ليش اغلب البنات صاروا جذي ؟!!!

[هب العطر]

السلام عليكم و رحمة الله و بركاته

حبيباتي في منتدى كويتيات ,,


ياليت تقرون موضوعي و تقولون لي ,, ليش أغلب البنات صاروا جذي ؟!!


اول : قبل


البنت لها دور في مجتمعها ,,

البنت تفكيرها بطموحاتها و أحلامها

البنت تجتهد و تكافح و تتميز و تبدع و تعطي

,,


اول : قبل


البنت منى عينها تحقق انجاز

تنصر مظلوم


تنتصر على ظلم


تعيش حياتها بهدف سامي .. و طموحات عالية

و تتضايق لأن المجتمع ما يخليها تروح المدرسة . ... قلبها معلق بالعلم .. و الثقافة


تفكيرها انساني راقي ...

,


البنت أول


قوية ...


صبوره ...


تتحدى المستحيل ..


قصة حياتها قصة رائعة ... قصة انتصار ... و قصة نجاح , باختلاف صور النجاح و مجالاته


لكن تعيش حياتها بهدف ,,, و تموت عزيزة مكرمه ...



ان حبت : حبت بشرف

و ان حبت : حبت اللي يستاهل

اللي يركض وراها ويبها بالحلال


و اذا تزوجت : شالت الريل بعيونها لكن ( بحدود ) و ( عزة نفس )

ما يعجبها ( السافل ) و لا ( راعي الحريم )

و ما ترضى ( بالغلط )


اذا ريلها ترك الفرض ( طاح من عينها ) !!


إذا ريلها مشى للحرام و الربا قالت له : نصبر على الجوع و ما نصبر على النار ...خاف ربك ..


تعيش عزيزة .. و تموت أعز

لأنها عارفة قدرها





ْْ~~~



البنات الحين ,, صحيح بتقولون لي صاروا يحملون شهادات عالية و عندهم طموحات يكملون دراستهم

و فيه منهم كاتبات و صحفيات و شاعرات و عالمات


لكن هذولي هم ( القلة القليلة فقط ) !!!!


و حتى من القلة القليلة : فيه ناس ماخذه الشهايد عشان الراتب و المعاش


انا اتكلم عن الشغف بالمعالي , و الامور العالية بالحياة



الباقي : نفوسهم صارت ( قزمه ) !!



تفكيرهم محصور بشيء واحد و بس



( الرجل ) !!



اشلون تصيده !! ؟


بحلال !! بحرام !!! بعلاقات !! بس المهم تصيده !!!


تبذل عشانه كل شيء : قلبها !!! عواطفها !!! تفكيرها !! و دينها !! و شرفها !!!!


تشوف ان قيمتها ( الأساسية ) لاحظوا - بأن يكون عندها ريال !!


واحد تعرفه !! او تكلمه !!!



شوفوا المصايب و البلاوي الله يكفينا الشر ,,


تلاقينها متعلمه و فاهمة و دارسه , مع ذلك تكلم و تطلع و آخر شيء تتوهق


و لا كأنهم يسمعون اخبار او يشوفون مسلسلات او يقرون بالجرايد


و لا كأن فيه رب يحاسبهم باجر


و البعض منهم يفتخرون بها الشيء !! و يتطنزون على اللي ما عندها رفيج

و يقولون عنها : مو مرغوبه !! مو حاصل لها !!!


كأن الحرام شيء لذيذ و سهل و مرغوب !!!


لها الدرجة صرنا رخاص !!!


اذا طلعت : اول شيء يطري على بالها ,, : اشلون تكون مايعة و رخيصه عشان الذيابه يركضون وراها !


( لاحظوا انا قلت الذيابه , لأن الرجل فعلا ما يركض ورا الساقطات ... اعتذر عن هالكلمة )



شوفوا الملابس : الصدور طالعه برا ... الفخوذ طالعه برا ,,,


الجسم مرسوم رسم من الملابس الضيجة و الهلاقه , و الشاطره اللي تتفصخ اكثر !!


