كرهت كلام جاراتي كيف ارد عليهم

[عششق القهوه]

السلام عليكم
بنات انا طولي 163 تقريبا او 164
ومو ضخمه
مشكلتي اغلب صديقاتي وجاراتي
ماينادون الا يالطويله
او يقطون كلام ع طولي
مثل انتي لما تعجزين بينحني ضهرك
او اذا لبست كعب بسيط جدا تعالو شوفو التريقه
ممكن هذا ثاني موضوع لي كذا
لكن حيل هالموضوع مضايقني
يعني ايش استخدم نفس اسلوبهم وابدا اتمسخر. من اشكالهم
والله هذه مو تربيتي
ابي ردود مسكته لهم بس بادب

 

[Tom ♥ Jerry]

,


يا زين الطول ! خلج وآثقه من نفسج حبيبتي
بعدين ترا انتي مو over over !!!
في بات 170 و فوق :/

منيكأن ياحبيبي منيكآن:eh_s(22):

 

[Heaven Light]

@@

والله انتي طولج حلو .. الا هم القزمات !

ما عليج منهم .. انا رفيجتي طولها 179 ما شاء الله وقمة الثقة .. وبنت عمي طولها 175 هم واثقه من نفسها ..

انتي اذا ضايقوج قولي الطول هيبه والقصر خيبه ,, واللي ما يطول العنب حامض عنه يقول .. وقولي لانكم قرب الارض تشوفوني طويله \

لان والله والله انتي طولج متوسط وحلو يصلح لج الكعب والفلات ..

لا تضايقين نفسج بس يبيلج شوية ثقة

 

[دلوعة أبوهآ]

طولك جداً طبيعي ..
الخلل في تفكيرهم واسلوبهم وآلله ..


قولي لهم الطوول عز ..

 

[بنوته ستايل]

انا تعقدت من قصري وانتي تعقدتي من طولج محد بحاله راضي..


بس والله انا وياج مفروض نقول الحمدلله غيييرنا يتمنون طولنا..



ومثل ماقالت الاخت الي فوق قوليلهم الي مايطول العنب يقول عنه حامض والطول هيييبه وغيري يتمنئ طولي

 

[Smchoocha]

محترين منج حبيبتي
مثل ما هم ماقدرو مشاعرج لا تقدرين مشاعرهم
بطيها بويهم قوليلهم ليش محترين ؟؟
او ردي عليهم رد قاسي يسكتهم و يحرجهم مثل ( يالقزمه او شي )
مع اني ما اييد الالقاب بس احترم تحترم

 

[برستيجي مآركة]

والله بعض الناس في منتهى الهلاقه لايعرفون يتكلمون ولايسكتون
اذا يعايرونج انج طويله قولي لهم شفيكم يبا ترى الطول عز واعتزي بنفسج
ياانج تحقرينهم وتبتسمين بمسخره واستهزاء ياانج تردين عليهم باسلوب مناسب وتبردين قلبج
انا اعرف وحدة طويلة شوي ومليانه يعني شوي فيها نسبه ضخامه وتعالي شوفي ثقتها شلون صايرة
ولاتهتم لااحد مير بعض كلامها طولي وطولي.....
وخلك ياجبل مايهزك ريح وانا اختك.​

 

[عششق القهوه]

والله لما قريت كلامكم تمنيت انكم صديقاتي
سألت نفسي من وين طلعوو الي عندي بس يذمون الطوول مع انهم طيوبات لكن في هالموضوع اف !!!
وماعرف ارد :/
اتبلم
حتى اشك بطولي اقول ممكن القياس غلط
وانزل واطلع اقيس طولي اتاكد :||
وشفيهم علي ...
وحده منهم تقولي هلا بالزرافه
ومارديت يوم رجعت البيت اكلت نفسي والومها ليه مارديت
مابي اجرح احد ...لكن شوية احترام
ولالازم نجرح الناس عشان تحس ..،
والله انا ماحب اجرح احد
حتى لما اشوف وحده دوباا ومدوره اجلس اعزز لها وامدح فيها اشيا بعدين اقولها بس لو تنحفين شووي
اراعي مشاعر الناس

 

[أعشقه]

اما عاد
ياليت انا يقولون لي يالطويله
الي عندنا يدورون الطويله ويمتون عليها
يكون شكلها شي جسم وطول واناقه وتكون مرتبه بكل لبسه تلبسهااا
ماعليك منهم والله بالعكس هذي ميزه فيك مو موجوده عندهم
وبعدين مااشوفك طويله انا بهالدرجه الي هم ينادونك فيهاا
والله عندي اخت طويله نمووت انا خواتي عليها بذات لا كشخت ولبست تصير ملكه
ماعليك من حد وخليك واثقه من نفسك ولا حد كلمك تبسي قولي انا ملكه وجسي وطولي كله اناااقه

 

[Kocheko]

الثقه حبيبتى انا طولى 157 يقولون لى قزمه ولا تمشين صوبنا ولااااااااااااااااااااا افتكر ....
ناس فيها مرض تحب تتريق وبس

 

[!الجادل الصعب!]

بالعكس طولج حلو

اعرف بنات ١٧٠ و ثقه ..

