كويتيات# تكفوووون ساعدوني الله يرضى عليكم :( مشكلتي مشكلة :(

[زهرة ووردة]

سلام حبايبي

انا مشكلتي عن الدراسه سمعوا
انا مشكلتي هي اني اخاااااف من الامتحانات بشكل رهيب والله مادري انا بعاشر وحددي اخاف من الامتحان اخاف ايي صعب او انه مايمديني اخلص كمية الامتحان والله الله لايوريكم شنو يصير فيني ما انام وما آكل واعصابي مشدودة وغير البجي الي ماله والي :eh_s(16)::eh_s(11):

والله بنات يمكن انتو تشوفون مشكلتي سخيفة بس بالنسية لي لا والله يوم كنت بالمتوسط ماكان يصير فيني جذي والحمد لله انا شاطرة واييب امتياز
والله من دشيت عاشر تدودهت
الله يخليكم ساعدووووني ونصحوني انا خبري فيكم نصايحكم تينن وحيل تفيد
تكفوووون فيدوني :eh_s(11)::eh_s(11):

 

[مدمنة كوفي]

انتي شاطرة ما شاءالله عليج وجايبة امتياز والامتحانات تخوفج ؟

لا تخوف ولاشي واذا تعقدين الامور بتشوفينها صعبة فدائما بسطي الامور اذا المادة صعبة وامتحاناتها صعبة درسي اول باول في ناس يدرسون بس حزة الامتحان واكيد هالشي صعب خصوصا اذا في معادلات وقوانين وحفظ مثل الرياضيات والفيزياء والكيمياء حتى التاريخ لازم حفظ اول باول

واذا ما يمديج حلي الاسئلة السهلة واذا خلصتيهم روحي للاسئلة الصعبة اللي تحتاج حق وقت

كلنا وقت الامتحانات نحاتي وما انام وخايفين بس من يخلص الامتحان يروح التوتر مسالة وقت , امي كانت مدرسة كانت تقولي قبل لا تدرسين فرفشي شوي طالعي تلفزيون او اكلي شي حلو
اقولها ليش تقول عشان تنتفح نفسيتج للدراسة وتركزين دائما ركزي ترى الخوف ما يخليج تركزين وبتصرين سرحانة والسرحان وقت الدراسة مو زين راح يأثر على دراجاتج

انتي امتياز واصلي على المستوى وانتي غلبي الامتحان تحدي هالورقة يا ما تحلينها كامل وانتي الفايزة اما هي تغلبج وما تنجحين فشنو الافضل

 

[سندس 90]

ياحيااااتي أنتي


تدرين اللي ضيييع علي حالياً وخله نسبتي مو راضيه عنه ونازله اهو الخوووووف


نفسسسج والله يأذن الفجر وباقي لي كميييه وارتعب وزين مايغمى علي من الخرعه

والحمد لله نسبتي موووشي بسبت هالخوووف

حاولي تسيطرين على نفسج وأنا همن بصير جذي


والله كريييم ويرزقنا باللي نبيه ونطمح فيه.
واللي يقرا يقول آمييين

 

[نونه المنكوشه]

الله يسهل امورج

 

[~ دلال و غلا ~]

حبيبتي الله ييسر امرج و لازم تتفائلين و تقولين حق نفسج انا دارسه عدل و فاهمه و متوكله ع ربي
و قولي اللهم لا سهل الا ما جعلته سهلا و انت ان شئت تجعل الحزن سهلا

 

[شــــــــــــــوقــــه]

عاشر لان مرحلة يديده و مواد اول مرة تمتحنين فيها بروحها يعني كيميا و فيزيا و احياء قبل كانو كلهم بماده وحده علوم

اما بعاشر ينفصلون و تزيد ايام الامتحانات و تفكرين و تحاتين

مريت بهالحالة و نزلت نسبتي الكورس الاول و بجيت لان متعوده عالامتياز بس الكورس الثاني الحمدلله رفعتها لي الامتياز

