اسـمـحـيلي يـالغـرام
New member
الفصل الواحد والعشرين
إلى متى ياسيدي ابقى هناا؟؟؟
ابعثر روزنامة الايام والاحلام؟؟؟
ابوح في الوقت الضائع
واحلم في الوقت الضائع
واحب في الوقت الضائع
واخلص في الوقت الضائع
واعيش انتظر...فرحة الوقت الضائع...ولا تأتي!!
انا وقفت مكاني لحظات..مو مستوعبة الدعوة اللي دعتها علي البنت...كانت وقحه بشكل غريب...
وافي: مرااام!!!....
: آهاااا..مرومه المشهورة!!
وابتسمت لها ابتسامه واسعه اهي فهمتها زين...كانت ابتسامة تحدي واضحه..
حطيت ايدي بايد وافي وقربت منه كثير...
: هاا حبيبي... ما تعرفها علي!!
لمس وافي خده للحظات..وطالع فيني وابتسم ببرود...وكأنه يقول لعبتك واضحه وضوح الشمس...
وافي وهو يجرني ويتقدم ناحية البنت المفجوعه واللي فاتحه عيونها على الاخير تطالعنا...
: هلا مرااام....كيفك؟؟...
وتصورا قدام عيني صافحها بشكل جدا عادي ولا كأنها وحده من محارمه...الخد بالخد ... واليد باليد..
مرومه وهي تطالعني بغرور: اشتقتلك كثييييييير...
رفعت عيوني للسماا وكأني اقول معقولة وافي مجنني على كل كبيرة صغيرة وبنات خالاته بالشكل هذا..
وافي وهو يطالعني منحرج: ماعرفتك على ملكه...زوجتي!!..
هزيت راسي لها وانا ابتسم: فرصه سعيده اني اشوفك يا مرومه..!!
مرومه بنعومه ودلع بايخ: هاا..وانا الاسعد...خصوصا ان وافي موجود...
وطالعت فيه بهيام زايد..ياربي ودي اقلع عيونها...بمكياجها الكثير...وملابسها الانيقة جدا..وشعرها اللي يتطاير بنعومه حول وجهها وجسمها...آآآآه ياليت شعري طويل...!!
قربت من وافي...ومسكته بقوة مع ايده الثانية...وهي تبتسم له...وكأنها قاعد تقولي هذا لي..انا حسيت الدم قاعد يغلي بعروقي..اهو زوجي ولا زوجها.. انا عمري ماسلمت عليه ... ولا عمري كلمته بهالدلع الزايد عن الحد.. صدق بنات ماعاد فيهم حياا!!!
قلت لوافي يوم بدينا نمشي: حبيبي!!..
طالعني وافي: هلاااا...
قلت وانا اتكلم بدلع زايد اقلد الاخت اللي وراه: الاغرااااض....ما اقدر اشيلهم..اخاف المناكير يخرب ويتخدش...
قطب حواجبه للحظات وكأنه مو مستوعب اني قاعده آمره بطريقة غير مباشرة...وكنت قاعد ادعي ان وافي مايفشلني قدامها...
هز وافي راسه وجا يسحب ايده من الآنسه المدلـله...بس هزت راسها رافضه ومشت معاه راجعه للاغراض..
شال الاغراض اللي طاحت من ايدي ورجع وهي ماسكة بايده بقوة...كنت راح اضحك لولا ان الموقف ما يناسب الضحك...فعشان كذا ابتسمت له بطريقة اهو فهمها...زين...فهز راسه وكأنه يقولي مو مثل ما تفكرين...لكني طنشته..وسبقتهم راجعه على المطبخ...وانا اسمع ضحكاتهم العالية...
في المطبخ..لقيت حصه وصيته..ابتسموا اول ماشافوني...كانت خدودي محمرة..وكنت فحمانه...ناولتني حصه كاسة ماء...
حصه وهي تبتسم وبحنان: عساا ماهبلتبك مهاا...تراها مستخفه من عرفت انك بتجين...
: يا حبيلهاا..الله يخليها لك...قمر مشاء الله..
صيته وهي تشوف بنتها الصغيرة تصيح: هااا يا بعد قلب امك...وشووو؟؟..مين اللي طقك عشان اكسر له راسه؟؟..
ابتسمت للبنت الصغيرة...كانت تزنن..نعومة..وكيوت...ببشرتها المحمرة وشعرها الناعم القليل...
اعطيتها الحلاوة اللي سويتها للاطفال..وانبسطت وراحت تركض برى عشان تعلم البزران الثانيين...
قالت حصه: والله انك تعبت نفسك...يا شيخه جيتك لنا تكفي...
: لااا تعب ولا غيره.. الحمدالله كلها شوية فطاير وصينية حلاا...
حصه وهي تحط ايدها على كتفي: صدق ان وافي عرف يختار...
صيته وهي تطالع بره من الشباك: مرااام مع واافي...
حصه طالعتني وبعدها راحت بتشوف مع صيته..
صيته وهي معصبه: اااه يا قليلة الحياا...لو هي بنتي كان ذبحتها وشربت من دمهاا...ولا كفاني..
حاولت اني ما افكر بكلامهم وانا اعطي البزران اللي تجمعوا عند باب المطبخ الخارجي واعطيهم من الحلويات..
حصه: الغلط على وافي..مفروض يعطيها كلمه يحبها قلبك...لكن اخوي رهيف..ما يحب يجرح احد...
صيته: يا شيخه!!...هي ليش ما تستحي؟؟..الحيا منفصخ منهاا..واحد عمره مافكر يتزوجها ولا يبيها..بس اهي مصرة عليه...
حصه وهي تلفت لي: ملكه..ترانا تعمدنا نقول هالحكي قدامك..
طالعت فيهم وحاولت اثبت صوتي: ليش؟؟..
ابتسمت صيته بشراسه وبأعلى صوت: لأنها راح تحاربك بكل الطرق...
رفعت حواجبي وكنت بقولهم..ياليت تقولون غير هالحكي...لأني تعبت من الحروب اللي خضتها بحياتي..
: انا واثقة من وافي!!..وعارفه انه يحترمني حيل...
ابتسمت حصه: وافي يحبك يا ملكه...لكن ان كيدهن عظيم..
وافي..يحبني!!..مين قال كذا؟؟..وليش متأكده؟؟..كان ودي اسالها..استجوبهاا لكن قررت اني اسكت وانا اسمع صوت وافي قريب من المطبخ...
دخل وافي المطبخ لوحده....ووقف يطالعني فترة شوي طويله..حتى اني حسيت ان الدم بيتفجر من اذاني...بس كنت اتظاهر اني ما اشوفه...
وافي:كاسة ماء...يا حصه..
طالعت بحصه اللي كانت مشغولة...فرحت صبيت له كاسة ماء...وطبعا مايحتاج اقولكم انه في البيت...يكب كاسة الماء لو لمستها...
ناولته الكاسه...بس كان رافض يآخذهاا...
ببراءه مطلقة: هاا حبيبي..الموية!!