قولي من هني لين اعجز بتم الاطول والارشق وردي بضحكه

ههههههه مشكله غيرة البنات

 

[ناتشوو]

عاد مو طويلة حيل
طولج عادي متوسط ومألوف
بس واضح انج حساسة
وردي بضحك
يالاقزام يالسنافر
اي شي

 

[ام رينـاد]

ماشوف فيه مشكله

خليج واثقه من نفسج وطولج طبيعي

 

[محبة الزهور]

خليج واثقه من طولج
‏​ٱ‏​نـِْ♡̨̐ـِْا طولي ١٦٦ واذا لبست كعب حتى لو قصير
قالو شطولج ولابسه كعب ونفس ما ينادوني الايا طويله
مرات ادر اقول الطول هيبه مو نفسج قزمه ويسكتون
وما قامو يعلقون بس الي ذابحتني مرت اخوي هالبنت مخها مقفل هي قصير ومالها رقبه
وتعيب شطولج وشطول رقبتج عادي هذي الحرمه ما احبها واكلها اكل اخليها تندم ع الكلمه الي قالتها

 

[أنفاسي دخون]

يابووووي 163 وينادونش يالطويله !!! اجل اللي فوق 170 وش بيقولون لهم

ماعليش طولش حلو ويهبل بعد << طولي احم احم

 

[الأميرة ديانه]

انتي مو محتاجه رد عليهم
بأختصار انتي محتاجه ثقه داخليه
ترد عليهم

لمن تحبين طولج راح تقدرين تسكتينهم بأي طريقه

الثقه علاج راح يخليج لو شنو يقولون تطنشينهم
بس اذا حابه رد

قولي : ملاين يلبسون كعب يبون يصيرون طولي
وانا الحمد لله بدون كعب شحلاتي اهبل
اهم شي ردج يكون رد انسانه واثقه لا اكثر ولا اقل
او اذا حابه
مثلا قطو عليج كلام قولي : ( اوكي ويعني !! ) مثل ان مو هامج كلامهم



بس اهم شي بهذا كله الثقه و بس

 

[-تكفيني الذكرى-]

أنتي من جدك ولا تغشمرين ... اختي واضح ميتين حره يبون يصيرون مثلك ... حطيها قاعدة براسك
اذا لاحظتي احد يحاول يحطمك بطريقة هذي دليل ع غيرتة يبي يكسر مجاديفك ...
انتي عمرك سمعتي شاعر من عصر الجاهلية او هالوقت يتغزل بالقصيرة .. من علامات الجمال لدى العرب والغرب الطول ..
وانتي طولك حلو مو فاااااارع .... الي يسمعك يقول جسمك وطولك وطلتك مثل عبدالناصر درويش ههههههههههه

 

[هدوء العالم]

لخواتي العزيزات أبتعدوا عن الشماته
وكلمة أقزام هذا أعتراض على خلق الله سبحانه وتعالى ما يجوز
لأنه هذا الأمر مو بإيد أحد حتى لو كان من الأثرياء لأنه هذا الأمر لله وحده
لقوله تعالى: يَا أَيُّهَا الَّذِينَ آمَنُوا لا يَسْخَرْ قَوْمٌ مِنْ قَوْمٍ عَسَى أَنْ يَكُونُوا خَيْراً مِنْهُمْ وَلا نِسَاءٌ مِنْ نِسَاءٍ عَسَى أَنْ يَكُنَّ خَيْراً مِنْهُنَّ [الحجرات:11].

النبي صلى الله عليه وسلم قال: لا يدخل الجنة من كان في قلبه مثقال ذرة من كبر، فقالوا: يا رسول الله، إن الرجل يحب أن يكون ثوبه حسنًا ونعله حسنًا، فقال صلى الله عليه وسلم : إن الله جميل يحب الجمال، الكبر بطر الحق وغمط الناس

وأختنا صاحبة الموضوع متعرضة للشماته بدال ماتعلمونها ترد بالشماته ترد بشئ حلو ويقهرهم وبدون ماتجرح أحد

وعن كلمة قزمة أعرف وحدة مسكينة بس تخلينا أحنا المساكين كم طولها طول واحد بأولى أبتدائي وهي ماشاءالله واثقة من عمرها ولا تحب أحد يعطف عليها مو حابسة عمرها في بيتها

والمساكين أحنا الطول الطبيعي من 150 إلى 170 مو واثقات في أنفسنا

وأختي العزيزة عششق القهوه
أن قالوا لج لا تردين لهم بشماته إلا قولي ( أحمدالله وأشكره ) مافيها شئ الله خلقني بهالطول ما أقول إلا أحمده وأشكره
بكل ثقة

 

[Môre N!Ce]

وليش يتمسخرون على طولج .. عشانهم أقزام ..

عادي ردي عليهم عاجبني طولي؛ حاصلّكم !!

هذا وانتِ مو حيل طويلة .. عيل لو طولج 170 وفوق شبيقولون ههة!

 

[عششق القهوه]

كل الشكر لكل وحده ردت ..
الاميرهـ ديانا صحيح ينقصني ثقه ششوي
لان الحمدلله احمد الله ع صحه والعافيه دايم وابد
لكن المسخره مااحبها واعرفهم مو من النوع الي اقول غيرانين
الا ان كان دواخلهم اشياء ثانيه ماانتبهت لها ,,,
...
تكفيني الذكرى والله عن جد يحسسوني اني عبدالناصر الدرويش !!
...
هدوء العالم للاسف بعض الناس عشان توقف عند حدها لازم تردين ينفس الاسلوب
لكن الى الان والله ماقدر اتمسخر ع شكل احد
...
موري يووو لو طولي 170 وش بيسموني ديناصوره !! ههههه ....

...
محبة الزهور زين تعرفين تردين عليهم انا اتفاجأ واسكت او ارد رد ضعيف ..