اذا شافت ريال بوزارة او دائرة حكومية او معهد او اي مكان : اول شيء يطري على بالها تكون ( سيكسي ) و ( لذيذه ) عشان فلان يطالعها !! او علان يشم عطرها !!!


شوفوا المياعه بالكلام !! شوفوا التكسر !! و تسبيل العيون !! و الترمش ! و تذبيل الشفايف !!!



او عشان تغيظ فلانه ,, اهي عندها رفيج و فلانه ما عندها رفيج !!


شوفوا المستوى اللي وصلنا له !!!


شوفوا الملابس اللي يلبسونها !! البنت كبر زبوط النقعه ,,, ميك اب كامل ,, و حافه الحواجب و اللبس حدث و لاحرج


و الهدف ( تصيد ريال ) و ما تدري انه هو اللي بيصيدها صيده قشرا و يخليها تعظ اصابع الندم !!


...



التفكير : محصور بـــ ( ريال ) اذا مو متزوجة , تبي تتزوج


و بعض البنات - البعض مو الكل - تبي تتزوج اي واحد !!

من كثر ما المجتمع النسوي ( لان الرياييل نفسهم مو شايفين جذي , بس الحريم اللي عندهم هالنظرية )

ان اللي ما تتزوج مبجر غير مرغوبه !!


وويع !!



و خايسه !!


و حرام تكسر الخاطر !!


تدرون ليش ؟ لأن تفكير الحريم صار بنقطة واحدة فقط بالحياة , ما يشوفون غيرها !!!


و بعملية واحدة بالحياة ,, ما يفكرون الا فيها !!!


عشان جذي تشوفين الفشل الذريع في المدارس , خصوصا المتوسطة : أغلب البنات - الاغلبية مو الكل - تفكيرهم مو ويا الدراسة

تفكيرهم ويا شيء واحد بس ...

متى ؟؟

و اشلون ؟؟


و شبيصير ؟؟

تفكيرهم ( محجوز ) حق هالشيء بس !!


لأن المجتمع - الاغلبية منه - صار توجهه هالشيء , و تفكير الناس اصبح منحصر بالشيء هذا


قعدي مع اي قعدة حريم , شوفي سوالفهم !!! اسأليهم عن اهتمامات ثانية ؟؟


(( ماكو ))


طموحات ثانية ؟؟


(( ماكو ))


جم جزء حافظة من كتاب الله ؟؟ و هل تفكرين تكملين حفظج ؟؟


(( ماكو ))


لأن الدنيا , و حلاوة الدنيا , و ( القيمة الحقيقية للدنيا ) بنظرهم : شيء واحد بس !!!


اذا مراهقة : تبي تفتن و تلفت النظر

اذا متزوجة : تبي تصيد الريل لا يطير

!


مستعدة تبذل له كل شيء


حتى لو هو ( سافل ,,, و بايعها ,,, )


حتى لو هو ( ما يصلي ) و مستحيل تنصحه عشان ما ( تجرح مشاعره ) و يطير !!!


فنون الارضاء بكل الاشكال


!!!!


حتى انعكست الفطرة !



رياييلنا من كثر ما قطينا ارواحنا و ارخصناها , استهانوا فينا !!!


اي و الله صج



رياييلنا عرب و بدو ,,


و العربي و البدوي كان قبل ( يحارب قبايل ) عشان اللي يحبها !!


يعني فنون الحب و الغرام العفيف الحلال , موجودة في فطرتهم


( لكن ليش ما يعطوننا ويه ) ؟؟؟


لأننا ( حاذفين روحنا عليهم حذف و ملوعين جبودهم )


لأننا ( كاشفين لحمنا بالشوارع ) !!


عشان جذي يحسوننا مالنا قيمة , واول و تالي لازقين فيهم لازقين فيهم :ggdw:


ما تشوفينهم ورا الاجنبية يراكضون :eh_s(4):


لأنها للآن عارفه قيمتها , و عندها عزة الانثى .


احنا - الاغلبية - لا للأسف


بنموت عشان الريال !! و تنحرق الدنيا و اللي فيها !!


و الله قريت ان وحدة تقول دمعة امي و ابوي , و لا دمعة حبيبي !!