اخذ الكاسه وهو يبتسم لي بتكشيرة انا عارفتها...
صيته وهي توقف قباله: وافي..وش المصخرة اللي نشوفها؟؟..
وافي وهو فعلا مو فاهم وش تكلم عنه: وشو؟؟..اي مصخره؟؟...سوت ملكه شيء؟؟..
صيته: حاط حرتك بالضعيفه...لااا يا حبيبي...إلا الاخت مرام...
وافي وهو يمد بوزه: صـــــيته!!...
صيته وهي ميب مهتمة بنبرة التهديد الواضحه: لااا صيته ولا غيره...ياخي توك معرس..ارمي عليها شيلتها إذا اقبلت لك...
وافي وهو يطالعني: صيــــــته....ما تشوفين انه مو وقت هالموضوع...؟؟..وهالقمر واقف هناا يطالعنا ببراءه...
طالعتني صيته وبدل ماتسكت كملت: ايه الموضوع كله عشان ملكه..ياخي احمد ربك.. صدق انكم الرجال ما يملا عينكم إلا التراب..
تنهد وافي بملل وجاا يطلع: تراك ذبحتينا...بنت خالتي واعرفها من كناا صغار...وشفيها.. بعدين ملكه راضيه...اشتكت لك؟؟..
صيته وهي تلحقه: وإذاا هي راضية..انا ماارضى..لو انها بنتي كان ذبحتها يا شيخ!!...
طنشها وافي وراح..ابتسمت غصبا علي ابتسامه غريبة...تقدرون تقولون ابتسامة نصر.. لأني عرفت ان اهل وافي موب راضيين عن هالعلاقة...
رجعت انا وصيته واللي هي على فكره اكبر مني بس بتسع سنين...للصاله من جديد... كنا شايلين القهوة وصواني الحلى اللي انا مسويتها..
واول ما دخلت لاحظت ان كل اللي كانوا يتكملون سكتوا...فعرفت وتاكدت اني كنت محور الموضوع...
حطيت القهوة على الطاولة..ومسكت الفناجيل..ودرت على الحريم وانا اصب لهم..حسيت بنظرات خالات وافي الحسره..وكأني موب عاجبتهم!!..بينما جدته اشرت لي اجلس جنبها يوم خلصت..جيت وجلست جنبها... والصراحه تنقال...حرمه جدا قوية ومتسلطه.. لكنها طيبه حيل..يعني صدق اللي مايعرفك ما يثمنك..
كنت اسمع لسواليفهم بدون ما اعلق...انا مرة صغيرة...ما ادري شلون امي تزوجت وهي بعمر 15سنة...كيف كانت تصرف مع الحريم هاذولي..
يعني صيته تقريبا كانت اهي اصغر المجموعة... ووحده جنبي..وكانوا يتصرف مثلهم بالضبط...الحرمه الصغيرة الي جنبي..كانت ماسكه جوالها تقرا فيه....
ابتسمت لي: ممكن طلب؟؟...
رديت لها الابتسامه: آمري..خلص فنجالك؟؟..تبين حلى؟؟...اجيبلك شيء..
ضحكت الحرمه بنعومة: لااا يا قليبي...ابيك بس ترسلين لي رساله جديدة على جوالي إذا ماعندك مانع...
:...............
كملت الحرمه: وتكون رسالة حب قوية..عاااد انت عروس...مثلي!!
ابتسمت لها: آآه عروس...انت...ابتسام؟؟؟..( وكنت احاول اتذكر اسمها لأن صيته عرفتني على القروب كله)..
ابتسام: ايه..توني متزوجه لي ست شهور...زوجي يصير ولد خالة وافي...
: آآه..ياهلااابك....حضرتي عرسي؟؟...
ابتسام وهي تعتذر: لاااا لاسف...كنت مسافرة عند اهلي....
: حلووو...مشاء الله...
وكملت وانا حاسه اني بموت من الفشيله: للاسف ماعندي جوال يا ابتسام..
فتحت فمها وكأنها مو مصدقة...واعتذرت بسرعه: سوري..حيل مصدومة..فيه احد ماعنده جوال؟؟..
سمعتنا الجده فقالت: وش هوله الجوال؟؟...ماغير مضرة واذى...ويطنطن طول الوقت.. والله...هذا جوالي طول وقتي راميته...ولااا كل بعد فترة يآخذون يغيرون جهاازه..والله انها ماتفرق عندي كل ابوهم...
وكملت وهي تدور جوالها بجيبها: ودامك يا ابتسام تقولين انه موهييم..اجل انتي احق فيه من غيرك يا ملكه!!يامرت الغالي اللي مايرد لنا طالب...
سمعت كلمات متفرقة من اللي جالسين: آآآآآآآآآآآآه..وشهوله؟؟..ماله داعي..يا جده خليه معك..وافي بيشتري لها غيره..
قلت وانا اهز راسي باعتراض: ابداا يا جدتي..لا يمكن آخذه...
الجده وهي معصبة: ترفضين الهدية يا مره!!
قلت وانا خايفه ومرتبكة: ماا قصدي...
سفهتني وحطت الجوال بشنطتي الصغيرة..وغيرت الموضوع...: يا ووويلي...ما ادري وش تحطن بهالشناط الصغيرة...ياله الواحد يدخل يده...
صيته من آخر المجلس وبأعلى صوت: الموضه يا ميمتي...
الجده: والله ان هاليهود اثروا علينا بكل شيء...قالوا الموضه قالوا...
ابتسام وهي تهمس لي: مشاء الله عليك..كسبت الجده...انا ياما حاولت لكن المحبه بالقلوب..
ابتسمت لها منحرجه...واشرت لي نطلع نتمشى..فستأذنت من الحريم ومن الجده اول.. وطلعت مع ابتسام..
ابتسام وهي تغمزلي: يله..دقي على زوجك!!
: هااا...ليش؟؟...مايحتاج؟؟...
ابتسام وهي تضحك:ههههههه... إلااا..بوريك شلون يخافون من جدتهم..بتشوفين كيف بيرد عليك بكل الرسمية اللي بالدنياا...
طالعت بابتسام ومسكت الجوال بتردد..وكأني تذكرت شيء...: ما اعرف رقمه...
ابتسام وهي تطالع معي بشاشة الجوال: والله؟؟...طيب...اكيد مسجل هناا...
فتحت قائمة الاسماء....ادور ببطء ليما لقيته وافي...يا الله اسمه يجنن...
ابتسام : اسم رجلك يجنن..اما انا الله يخليه لي..اسمه يفجع..بس مع هذا اموووت فيه.. ولا اتخيل حياتي بدونه لحظة وحده...
كل العرايس مثلك يا ابتسام إلا اناا!!..
: اممم..هذا رقمه...طيب..وش اقوله؟؟...
ابتسام وهي تفكر: بس اسمعي صوته!! وبعدين بنرسل له رسايل غزل قوية..
هزيت راسي وانا ادق بتردد..واحس حلقي بدا يجف..عااد كنا بعيدين مرة..فحولناا في هدوء غريب..وكنت اشوف البزران وهم يسبحون..مع البرد...داخل الغرفة الزجاجية...
