قلبــي معــورني عليــه ...

[أميره بحزني]

السلام عليكم ورحمة الله وركاته



والله خواتي مادري منين أبدا بس يمكن أللي عندهم عيال بيفيدوني أكثــر ...


أنا عندي ولد أخوي عمره تقريبا 12 سنه فديـتـه عسي الله يحفظه ويطرح البركه فيه هالولد من عرفت الدنيـا وأهوا خجول بدرجه موطبيعيه مع أنه مو وحيد عنده أخوان وخوات بس أهوا أكبر واحد حتي لما يزرونا مع أمه وأبوه يقطع قلبي تخيلوا يخاف من عيال أخواني وخواتي أللي عمرهم سنه وسنتين حاولت أخليه يصير شجاع أستأذنت من أمه وأبوه وقلت بشركه بالكارتيه بس ماكو فايده ماتغيـر ذاك اليوم كان عندنا عزيمه في بيتنا المهم حزة المغرب والناس مايوا أسمع صراخ يهال أخترعت وخفت الديوانيه فيها رياييل بس كان حزة صلاة قلت حق الخدامه روحي شوفي منو قالت اليهال قاعدين يطقون ضاري يمه أنصدمت رحت أركض تخيلوا منو يطقه بنات المفاعيص عيال أخواني وخواتي بو أولي أبتدائي وثانيه أبتدائي أنا صراحه ضغطي أرتفع بغيت أموت وأيي وأشيل اليهال من فوقه وأقعد أزفهم ماتستحون أطقون واحد أكبر منكم واقعد أزفه وأنت ليش تخلي اليهال يطقونك طاقينه يبون ياخذون من الورقه ( الجنجفه) ويه أحمر سكت ومارد علي قلت ماراح أضغط عليه المهم أهوا كلمة يموت فيني شوي عليه و كثر ماأقدر متواصله معاه مثلا أدق عليه حبيبي وين تبينا نطلع فديته يعرف اسامي المطاعم أكثر مني والمجمعات ووايد ذكي متفوق بدراسته بس عيبه الخووووووووف والخجل الغير طبيعي قبل جم يوم مريت صوب المطبخ ولاقاعد يحاجي خدامتنا جنه يحاجي مدرسته حتي المدرسه مايحترمونها جذيه لو سمحتي بعد أذنج بغيت ماي أنه أوكي مؤدب بس عاد مو أدب مع خوووف موطبيعي وسلامتكم .... أمنيتي أحط بقلبه الشجاعه شلون ,,,,​

 

[ورديـــه]

ياعمري عليه حبيبتي يمكن ابوه وامه عصبيين ويخانقونه وايد ومايحسسونه ان اهو الكبير لازم تقعدين مع امه وابوه وتقولين لهم يغيرون طريقة معاملتهم معاه ويحسسونه ان اهو الكبير وياخذون رايه بمواقف ويقوون شخصيته

 

[ورديـــه]

ياعمري عليه حبيبتي يمكن ابوه وامه عصبيين ويخانقونه وايد ومايحسسونه ان اهو الكبير لازم تقعدين مع امه وابوه وتقولين لهم يغيرون طريقة معاملتهم معاه ويحسسونه ان اهو الكبير وياخذون رايه بمواقف ويقوون شخصيته

 

[ام الدرر]

ياقلبي عورتي قلبي
حبوبة حاولي تودينه دورات تعزيز الثقة بالنفس
او تشركينه بمخيمات يبتعد عنكم فيها ويعتمد على نفسه
مثل اللي يسويهم طارق السويدان او محمد الثويني
عسى الله يحفظه ويتمم عليه اخلاقه ​

 

[توفـــا]

واي فديته عور قلبي صج شوفي يمكن اهو ضعيفه شخصيته مع الخوف زاادت عنده هل مشكله لازم الكل يلاحظ وضعه مو بس انتي يعني كلكم حاولي تخلون له شخصيه وتقوونه مو زين جذي الحين ياهل ماعليه بس لا يكبر معاه هل شي اهني صعب يتغير وبيحتاج طبيب نفسي الله لا يقوله انشاءلله

 

[نور مغليها]

رد : قلبــي معــورني عليــه ...

،

يَآ حياتي عليِـه .. ليش جذي خواف
اخاف احد مهآوششه واهوا صغير عشان جذي صار خواف !
حَآولي تخلينه يصير قوي وشجَآع وولآ‘ يخَآف من آحد ... قولي له اذا احد طقك طقه ولا تسكت عن حقك
لو قلتي مرا ومرتين عيدي عليه اكثر من مرا ، واذا كلش كلش ما قدرتي عليه قولي لأمه وابوه ( احس لاهيين عنهـ ) او اذا عندج وقت وفاضيه وديه لدكتور نفـسي ... هذا ماله شخصيه واهوا صغير لا كبر شخصيته بتكوون حييل ضعيييفه ...

