للجادات شوروعلي بليز

[Only version]

مساء الخير
حبايبي حابه استشيركم بموضوع واتمنى تنصحوني بعقلانيه موكيدحريم وهالحركات الاكلام الحرمه يمشي

زوجي طلبني يروح مع خويه يتمشون اسبوع بالمانيا ؟؟؟وماراح يروح الااذاوافقت انا فكرت فيها وواثقه فيه فاشوف عادي بس اسمع الحريم الي زوجها بيسافر مرة بيدمن ويتعودومايصيلر ياخذك ومن هالكلام لان ولامرة سافرخارج المملكه وش تشورون علي اوافق اولا بافتح لنفسي بابا انا بغني عنه​

 

[amami al-kuwai]

انا لو بمكانج ارفض

على الرغم من اني اعرف ان الدول الاوروبيه ماينخاف من حريمه كثر ماينخاف من حريم العرب

اذا بستانس مع ربع قولي له بالمملكة بره لا

 

[الذويقه]

مافيها شي خليه يروح ويرجع لج مشتاق ..

ولاتصدقين انه بيتعود .. انا عن نفسي ماامنع ريلي من السفر يروح ويرجع بالسلامه له رب يحفظه .. هذا طير مرده يرد لعشة . ..

وانتي تقدرين في هالوقت تغيرين من نظام غرفتج وتسوين لوك جديد حق شعرج ويرجع لج يلاقيج عروس ..

وصدقيني اذا عجبته البلاد بيفكر يوديج لها في اقرب وقت يناسبكم ..

 

[لوفيه]

والله انه باب وماراح يتسكر اذا سافر

سألي مجرررربه

سافروا مع بعض انتي اولى

ورفيجه يطلع معاه داخل الديره وهذا موسم مخيمات خل يستانس هنيه

واذا كلش بيموت عالسفر وبخاطره شتسوين

استودعيه الله والله يحفظكم من كل شر

 

[ام كوثر2007]

حبيبتي مافيها شي .. اهو مقدرج ومعطيج مكان عنده ويقولج لمن ترضين . يعني يزاه الله خير ..


لا تحسسينه انه دخل سجن مو قفص زوجيه .. خليه يسافر مع ربعه اشفيها يعني ..؟


ما عليج من كلام الناس .. وحاله عن حاله تختلف ..


هالمره بيروح بروحه وراح يعرف الدرب والاسواق والاماكن في هالبلد ..

واكيد المره اليايه يقولج باخذج . صارت معانا وايد ..

تعوذي من بليسسس .. ولا تسمعين حق هذى وذيج لانه كل وحده حالتها غير عن الثانيه والرياييل يختلفون عن بعض ..

 

[شادن33]

يحليله ريلج ناطر موافقتج !!
ياحبيبتي خليه يروح كل واحد وتربيته واخلاقه
سبحان الله اذا كانت تربيه الولد قويه ماينخاف عليه لو يسافر اي مكان*

 

[منال $]

والله اول شي حبوب زوجك يعني شوفي طلب اذنك
خلية يروح يغير جو ونفسية ومنها بتشتاقو لبعض
واكييييد ماراح ينساكي من الهدايا

وانتي كمان لاتنسي توصية

 

[baby qa6wa]

اذا اللي معاه متزوج خليسافر معاه
اذا عزوبي رفضي رفضا قاطعا

 

[زوجة عزيز]

أنا عني ما أرضى أبدا انتي شوفي نفسج في بنات عادي يتحملون إن زوجهم يسافر وفي بنات لا مايرضون

 

[@Miss Dio@]

مع احترامي للجميع يعني اذا قلتي له لاتروح ترى بيروح ممكن يسوي هوشه وممكن ربعه يشيشونه ويروح وترى السفر مو شرط خرابيط انا اعرف ناس ماتسافر كل وكل ربعه متزوجين وعلى قوله الاخت مخيمات وشاليهات وراعي خرابيط هذا مو منطق ممكن لمن يرد تقولين له السفره اليايه حقي ومره جذي ومره جذاك وبالمقابل لازم مايكون مقصر على بيته لكن امنعه والا اسوي تحقيق ربعه عزابيه والا متزوجين بالعكس الحين المتزوج العن واللي تقول خليه بالمخيم يعني مالقو بالمخيمات دسكوات ؟؟ ما ادري بصراحه انا تفكير بعض الزوجات مايعجبي كلش بس دايم قولي استودعتك الله الذي لاتضيع وداعئه وادعي له والله الحافظ ولا تنفسين ولاتعصبين صدقيني اختي راح يرد لج مشتاق ويعوضج بعد لكن اذا عصبتي وزعلتي راح يفكر بس اشلون ينحاش منج

 

[حبيبه هيثم]