,


رفيجاتي بأعياد زواجهم - و لو انه محرم شرعا - بس تجاوزا بقول لكم الظاهرة


( هم ايبون حق رياييلهم ورد !!!!!!!!!!!!!!!!!!!!! )


و الريل و الله مو داري !!


من متى ان المره تخطب ود الرجل بإرسال الزهور !!! شنو هالفطرة المعكوسه !!!


عادي ان الزوجة تهدي لزوجها , و لها اجر ان شاء الله

بس مو دائما هي تهدي و هو كاشت !! مو هذا الاصل !!


و العيب مو بالرياييل , العيب فينا احنا


ما عرفنا قدر ارواحنا ,,


ترا الريال ما يحب المره اللزقه !! المره اللي حاذفه روحها عليه !!

و هذا كلام حريم وايد .

الريال يحب و يحترم المره العزيزة ... المميزة ... اللي تخلي عقله ما يوقف تفكير فيها

و تعرف كيف تحترم ذاتها و تحترم كيانها

ما تفرم قلبها و تحطه بصحن وتقول للريال تفضل !! هذي ما يحبها , هذي يرخص فيها و يكشت فيها .


,,


ياليت الكل يرد , لأني احس هذرت وايد :eh_s(10):

 

[PuPa^^SWeeT]

ماشالله علييييج


يسلمووووووووووووووووو

 

[KOKO_284I]

لان قل الوازع الديني لان نسوا عاداتهم وتقاليدهم لان لكل غلطه اجابه صريحه عندهم .. اهلنا عقودونا .. عندنا تفكك اسري

مشكوووووووووووووووووووووووووووووره وايد عالموضوع

 

[نفهمها صح]

احس هذرت وايد :eh_s(10):
اخذي راحتج هذره مفيده جدا
صحيح كلامج ومشكووره
الله علي حيا ءقبل​

 

[ملــحْ !]

مآشآالله

عيني عليج بآرده

وهذآ تفكككييير صصصصصح ..
ومفروووض الكل نلتززم فييييه ,,
والله يضيق خلقي لما اشووف البنت تخز بالرييىييل .. > وييييييييع نقلبت الايه ,,
وتخزه مع تمييييييييع

شي يضيق الخلق


الله يوفققج ويعطيييييج ع قد نيتج حبوووبه ,,

 

[CALM]

للاسف بوقتنا هذا البنت اترزز وتقط فيسها عند الرجال وفي بنات اعوذ بالله منهم علي ذمة رجاجيل ويكلمن ودج تعدمينهم

 

[اشراقة المحبة]

كلامج عين العقل ... يسلم راسج

 

[مسك حياتي]

الله يهدي الجميع ...

 

[ترانيم القصيم]

أحسنتِ أحسنتِ أحسنتِ أحسنتِ و تصفيق حاااااااااااااااااااااااااار لفكرك الحي , مااااا قصرتِ يا الغاليـة :ggdw:

يسلم فمك على هالدرر الله يرفع قدرك , أعجبتيني لامنك تطرّقتِ للعلاقات المحرمة ,

ألف ألف ألف شكر بصراحة ما شاء الله عليك ,

على كثر البلاوي آللي تصير , و كثيييييييييير شباب طلعوا بالتلفزيون و قالوا :

يا بنات افهمن ترانا نخاوي البنت بس ما نتزوجها مستحيييييييييييل و كلنا حنـا يا هالشباب بنفس التفكير

يضحك عليها , يكذب عليها , يستغل مشاعرها و عواطفها , باختصار شديد الشباب يعتبرون البنت

و السموحة على اللفظ لكن هذا مهوب كلامي والله :

يعتبرون البنت ( مرحاض ) يفرغ فيها شهوته و لامنه قضى يسحب عليها سيفون !