تعالت دقات قلبي اكثر اكثر..وانا اسمع صوت الرنات...رنه ورا رنه..
اخير رد وافي....صوته يجنن بالتيلفون...صوته حلو بكل وقت..
وافي بثقل: يامرحباا مليون ولا يسدون...
وافي: الوووووو...يا السلطانه ردي علينا!!...
ابتسام قاعده تسمع معي..وميتة ضحك..
وافي وهو يكلم احد جنبه: شكلي جدتي كالعاده نايمه فوق جوالها...كخخخخخخخ...
واسمع صوت واحد جنبه وشفت ابتسام ميتة به الصوت فعرفت انه رجلها: يا حبيلها جدتي.. والله ان الحظاره حرام فيهاا....
اشرت لي اقفل..فقفلت الخط..وانا قلبي ينبض بقوة فضيعه..
ارسلت لي رسالة..قريتها نهبلت...
: ابتسااام..لآ يمكن ارسلها..هاذي مررة قليلة ادب...
ابتسام وهي تهز كتوفها: عاادي...وش فيهاا؟؟..تراك زوجته...
: لااااا...مرررة استحييييي...شلون راح اشوف وجهه وانا مرسلة له كلام زي كذاا..
سكتت ابتسام..وهي تدور رسالة ثانية وارسلتها لي...وعييت ارسلها...وبالاخير ارسلت لي آخر رسالة...وهي اللي قررت ارسلهاا..
(( صاحبي محتـــــــــــــــاج لك شعر وشعور...واحتياجي شي ماكان باختياري...في غياب الشمس وش ذنب الزهور؟؟...والمطر لا شح وش ذنب الصحارى؟؟..اللقا لحظات والغيبة شهور...تقصر الخطوات ويطول انتظاري!!))
وضغطت على الارسال وقعدت انتظر....اما ابتسام فأخذت ترسل لزوجها رسايل...فدق عليها وقاموا يسولفون..حسيت بالم بقلبي...هذا هو الزواج...مو الحياه اللي اعيشها... يا قلبي تعبت من قوة احاسيسك..ما ادري متى تموت وارتاح من هالعذاب؟؟...مارد وافي
الرسالة..واستغربت اناا..وبعدها بخمس دقايق تقريبا...دق على الجوال... اشرت لابتسام .. لكنها كانت بعالم ثاني مع متعب حبيب القلب..
توهقت..وبالاخير قررت ارد بس واسمع صوته...
وافي وهو معصب: الووووووو...
خفت وتوقعت شر..صوته كان معصب موب مثل قبل شوي...
وافي: ملكه...ردي علي!!
وافي: ملكه ردي علي...بسررعه!!
: هلااااء...
وافي وهو يآخذ نفس عميق: وينك؟؟؟..
: ااااااه..مع ابتسام مرت متعب....قريب من المسبح..
وافي وشكله مولع: طيب...تعاليلي ورى المسبح....بتلاقيني واقف هناك بالركن.. بسرررعه...
ودعت ابتسام ورحت ببطء امشي ...انا عارفه انه بيهزئني وبيتكلم علي...لكن هالمره ماراح اسكت له...انا مو عبده له...انا حره بنت احرار...وافي بالذات من بد هالبشر كلهاا لازم يعرف اني اقدر عليه وعلى عشر مثله..
قعدت اقوي قلبي بهالكلام وانا اقراا بعض الاذكار حق لقاء العدو..
وصلت اخير للمسبح فلفيت من ورا الغرفة الزجاجية..ولقيت وافي واقف مثل ماقالي بالركن...بس كانت عنده مرومه!!
لا يكون ناوي يهزئني على حسابها...
ابتسمت وانا اقرب منه..ولاحظت ان مرومه الدلوعه التافهه كانت تطالعني بتحدي...
: هلاااا حبيبي..شبيك لبيك ملكه بين ايديك...
حسيت وافي ارتبك..وكنت راح اضحك على وجهه...بس اكتفشت بابتسامه عذبة...
وافي وهو يحك شعره: هلاااا..آآآه..اممم...
وطالع بمرومه منحرج ما يدري وشيقول...
مرومه وهي تطالعه بغرام: وافي..توعدني اسوق الجيب حقك بعدين...!!
وافي وهو يبتسملها: اكيد حبيبتي...!!
انا حسيت بغثيان قال حبيبتي قال...حبك برص وهم وغم يا حمار...بس تصدقون رغم اني مولعه من جواتي لكن اللي يشوفوني يقول حيل مبسوطة وتبارك هالشيء اللي قاعد يصير...
: مرومه عيوني..ليتك تخليني انا ووافي شوي...ابيه بكلمه!!..على انفراد..
مرام فتحت عيونها للاخير...ورفعت خشمها بغرور وصرخت بدلع وعيونها تدمع: واااااااااااافي!!!
وافي وهو شكله كاره هالشيء: آسف مرام...بس اوعدك انها كلمتين...وارجع لك عشان نركب السيارة!!
هزيت راسي بنعومة وانا مبتسمة بتريقة....يا حياتي على الحب المتدفق..لو كان معي مسدس كان فرغته فيهم هالحين...بس لاااا..انا اوريكم...وما اكون ملكه!!
مرومه اللي انصدمت ان وافي صرفها بهالطريقة..امتلت عيونها دموع..وتركتنا وركضت بسرعه وسمعنا صوتها وهي تصيح..وشفناها وهي تروح عند مجموعة بنات شفناهم يطالعون فيناا كلناا...
وافي: كان لازم تكلمينها بهالطريقة!!
: لااا ابدا..كان مفروض بس آخذها بالاحضان واقولها الف مبروك عليك الرجال اللي مفترض يكون رجلي...
مسكني بقوة مع كتفي: خلك ساكته دام النفس عليك طيبه!!..
صرخت: مانيب ساكته...وبعد ايدك عني...بكل بساطه..تبوس خدها...وتمسك ايدهاا...ليش واحنا عايشين ان شاء الله؟؟..هاااا...تكلم...قووووووووول...
وافي وهو منقهر: كاااافي..لا تخلين اتوطى ببطنك!!..
رفعت راسي ومشيت من قدامه: ما تقدر...ولا راح اسمحلك فااهم؟؟..انا موب لعبة عندك ... كافي اهانات وصياح وتعب نفسي ومعنوي....انا اقبل اي شيء...إلااا انك تهيني قدام الغرب يا وافي!!..
مسكني وجرني بقوة مع كتفي...وانا اصرخ فيه واحاول اني اضربه بقوة..عشان يتركني.. ورجعت ضربته مع كتفه بقوة....فمسك ايدي ولفهاا...
صرخت بالم: وافييييييييي...يا حمااااااااار!!!...آآآآآآآآآه اهىء اهىء...
وقعدت اصيح بسبب الالم اللي حسيته...
قال واهو يدور مفتاح الغرفة اللي معاه: ابيك تنطقين هناا..مفهوم...!!