 

[نور مغليها]

رد : قلبــي معــورني عليــه ...

إنزين يمكن ما عنده صداقات ، او اصدقاائه الي عندهم ما يبيهم ولا يحبهم !؟
خل يكون إجتمآعي ‘ ويكون صدآقه يمكن يطلع من الحآله الي اهوآ‘ فيهآ‘

 

[فاهييه]

يا حياتي فيج الخير والله

عسي الله يسخرلج اللي يحن عليج و على عيالج مستقبلا مثل ماحنيتي على هالولد

بس انا بعرف امه و ابوه شنو تعليقهم على الموظوع
ماذكرتي انه هالشي لافت نظرهم مثل مو لافت نظرج . او انهم اتخذوا خطوات عمليه عشان يقوون من شخصييته .

(( يمكن هم كاسرين شخصييته بتعاملهم ))

قولي لأمه و ابوه < شوفي اشلون يعاملونه بالبيت

تري الشخصيه هاذي خطره وعلماء التربيه يحذروون منها

يعني الدكاتره يقولون <<<< ان عندهم الطفل او المراهق يطلع شيطان و مهاوشجي

احسن بواييد من ماتطلع شخصيته ضعيفه و مهزوزه و خوووواف .. ولهم اسبابهم بهالتفضيييل < اذا تبين تبحثيين بالموظوع اكثر دوري بالنت والكتب .

بس انا بقولج ليش هالشخصيه موزينه من ناحيه وحده بس

الولد بعمر مراهقه و الدنيا الحين تخرع

باجر ماتدريين من يلتم عليه من المراهقيين اللي مومتربيين

او من الكبار اللي مايخافون ربهم ؟ و بشنو يستغلونه

يستغلونه هو شخصيا ( اسم الله على ) باِنه يعتدوون عليه ( فاهمتني)

و مثل شخصيته تعتبر صيد سهل لهم < خواف ومايدافع عن نفسه

و يمكن حتي لو صارله شي (الله لايقوله) يمكن ماراح يجرأ يصارح احد منكم

خصوصا اذا تهدد

و شوفي عاد لي وين بيوصل فيه هالاستغلال او لي متي ؟.

وشوفي شنو تأثير هالأستغلال على سلوكه ونفسيته وسمعته مستقبلا

و يمكن يستغلونه بالجرايم < يوزع لهم شي ممنوع مثلا .

او يسووون شي ممنوع و لي انكشفوا يحطونه براسه (حمال الأسيه) .

لاتقوليين اني ابالغ (( انا ماابالغ )) انتي عايشه بهالدنيا و تشوفيين و تسمعيين << دنيا اللهم ياكافي


واللي قد حاله و مثل مايقولون (مقطع السمجه وذيلها ) مو سالم . اشلون بمراهق اساسا شخصيته معدومه و خواف .

وانا اتفق معاج انه هذا مو أدب . هذا ضعف

شتسوووين ؟ اول شي تشوفيين امه وابوه اشسالفة هالولد < وتبينيين لهم الخطوره اذا استمر بهالشخصيه .

ثانيا الحين اشكثر الجهات اللي تقدم استشارات نفسيه واجتماعيه و بعضها مجانا .

واذا عندج امكانيه ماديه روحي خذي استشاره من دكتور او دكتوره .

يحطلج مثل مايقولون ( خارطة طريق ) شتسوووين بالضبط معاه خطوه خطوه .

يمكن اذا تعرف على شباب بعمره صالحيين وشخصياتهم قويه و راح وطلع معاهم ولعب كره وتناقش وقعد معاهم يمكن تتقوي شخصيته .

و ابوه المفروض ياخذه معاه دواويين ومخيمات و يخاوييــــــــــــــــــــه .

خلي ابوه يشوف الاخصائي بالمدرسه يسأله اشلون وضعه بالمدرسه ؟ واشلون يتعامل مع زملائه والمدرسيين

والعكس اشلون المدرسيين وزملائه يتعاملون معاه ؟



والله العظيم عمره ماشدني موظوع بالمنتدي كثر موظوعج

و عمري مارديت باِستفاضه جذي مثل ماردييت على موظوعج

لاني لما قريته هم انا عورني قلبي عليه

كــــــــــــــــــــــــــله الا الاطفال ( بالنسبه لي )

و 12 سنه يعتبر طفل بالمرحله الاولي للمراهقه .

واخيرا عندي احساس و توقع انه بلاه من امه وابوه ( يمكنهم قاسييين معاه او مهمليين )


وجيكي بعد على خدامتهم بالبيت اشلون تعامله ( يمكن لاعبه فيه دور ومحد داري )

ويمكن بعد تكون عين ( تقولين ذكي+متفوق) خلي امه ترقييه .