فـ إلى متى الثقة العمياء في الشباب ؟ إلى التى الإستهتار بالعرض و الشرف ؟

ويـن الحياء , البنت المسلمة بطبيعتها خجولة و تستحي من متى البنت تتجرّأ إنها تناظر برجّال

عشان هالمرة تكلمه و تحتك فيه ليه يا بنات هانت عليكن أعراضكن ليييييييييه :eh_s(16):

شوفوا المقطع هذا

http://www.youtube.com/watch?v=taTLOPMmJE8&feature=related

احترامي و تقديري

ترانيم القصيم

 

[الينبوعة]

مشكورة يعطيج العافية موضوعج جميل وان شاء الله وحدة تفيد الثانية ​

 

[كلي أنوثة]

صح لسانج ماشالله عليج وصفتي الي يصير بدقة..الكل يفكر بالريال يا رفيج (استغفر الله) و الا زوج...مافيه وحدة تفكر شلون ترضي امها و ابوها شلون تسعدهم..شلون تبرهم و شلون ترد لهم الجميل على تعبهم و بالتالي ترضي ربها بدال ملاحق الريال اذا طعتي ربج و ارضيتيه بتييج الدنيا بكبرها مو بس الريال...صاروا الحريم او البنات كلهم يفكرون بطريقة وحدة (الكشخة و توابعها من جناط و سيارة و ملابس و غيره)و مثل ما قلتي حتى الي تكمل دراستها يا عشان البرستيج او المعاش الي يعينها على الفرارة بالاسواق او انها فاضية ماكو شغل بتكمل دراسة عشان تسد الفراغ...اتوقع سبب ان الحريم يفكرون بطريقة وحدة ..هو الايفون و البلاك بيري..لان البروكاستات و السوالف بسرعة تنتشر..و الواحد قام ما يفكر فيها شنو الي يمشي مع مبادئه و مخه و شنو الي يعارضه..فمن جذي صرنا نسخ من بعض.

 

[Lovely_R]

والله كلامج عين العقل اللهيوفق بنات المسلمين ويهديهم ويستر علينا أجمعييين

والله العظيم من اللي اسمعه واجوووفه صج احس روووحي جنه انااا اللي غريبة وغلط في غلط.

 

[المتميزة@80]

ماشاء الله عليج تبارك الرحمن , والله كلامج كله عقل وسنع ,

جان زين بكل بيت في وحده مثل تفكيرج جان احنا بخير ,

الدور علينا احنا نعلم بناتنا وخواتنا الصغار ونوعيهم وكل وحده تشوف الغلط تحاول تصلحه سواء ببيتها او بيت اهلها باسلوب حلو ومحترم , عسى الله يقدرنا يارب

الله يهدي ويصلح بناتنا وعيالنا يارب ويهديهم وينور بصيرتهم .

 

[بنت احلام]

عجيييييييب موضوعج عسى الله يوفقج يارب

بس الي عجبني اكثر شي بالموضوع اخر فقره
والي هي ليش صرنا نقط روحنا على الرياجيل وين عزه النفس انا اقصد (الزوج)

اجل تقولين هي تجيب له ورده ههههههههههههههههههههههه !!


تكفين نبي مواضيع جذي خصوصا عزه النفس وهالسوالف
احس الريال مل مني من كثر مااتلزق فيه
ابيه هو يركض وراي شلون /:



هههههههههههههههههههههههههههه

 

[هب العطر]

هلا و الله حبيباتي سعيده جدا فيكمو بكلامكم الطيب


المصيبة : ان الشيء اللي يسوونه راح ( يطيح حظنا )

اي و الله صج !!

راح ينتشر مبدأ ان ( البنات محذفات بالشوارع و على قفا من يشيل )



تلاقين الريال حتى بأيام الملجة ما يراعيها و يعطيها الكلمة كفخ كفخ


و احيانا ينرفزها


و احيانا يحاجيها بنزر



مع انها ( ايام الملجة ) يعني ايام الدلال و الحب


مع ذلك , نسمع هالقصص ..



لأنهم بدوا يشعرون ان البنات لو تعومس ابوها , لازقه لازقه فيك !!