قلت بعصبية: لاااااااء...ماراح اجلس هنا..والله لاسويلك فضيحه..انا مانيب كلب عشان تحبسني هناا...
وضربته بقوة على كتفه وصرخت: انا انحبست شهرين اثنين بغرفة قذرة..اتجرع انواع الضرب والتحرش...وانت!!...بالذات من بد هالبشر كلهم...ماراح تحبسني فاااهم؟؟...
سكت يوم حسيت ان صوتي عالي مرة...وان في هدوء غريب حولناا...وافي كان يطالعني بطريقة غريبة...فمه مفتوح...وحواجبه مرتفعه بذهول...
مسحت دموعي اللي نزلت بسرعه عشان تغطي وجهي..
: اكرههههههههك....اكررررررهههك...انت ولااا شيء...فاااهم ولا شيء...
اكتسى وجهه تعبير غريب..تعبير صدمه بذهول بحزن بلا مبالاة..باشياء كثيرة اجتمعت..
دخل المفتاح بالباب وفتحه..واشر لي ادخل..حطيت ايدي على رقبتي...كان حلقي يعورني بسبب الصراخ....
سمعت صوت حركه وانتبهت للحركه من تحت الاشجار...وكأني شفت رجول...يعني فيه احد سمع حوارنا الرومانسي الجميل!!
دخلت الغرفة مستسلمه ودخل وافي وراي...
فتحت المكيف على الحار...وفسخت الفرو اللي لابسته..كان وافي واقف ورا الباب ومتكي عليه..يناظرني بنظرات غريبة...
: وشفيك؟؟..اطلع برااا...ما ابيك..ولا ابي شوفتك...قفل الباب بعد..مايهمني...احرررقني.. ما اهتم....انت عديم احساس...انت من وشو مخلوق؟؟...قووووووووول...
وافي وهو يبلع ريقه: ملكه!!...خلااااص...
: لاااا موب خلاص...عمره ماخلص...ليش تكرهني يا وافي؟؟..لييييييش؟؟..وش يدريك وش الي كان بيني وبين مساعد؟؟..على اي اساس حكمت اني احبه؟؟..ليش قررت وادعيت وحكمت وقضيت وخلصت..
فتح فمه بسرعه بيرد بيتكلم..لكن بدل من هذا كله..
وافي بكآبة: مو هذا المهم...المهم انك بدل ما تاكدين لي انك شريفه...رحت وخنتيني معاه..ولااا حطيتها بجارتك المسكينه اللي عندها اطفال...
:اطلع براااا...ما ابي اشوفك هالحين...اطلع برااااااااااا روح معى مرومتك الصغيرة الدلوعه...
وكملت وانا ارتعش: سؤال صغير بس؟؟...بس؟؟..ليش تزوجتني؟؟..ولا تقولي علشان تحمي بدرية مني؟؟....لأن هاذي اكبر كذبه بالعالم...
مسكني مع كتوفي واخذ يهزني بقوة: كذااا...تزوجتك عشان اريح هالبشر منك..تزوجتك لأني مابي سلطان يتزوجك....ولا ابيك تهربين مع مساعد..ولااا ابيك....لغيــ...
: وشووووو؟؟..كمممممممل...اجرحني اكثر...هيني اكثر...يا حقيييييير...انت حشرة تااافه..
ضربته بقوةعلى صدره..لدرجة اني شكيت إذا يحس..رماني بقوة على السرير وطلع بعد ما قفل الباب حق الغرفة...
بعد ساعه من الصياح المتواصل فتحت علي مهاا باب الغرفة بس الداخلي...قمت على طول من السرير وفيني نية خناق مع هالوحش الدب الحيواااااااااان وافي...
شافتني مهاا وهي بعد كانت عيونها حمرر: شفتكم وانتم تهاوشون!!...."
وحطت يدها على فمهاا وقامت تصيح...وهي تسكر الباب اللي وراها...
كملت مهاا وهي ترتجف:" توقعتكم تكونون مثل متعب وابتسام...لكن...صدمتووني.."
بلعت ريقي ومسحت دموعي :" مهاا حبيبتي...الحياه مو مثل ما انت معتقده..الحياه فهي تشابكات كثييييييير..."
مهاا وهي تطالعني وتمسح دموعي:" بس خالي وااافي....وعدني انه راح يعااامل زوجته برقة..."
مافهمت شيء من اللي تقوله..
كملت مهاا وهي تصيح اكثر:" كل الرجال مثل بعض...رغم انه دوم كان يحلف لي انه غير عن ابووووي..."
وقفت وضميت مهاا بقوة: "مهاا حبيبتي...اي رجال يختلف مع زوجته...واللي صار بيني وبين وافي شيء عاادي..."
مسحت خشمها بمنديل انا اعطيتها اياه وقالت وهي ترتجف: ليش قفل عليك البااااااااب؟؟.."
ابتسمت لها: لأني طردته وكسرت له راسه وقلت له مابي اشوفك..."
وكملت وانا احاول اضحك: فأدبني بطريقته...!!"
ابتسمت مهاا وكأنها تحاول تصدقني: يعني خالي وافي طيب معك؟؟.."
: طبــــــــعاا..صدقيني ان احلى ايام عمري مع خالك...بس انا عصبت عليه عشان الهبلة بنت خالتكم ذي.."
مهاا وهي تمسح دموعهاا:" مرااام؟؟.."
وقلدتها انا:" مروووووومه!!"
قمنا نضحك ومسحت دموعي...ورحت اعدل مكياجي عشان اطع معاها...
مهاا وهي تشوفني اعدل مكياجي:" تصدقين....اني حلفت ما اتزوج ابد...بس خالي وافي هو اللي اقنعني اني اتزوج..وقالي ان اصابيع ايدي موب سواا..."
وكملت وهي توقف وراي: "لمن شفت متعب وابتسام..انبسطت بس كنت اقول لنفسي خالي وافي هو اللي راح يثبت لي هالشيء...خصوصا بعد تجربته مع خطيبته الاولى...ومع عفااري..بنت خالتي نوراا.."
رفعت راسي بسرعه: عفااري...ليش؟؟...وش السالفه؟؟.."
مهاا بارتباك: ماقالك عنهاا؟؟.."
: "لااا...بس اللي اعرفه ان بينهم مشكله كبيرة...لكن نسوها بعد قضية جاسر الله يرحمه ويغمده الجنه..."
مهاا وهي ترجع شعرها ورا اذنها: "يا ستي السالفه عاادية...انت تعرفين بيت خالتي نورا مشاء الله قصر..."
هزيت راسي ولفيت اسمعها باهتمام...
كملت وهي تجلس على التسريحه: "وله عدة بوابات ... يا ستي كان خالي وافي زايرهم... المهم خطيبته الاولى كانت موجوده في ذاك اليوم... وكانت متفقة مع اللي تحبه انه يجي يشوفها هنااك...طبعا عفاري ما كانت تدري عن الموضوع نهائي....لكن لسوء حظ عفاري ان الرجال يوم نط السور...كانت هي بذاك المكان...وسمعته وهو ينادي اسم خطيبة وافي ... من الصدمه...ما قدرت تسوي شيء..وهو يوم شافها ارتبك وحاول يهج...لكن اللي شافه وهو ينط السور وعفاري واقفه..."