وتذكري منو بترضي باجر تتزوج واحد شخصيته ضعيفه جذي ؟

واللي يعافييج لاتهديين الولد خلج معاه لين يوصل لبر الامان ان شالله .

يمكن الله سخرج له .
و عسي الله يسخر عباده لج و لعيالج مستقبلا . وكله بميزان حسناتج مايضييع عملج عند ربج .


وطمنينا عليه ها . الله يوفقه ويفك عوقه يا رب .

 

[وصآااايف]

رد : قلبــي معــورني عليــه ...

حبيتي حلو المشكله جماعي يعني قعدي مع امه وابوه وناقشوا بالموضوع

أكيد في خلل بعلاقته بامه وابوه لازم ينتبهون لولدهم ويقون شخصيته​

 

[Om Fras]

رد : قلبــي معــورني عليــه ...

انا مع كلام الاخت فاهييه 100%


كلامها حيييييل صح و مضبوط

اول شي شنو دور الام و الابو من هالناحية شنو موقفهم

بعدين يحتاج استشارات نفسية ضرورييييي

هالولد سهل ينقص عليه حرام يضيع مدام اهوا جذي مسالم و بريييئ

والله يكون بعونكم

 

[النشبه88]

اخيييييييه بعد قلبي ليش جذي مكسورة شوقته ... والله مادري بس دايما حاولواا تشجعونه وتعطونه ثققققققه بنفسسسسه
شي حلو انج تحاااتينه ... وفيج البركه .. انشالله البنات يفيدونج اكثر
:gr4uu:

 

[Tom ♥ Jerry]

رد : قلبــي معــورني عليــه ...

.


ترا اذا كبر على هالحآل و آخترب آكثر منج و اسمحيلي على هالكلآم @@ !
لآزم تعلمينه يعتمد على نفسه ؛@ ! مو على طول تروحين تركضين له و تطقين اليهال
من جذي يموت عليج لأنج تاخذين حقه !
آهوه باجر بيصير ريال بدون شخصيه > لا سمح الله !
قعدي مع آمه و قوليلها حآلته لأزم تشركه بنادي اي شي المهم تطور شخصيته
وآيد يتصلون على برنآمج " طارق الحبيب " و يقولون له نفس مشكله ولد آختج
فـ اهوه يحتاج علاج + خليه يعتمد على نفسه + لا تدلعينه وآيد
+ دور أمه و ابوه ضروري .. 12 سنه مو شوية ترا ياهل بو سنتين يبجيه :/ ؟!!!!!
بآجر يصير عمره 14 و 16 و 18 و شخصيه مآكو ديري بآلج

 

[وين الفرح]

والله عورتي قلبي
ذكرتيني ببنت اختي خجوولة وتستحي ليش لانها ماتشوف الا بعين وحدة وحاسةا بنقص وماتبي تحتك باحد
فانتي حاولي تعرفين شنو مشكلتة اكيد عندة ومحد فاهم عليه

 

[Dousreya90]

رد : قلبــي معــورني عليــه ...

عور قلبي و رايي من راي البنات

 

[الغاليه ام احمد]

انا مع كلام الاخت فاهييه

 

[صبا الكويتيه]

رد : قلبــي معــورني عليــه ...

انا اقول حطيه في موقف ورااقبيه من بعييد ولا تقربون صوبه شوفوا شنو تصرفه في الموقف لا يلااحظ وجودكم عشاان يعرف يتصرف وان شالله يتحسن

 

[حجيه هيونه]

رد : قلبــي معــورني عليــه ...

البنات ماقصروا بالذات الاخت فاهيه


واتوقع افضل شي تسوينه بداية تودينه احد يرقيه

وبعدين تمسكين طريق العلاج النفسي

وتشوفين له اماكن فيها برامج لتقوية الشخصيه


والله يخليه لكم

 

[لؤلؤية]

رد : قلبــي معــورني عليــه ...

عورتي قلبي عليه

بس حبيبتي..لااااازم تستشيرين اهل الاختصاص
فيه مراكز نفسية فيها استشاريين نفسيين ممكن يفيدونج

وعسى ربي يحفظ لج ولد اخوج من كل شر...

 

[دلوعة أبوهآ]

ياحياتي عليه ..
بس هالشي مو زين له ولد بعمره 12 سنه .. وتصرفاته كذا .!


لازم تشوفون له حل
والبنات ماقصرووا

 

[FsForya]

حبيبتي كلمي امه وابوه ناقشوا الموضوع لا تخلونه جذي حرام صبي عمره 12 سنه المفروض يكون قوي وشجاع نفس صبيان هالايام