و بدا الريال يرخص المره ... و يعاملها مثل البهيمه


شوفي الزوجات اللي يانين ينون على رياييلهم ( و انا ما اقصد الزوجة اللي تخاف الله في زوجها , لا , اقصد الزوجة اللي لو يقول لها قطي روحج بجهنم ما تتردد )


شوفي هذيلي الزوجات : تلاقين الريل مسوي فيهم العجايب ,, و الغلط مو منه ترا ... الغلط منهم !



شعور ( الرخص ) اللي مخلينه يخيم عليهم


شعور ( اللزقه )


شعور ( الشفاحه ) ههههه , الريال يحس هالمره ما عمرها شافت خير , شوي شوي و تدش المصحه و السبه من كثر ما تلوحق فيه و تكبس على انفاسه .



من جذي ... الريال الخليجي ما يحترم الخليجية !!!


لأن الخليجية تسوي جذي . . تحسس الريال انها ولا شيء


و الغريب : ان الريال يمكن في بداية حياته معاها يحس انها غالية و لها قدر ,, و هي بنفسها تقلل من قدر روحها ,, و تحذف روحها حذاف


تلاقينها من ايام الملجة , تمشي مثل المسبهه ... تمطره مطر بالهدايا و العطور بمناسبة و بغير مناسبه !!!



نجح : يابت له هدية


تخرج : يابت له هدية


فريق الكره اللي يحبه فاز : يابت له هدية


فتح سيارة يديده : يابت له هدية


بنت خالة عمة ابو يد زوج ابو خالته يابت ياهل , يابت له هديه هههههه



الريال بدا يبقق عيونه ( هذا اشفيها ؟؟؟ )



ما يظل مسج حب و غرام وهيام الا ارسلته


ما تخلي بيت لبدر بن عبد المحسن الا و طرشته ههههه



,,



هذا ايام الملجة ,,, << و ترا بعضهم حتى قبل الملجة تسوي جذي , take it easy خخخخ


شوفيها لما تتزوج ,, شوفيهم بالمولات


الاجانب , و العرب , تلاقين الريل حاط ايده على جتف زوجته ,, و الاجانب يمكن يبوس راسها , يلمها و هم ماشين ,


( لانها عازه عمرها )


تعالي شوفي بعض بناتنا خخخخ


شابقته شبقه كاسره ذراعه كسر , تقول صقر على ذراعه , مو عروس . كامشه بمخالبها ايدينه كمشه خخخخخ

الريال يبي يعدل غترته , يطلع موبايله من جيبه , يحك اذونه , يرفع ذراعه و ذراعها لاصق فيه خخخخخ


لا


و كل هذا و عيييييينها بعينه

عينها بعينه


عينها بعينه


طالع ! شاف هذي ! غمز ! التفت ! شاف ساقها ! شاف شعرها ! شاف كرشتي ! شاف خصرها ! ابطلع من هالكافيه ! لا ! ابطلع من المول كله !!!!


الريال من كثر ما تحسسه انها رخيصه , يبدأ يسترخصها فعلا


ما يحترم شعورها ,, و لا يحسب لها حساب


يطقها بالطوفه

 

[*** كويتيه ***]

معاج حق ولافظ فوك اختي ويعطيج العافيه
​

 

[دعابة الشـتاء]

هههههههههههه ضحكتنيي معني على كثر ما رحت الاسواق ما شفت الاشياء هاذي بكثرة
الا اني فعلا اشوف البنات اللي يخزون الرجال بشكل واضح لكني دايما ادور على النادرين
فعشان جذيه الفئات هاذي ما تلفت انتباهي وماتزعجني لانها ازعاج وانا ما احب الازعاج

 

[Maaya]

صاجه بكل كلمة ذكرتيها
ذكرتيني ببنت كانت تقط نفسها قط على واحد انا استغربت لما تأكدت من تصرفها سألتها ليش تسوين جذي؟
تقولي الحين البنت لازم تسعى ورا الريال وتلاحق نفسها اذا تبيه لاتسكت ولاتاخذه غيرها وتضحك , انا صار على راسي الف استفهام ..
للأسف هذا تفكير اكثر بنات هالوقت الله يهديهم

 

[مجنونك 911]

الله يهدي الجميع ...​

 

[Lovely_R]

اب للإفاادة موضوع رااائع