للفضفضه ... مواقف غريبه مع البشر

[جِراحُ الغَرام]

مرحبا يا بنات شلونكم ؟ عساكم بخير ؟


موضوعي من عنوانه للفضفضه ... اعطيكم نبذه مختصره عني ...
متزوجه من 2003 ... عندي بنتين ... ملتزمه بعبايتي وحجابي ... زوجي من عائله تقريبا معروفه .. وحالتهم الماديه زينه .. واهله
مخلوطين بس الاكثر عاديين من ناحية الالتزام
اخليكم مع مواقف اللي مريت فيها واحكموا ... وحياها الله اي وحده تبي تشاركني بالفضفضه :ggdw:

موقف 1 : زوجي كان شارط وحده لابسه عبايه وحجاب ... وحلوه ...
وصار من نصيبي ... لاحظت ان خالتي ( امه) بين فتره والثانيه تفتح عباتي تطل على لبسي جدام خواتها وحريم اخوانها .. وتقول ما عمرنا شفنا لبسج من عباتج .. وبعدين تعلق على لبيس .. حلو من وين .. ماشاء الله .. وانا على نياتي ... الى ان اكتشفت من زوجي ان عندهم نظريه : المتدينين ما فيهم حلوات .. المتدينين ما يعتنون بروحهم ويلبسون دراعة البيت اللي ريحتها طباخ تحت العباية ... امممممم لا تعليق :denya:
موقف 2 : زوجي اتفق معاي اول الزواج ان ما يقدر يأثث ويشتري لي سياره .. فدفعت مفدم سيارتي وهو تكفل بباقي الاقساط والجمدلله رجع لي فلوس السياره اول ما فتح عليه ربي .. المهم .. زوجة حماي طلبت من زوجها يشتري لها سياره .. ليش ؟ اخوك شرى حق زوجته .. اخوي شرى تويوتا تبين ؟ ويييي انا اسوق تويوتا .. لا يبا .. وشرى لها سيارة نفس مواصفات سيارتي بس اسمها ..... انزين حبيبتي مشتهيه سياره يديده لاتحطيني وسطكم ...
موقف 3 : رحت سافرت ويبت صوايغ ... طبعا كنت مملوجه .. وماعندي معاش .. طالبه بعدي .. يبت خواتم فضه .. وطبعا يلبسون بس لازم من محل معروف وجذي ... المهم .. زوجة حماي خذته لانه حق البيبي .. بس حماتي يوم زوجي عطاها ردته حقه مباشره ... انزين جامليني واخذيه بعدين وزعيه ... افففف



وعلى كل هذا .. مشيت بدنيتي والزم ماعلي بيتي وعيالي ...
تبون اكمل لكم مواقفي ؟
تبيون تضيفون مواقف حياكم الله واذا موضوعي ما يشيلكم فعيوني تشيلكم

 

[سارووونه22]

الله يعينج حبوبه خل اقول لج موقف صار لي مع حمولتي الله يسمج ام ريلي اقترحت علي انه اتنفس عندها وانا قلت لها ابي اتنفس عند امي قالت امج عايشه بشقه ومافي مكان ومن هل حجي انا وايد تضايقت قلت حق ريلي انتو من البداية شايفين بيتنه وبيتنه موصغير وصارت سالفه بيني وبينه وانا رفضت اروح عندها قلت امي ماراح ترضى وبس عدت السالفه على خير وفي وايد موقف بس انا ماذكر حاليا غير هذا وسلامتج

 

[(100%)]

الله يهون عليكم انا اذا تكلمت ماراح اخلص وافضل السكوت

 

[اشتياق]

فضفضي ياوخيتج ..

انا نوعي بالي طويل وصدري وسيع الدعوة سهالات والبساط احمدي ان شاء الله ..

 

[جِراحُ الغَرام]

الله يعينج حبوبه خل اقول لج موقف صار لي مع حمولتي الله يسمج ام ريلي اقترحت علي انه اتنفس عندها وانا قلت لها ابي اتنفس عند امي قالت امج عايشه بشقه ومافي مكان ومن هل حجي انا وايد تضايقت قلت حق ريلي انتو من البداية شايفين بيتنه وبيتنه موصغير وصارت سالفه بيني وبينه وانا رفضت اروح عندها قلت امي ماراح ترضى وبس عدت السالفه على خير وفي وايد موقف بس انا ماذكر حاليا غير هذا وسلامتج

أول شي حبيبتي مبروك المولود .. وعادي ياما و ياما ...
عموما الموضوع يرحب فيج كو ردج أول رد .. وشغله ثانيه هدفي من الموضوع نفضفض شوي لأن الواحد يحتاج يفضفض .. وبعدين عشان لا نكشر بويه ازواجنا

 

[جِراحُ الغَرام]

الله يهون عليكم انا اذا تكلمت ماراح اخلص وافضل السكوت

تسلمين حبيبتي ... واحترم رايج بالتزامج بالسكوت ... ومتى ما حبيتي تتكلمين قلوبنا مفتوحه لج ... والله يهون عليج وعلينا

 

[حجيه هيونه]

الله يكون بعونج شكلهم حمولتج شوي صعبين كملي كملي

 

[جِراحُ الغَرام]

فضفضي ياوخيتج ..

