- إنضم
- 18 سبتمبر 2009
- المشاركات
- 13,224
- مستوى التفاعل
- 1
- النقاط
- 0
قوة بنات شلونكم...؟
ان شاء الله بخير..
بعد موضوعي الأول عن الــــ Red Velvet Cake
http://q8yat.net/showthread.php?t=576205
والتشجيع الحــلو الي لقيته منكم..
اليوم جبتلكم وصفة كيكة القرع العجيبة الــ Pumpkin spice cake
وطبعا هالكيكة كليتها من محل كاراميل...وعجبتني ودورت وصفتها ولقيتها والحين صارلي فوق السنة ونص وانا أسويها والكل يحبها..والطعم 100 % نفسها وأحلى بعد..
نبلش بمقادير الكيكة :
نص كوب زبدة
1 وربع كوب سكر بني فاتح
2 بيضة
1 كوب قرع مسلوق
1 ملعقة متوسطة فانيلا
2 كوب طحين منخول
1 ملعقة متوسطة بيكنغ باودر
1 ملعقة متوسطة بيكربونات الصوديوم
نص ملعقة متوسطة ملح
نص ملعقة متوسطة دارسين مطحون
ربع ملعقة متوسطة زنجبيل بودرة
ثمن ملعقة متوسطة بودرة ثوم
نص كوب لبن ثقيل
خلطة الجبن :
228 غرام جبن كريمي
ربع كوب زبدة
ربع كوب سكر مطحون
شوية رشات كريما سائلة او حليب رشه خفيفة وممكن بلاها بس اذا شفتو الخليط يحتاج يكون قوامه أخف
خلطة التوفي :
كوب سكر
ربع إصبع زبدة
كريما سائلة
الطريقة :
أول شي بصحن عميق نخلط المكونات الجافة مع بعض ( الطحين + البيكنغ بودر + بيكربونات الصوديوم + الملح + الدراسين والثوم والزنجبيل )
بالخلاط نخلط أول شي الزبدة + السكر لمدة 2 دقيقة
بعدها نضيف البيض ونخلطه لمده 2-3 دقايق لي مايصير الخليط كريمي وبعدها نضيف القرع والفانيلا ولما يمتزجون عدل نبلش نضيف الطحين واللبن بشكل تدريجي ونبلش بالطحين وننتهي بالطحين...ونخلطه لي مانتأكد من امتزاج الخليط عدل..
وبس نكون مجهزين الفرن من قبلها ونجهز القوالب ونمسحها بزيت وطحين عشان يصير سهل ان نشيلها..
أنا حطيتها بقالبين وممكن 3 قوالب لأن ماحب أجازف وأقص الكيكة من النص لأن صعب علي..
وطبعا أول ربع ساعة مانحاول نفتح الفرن نهائي..عشان الكيكة تنتفخ عدل..بس طبعا كيكتنا ماراح تنتفخ حيل لأن فيها شوية بيكنغ باودر..وبعد مايستوون نخليهم لي مايبردون..
بعد مانخلط خلطة الجبن وتكون جاهزة نحطه كلها على الطبقة الأولى ( لان عندنا بس قالبين) ونحط فوقها الطبقة الثانية
وبعدها نصب التوفي فوق الكيكة ونزينها بالجوز والفستق أو اي شي متوفر عنكم ممكن يكون بديل للجوز..
طريقة عمل التوفي:
نذوب السكر على نار هادية ولما يذوب كله على طول نجط الزبدة معاها وبعد مايذوبون نضيف الكريمة السائلة أو القيمر ( تقريبا نص العلبة او أكثر شوي) ونخلطه وعلى مايمتزج عدل نوخره سيده عن النار ونخليه لي مايبرد ونضيفه على الكيكة..والباقي خلوه بالثلاجه يفيدكم بعدين...
وطبعا تقدرون تسوون الكيكة على شكل كب كيك حلو حق العزايم أو الشاليه..
وهذي صورة الكيكة الي سويتها..طبعا كل مرة تطلع أحلى من جذي بس مشى الحال..
أتمنى تسوونها وتعطوني رايكم..وصدقوني بتعجبكم والكل بينصدم انها كيكة قرع..
:nbvppw::nbvppw::nbvppw:
