كل يوم والثاني ماد إيده علي

[ام مذكر]

السلام عليكم ورحمة الله وبركاته يابنااااااااااات أبي حل زوجي إيده طويله حاولت أحط له حد بس ماكو فايده تعبت نفسيتي منه وياليت يمد إيده على شي يسوى أقسم بالله حتى أهلي عمرهم مامدوا إيدهم علي تخيلوا موضوع عادي يصرخ علي جني أصغر عياله والله يحز بنفسي بس أروح داري وأخليه يلحقني ويصرخ ويمد إيده ذاك اليوم طالعه مع حماتي طلبت منه فلوس ماعندي سوالي سالفه إنزين إذا أنا وأعوذ بالله من كلمة أنا وأقسم بالله العظيم إني مو قاعد أضغطه لا بمصاريف ولا طلعات ولا غيره وهذا جزاتي وقت حاجتي ماعندك شنو أتسلف من الناس وزوجي عندي المهم عقب مارديت من السوق واحنا رادين البيت قعدت أتحلطم وحماتي اتعذر ماعنده تحملي جك بم دشينا البيت روحي سولفي لأهلج عن السالفه المهم ثاني يوم أنا راده البيت عقب الدوام قاعد أضحك معاه حاقرني سألته شفيك أقسم بالله جان يزنطني حيل بقيت أموت جان يقول عشان ماتسولفين عند أحد والله كل ما كلمته بموضوع سوالي سالفه وكل مانزلت عند أهله انغث يا بكلمه أو بتصرف أو خدامتج فيها وخدامتج فيها خلصت السوالف استلمو خدامتي وإذا مانزلت ليش مانزلت جنه دوام لازم تحضرين واطقين كرت والله بلشه تكفوووون انصحوني شسوي مع العلم إني ماحب أسولف حق أهلي أو رفيجاتي والمشكله إنه عندي بنت وحامل وما أكذب عليكم فكرت بالطلاق وأشتري راحتي النفسية بس شذنب هاليهال

 

[الـوايـلـيـة]

الحل توقفينه عند عنده
يعني لازم اهلج يدرون بانه مد ايده علشان يتووب ومايعيدها
ويعرف ان وراج عزوه ورجاجيل

 

[منيرة خالد]

غيري اسلوبج معاه وشوفي الشي اللي يستفزه لا تسوينه

ولا تسولفين على اهله عن مشاكلكم ولا تتحلطمين عليهم لأنهم اهله وبيوصلون كل كلمه تقولينها >> سمعتي بالمثل امدحه واخذ عباته


سويها فيه عند اهله




غيري اول شي بنفسج واذا ما تغير لازم تقولين لأبوج يتفاهم معاه


والله الموفق

 

[غدووور الكويت]

رد : كل يوم والثاني ماد إيده علي

حبوبه لا تسولفين عنه عند أهله واذا بتقولين شي خليه مدح لأنهم ما يرضون على ولدهم بالشينه وقعدي معاه وتفاهمي وياه بهدوء بخصوص الطق وبيني مكانتج وانج معززه عند أهلج وإنهم ما يرضون باللي يسويه واذا مد ايده مره ثانيه لازم اتدخلين شخص عود وحكيم يعطيه جم كلمه ويفشله علشان يحسب لج حساب ويعرف انه عندج ظهر

 

[~LiBrA~]

رد : كل يوم والثاني ماد إيده علي

لازم توقفينه عن حده وتقولين حق ابوج او اخوانج يعني ريال من اهلج

لان السالفه مو مرة اومرتين انتي تقولين وايد وتحملتي

الموضوع ماينسكت عنه وشافج معطيته ويه قاعد يتمادى زياده ديربالج منه لايسوي فيج عاهه وانتي حامل وتبتلشين

الله يهديه انشالله

 

[a7la MUM]

رد : كل يوم والثاني ماد إيده علي

حياتي انتي انا بس بقولج كلمه وحده
الريال اذا مد ايده وسكتي عنه ولا احد وقفه عند حده بيتمادى ولا راح يوقف عن الموضوع ..بس

الحل انج توخرين عن اللي يضايقه بس انتي تقولين على اي شي يعصب ويمد ايده@@

اذا لاسمح الله مد ايده مرة ثانيه اهني خلاص اتخذي قرار ترا مدة الايد مو شويه هل مرة مد ايده على خواته ؟لا طبعا بس شاطر عليج انتي ليش ماعندج اهل ماعندج احد يوقف بويهه حتى لو عندج يهال هذا حده عني هذا وانتي حامل يزنط اللهم ياكافي الله يهديه بس

 

[ام شووووق]

رد : كل يوم والثاني ماد إيده علي

ماعندج اخواااااااان

ابوج عايش

عمج

او

روحي حق حمولتج



وغلطتج اللي سكتي من البدايه

 