انا نوعي بالي طويل وصدري وسيع الدعوة سهالات والبساط احمدي ان شاء الله ..

تسلمين حبيبتي .... الله يعطينا طولة البال جميعا ... بس ترى مو تشكي اللي اكتبه ... مواقف مريت فيها ... وبس ابي افضفض ... وعموما صار لي 7 سنوات متزوجه ... عمري ماشكيت ... بس هني مرتاحه لو اتكلم شوي وافضفض محد عارفني
وشكرا على مرورج

 

[جِراحُ الغَرام]

الله يكون بعونج شكلهم حمولتج شوي صعبين كملي كملي

تسلمين حبيبتي ... ماكو احد مرتاح بالدنيا ... والله اذا احب عبده يبتليه بنفسه او ماله او اهله او ... او ... او ...
لكن نبي الصبر ...
والموضوع مجموعة مواقف كثيره ... منها الزين زمنها الشين ... بس الواحد بين فتره و الثانيه يحتاج شوي يزيل من هالمواقف عشان يجدد من همته ...

 

[جِراحُ الغَرام]

مساء الخير ياحلوين ... نكمل مواقف .. وارد واقول اللي تحب تكتب موقف حياها الله ..
موقف : معروف عني عند اهل زوجي اني ما اشتري ماركات ... بس ما عندهم خبر للسبب ... بس اهم شي ان ما يدرون اني اذا ابي اقدر ... المهم ... قبل لا اتوظف .. حماي طلبت منه يشتري لها جنطه ماركه .... وكان يقول حق زوجي ويقول له عن سعرها ... وان حماي انصدم بالسعر ... زوجي انصدم لان يعرف زوجة اخوه انها متواضعه .. وحماي رد ان لأنها تداوم وتشوف كل اللي معها عندهم ... زوجي على نيته قال زوجتي ما عمرها طلبت ( الاخ على نيته ياي يبي ينصحه ) اخوه رد عليه رد وزوجي قال لي الكلام وخلا على راسي علامات استفهام ؟؟؟؟ يقول : زوجتك ما عندها معاش ... خل يصير عندها معاش راح تقطه على الماركات والخرابيط حالها حال كل الحريم....
ونفس الجمله بالضبط قالها عمي جدامي ... كنا قاعدين على الغدا يسولفون عن زوجة حماي .. المهم ان عمي قال كل البنات جذي ..خالتي قالت بس فلانه ( انا ) موجذي ..عمي رد وقال جدامي : فلانه خل يصير عندها معاش راح تقطه كله على الماركات مثل كل البنات ؟؟؟؟؟
تناقشت مع زوجي .. شنو سالفة الهجوم هذا ؟ فسره ان كل وحده من البنات ( حماتي وحريم حمواني ) الظاهر لما يطلبون وازواجهم الظاهر يقولون لهم شوفوا فلانه فيردون ويبررون ان مو حاصل لي ماركات لأن ما عندي معاش ...
ارد واقول ... ليش حاطيني شماعه لكم .. ؟؟؟؟؟؟

 

[LA TROO7]

حبيبتي فضفضي بس الموقف الاخير عاادي انا احسه على طيب نيه قالووة مو القصد ترااا

مثلاا انا مرة شريت جنطه ب800 دينار وحزتها كان عمي(اخو ابوي الكبير )موجود قام يضحك علي وان ماتسووى هالسعرر ولوو بيدي ماخليج تتوظفين وتحرقين هالمعااش بس ماشلت بخاطري لان ادري بنيته طيبه وقلبه ابيض

ومبين شخصيتج حلووة بس رسميه جداا وشوي جامده صح ؟؟

المهم لاتعورين راسج بسوالفهم طاااف ولاتفكرين فيهااا

كملي حبيبتي

 

[سارووونه22]

والله انا لو بسولف مابخلص بقول لكم على موقف صارلي مرة كنت متهاوشه مع ريلي هوشه كبيرة وبما انه ساكنه عند حمولتي فصوتنه كان عالي المهم اول ماطلع ريلي الصبح حق الدوام يت ام ريلي وقالت لي شصاير بينكم وانا مابقيت تكبر السالفه قلت لها ماكو شي خالتي والحمدالله مافينه شي عاد اهيه قامت تصرخ وتسب وتقول لي انا زوجت ولدي عشان يرتاح مو عشات تيين حضرتج تأذينه وعشان كنت ساكته ومارديت عليها ترد تقول لي انتي مومتربيه وانا هني قلت لها انا متربيه احسن تربيه ماله داعي هل حجي وانا قلت لج مافي شي بينه عاد دقت على امي ساعه6 الصبح قعدت تصرخ على امي عاد امي بروحها مريضه واخترعت عاد انا هني ماتحملت شلت لي شوية هدوم واسمعها تصارخ بتلفون ودقيت على اختي قلت لها تعالي خذيني وامي قالت حق خالة ريلي خلي البنت تروح مع اختها واهيه تصارخ ماتطلع من البيت يعني ماتطلع وانا خايفه عاد اختي دقت علي قالت ناطرتج برى وانا بسرعه اركض على سلالم جنه احد لاحقني بنحاش والحمدالله نحشت لووووول كل ما اذكر اضحك على روحي شكلي كان يضحك حتى امي قالت حق ام ريلي مرة وريلها ليش تتدخلين بينهم تقول ولدي ولازم اعرف كل شي وبس عدت على خير:denya:

