للحلوين إلي والدين قيصري....

[royal girl]

السلام عليكم
شلونكم بنوتات عساكم بخير يااارب
حبايبي ماعليكم أمر أبي مساعدتكم .....
آنا بولد قيصري بإذن الله الله يسهل علي ويسهل على كل وحده حامل...آمين
بس في وحده تقولي إن الولادة القيصري يظل ألم الجرح مالها مطول
وغير جذي مايسير أربط بطني أبد لمدة ست أشهر
وتقول إن من الطبيعي إن كل إلي تولد قيصري تكرش مع الوقت من الولادة القيصرية

بالله عليكم يابنات ريحوني صحيح هالكلام؟؟
آنا أول مره أولد قيصري وماعندي فكرة أبدا عن الولادة القيصرية
وصحيح إني ماأقدر أربط بطني كلش وقت النفاس؟؟
أرجووووكم يابنات خصوصا إلي والدين قيصري يقولولي تجاربهم ويجاوبون على أسألتي
الله يريحكم ويرزقكم الذرية الصالحة يارب العالمين .... آمييييييين:yaaaaaarb::yaaaaaarb::yaaaaaarb:

 

[أم وهابي (عبير)]

الله يسهل عليج حبيبتي


عن الربط انا ماربطت واساسا انا وانا بنت عندي كريشه فزادت بعد القيصريه بس مع الوقت تخف حييل

والجرح بس يتم وياج عوار بعد العمليه باسبوع بالكثير بعدين عادي

وترا سهالات حبيبتي لا تحاتين مو مشكله تكرشين اهم شي البيبي يطلع بالسلامه وانتي تطلعين بالسلامه ان شاء الله
واذا يت عالكرش الله يعافي الشد

 

[ام الفهد712]

رد : للحلوين إلي والدين قيصري....

حبيبتي حجي فاضي

انا والده 5 مرات قيصريه والحمدالله بطني اوكي مو الكرش الكرش اللي نازل لا عادي وكل وحده على حسب طبيعة جسمها ماشاءالله حماتي والده 3 مرات قيصري وبطنها لازق بظهرها تبارك الرحمن

وبالنسبه حق العوار العوار بس اول اسبوع من الولاده وبعدها مافي لا عوار وقال هالله واهم شي انج ماتشيلين شي ثقيل ولا دزين شي وعليج بالمره نقعي المره بماي دافي وبعدها حطي بقطنه ومسحي ع الجرح وشوفي شلون يلتام ويصير اوكي وادعيلي

وبالنسبه حق ربط البطن انا بس اشيل الكبس يعني اسبوع من ولادتي البس الكورسيه واربط بطني ومافي اللي العااافيه ولا ترى دكتوري اهو اللي يقولي ربطي عادي مو من كيفي

والله يسهل عليج يارب وتقومين انتي والبيبي بالف سلاامه ان شاءالله

 

[حبيبي مالكني]

رد : للحلوين إلي والدين قيصري....

حبيبتي لا تخافين انا ولدت مرتين قيصرية والحمدالله ما فيني الى العافية
تعرفين اول 10 ايام راح تلاقين صعوبة في المشي والقعدة والقومة
والضحك بع
بس 10 ايام وبعدين راح ترجعين طبيعية ةلا جنج امسويه عملية
وحبيبت انا في ولادتيني مار بطت بطني كلش اتعرفين ان القيصرية يبر الجرح الخارجي بسرعة بس من داخل يبيله على الاقل سنتين عشان يلتحم
ولا تخافين عقب ثمان شهور تقدرين اتسوين تمارين بطن
وان شاء الله ماراح تطلعلج كرشة
واي استفسار انا حاضرة لج
وبشرينا اذا ولدتي بالسلامة

 

[مروووم]

