ليش اتعب وغيري عنده كل شي [فضفضة]

[كنت أح ـبك]

السلام عليكم

كويتيات مالي غيركم .. الحمدالله احنا في ديرة عز وكل شي .. رغم وجود الفروقات

عندي مشكلة مضايقتني .. ملاحظة موضوعي للفضفضة مو لشي اخر

بحكم ان ماعندي خوات .. ماعندي احد اسولف له عن اللي فيني ..

بنات والله مو عارفة شقول خوفي تفهموني غلط ...

طبعا انا وحيدة امي وابوي ماعندهم بنت غيري وحيدة بين اولاد ..

اللي يدري اني وحيدة يقولون اكيد مدلعينج ...... :bbbiu:

وهذي القشة الي قصمت ظهر البعير ......

انا أؤمن ان كلن له ظروفه على حسب يعني مو شرط وحيدة تكون مدلعة وجذي

مالكم بالطويل بدش بالمووضوع ... بنات انا تعبت نفسيا ان احس بنقص انا موحالي حال البنات

اي شي بخاطري احصله بالحسرة .. والله يابنات وبدون مبالغة .. من زمان وانا هذي حالتي من ايام المتوسط

مع العلم ان عمري 23 وطالب في احدى الكليات

اي شي مثلا من البقالة .. كنت احرم نفسي من مصروف المدرسة ولا اكل عشان احصل مجلة مثلا او اي شي

اي تخيلوا هالشي يصير حق كويتية .. اهلي مستواهم مابين المتوسط والمتواضع .. ابوي عليه ديون وامي متقاعده وايضا حالتها المادية ماتساعد ابدا ..

اللي كرهني بنفسي ان من وانا صغيرة اخذتها عادة اني احرم نفسي من كل شي بسبيل الادخار حتى لو عشان شي سخيف اهم شي ماخلي شي بخاطري مع العلم ان اوقات وايد اشياء فعلا مااقدر اييبها لظروفي ..

كبرت .. وعلى عدة مراحل من المتوسط شوي كنت مراهقه واحسب الكل نفس وضعي بحكم اني طالب متوسط مصروفي مثل غيري

لكن الطامة الكبرى بالثنوية .. اسمع واشوف واقارن باللي حولي اكتشف اني دايم الاقل بينهم .. وهالشي عزز عقدة النقص فيني ..
من موبايلات الى ملابس والكشخة والكماليات ..

والله يابنات يمكن غيري ياخذها فشخرة بالكشخة بالنظارات الماركة .. انا انسانة عندي حساسية مزمنة بعيني واتعب حيييييييييييييييييل من الشمس والحل اني اشتري نظارة شمسية تخيلوا سنين ماقدرت اشتري مع اني ابيها حاجة مو كشخة .. بس الله كريم


استمرت هالقعدة والاحساس الخايس المزعج معاي مدة طويلة ...

ماامدح نفسي لكن الحمدالله الله عطاني قناعة وصبر .. وكنت اعيش صراع بيني وبين نفسي على القناعه والصبر والقهر ..لاتسألوني شلون ..

بنات لما اروح السوق والا تجي اي مناسبة والله اني انقهر لين وصلت فيني اني قمت اكره التجمعات ولا احب اروح لاي احد .. اشوف البنات اللي كبري وطقتي كل مرة لبس ومكياج كل شي جديد .. وانا مثل ماانا لبسي خاس علي

الحين مو ناقصني شي .. موبايل وعندي ولاب وعندي ونت وعندي .. كل هذا من تعبني وادخاري

بس اللي يحرني ويحرق قلبي ليش انا اتعب وغيري يحصل كل شي بالراحة ..... مااحسد احد بس لما افكر اوسوس واتعب واتحسر على نفسي ........