 

[حجيه هيونه]

سارونه موقفج مو صج !!

شفيها هذي يعني بدل ماتهدي الامور تزيدها

الله يهديها شكلها انقهرت لانج ماعلمتيها شسالفه

 

[حروف من ذهب*]

فضفضي حبيبتي احنا معاج واذا ذكرت موقف بحطه
وتري هذي هي الحياه فيها الصعب وفيها السهل والوحد تقول العفو والعافيه اما الاشياء الثانيه سهالات

سارونه2 ياشين لقافه ام زوجج الله يعينج عليها

 

[سارووونه22]

عادي تعودت عليها عاد والله اني احبها وايد بس الحمدالله من طلعت من عندهم واحنا سمن على عسل يعني مرتاحييييييييين

 

[a7la MUM]

انا الحمدالله وايد مرتاحه ام زوجي اجنبيه فديتها ماااااا تدخل بينا كلشششش
والله يعينكم على اهل ازواجكم ويسخرهم لكم يااارب

 

[دانه_83]

حرقريهم خليهم يمتون اكثر من ما اهمه ميتين من الحره منج

 

[قلبي سلومي]

الله يعين مافي احد مرتاح

 

[غيمه ظميانه]

حبيبتي ماعليج منها ضدقيني غيرانين منج ليش ؟؟؟ انا اقولج ليش

لانج اول شي ترضين ربج بلبسج والتزامج

ثانيا ان زوجج مرتاح منج واخوانه محترين ليش ان حريمهم طلباتهم وااااجد

ثالثا الحريم محترين منج لانه ماعندج معاش بس الحمدلله كل شي متوفر لج وبعد مو مقصره معاها بالهدايا .حبيبتي اللحين حتى الموظفات مايجيبون هدايا قامت تقول زوجي ما اجيب هدايا

رابعا .صدقيني الغيره موجوده في كل بيت وبلاخص بيوت الحموله بين الخاله والحموات وحريم الحمى

سوالف ما تخلص والغيره شغاله ليل ونهار .فلانه حطت فلانه سوت

واهم شي الوحده على ذوقها مو على ماركه

ياما حريم يلبسون ماركات وتلقينهم يفشلون

وياما حريم لبسهم وخاماتهم عاديه بس تلقينها تتفنن بطريقه اللبس والاسلوب

 

[جِراحُ الغَرام]

حبيبتي فضفضي بس الموقف الاخير عاادي انا احسه على طيب نيه قالووة مو القصد ترااا

مثلاا انا مرة شريت جنطه ب800 دينار وحزتها كان عمي(اخو ابوي الكبير )موجود قام يضحك علي وان ماتسووى هالسعرر ولوو بيدي ماخليج تتوظفين وتحرقين هالمعااش بس ماشلت بخاطري لان ادري بنيته طيبه وقلبه ابيض

ومبين شخصيتج حلووة بس رسميه جداا وشوي جامده صح ؟؟

المهم لاتعورين راسج بسوالفهم طاااف ولاتفكرين فيهااا

كملي حبيبتي

تسلمين حبيبتي على ردج ...
شوفي .. انت سألت عن شخصيتي وراح اجاوبج ... انا مضطره اتعامل برسميه وشوية جمود ..
مو مني .. بس الوضع يسوي جذي ... تخيلي طول عمري اعيش في بيئة تفصل بين البنات والاولاد .. وكنت مرتاحه .. وفجأه ادخل عند اهل زوجي .. اختلاط .. وعادي كل واحد يكلم بنت خاله او بنت عمه .. البنات يكلمون نسايبهم وازواج خواتهم .. يعني مو وضع ارتاح فيه ...
ثانيا .. وبكل صراحه .. في منهم يحاولون ما يكثرون احتكاك لأني ملتزمه .. وراح تشوفين المواقف وتحكمين بنفسج ..
وعموما انا مجرد افضفض .. لأن اغلب السوالف مر عليها فتره .. بس تظل عالقه بالذاكره .. وما ابي اقولها حق امي .. ولا ابي اناقش زوجي فيها ... فهمتيني ؟ ... واكرر شكرا على المرور