اول شي الله يسهل عليج حبيبتي وما تشوفين شر
انا والدة قيصريتين ونفس ما قالوا البنات اول ١٠ ايام ما تقدرين تتحركين وايد والكحة اااااخ ما تقدرين >>>>>>انا اخلي بطل ماي يمي وبس تييلي كحة اشرب المااااي بس عشان لا اكح ههههههه هذا بالنسبة لي انا لاني حيل حساسة
وعلى رباط البطن بعد ٣ شهور عادي يقول الدكتور
ولاتخافين اساسا بعد ٦ شهور يرد كل شي طبيعي تدريجيا بس طبعا من العملية لااازم كرش بس مووو شرط تكون وايد >>>>>برفع من معنوياتج شوي
وياااارب تقومين بالسلامة
واي استفسار انا حاضرة (؛

 

[قنــــــــــوت]

رد : للحلوين إلي والدين قيصري....

حبيبتي ...العوار يخف ويمكن يروح تماما بعد اسبوع ...
ولما شالوا الكبسات بعد اسبوع بالضبط من العمليه لبست الحزام والكورسيه .. وكنت مااقطه حتى وانا نايمه وانا قاعده ..
على طول لنهايه الاربعين ... اتركي عنج كلام اللي يثقولون مايصير ..لان هالنصيحه اخذتها من دكتور متخصص ..اصلا لبس الحزام افضل ويساعد على التئام الجرح وعدم ترهل البطن ...

ومع ادوية النفاس الجيده اللي توخر الغازات وتنظف البطن ... والكورسيه ..
الحمدلله .... جسمي حلو ورديت افضل مما كنت .. ولا كرش ولا هم يحزنون (ماشالله)

لا تحاتين يالغاليه .... وان شالله تولدين بالسلامه يااارب ..

 

[hneen2]

اي انا والده مرتين قيصريه ونفس كلام البنات بالضبط لاتحاتين

 

[غلاي امي وزوجي]

انتي تبين قيصريه والا الدكتوره هو الي قالج؟؟؟

 

["*آآآنؤؤؤقهـ*"]

رد : للحلوين إلي والدين قيصري....

حبيبتي

وحده عن وحده تفرق .. اناا وربيي ليش اجذب علييج تعذبت
قيصريه و20 يووم يالله تعافيت

قومه ولاقعده مثل النااس .... وااي انشبت عمليتي قلت خلاص بيصير معوقه لاني بجر وربي عذااااب

لاحول ولاقوة الابالله اجر ا نشااء الله

بس ربط بطن لاتربطين انا دكتوري عكس كلام البنات قالي لاتشدين على العملييه لاتضغطيين على بطنج هذاا جرح البطن مشقووق 7 طبقاات تعرفين شنوو 7 طبقاات

مو شئ هييين ...

لاحبيبتي من طقك حبك وانا انصحج مابي ارفع من معنويااتج عشاان تكونين بالامر الوااقع حبووبه ......................


والله يسهل عليييج ولادتج يارب وتقومين بالسلاامه


ولا على البطن اهم شئ السلاامه ولايهمج شئ عيوني .... اهم ماعلييج نفسج وصحتج


وكثري مشي زيييين


و6 اشهور وعقب العبي ريااضه ...................

وابتعدي عن الرييح وخلي بطل المره ويااج 24 سااعه وشمي وحطي حوالين بطنج ..........


لاتقمتين الجرح لايخيس ويسود ويطلع لج وعي واشيااء

انتي مالج غنى عنهاا .......... خليييه الهوااء دااايم دااايم علييييييييييييييييه ....


وداايم نظفي الجرح بيتادين المرهم اللي راح يصرفونه لج ............

واكلي دويات وتنفسي عدل ... وابتعدي عن الفلفل والبهارات ... مو زين للجرح ...... يخلييه يلتهب من دااخل

ويعوووورج ...................



والله المولد والمسهل ..........

 

[غنوة ستايل]

انا ولدت قيصري
واول 10 ايام كله يقرصني الجرح بس يقولون كل ما تقرص يعني خلاص راح يبرى والحمد الله

احس بألم خفيف للحين بس مو دائما مرااات نادره . وما اشيل اي شيء ثقيل ابد . ولا ادش شي ثقيل . وما ربطت بطني
بس بالاساس انا ضعيفه مو متينه .