انا من رايي خليه يسافر شنو واذا سافر
صدقينى الى خايف من ربا اهنى والا اهناك نفس الشى فا خليه يروح وجيبلج صوغه جنطه وجوتى هههههههه ويرجع بالسلامه

 

[tbola]

خلي يروح دامه استاذن منج وحترم رااايج

 

[بيتي بوب بس كويتيه]

شي حلو انه خذا رايج الله يتمم عليكم
خليه حبيبتي تراها اسبوع وما تأثر
والي يخربط يقدر يخربط بمكانه
مافي ريال ينطر موافقه زوجته
الرياييل يحجزون ويحطون حريمهم امام الامر الواقع
ولا تخلين هالسفره بخاطره لانه اذا رفضتي بعدين بغير أسلوبه
ويسافر قصبا عليج

 

[الزورق222]

رجلى على رجله ليش يسافر بروحه

 

[اميره1980]

ليش ما تروحين انتي وياه و تتمشين و تستانسين وياه بدل رفيجه ؟؟
انتي اولا من رفيجه بالوناسة و التمشي

 

[أنهار الكويت]

انا احس فاهمه قصدها البنت مو خايفه من الخرابييييط اهي خايفه ان يتعود يسافر برووحه ويخليها
تبييين رايي حبيبتي خليييييه يساااافر بس حسسيه ان كان ودج انتي اللي تكونين معاه وانج مو قادره تخيلين وضعج بدونه بهالاسبوع ولا قادره تخيلين شلون بيكون بدونج،،، طبعاً حسسييييه موووووو مبوووزه ومتضااايقه لااا حسسيييه بطريقة رومنسيه ودلع
وبعدين على سالفه انج تفتحين على نفسج باب انا بسألج سؤال ،،، اهو ليش مافكر نفسج وقال شحقى انطر او اخذ موافقتها وافتح على نفسي باب بعدين يصير واجب علي اخذ رايها وطبعا كل الرياييل يشيشوون بعض على ان المره مالها سلطه علي بس اهو ماسمع لهم ولا اخذ طريقتهم تدريييين ليش لانج تهميييينه وتهمه مشاااعرج فلا تخلينه يحس انج انانيه ومايهمج وناسته وتخلينه يندم ان فكر اخذ رايج ويحس ان تحكمتي فيه وعقب مايفكر يعيدها ويسألج
على طول بيقولج جهزي جنطتي انا حجزت مع ربعي
وانتي عاد ليما يسافر كلميه عالاقل ثلاث مرات باليوم وبالذات قبل لاينام صدقيني بكل مكان بيستانس فيه بيتمنى انج معاه واي صج قوليله حبيبي صور نفسك بالمكان اللي حبيته وخليه يطرشلج اياه وتس اب او وسااائط وانتي قوليله الله ياليتني معاك
ومن هالحركات
واذا سالج مره ثانيه عن سفره رفضي بس حطي لج سبب وبحب يكون رفضج مو من باب الفرض وووجذي مره وافقي ومره لااا (يعني مره لج ومره له السفره)
صدقيييييني بيحترررررمج ويحترم رااايج حيييل وراح ياخذ راايج بكل صغيره وكبيره تدرين لييييش لان بيحس انج مو انانيه الريال متى ماحس ان مرته انانيه وتفكيرها تفكير الحريم والله والله والله ماياخذ برايها او موافقتها لان عارف تفكيرها تفكر لنفسهااا وبس ما تمسك العصا بالنص
وبسسس هذا رايي
الله يوفقج يارب ويكتبلج اللي فيه الخير
سوري طولتها بس لاني ماعرف اختصرر

 

[توتا حمرا]

ولا مرة سافر خل يسفرج يوديج معاه انتي اولى ليش يروح مع رفيجه
لو أنا مستحييييييل اوافق واذا انتي ماعندج مشكلة ان يسافر وانتي اتظلين بدون سفر وواثقة من أخلاقه كيفج اذا بتوافقين

 

[sosowaty]

ااااااب

 

[mira]

اذا انتي وآثقه منه خلييه يروح عادددي ..
انا زوجي يروح عاددي لأنه عارف ربه زين وثقه لكن مايمنع انه يبصبص يمين ويسآر لكن عادي هم معانا ويطالعون
انا اقول خلييه عادي لأنه بيحس انك ساجنته كذا وتتحكمين فيه ودام اخذ موافقتك هذا ماينخاف منه

 

[دروبك يالسهر]

عادي حبيبتي خليه يسافر مافيها شي من حقه يستانس ويا ربعه مثل ما انتي تبين شويه حريه هم هو يبي
الحياة الزوجيه عطاء وتضحيه مو امتلاك للشخص الثاني والله يخليكم لبعض ان شاءالله