خو بعد بالثانوي سالفة ما اخلص الكمية وايد صارت معاي اروح امتحانات الفاينل مو خالصة دراسة

اقري اية الكرسي و طردي هالافكار من راسج وقولي انا قدها

 

[حروف من ذهب*]

الدعاء أولا وخليج أوثقه من نفسج والله يوفق الجميع

 

[دلوعةمآمآ]

والله أنتي زيي بالضبط

اتعب كثيير من الأمتحانات وأشييل همها

من اول متوسط وانا فيني هالحاله ,ما أنام منها ولا آكل حتى مأسولف ولا أضحك ودايم تعبانه منها ومنفسه

وبس أبككي

تجيني هالحاله فترة الأمتحانات وبعدها يرجع كل شيء تماام الحمدلله

لكن حمدلله شوي شوي خفت , يبي لها صببر يمكن أنتي حرييصه على دراستك كثيير زيي

انا أخاف إني افششل فيها ويضيع مستقبلي ووووو.......إلخ ,, لأن عندي طمووح وأبي احققه إن شاءالله

عششان كِذآ أتعب منها وخاصه امتحاناتي على مادتين مادتين فـ صعبه مرره

ودايم قوولي لنفسك امتحاناتي سهله وراح أنجحح


لكن أتكلي على الله وأكثري من الأستغفار والدعاء


الله يوفقك في حياتك العلميه والعمليه ...

 

[زهرة ووردة]

الله يجزاكم خيررر حبايبي والله يستر عليكم ريحتوني الله يريح بالكم

 

[Beautiful soul]

انا مع المقولة اللي تقول من خاف سلم
بااال ذكرتيني في الثانوي ايام الامتحانات كلها دموع وترجيع وصياح لاني خوافة دايما اقول ماحفظت وماخلصت حالتي صعبه
مع اني الحمدلله كنت متفوقة بس اخاف واشوف ان الخوف نفعني :/ بس اكثر شي يلوع جبدي اني من النوع اللي اذا خفت ارجع كل اللي في بطني وهاللي يتعبني

شدي حيلج وادرسي ولاتحاتين ان شاء الله بتكونين متفوقة كالعادة

 

[M!SS.LOBY]

الله يسهل أمورج


شي طبيعي تكون عندج حالة خوف لان هذي مرحلة الصف العاشر اول مرحلة لج بالثانوية بعد مرحلة المتوسطة شئ عادي

بس خلى عندج من داخل عزيمة وارادة واصرار قوي عالدراسة

 

[ابي قطوة ميوووو]

ليش ليش تخرعين عمرج ! بعد انتي ما شاء الله متفوقة ! اهوا طبيعي يكون فيه خوف ورهبة ايام الامتحانات بس انتي حطي ببالج انج درستي والحمدالله وتوكلي على الله وخلصج واثقة بنفسج
وقل لن يصبنا الا ما كتبه الله لنا

 

[احلى بنوته11]

انتي مثلي
انا الحمدلله شاطره واجيب علامات زينه
بس هم انا اخاف من الامتحانات
الخوف شيء طبيعي ، طبيعي الواحد يخاف بس المفروض مايخلي الخوف يسيطر ويؤثر عليه
حبيبتي اذا انتي ذاكرتي زين وانتي واثقة من نفسك ليش تخافين ؟؟
ترا هالخوف راح يضيعك ويخليك ترتبكين خلال الاختبار
حبيبتي توكلي على ربك وقبل لا تختبرين اقراي ادعيه وصلي على النبي وتوكلي على الله وان شاءالله ربك يوفقك

 

[dodo egy]

انا طول عمرى شاطرة ومتخرجة من كلية الهندسة .كنت ازاكر طول السنة بس ايام المتحان اراجع بس بيقولو اللي اتخزن فالزاكرة مابيضيعش مالخوف بيفضل متخزن .سمي باللة وابداى بالاسئلة السهلة .وربنا معاكي يا صغنونة