طبعا بتقولون اكلم ابوي والا امي .. من الحين اقولكم انسوا ومافي مجال

ااانا لدرجة اني قلت لهم راضية اتوظف اي وظيفة مقابل راتب حتى لو رمزي مثل هالبنات اللي بمكدونالدز وغيره وغيره

طبعا الرد كان رفض



الخلاصة :

انا تعبت من اني لو بغيت شي حيل احرم نفسي عشانه
تعبت كل مابغيت شي اجاهد واتعب عليه
خاصة لما يكون مصروفج اساسا مايكفيج
والله احساس بايخ وموحلو




بس مجرد فضفضة لا اكثر ومشكورين للاستماع

 

[زهراء الركابي]

رد : ليش اتعب وغيري عنده كل شي [فضفضة]

بس اللي يحرني ويحرق قلبي ليش انا اتعب وغيري يحصل كل شي بالراحة
كل عايله ولهاااااا ظروفهاااا وانتي تقولين امج تقاعد وابوج ديون الله يعينكم تحملي لين تتخرجين والله يوفقج

 

[Un-6be3iya]

يا حياتي اول شي احنآ خوآتج و متى ما حابة تفضفضين فضفضي ..

ترا مو كل الناس انولدو و بحلجهم قفشة من ذهب .. وايد ناس يمكن في ناس نفس حالتج يمكن في ناس احسن و يمكن في ناس اردى والله مو محصلين حتى الي يدخرونه عشان يسدون حاجتهم
قولي الحمدلله على كل حال
الله سبحآنه يقول و إن شكرتم لأزدينكم
بالعكس حلو الوآحد يتعب بالشي عشان يحصله هني راح تحسين بقيمته
هالبنات الي تشوفينهم ماخذين هالسوالف فشخرة و كشخة تشوفينها لو ضاعت منها النظارة ولا غيره والله ما همها لانها مو من دم قلبها و على قولتهم مال عمك مايهمك ..
و إدعي ان الله يعوضج بالريل الي يستاهلج و يدلعج ويكون بحآلة مادية ممتازة عشان يعوضج عن كل تعبج ..
استغلي هالشهر الفضيل بالدعاء والله يحب العبد اللحوح في الدعاء : )

 

[عربجيه]

استغفري ، تصدقي واقري سورهـ الفاقه واستغلي هالشهر بالدعاء


الحل ترا سهل بس بيدج انتي انج تستمرين

الله المستعان

 

[كنت أح ـبك]

رد : ليش اتعب وغيري عنده كل شي [فضفضة]

مشكورين بنات عالردود اللي تشرح الصدر والله كلامكم يريح

 

[eng.zainab]

رد : ليش اتعب وغيري عنده كل شي [فضفضة]

حبيبتي ..بالعكس لا تعتقدين ان الكل قاعد يحصل كل شي بالساهل..اعرف وايد ناس مستواهم المادي عالي ومع هذا معيشينهم اهلهم عيشة بسيطه..عالاقل لمه الواحد يعيش ببساطه و هو عنده ظروف يقول هذي ظروفي بس الحسره الاكبر لمه الواحد يكون عنده و يحسر فالحمدلله على كل حال و صدقيني لو الكل يحصل كل شي بالساهل ماشفتي شباب الكويت الحين هبه الي يشتغل بمطعم و الي بكافيه والي بمحل ملابس ..عالعموم انتي تقولين صرتي 23 سنه يعني اتوقع تخرجتي او بتتخرجين و على وجه وظيفه دائمه مو بمطعم او غيره فانشالله عن قريب تتوظفين و تعوضين نفسج بنفسج

 

[كنت أح ـبك]

رد : ليش اتعب وغيري عنده كل شي [فضفضة]

اتمنى احصل وظيفة لو 30 بالشهر والله راضية بس المشكلة اهلي وابوي خاصة موراضي
انا الحمدالله مااحب اخذ من احد حتى والله مااطلب من امي ولا ابوي شي
احبه يكون من تعبي ...... مااحب احد يتمنن علي بشي
وتعرفين البنت بهالعمر لها احتياجاتها من عناية ولبس
لكن مانقول الا الله يعين

 

[Om_Ksha]

