كيف نقدر نستفيد من مشاكلنا . . ؟

[ايشآ]

بسم الله الرحمن الرحيم

طبعآ مافي زواج او حيآه زوجية خآلية من المشآكل والخلآفات مهما كان عمق المحبه بين الطرفين
والصبر شي اساسي والتنازل ايضا في بعض المواقف عسب تلتحم هاذي المشآكل

انا برأيي الزوجه الذكية واللي تحب زوجها
هي بس اللي تفكر صصح وبذكآء في حل مشاكلها


مرات نشوف مشاكل غيرنا من المتزوجات وانساعدهم وننصحهم بشكل متوسع
لكن من نصير نحن بالمشكله نفسها عقلنا يوقف ولا نعرف نتصرف
مب دايما ولكن في اغلب الحالات جذي

انا حبيت افتح هاذا الموضع عشان نتناقش كيف نتصرف في مواقف تكون محتاجه ذكآء وتصرف سريع
لان اغلب البيوت تنهدم نتيجة ل التسرع في أخذ القرار +اتخآذ القرار الغلط للأسف

وطبعا انا ماكتبت هالموضوع الا بعد ماكانت حياتي الزوجيه على وششك الانتهآء قبل ما تبدآ حتى
بسبب تسرع وعدم تفكير ويوم دخلت المنتدى لقيت وايد مشاكل بنفس طريقتي

فـ حبيت انزل هالموضوع عسب نستفيد وننصح بعضنا في سبيل التحسين من الحيآ الزوجيه
ورفع معنوياتنا واساليبنا وطرقنا في ارضاء ازواجنا لآن الحين طريقة تفكير الريايل صارت غير
او بمعنى اوضح ماصارت ترضيهم الاشياء اللي كانت ترضيهم من قببل صار في تطور وتفتح

باختصار كل وحده اكيد مرت بمشكله او هوشه او نقاش حاد واكيد استفادت من الشي
وعرفت شنو هي اغلاطها وشنو المفروض كانت اتسوي وكيف اتصرفت
ياليت اتفيدنا وتنصحنا عشان ما نطيح بنفس الموقف او اذا طحنا نكون اولريدي عارفين كيف نتصرف


انا ماراح اذكر مشكلتي لآنها ششوي خآصصه لكن
انا اعترف اني غلطت ودخلت اكثر من طرف وكنت بلحظه غضب ..

واخطائي كانت :
اني ما واجهته
ثاني شي دخلت اكثر من طرف وكبرت المشكله اكثر واكثر
طلعت من بيتي وهاذا غلط غلط بس اكتشفته بعدين
شفت للمشكله من جانب واحد ومافكرت ف غيري
نسيت اللحظات الحلوه وذكريات الفرح


الواحد يغلط صح بس المفروض مايستمر بالغلط ويبدأ يعالج هاذا الغلط بطريقه صحيحه
وحاليآ انا يالسسه اعالج مشكلتي واراجع نفسي والحمدالله الامور بدت تتيسر وكل شي يصير مثل مابا
لاني عرفت افكر صح وبهدوء وبعيد عن اي حد .. والأهم اني ما اعيد هاذي الاخطاء مره ثانيه

ان شاء الله الموضوع هاذا راح يكون فيه نصايح وافكار واشياء راح تحسسن من حياتنا مع ريايلنا ..

 

[Aloe Vera]

موضوعج حلو و الله يوفقج و يوفق الجميع

 

[M!ss CoLoRz]

الله يبارك فيج أختي على هالموضوع الحلو والمتزن

وشي زين انج ما ذكرتي مشكلتج ولكن عطيتينا الزبدة بطريقة واضحة وكافية

في شي الاحظه ان الوحدة وخصوصا في المنتديات لما اتيي وتذكر مشكلتها مع زوجها تعرض موضوعها وكأنه زوجها شرير والعن ما خلق الله + الوحدة اتيي شايلة على ريلها جبل والعكس اهوه بعد تلقينه شايل وشايل وانفجر فيها "مثلا" ، وغير اللي ما تيود لسانها قاطة سرها عند فلان وعلان يا تمدح في ريلها على الطلعة والنازلة يا من تهاوشوا قعدت مع النسوان وتشكت !!في شي اسمه أسرار بيوت ما تطلعينها حتى حق امج

وهاي الغلط الأكبر إن الوحدة ما تجوف زوجها كحبيبها وصديقها وروحها اللي ما ترضى عليه .. تزعل عليه عشان شي عشان مشكلة اي بس انه بقدرة قادر ينقلب شرير من تصير مشكلة هاي مشتت الجماعات !!