[واصله]

لازم يوقف عند حدة شنو وهذا انتي حامل يمد ايدة عليج
الله يهديه
لازم تتصرفين معاه بجديه وتكبرين الموضوع عشان يحرم

 

[jnawe]

رد : كل يوم والثاني ماد إيده علي

حبيبتي ، الله يكون بعووونج
كل اللي تسوينه وصبرج عليه مو ضااايع انشالله ، يزاااج على رب العالمين

بس ريلج لازم يوووقف عند حده
لازم يعرف ان وراااج اهل بيوقفون معاااج مهما صااار

حبيبتي الريال من يطق اول مره ونسكتله بيتمااااده ، خصوووصا اذا اهله جذي

حبيبتي اشتري رااااحتج

ولا تطيحين من قدر نفسج

الله يسعدج ويريحج يااارب

 

[اشتياق]

لاتدخلين اهلج
صكي ريولج<<فاهمتني؟
عفوا عالجرأه بس لاتكلمينه
ان حاول يعرف السبب قولي ماكو سلامتك
مافيني شي
ونزلي كل يوم 10 دقايق وانتي ساكته وردي صعدي
ماله حجه
قولي نزلت وانتي مبتسمه وروحي عنه
لهي نفسج ببنتج
والهي عنه
وخلج اكبر منه

 

[مناير خزنة التاير]

الله يعينج
ولا تسولفين عنه عند اهله !
فضفضي عند اختج امج بس اهله لا لا لا

وصلي و ادعي ربيج يسخره لج
مالج غير الله و الصدقه و الاستغفار وانشالله يتغير

ياربي يسخره لج و يهنيج معاه وتولدين بالسلامة

 

[حبيبي مالكني]

رد : كل يوم والثاني ماد إيده علي

حبيبتي بعض اليايل اذا شافو المرة ماتعلم اهلها اذا طقوها
يتمادون
انتي خبريه انه اذا مد يده عليج مرة ثانية انج بتخبرين هلج
واذا ماتغير
خبري هلج حبيبتي ولا تخلينه يعذبج جذي يمكن يستحي من هلج ويتغير
وانتي غلطتي انج سكتي عنه من المرة الاولى انتي انسانه وتعامل معاج يكون بالتفاهم مب بالطق
الله يعينج حبيبتي

 

[مناير خزنة التاير]

تصدقين انا مع الاخت واصله
التزمي اسلوب الصمت يعني لا تحاربينه و تنفسين عليه

لا بس سكتي عادي
واذا هو بالصاله روحي سنعي دارج كبتج اي شي
تسبحي
اذا يه روحي الصاله طالعي تلفزيون
بس لا يحس انج تنحاشين

 

[.،:"$الـعـوبــــة$":،.]

رد : كل يوم والثاني ماد إيده علي

لأنك من الأول سكتي ،
بعض الرياجيل فيهم رداة ! لاشافوا المرة مسكينة وساكتة يزيدون ويستلعنون ! ماتكسر خاطرهم ويطخون !
مدة الإيد أول شي لازم تنتهي وتوقفينه عند حده باي حل من الحلول ،
وبعدين على شوي شوي ، غيري من طبعك ، خل شخصيتك تكون اقوى من كذا !
وضاقت عليك مالقيتي تشتكين له الا عند اهله ؟؟ من صدقك ؟؟
انا اقول انتي شوفي اغلاطك وصلحي فيها !​

 

[wafa82]

رد : كل يوم والثاني ماد إيده علي

:0bee2e8d89:حبيبتي والله مادري شقولج الله يعييينج ويسخره لج بس لازم تقولين حق اخوج ابوج اي ريال من اهلج يوقفه عند حده

 

[senioreta n7oola]

رد : كل يوم والثاني ماد إيده علي

الله يعينج حياتي .. ويفرج همج ..

 

[حبيبتي إختي]

رد : كل يوم والثاني ماد إيده علي

ما يصير يمد ايده عليج على الفاضية والمليانة
والسوالف هذي ما ينفع فيها الا اهلج ابوج او اخوانج
روحي كلمي ابوج وقولي له عن السالفه واكيد ما بيرضى على بنته
وريلج قمة الإحراج لما ابوج يزفه و يعرفه حجمه الطبيعي
وبشكل عام ولا تقولين حق اهله أي شي خاص بحياتكم الخاصة

والله يعينج ويفك كربتج.