قولي الحمدالله على كل حال وانشالله كله اجر لج وصدقيني ربي بعوضج خييييير
بس صبري واحتسبي .. وانشالله تتخرجين وتتوظفين وتستانسين بمعاشج بالعافيه ..كلها ايام وبتعدي

 

[Joy close]

رد : ليش اتعب وغيري عنده كل شي [فضفضة]

الله يرزقنا ويرزقك يارب قريت كلامك وعور قلبي
تقريبآ انا مثلك اصرف على نفسي من المكافأه لو تنقطع راح ادج بقوه حتى النت يمكن ينقطع
ماحب اخذ من ابوي وامي ماتشتغل
عاد شنسوي ذي حكمة الله والله يعوضنا ان شاءالله بوظيفه

 

[...broken heart]

رد : ليش اتعب وغيري عنده كل شي [فضفضة]

الله يعينج ويصير الي بالج

 

[ام انتيكه]

رد : ليش اتعب وغيري عنده كل شي [فضفضة]

عليج بالدعاء في هالشهر وصدقيني مايدوم الحال انشالله تبقى ذكرى منسيه ولا تطري في بالج والله يرزق وكريييييم

 

[MiSs_6a7LooSHA]

الدنيا رايحة

واللي تسوينه ترى تؤجرين عليه تدرين ولا لأ؟؟

بالعكس شي حلو تعتمدين ع نفسج غير هالناس اللي تحصل كل شي بالساهل وماتحمد ولا تشكر !!

دام أهلج حوالينج وتتريقين وتتغدين وتتعشين وعندج بيت هذي نعمة وانتي غنية ترى عرفتي ؟؟

فالحمدلله ع كل حال وكل ماتحمدين ربج بيزيدج أكثر وأكثر من خيره


شدراج ؟ شدراج الزمن شنو خاشلج ؟ باجر تتوظفين ويمكن تكملين دراستج بعد ويصير الدخل أقوى !!

ويمكن تتزوجين واحد ينسيج كل التعب اللي تعبتيه

ثقي بالله ان تعبج ماراح يروح جذي ربي بياجرج اذا ماكان بالدنيا بالاخرة ان شاء الله والله يوفقج ولا يغرج كل الناس عندهم بالعكس في ناس ماعندهم ترى انتي شدراج !! في ناس يعانون ترى

ودايم دايم دااااااااااايم خليها بلسانج وتعودي عليها

الحمدلله على كل حال

 

[Tulips]

الله يعينج

خلاص حبيبتي كيفي نفسج على مصروفج او اعانتج .. اول ماتنزل قسميها .. اذا بغيتي شي ابدي جمعيله من قبل .. وانشالله كلها جم سنه وتتخرجين وتتوظفين ومعاشج كله بيصير لج حقج محد يقدر يناقشج فيه

ودايما اقري صورة الواقعه لانها تجلب الرزق

 

[^^ريهام^^]

لا تشيلين بقلبج

وايد ناس مثلج

مو كل الكويتيات ماركات وستايل

يعني انتي مو بروحج اللي ظروفها المادية صعبة

بالعكس يمكن هالشي يفيدج بعدين اذا توظفتي بتحسين بقيمة الفلس

لا تضايقين , اذكري ربج وصلي واقري قرآن وادعي الله يبارك لج برزقج

 

[missdreamer]

حبــــــــــــبيتي انتـي

حاليا اعتقد يعطونج اعانه مو ؟؟ هالاعانه واللـه العظيم اذكر فيها برررررررررررررررركه

كنت اشتري منها كل شي ويزيد واصرف للكليه بعد !! شلون لا تسأليني ! سبحان الله

وان شاللـه بتتخرجين وبتتوظفين وبيصير عندج معاااااااااااااش وبتستانسين فيه وبتطيرينه على الملابس والكشخه

قوليلي انتـي جم بقالج وتخرجين اتمنى يكون القريب العاجل

 

[رووز q8]

حبيبتي هونيها وتهون

انا مستوى عايلتي زين وكاه ما اطلب منهم اي شي استحي ولا اشتري الا شي محتاجته وقاعده اخش من اعانتي مبلغ صغير للحاجه والحمدلله مكفيني ،، مولازم اقلد البنات والبس مثل لبسهم واشتري كل الي يشترونه عااااااادي مايهمني هالموضوع بتاتا الحمدلله