لي الحين شهرين وشوي من ولادتي

عسى الله يهونها عليج يارب

 

[% سود العيون %]

انا والده قسصري

بصراحه طلعت الاربعين مكرشه بس بعد 3 شهور بطني لزقت بظهري وانا ماربطت كلش بالاربعين كنت خايفه

والان انا نفاس قيصريه بعد وللحين ماربطت احس نفسي تعبانه ومالي خلق ع شي مع ان الم الجرح راح

..

وترى الالم اللي يقعد معاج زي النغزات مش الم كبير يعني وعادي اصلا تنسين العمليه كلها بعد الاربعين


.
.

 

[أم أسوووله]

رد : للحلوين إلي والدين قيصري....

اولا الله يقومك بالسلامه..

ثانيا انت طلبتي العملية والا هم قرروها لك..

انا ولدت قيصري قبل 6 شهور بالنسبة للأم بس اول اسبوع ويخف اما عن شد البطن انا ما ربطت لأني خفت وسمعت كثيير يقولوا خطير ع الجرح والحمدلله ما طلع لي كرش ابدا بطني لاصق في ظهري بس اهم شي انتبهي ع حالك لا تشيلي ثقيل لمدة سنتين

وحابة اقولك ان العمليه يكون لها آلام شوفي انا لي 6 اشهر وتألمني كثير اذا طولت بالقعدة والا الوقفه والا المشي بس ما ادري هو بس انا والا كل الاخوات..

ع العموووم تقومي بالسلامه يا عسل وطمنينا عنك بعد الولادة

الله يحفظلك البيبي استودعيه الله كل شوي..

 

[Roty]

رد : للحلوين إلي والدين قيصري....

حبيبتي انشالله تقومين بالسلامه

انا اقولج نفس كلام انوقه والسهالات من الله

 

[فروحة الحلوة]

شوفي حبيبتي تترا تفرق من وحده للثانية الي تقول بطنها لاصق بظهرهاا الله يتمم عليها وماشاءالله يمكن طبيعه جسمها جذيه
لاكن معروف القيصرية تطلع كرش وانا والله منعني الدكتور اربط بطني بس فيه دكتورة قالت لي بعد شهر تقدرين تلبسين حزام وتشدين الكرششة لتحت نفس الشي صارت لي كرشة نازلة :eh_s(16):
بس العوار لا ولله الحمد بس اول عشر ايام مع انه اعرف وحده صارلها سنيين للحين مرات اذا عرقت ولا تعبت تحوشها حكة وعوار مكان عمليتها بس يمكن لان عمليتها من زمان وقديمة اللحين تطور كل شي ،
والحمدالله اهم شي السلامة لج وللبيبي
:nbvppw:

 

[حرم_طيار]

رد : للحلوين إلي والدين قيصري....

شوفي حبوبه انا ربطت بعد الولادة بأسبوع
ونفاسي كان عادي نفس ولاتي الطبيعيه
والعوار خف اشوي والسحر كان بالمشي كنت كل ما امشي كان يخف

 

[قنــــــــــوت]

رد : للحلوين إلي والدين قيصري....

فعلا ...المشي والحركة ممتاز للجرح ... يلتئم بسرعه وترجعين لحياتج الطبيعيه ..
وارجع واقول لج الحزام ما منه اي ضرر ... وهالمعلومة من طيبيب مختص ... مو من اي شخص عادي ...
وعن تجربه .... الحزام بعد اسبوع بالضبط ...

موفقه خير ...

 

[royal girl]

الله يرزقها من حيث لا تحتسب كل من ردت علي
الله يريحها دنيا وآخره
الله يسخرلها زوجها وعيالها ويقر عينها فيهم
الله يرزقها الهداية والصحة والعافية
الله يجملها بعين زوجها أكثر وأكثر
الله يريح قلبها ويشرح صدرها ويجعل لها من كل هم فرجا ومن كل ضيق مخرجا
اللهم آآآآآآآآآآآآآآآآآآآمييييييييييييييين : )