 

[عاشقة-الكفيل]

رد : كل يوم والثاني ماد إيده علي

صلي على محمد وآل محمد
وهدي اعصابج يالغاليه
باين على زوجج عصبي ومايحب الناس تنتقده وانتي شايفه ان اهله حجايين وتقولين اذا مالقو فيج عذروب استلمو خدامتج ..
مبدأ مدة الايد مرفوض تماماً .. وانتي لازم تحطين حد حق هالشغله بطريقتين : اولشي تكلمينه بوقت الهدوء ووقت الي تحسينه انه رايق وتقولينله انه مايصير هالتصرف مو سليم .. وحلفيه انه مايعيدها .. ثاني شغله اتجنبي الاشياء اللي تخليه يفقد اعصابه .. يمكن في اسباب تشوفينها تافهه بس اهو يشوفها كبيره ..
بالنسبه لاهله خصصيلج ايام محدده بالاسبوع خليهم يشوفونج ..
انا مثلج كنت احس بظغط كبير كانو يوميا يبوني انزل .. بس ماتحملت ..
قمت اتحجج اول فتره وقطعت موليه وكنت اروح بيت اهلي اقعد وياهم ..
وبعدين شوي شوي بديت انسق وبديت ارد زواراتهم بس بايام معينه الخميس والجمعه .. مع اني ساكنه وياهم ومجبوره اتواجه وياهم بس قمت اتعذر فباجي الايام بالبيت والشغل والالتزامات .. وافضي روحي هاليومين وانزلهم ..
ثالث شغله كثري صلاة ودعاء وشربي ريلج ماي مقري .. اقري المعوذات على قلاص ماي وشوية سور قرىنيه وخليه يشرب يهدي نفسه شوي ..
صدقيني المشاكل من الشيطان داش بينكم ..
خلي الاذكار والقرىن بلسانج على طول ومن تشوفينه معصب كرري اسم (( ياحليم ))
ولاتنسين بعد الدلع والحنان حتى لو عصب حظنيه واهو نايم واذا صاحي قعدي بحظنه ولعبي بشعره هالاشياء تحنن قلب الزواج وانتي وشطارتج وحكمتج .. صدقيني الحكمه بالتصرف تسهل الامور
الله يوفقج ويسهل امورج ويسخرلج زوجج يارب

 

[ريماس77]

رد : كل يوم والثاني ماد إيده علي

حبيبتي من صجج تشكين عند اهله 0000اكيد بيوصلون الخبر مثل البرق له اول شي لاتكلمين ثاني شي لازم تحطين حد حق هالموضوع وين قاعدين قعدي تفاهمي معاه بهدوء لايزنطج المره اليايه وتروحين من جيس اهلج بعد الشر والله يخليج لهم

 

[ام مذكر]

أشكر كل وحده دشت وعلقت والله ريحتوني عسى ربي يريحكم بالدنيا والآخره بنات أنا تكلمت مع حماتي كلام عادي ماتوقعتها إتكلم والله ماتدرون بلي بقلبي أنا إنسانه كافيه خيري شري والله ما أقصر معاهم بأي شي أنا أعترف غلطت وتكلمت بس مو معناته تقومين توصلين السالفه وبعدين والله أحس إن في أحد قاص عليهم قايلهم إنه يصرف علي ومومقصر فيني تخيلو حتى شيل البيت عينهم عليه والله يابنات معتبرتكم خواتي المشكله إني مومقصره بشي لا بنظافه ولابريحه ولابسنع بس كله يقارن بيني وبين حريم إخوانه ويمدح مرت فلان سوت مرت فلان حطت وهاذي سوالف حريم ولا أهو شدراه وأنا ما أحب أقلد ولا أحب أجامل أحب يطلع الشي من خاطري والله مع إني مومقصره فيه ولا بأهله بس عمره ما مدحني بشي ولا سمعت منه كلمه حلوه يقول إنتي تدرين أنا أحبج وماله داعي أقولها لا وأزيدكم من الشعر بيت أغلب سوالفه مبين يحرشونه حسبي الله ونعم الوكيل فيهم ومره دزيت له مسج قلت له بطلع دزلي حسبي الله ونعم الوكيل فيج إنزين أنا شسويت عشان إتحسب علي والله يابنات مقهوره ما أبي أتكلم عند أهلي أخاف تكبر السوالف وباكر بتمر الأيام وأنا بنسى وأهلي مانسوا وراح يكرهونه والله إني أمس قاعد أبكي كني ياهل وخفت يلبسني جن ماقدرت أسكت قمت شغلت سورة البقره والله لا أروح سوق معاه ولا بروحي ولا مع أهلي بس ساعات يحن قلبه بعد ضغط وحنه شهر يالله يخليني أروح مع خواته والله ملييييت وزهقت بس أدعي ربي يهديه والله ساعات يصير زين وساعات ماكو أشين منه طول اليوم قاعد يضغطني لا كشخت له قال شفيج بتسيرين والله تعبت ذاك اليوم غلط وقال بسفرج قدام أهله ما استحت حماتي لما طلع قالت عنده فلوس يسفرها ماعنده فلوس يودينا جاخور ولا شاليه.