قلبي القناعه كنز لا يفنى صدقيني لو رضيتي بقسمتج راح تشوفين كل شي حولج ما يستاهل تضايقين عشانه ، ودايما لا بغيتي تندبين حالج شوفي الي اقل منج شلون عايشين وراح تعرفين انج عايشه احسن الف مرره من غيرج


الله يوفقج ويرزقج من حيث لا تحتسبين ..~

 

[عقــد منثور]

حبيبتى .. ترا اغلب البنات جذى .. الاهل يدوب يغطوون مصاريفنا الاساسية .. وبالنسبة للكماليات صعبة كل شئ يوفرونة لج .. يمكن انتى

نوعج ماتطلبين من اهلج .. واهلج متعودين علي جذى .. وهم انتى البنت الوحيدة .. فأهم كلش مو متعودين على هالشغلات ..

اغلب البنات ما يتدلعوون الا من معاشاتهم .. تشووفين البنت من تتوظف تتغير 180 درجة .. تبين عليها الفلوس لووووول وتدلع بعمرها

هونيها وتهووون يالغلااا .. باجر لى توظفتى بتحسين بقيمة الفلووس ..

 

[غ ــلا الــروح]

رد : ليش اتعب وغيري عنده كل شي [فضفضة]

اول شي مثل ماقالت العضوة عقد منثور الاهل يدووب يغطوون مصاريفنا وبعدين الحيين انتي شايفة الضغوطات على الاهل مافي شي يتحصل بسهوولة واحناا لازم نحمد ربنا لان في غيرنا نآآآس مو لاقييين اكـل وبعدين انتي حآآآولي قد ماتقدرين تكلمين اخووانج على الاقل تقنعين امج وابووج انهم يصرفوون عليج ولاتحبطييين روحج اهم شي ريحي روحج ولاتقعدين تكدرين خااطرج وادعي ان الله ييسر اموورج والله يسهل اموورج يارب العالمين​

 

[متفائله بلا حظ]

ياقلبي انتي
والله لاتحسبين الكل مثل ماتشوفين
وانتي لاتصيرين على نياتج وتصدقين كل شي ترا فيه بعض البنات ماعندهم الا الفلس بس هيااط انا شريت وانا سويت
عاد انتي لاتصيرين طماعه وتشوفين الماركات والاشيا الغاليه اشتري من المحلات العاديه << عااد موو الشعبيه
لا قصدي المحلات اللي الكل يشتري منها ويلبس منها ترا مقدوور عليها ياعمري
ويابنت الحلال والله انا كنت عند اهلي البس الغالي واشتري الغالي واللحين من تزوجت على معاش زوجي وهو عليه اقساط الدنيا وانا للحين انتظر الوظيفه من اول اسبوع ينزل المعاش يازيننا ثاني اسبوع منتفين والحمدلله عايشين صح مرات تجي فشة خلئ شمعنى فلانه عندها وانا ماعندي بس يومين واطخ واقتنع باللي عندي
لاتشغلين تفكيرج بالهالاشياء الفاضيه مدامج بصحه وعافيه الحمدلله وان شاءالله ربي يرزقج وتتزوجين وتتوظفين وتدلعين عمرج ترا بالكويت المره هي اللي تدلع عمرها بمعاشها لااهلها ولا زوجها

 

[أم منيـرة]

دآمـج تحملتي اول ، وكلي هذا كله لـربج ، رب العبـآد ..

وان شاء الله بتمر أيام الكليه بسرعه وبتستلمين معـآشج الي يغنيج عن الحـآجه والإحساس بالنقص ..

كلنا احيانا نقارن ، حتى الي ميسور الحـآل و قادر ، يقارن بالناس الي فوقه ..

بني آدم طمـآع ، يبي أكثر وأحسن ..

وإدعي دايما ان الله يرزقج ويوسعها عليج ..