيل واقوله كل الاطفال يحبون الروضه لان الروضه تخليهم يتعلمون كل شي ويصيرون شطار وكبار اما اللي يقعد كل يوم بالبيت ما يستفيد شي.

3) لازم تكلمين ابلاته وتقوليلهم هالمشكله وتحرصين عليهم بالاشياء اللي اهوى يحبها يعني اذا في لعبه يحبها يلعبونه اياها اذا في قصه يحبها يقول له اياها اذا مثلا اصدقائه اللي قاعدين يمه ما يحبهم خل يغيرون مكانه وانتي سأليه يبي يغير صفه ويروح عند أبله ثانيه ولا مايبي.

4) دايماً فهميه ان خلاص ما في مفر انا سويت هالطريقه ودشت مخه كله اقوله خلاص سجلوا اسمك بهالمدرسه ما يصير تغيب كلش لازم كل الاطفال اللي مسجلين يحضرون. وقوليله اللي ما يغيب تمشي الايام بسرررررعه ويخلص الاسبوع ونوصل لي الويك اند ونطلع ونستانس.

5) سوييله لوحة النجوم بالبيت حطي اسمه فووق وتحت سويي جدول بالايام كل يوم ما يبحي فيه حطي عليه نجمه واشتري هدايا حطيهم بعلبه كل يوم عطيه هديه بسيطه وبنهاية الاسبوع لعبه كبيره يحبها.

6) سولفي مع اصدقائه جدامه وسأليهم تحبون الروضه ليش تيون الروضه (طبعا اختاري اليهال المستانسين) وخلي اهوى يمج يسمع كل شي.


وملاحظة : لا تعودينه على الغياب فهميه ان الغياب شي مو سهل ومو أي أحد يقدر يغيب متى ما يبي

والاهم : اقري عليه يومياً وارقيه حطي ايدج على راسه كل يوم قبل لا يروح المدرسه وقولي: أعيذك بكلمات الله التامة من كل شيطان وهامه وكل عين لامة

ووقت النوم قوليله قصه حلوه عن المدرسه ولما تخلصينها قولي اذكار النوم بصوت هادي عشان يرتاح وينام بإذن الله.
ولما تقومينه الصبح لا تقوليله يله قوم مدرسه لان من يسمع هالكلمه راح يتعسر وما يقوم نادي باسمه وضحكيه ودلدغيه ولازم يتريق وخلج بشوشه ولا تحسسينه بالتوتر.

ومثل ما قالت الاخت خل ينام مبجر عشان يشبع نوم

يا حياتي والله حاسه فيج الله يفرجها عليج وتبشرينا يارب بالتطورات يارب

 

[الفتاة السماوية]

دخلي هالموضوع يفيدج ان شاء الله

http://www.q8yat.net/showthread.php?t=696363