سكتت..فكملت اناا وانا حاطه ايدي على قلبي: يااا ويلي وافي...هو اللي شاف عفراا وحسبها تعرف الرجاال؟؟..."
هزيت راسي متأثرة..ياربي وش ذا الحظ؟؟...إذا ماصدق عفاري والسالفه من سنين فمعقولة راح يصدقني والسالفه مالها ايام؟؟..
مهاا وهي تحلفني: بس الله يخليك لا تقولين لأحد...ترى والله ماحد يدري بذا الموضوع غيري انا وعفاري..."
تنهدت وانا اقوم : مسكين وافي...وش هالصدمات اللي يشوفها في اللي يقربون له...عفاري كانت تقولي انها ياما حلفت له انها بريئة بس ماصدق"
مهاا وهي تأيدني بهزة راس: صح...خالي حمل عفاري كل سبب تعاسته خصوصا بعد ظنه ان عفاري بنت تمشي مشي بطاال.."
: بس لازم نعلمه..حرااام..لازم يعرف انه ظالمهاا"
مهاا: ياما حاولت اني اقوله...بس عمره ماعطاني وجه..."
كملت مهاا وهي تغير الموضوع: طيب..دامني مبسوطه على خالي..ودامك تحبينه... امشي اوديك للبدروم..تشوفين صور رجلك يوم كان صغير..وكل ذكرياته..كتبه دفاتره.. ملابسه..العابه..كل شيء يخصه."
دخلنا البدروم الكبير بس نوعا ما مظلم...وكان بااااااااااااااارد..لدرجة اني سمعت صوت طقطقة اسنان مهاا وهي تشد الكوت حقها بقوة على جسمهاا...راحت للكراتين مغبرة بالركن ولحقتهاا بسرعه...
حسيت بخوف فضيع مع ان عندي مناعه من الحشرات والفئران...لأني تعودت عليهم بالمستشفى...
مهاا وهي تأشر لي بالكشاف: هنااا...
جيت وراها وجلست قريب منها..وكان فيه صندوق خشبي كبير فيه اغراض كثيرة... طالعت بالاغراض..وحسيت بمشاعر غريبة تخنقني بقوة...
تأملت اللعب الصغيرة..سيارت مغبرة...سوبرمان وسبيدر مان..مجلات باسم..لقيت تي شيرت قديم ازرق وابيض..غصبا علي حظنته بقوة...ما اتخيل شكل وافي وهو صغير... اكيد قمر...
مهاا: ياعيني على الحب!!"
بتأثر رديت عليها: ودي آخذ كل اغراضه.."
مهاا: تحبينه؟؟..."
سكت ماعرفت وش ارد...وهزيت راسي بصراحه: لسه!!"
ابتسمت وحط ايدها فوق ايدي: اقدر صراحتك...لكن صدقيني راح تحبينه...خالي ينحب.. خالي غير!!.."
:ههههههههههههه...لااا يا شيخه..اظن الغرور صفه متوارثة بالdnaعندكم"
مهاا وهي تمسك كتاب جلدي كبير وتعطيني ياه: وانت الصادقة"
فتحته بتردد...وافي...هذا البوم لصوره...كان يبتسم ببلاهة وهو ماسك كورة ولابس لبس الهلال...وشعره الاسود الكثير منتفش...وركبته مجروحة..وعيونه تلمع..ماكان جميل.. كان عادي..لكني حبيت الصورة غصبا علي...حسيتها تمثل وافي الحقيقي...وافي الطيب.. اللي كان قبل لا يتزوجني...مثل مساعد...اللي صار مجنون لمن عرفني وحاول يدمرني.. مثل سلطان اللي فقدت الحياة بهجتها عنده..لمن تزوجت غيره...
قلبت الصفحات...صور مختلفة لمراحل زمنية متغيرة...وافي وهو واقف مع اصحابه قبال مدرسته.. وافي وهو يسوق السيارة.. وافي وهو يفرش اسنانه ومصورينه اصحابه بامريكا ... وافي وهو ماسك ثعبان كبير وحاطه حول رقبته..
اعطتني مهاا البوم صور ثاني..وقامت تشرح لي كل صورة وش مناسبتها.....وهاذا الالبوم كان صور متنوعة للعائلة...صورة لحصه وهي شايله وحده من بناتها الكبار بين يدينها....صورة للجدة وهي واقفه في المرزعه جنب الغنم...صور لاحداث كثيرة ومهاا تذكرها وهي جدا مبتسمة...وكنت استمع باهتمام...
: مهااا...ممكن طلب؟؟.."
مهاا وهي تسكر الالبوم: آمري..."
: امممم...ابي صورتين لوافي...وابي التي شيرت حقه...واللعبة حقته..."
مهاا وهي تبتسم: اكيد...هاذي كلها حلالك...اساسا اغراض رجلك...المزرعه كل شبرها فيها لك..."
: ولا تعلمين احد عنها..خصوصا وافي"
مهاا وهي مستغربة: انن..شاء الله.."
طلعت صورة وافي وهو ماسك الكورة..وهو لاف الثعبان على رقبته ودخلتهم بالشنطه.. و اخذت لعبته السوبر مان الصغيرة..وحطيتها بالشنطه...واخذت التي شيرت وضميته بقوة ... وكأني احاول اضم وافي من خلاله...لا تسألوني ليش سويت كذاا؟؟؟.. غصبا علي والله.. مع اني ما احبه...بس حسيت ان ودي اضم هالطفل بكل القوة اللي عندي...
مهاا وهي تبتسم: خلااااص...لو درى خالي عن كل هالغرام والمشاعر كان ما ترك دقيقة..."
طقيتها على كتفها بمزح: دبـــــــــه..عيب عليك...!!
مهاا :ههههههههه..ولااا تقول لسه ماحبيته...وهي..."
سكتنا انا ومهاا نسمع رنة الجوال القوية...
: مهاا...جوالك...
مهاا طلعت جوالها من جيبها وهزت راسها بمعنى لااا موب حقي...
تذكرت ان معي جوال انا الثانية..فتحت شنطتي وطلعت منها الجوال..وكان وافي هو اللي يتصل...خفت...
مهاا: مين؟؟...خالي؟..."
: ايـــــــه...مهاا خايفه..احد درى انك فتحتي الباب علي؟؟..."
مهاا بارتباك: لااااء...محد درى..اخذت المفتاح بدون محد يدري وجيت فتحت عليك الباب..."
سكت الجوال..وخفت وعضيت على شفايفي ووقفنا انا ومهاا..
مهاا: اكيد فتح الغرفة ومالقاك... يا ويلي منه...بيكسر لي راسي"...
: آآه..اممم..طيب...وش السواة؟؟"
رجع الجوال يدق بالحاح اكبر...وطاح من ايدي من شدة الخوف والربشة...وتمينا انا ومهاا مكانا نطالع مصروعين بالجوال...