اي مشكلة زوجية حليها حار بحار "طبعا اختاري الوقت المناسب" بس مو تشيلين في قلبج وسامحي على التوافه وعدي عشان المركب تعدي ... وشجعي زوجج انه لما تصير مشكلة تكلموا فيها تحجوا طلعوا اللي في قلبكم وقطوا الموضوع ورا ظهركم

عشان لما اتيي مشكلة تواجهونها بسهولة مو انتي شايلة واهوه شايل( واي انت كيت وكيت وكيت واهوه اييج انتي وانتي )

شخصيا أقع في هالغلط ساعات ومع الوقت تعلمت وقاعدة اتعلم انفذ اللي قلته فوق انا و زوجي

+ محد فينا يعرف الغيب لما نزعل انا آخذ موقف واتوقع منه 1 2 3 وآبيه بروحه يكتشف وهاي شي مستحيل لو عرفني 70 سنة واهوه بعد حزة الزعل يتوقع منج رد فعل معين

ضروري الاثنين يتقبلون ويتعايشون مع واقع انهم شخصيات غير كل شخص له تفكيره ومحد يقدر يدش مخ الثاني ، هدوا كرامتكم على صوب وقعدوا مع بعض وتكلموا بهدوء والأهم حزة الهواش ما في سب ولا تجريح وطلبوا اللي يرضيكم ... متوقعة اعتذار قولي له انا شايلة في قلبي آبي اعتذار

والزوجة الذكية اهيه اللي تجوف زوجها ياهل "في بعض الأمور طبعا" وتمشي على مبدأ (اختيار المعارك) مو كل شي نتهاوش عليه ، في اشياء تقهر بس لما اسوي مشكلة واحاول اغيره "حسب وجهة نظر كل الرياييل" شنو النتيجة بتكون ولا شي هاي زوجج وهاي اطباعه دامه ما يضرج ولا مسوي شي حرام او ما يغتفر لا تسوينها مشكلة

سامحيني كلامي مخربط وداش في بعضه بس هاي رؤوس الأقلام اللي طرت على بالي

 

[شمس وورده]

مشكوره اختي على الموضوع وايد حلو وان شاء الله لي عوده اكتب الي عندي من اشياء تعلمتها من مشاكلي الزوجيه يعطيج العافيه اختي

 

[ايشآ]

M!ss CoLoRz

ماشاء الله عليج كفيتي و وفيتي
فعلا من اكبر المشاكل هي انج تسردينها حق كل حد يعني اوكي ممكن تذكرين مشكلتج بس مب بالتفاصيل اللي مالها داعي
لآن هالشي لازم يكون بينج وبين ريلج ..

يعطيكم العافيه على المرور ..

 

[Aloe Vera]

اعتقد ان الحياة الزوجية مقدسة و فيها اسرار المفروض ما تطلع من البيت لو شنو ولا حتى الام و الابو ولا حتى المنتديات علبو ان محد يعرفني
انا غلطت جم مرة بس بالغالب ماحب اتكلم باموري الزوجية و لا حتى ابين عن حالتي داخل بيتي اول شي العين حق و ثاني شي محد له شغل و ثالث شي مابي اعطي احد فرصة ان يتدخل بحياتي

 

[ايشآ]

ومن الغلطات اللي سويتها اني خليت حياتي مثل الكتاب المفتوح
خصوصا بالانستقرام
كنت اصور كل شي واحط كل شي صور ريلي ووين نروح ووين نسافر وشو يشترلي

والبنات كانو يحذروني ويقولون لي ان العين حق بس سبحان الله الوحده لما تفرح ماتفكر
بس جد مسحت كل الصور الخاصصه وماصرت أبين اي شي لآني حيل عانيت من ورا هالموضوع