بالاخير ما عدت احتمل...فشلت الجوال وضغطت على الزر الاخضر...
: الو...ووو...وو..."
وافي وهو صوته منبح وقاعد يلهث:آآآه...وو...وينك؟؟...."
:آآه...هنااا...قررريبه..."
وطالعت بمهاا...اللي اشرتلي عشان نطلع بسرعه فوق...عشان ارجع لغرفتي...
هزيت راسي ولحقتها...
وافي واهو يآخذ نفس عميق: وووووووينك؟؟.."
روعتني صرخته واشرت لمهاا بخوف...
سحبت مهاا مني الجوال...: الوووو..___ايه يا خال___لااا عادي...___أنا اللي فتحتلها الباب___لا تصرخ علي____طيب..اهي جايه تستان.._____ان شاء الله___ولا يهمك"
طالعت بمهاا وهي تقفل وعيونها مليانه دموع...وشفايفها ترتجف...
: مهاا حبيبتي..وش فيك؟؟.."
صرخت فيني وهي تبكي: يقول انه مايبي يشوف وجهي ولا يبيني ادخل باللي ما يخصني.."
وركضت تطلع الدرج...لحقتها وانا حاسه ان قلبي بيوقف...طالعت بالاماكن من حولي... ومالحقت مهاا...رحت لمجلس الحريم بسرعه..ابي اهرب من مواجهة وافي..خلني ااجلها ليما اقدر...
بس يا فرحه ماتمت...حسيت بايدي شوي وتنكسر...كانت يد وافي قابضة علي لدرجة اني حسيت ان لحمي بيتقطع من قوة مسكته...كنت راح اصرخ بوجهه..بس خفت يوم شفت شكله...سحبني معاه لغرفتنا اللي كانت قريبة من البدروم...
دخلني اغرفة وسكر الباب...انهار على الكنبة جالس..وقام يتحسس جيبه بتعب...يدور عن سيجارة...
طلع سيجارة..اخيرا وحيده يتيمة مثلي..لقاها بجيبه....ولعها بارتباك وايده ترتجف...
وافي واهو يطالعني وانا ماسكه التي شيرت بايدي: حق مين؟؟.."
طالعت بالتي شيرت القديم وضميته بقوة لصدري: حق ولد صيته..."
قطب حواجبه: وليش معك؟؟.."
: لللل..لأني اخذته منهاا..عش..عاشن اعطيــه...الشغالات"
وافي وهو يفرك راسه بعصبية: صرخت على مهااا..انت السبب"
: بكت بسببك!!..طلبت منهاا انها ما تتدخل فينا؟؟...ليش يا وافي؟؟.."
وافي بعصبية: مايحقلها تفتح لك الباب بدون ما تقولي؟؟.."
ووقف ورمى السيجارة وفركها بقوة برجله...حسيت بالعطف عليها..مسكينه..ماتت..تفتت .. انتهت...
وافي وهو يحط يدينه على الجدار اللي وراي ومحاصرني بشكل مخيف!!: توقعتك هربت..."
:................
غمض عيونه بقوة: حسبت..ان..احد من العمال آذاك!!..
:...........
وافي وهو يفتح عيونه الحمر وينتفض:كنت راح اقتلهم...عارفة وش يعني اقتلهم؟؟..يعني انهي حياتهم بكل بساطه...
: واااااااااافي...اهىء اهييييييء..
حطيت ايدي على صدره...
قال لي وهو متعذب ويضحك في نفس الوقت: لكني تذكرت..اي حقيرة خاينه بايعه لسمعتها انا تزوجت!!
صرخ فيني بقوة: آآآآآآآآآآآآآآآآه...ليش انت؟؟...ليييييييييش؟؟..ليش حبيت مساعد؟؟...ليش غررت بسلطان؟؟...ليـــــــــــــــــــــــــه؟؟.."
سحبني بقوة له...ضمني بقوة لصدره... يدينه كانت تعتصرني بقوة...حسيت انه يعذبني بهالطريقة..وقعدت ابكي مو عارفة وش اقول...كل مافيني يتنافض...انا ندمانه.. على كل شيء...وعلى اي شيء..بس ما احب ان احد يتعذب بسببي!!...انا اللي فيني كافيني..
بعدني عنه بقوة فجأة..وكأنه تذكر فجأة مين انا؟؟.. حسيت بظهري يتكسر...لأني انصفقت بالجدار بقوة...ابتعد عني ببطء..قعد يطالع بوجهي بألــــــــــــــم..
وبالاخير اطلق رصاصته الاخيرة علي: ما ابي اشوفك خارج هالغرفة..مفهوم؟؟"
حطيت ايدي على فمي ومارديت عليه واهو يطلع ويقفل الباب علي.
كنت راح اطق...من الطفش اللي فيني وانا ادور بالغرفة وماعندي غير التلفزيون اتفرج عليه..اقلب من قناة لقناة النوم مجافاني..ولاني قادره افكر غير بوافي...ردة فعل وافي.. كلام وافي...افكار وافي...احاسيس اللي تنعفس وتتغير من تشوف هالوافي؟؟..
حسيت بضيقة فضيعه وانا ارجع اضم التي شيرت بقوة لصدري...آآآآآآآآه..وش اللي قاعد يصير فيني يا رب؟؟..ياليتني ما رجعت من المستشفى ابدا...اقلها عيشة المجانين ازين من عيشة الناس العاقلة...
فصخت ملابسي..ولبست بنطلون بيجاما..ولبست التي شيرت حق وافي..مشاء الله كان واسع علي...رغم انه لطفل عمره عشر سنوات...مشاء الله على وافي...جسمه عريض من يومه..
دخلت تحت الفراش..بعد ماقفلت اللمبات...كنت اشوف البطل شلون قاعد يهين البطله بالفيلم...يضربها بقسوة بحزامه...ويجرها من شعرها للدرج...ارتجفت..على قسوة وافي...ألا اني لا يمكن اتصور انه يضربني بهالطريقة...وحتى الكف اللي صفقنياه قبل... كان كف لأنه طلع عن طوره للحظات..ولااا ما اتوقع انه راح يعيدها مرة ثانية...
شفت البطلة وهي تهج وتقفل الباب بوجه البطل...وتروح للشباك..مجنونة بتنتحر..كنت اعصابي مشدودة مع الفيلم لآخر درجة..وما انتبهت للباب اللي انفتح ولكن اللي شدني ريحة الاكل...فالتفت ادور مصدرها...كان وافي..
التقت نظراتنا...وجمدت حركتي...اتذكرت اليت شيرت اللي انا لابسته...غطيت جسمي بسرعه...
طالعني وافي...يكن مستغرب من حركتي...وحط الصينية حقت الاكل بالطاولة اللي قريبه من الكرسي...
ثواني ودخلوا خدامتين شايلين كنبة صغيرة ثانية...حطوها محل ما اشرلهم وافي..
وافي وهو يقرب مني: يله قومي كلي...!!"
:..........
وافي وهو يحط ايده على الجدار فوق راسي على طول: وش فيك؟؟...كأنك مخترعه؟؟"
:.........لااااء...
وقلت وانا اغطي نفسي اكثر: اطلع بره شوي...ابي..اغير ملابسي...
وافي وهو مستغرب: وش هوله؟؟؟..نص اللي بالبيت ناموا ماعندا البنات...
احترت وش اقوله؟؟...وبدون اي تفكير: صراااحه..لابس لبس..شوووي..خااالع..فياليتك تطلع بره...عشان اغير..!!
ابتسم بسخرية وقام يضحك وكتوفه تهتز..ورجع راسه على وره...
: قلت شيء يضحك؟؟...هاا؟؟.."
وافي وهو يجلس على الكنبة: لااا ابدااا...ماقلتي شيء يضحك...خلك منسدحه على هالسرير ليما يصبح الصبح...الصراحه مافيني اتحرك..تعبان ابي آكل وانووم!!"
انتظرت دقايق...وبطني تعورني بسبب الجوع....وكنت شوي واصيح بالاخير...قمت من على السرير..وجيت جلست على الكنبة اللي قبالته..
طبعاا ما يحتاج اقولكم شلون وجه وافي قايل وهو يطالع بالتي شيرت...حتى اللقمة اللي كان يآكلها وقفت في حلقه..وقام يكح...
صبيت له كاسة ماء وناولتها اياه..شرب الكاسه كلها...وطالعني وهو يهز راسه...
قلت وانا اعض شفتي: الغرفة حيل دافية..وانا كل ملابسي ثقيله...عشان كذاا...."
وهزيت كتوفي..ومديت ايدي اخذ الملعقة اللي قدامي...
وافي وهو يحك رقبته: هذا التي شيرت...آآه..حق ميـــن؟؟.."
ابتسمت وانا آكل بسرعه: حق ولد صيته...نظيف وصيفي...هههه..."
وافي وهو غير مقتنع: كأني شفته قبل!!...بعدين غريبه على صيته تجيب هالتي شيرت معهاا في عز البرد!!.."
ابتسمت ابتسامة بكش كبيرة: هاا حبيبي...غلطت...الشغاله وحطته...كل...ليش ما تآكل؟؟.."...
حرك الملعقة في الصحن حقه..وقام يطالعني ويرجع يطالع بصحنه...بس من غير ما يآكل..
وافي فجأة وانا قاعده آكل بسرعه: مكتوب على جبيني هندي؟؟.."
:حبيبي...ليش تقول كذاا؟؟.."
حمرت خدودي...انا قلت حبيبي..وش سالفتي؟؟..حسيت بحرارة فضيعه تزحف باوصال جسمي...بلعت ريقي كذا مرة...
وافي وهو يبتسم: وش قلت؟؟.."
طالعته بتردد..وهزيت راسي بمعنى ماقلت شيء..وحسيت نفسي انسدت عن الاكل..قمت ببطء عن الكنبة...وكان لازم امر من قدام وافي عشان اروح السرير...مسكني وافي بقوة من يدي...شهقت بقوة..وسحبت ايدي منه...ما اعرف ليش ارتبكت مرة..
وافي وهو يمد بوزه شوي: لايق عليك..."
طالعته للحظات مو فاهمه وش يقصد...وحمرت خدودي يوم فهمت انه يقصد التي شيرت ...
وافي وهو يسرح بزمان مضى: كان واسع علي كثير....اذكر اني قعدت زعلان يومين يوم عيا ابوي يشتريه... كنت ابيه بالذات...اصحابي ضحكوا علي وقالوا لي ان يوسف الثنيان موقع عليه..."
ابتسم بحزن وهو يكمل: يوم مااات ابوي....الله يرحمه ويغفر له... حلفت اني ماعاد البسه ابد...ورميته بالصندوق ولا عااد فتحت الصندوق مرة ثانية.."
ارتعش صوته شوي: كنت اعتقد انه مات بسببي...."
دمعت عيوني...وحطيت ايدي على فمي...ولاحظ وافي اهتزاز كتوفي...والدمعات اللي تساقطت على يده..وقف..وحسيت انه ضاق صدره... وشال صينية الاكل وراح...بينما انا قفلت التلفزيون...ورحت تمددت على السرير وغطيت نفسي وحاولت انوم...
ماقدرت انوم..الوقت متأخر ووافي مارجع لي مرة ثانية...رحت لبستلي جاكيت دافي وشبشب وطلعت من باب الغرفة الخارجي...
سمعت نباح كلب...فارتجفت بقوة...وحاولت اني اكون قوية وامشي اكثر..بس ماقدرت فجلست عند الباب ارتجف بسبب البرد..وادق على وافي اللي ماكان يرد علي!!
غفيت بمكاني للحظات..بس قمت على هزة يد وافي...فتحت عيوني على وسعهم..ودخل الغرفة وسفهني..
تركني بمكاني لوحدي..غرقت عيوني دموع...ورفعت راسي اناظر للسما...اناجي ربي بصمت.. حاسه بضعف وخوف من كل شيء..واولهم وافي...هالغامض الغريب...اللي دوم يتركني وحيده..ما ادري متى بيحس فيني؟؟...انا مابيه يحس فيني..انا ابيه يحن علي.. كافي يتم..ما استاهل يتم اكثر...
دخلت الغرفة بعد مامسحت دموعي..شفت وافي منسدح على السرير وكان صاحي يقرا حاجه بالجوال...سكرت الباب وقفلته..
: وين انام؟؟.."
وافي بلامبالاة: شافيه مكان غير السرير...."
: وانت؟؟"
وافي: انا بنوم بعد على السرير..الصراحه جسمي متكسر...ومافيني على نومة الارض.."
انسدح على بطنه ودخل راسه تحت المخده..
ترددت بمكاني للحظات...ثمن رحت فصخت الجاكيت..وجيت تمددت على السرير انا الثانية...كنت نايمة بآخر طرف السرير..يعني اي حركة بسيطة مني واطيح على الارض ...
كنت عارفة انه ما نام..واغلب الظن انه يراقبني..وانا ماكنت قادرة انوم.. كنت زعلانه من نفسي..كنت عتبانه على حالي... ليش اركض وراه؟؟... ليش ادور رضاه؟؟...ليش انا افكر إذا هو اكل او شرب؟؟..وهو..؟؟..جاوبوني هو..وافي...القاسي عمره مافكر فيني...
اعتقد اني من الاشياء اللي لمرت على باله ازاحه مثل ما يزيح اي ذبابه تزعجه بالجو... هذا انا بحياة وافي..فاهمين مجرد ذبابة..
جاني هالسؤال: وهو...القاسي...وش مكانته بحياتك؟؟...ليش مهتمة فيه؟؟
تقلبت مرتين بملل على سريري... ما ادري...اللي اعرفه اني اكرررههههه كثير...بس اشفق عليه...يحزني.. ما احب الانسان اللي عايش بعالمه الخاص...
تردد علي سؤال ثاني مزعج..انت متأكده من كرهك له؟؟...
كان ودي اصرخ بنفسي...اكيد اكرررههههه انا اعرف مشاعري اكثر من اي احد ثاني في هالدنيا....بس هذا زوجي..عيلتي...ماعندي احد غيره...لو طلقني وين راح اروح؟؟... اروح لعمي اللي رماني مرتين...مرة بمستشفى المجانين...ومرة عند وافي؟؟..
وافي بصوت نايم:خلاااااااااص كافي تقلب على السرير..."
انفجعت ماتوقعت انه لسه صاحي...جلست وطالعت فيه..كان نايم..مغمض عيونه بنعومة.. شعره الاسود متناثر حول وجهه بخشونة..مثل نسر اسود.. ملامحه...خشمه فمه عيونه.. كله كله يجنن...مديت ايدي بتردد...كان ودي بس المس الجرح اللي بحاجبه...بس بالاخير اكتفيت اني هزيت كتوفي ورجعت نمت..
الساعه 5:30ص
تمغطت بكسل على سريري...كنت اسمع صوت الماء في الحمام...طالعت بجهة وافي.. لمستها بتردد كانت لسه دافية...قمت من على السرير...ورحت للشنطه ادور لي لبس..
طلع وافي من الحمام...وهو لابس روب الحمام..جلس قريب مني...فقام يطلع اغراضه.. اخذت لي بنطلون جينز وبلوفر ناعم احمر ريفي...وقمت دخلت الحمام...
اخذت لي شاور سريع..ابي اطلع اتمشى مع وافي..كنت متأكده ان معظم الناس نايمه في ذا الوقت وحسيتها فرصه..لا تسألوني فرصه لايش؟؟..انا نفسي ما ادري؟؟...خصوصا ان النور توه بدا يشعشع...
خلصت لبس ومشطت شعري بسرعه وطلعت من الحمام... كان وافي على وشك يطلع..
: وافي.."
التفت علي: هلاااء.."
: صباح الخير" وابتسمت بنعومة.
وافي وهو مستغرب: صباا..ح النوو..ر"
: ابي اطلع معك اتمشى...ممكن؟؟.." وناظرت فيه ببراءة متعمدتها...
هز راسه بفتور: ممــ...كن.."
حطيت عطر خفيف وروج على الطاير ولحقته على برا..
: تبي تآكل شيء؟؟.."
وافي وهو مدخل يدينه بجيوب الترينق:لاااء..مو مشتهي..تبين؟؟.."
: لاااء..."وسألت بعد لحظات: فيه حيوانات؟؟...هنا؟؟.."
وافي وهو يهز كتوفه: ايــــــه..."
سكت شوي...بعدها كمل: تبين تشوفينها؟؟.."
هزيت راسي بحماس...إذا معي وافي ما راح اخاف من الحيوانات ابدا...
رحنا جهة الحيوانات اللي بعيدة مرة...عن البيت...
اخيرا وصلنا لصندقة الحمام...
صرخت بحماس: حمااااااااااااااااااام"
ورحت فتحت الباب بدون ما افكر ودخلت جوه...
: وااااااااااااااو...شوف من كل شكل؟؟...شوف الرقاص؟؟..."
وجيت اخذت حمامه كانت منعزله بمكانه ما تمشي...يا حياتي كانت رجله مربوطة بخيط مو واضح...ويألمها كثير...
: وااااافي..." وعضيت على شفايفي..
جاا وافي وجلس جنبي على اطراف رجوله مثلي بالضبط..
: هااتي عنك.."
شرحت له وانا اتألم:شوف...رجلهااا..اوووه يا حياتي..."
اول مرة اشوف وافي يبتسم من قلبه واهو يتألمني: لااا تبكين..."
: اصلااا ماكنت راح ابكي...بسس..."وحطيت ايدي على خشمي وكنت خلاااص على وشك اصيح من شكل الحمامه المسكينه..
وافي وهو يحاول يفك الخيط بمهارة وبسرعه: هدي اعصابك ملكه.."
: خلني امسكها وانت فك الخيوط عنها..."
عطاني ياها فمسكتها بنعومة..وقعدت اداعب راسها وهي تتخبي مني وتهدل بصوتها الحلوو..
اخيراا قدر وافي يحررها من الخيوط اللي ناشبة برجلها...
: تقدر تطير؟؟.."
وافي وهو يمد يده يمسكها: تعالي نشوف..."
: خلها معي..الله يخليك.."
هز راسه موافق وطلعنا من الصندقة وقفلنا بابها...مديت ايدي للمسا ابي الحمامه تطير..وعيت تطير واستغربنا انا ووافي...
وافي بعد لحظات: هاذي ملكه...."
طالعته مستغربة وش قصده...
ضحك: مثلك...ترددين مية مرة قبل لاتسوين الشيء اللي فعلا تبينه..."
: من خااف سلم..."
وابتسمت بنعومة وانا ارجع اضم الحمامه لصدري..
: حمامتي...ملكه...بتشوف راح تطير.."
ورفعت يديني مرة ثانية للسماا...فطارت الحمامه من يدي وراحت للسما...تتبعتها بعيوني..ولحقتها...بس بالاخير وافي خلاني ارجع من جديد...
: ابي اطعمهاا....الله يخليـــــــــك..."
وافي وهو يعطيني كيس الحب: يلـــه"
ابتسمت بشكر ودخلت القفص وحطيت بيدي حب كثير ونثرته بكل مكان وخليت بعضه بايدي...فتزاحمت الحمامات على ايدي..وبالاخير بعد ماخلصت..وطلعت لوافي... لقيته واقف يدخن ويطالع بالسما ...بملكه...
تركت باب الصندقه مفتوح...فطار الحمام كله مرة وحده بشكل افواج... كان منظر روعه ...
وقفت جنب وافي نتأمل السماا بصمت...حسيت ببرد فضيع يدخل جسمي...لأن شعري مبلول..بس مع هذا ماكان ودي اتحرك من جنب وافي...جنبه يدفيني...احس تطلع منه اشعاعات حااارة... احس نفسي جنبه مثل ورقة سلطوا عليها ضوالمشس من خلال عدسه مكبره...حرارة قصوى...تشعلني...
سمعت صوت الكلب فطلعت مني آهة خوف....وما اعرف ليش تذكرت بوبي...تذكرت شلون وافي ذبحهه..تذكرت اشياء كثير..
وافي وهو يحاول يمسك ايدي عشان يهديني: لا تخاافين بعيد مرة.."
حسيت باصابعه تلامس اصابعي بس بعدت عنه بسرعه: لااااء...الصوت قريب..."
وكملت وانا ابعد عنه: انا لازم ارووح..برجع البيت...يمكن جدتك صاحيه.."
وافي وهو يوقفني ويلفني اقابل وجهه: ملكه؟؟... وش فيك؟؟...قلتلك بعيد..."
حسيت باحاسيس مجنونة وغريبة...فقلت بتمرد وكأني انتقم من وافي: لو سمحت... ابعد ايدك عني...لأنها تقرفني...روح لمرومتك.. وخليني لحالي..."
وتركته وهو واقف مصدوم بمكانه..
لقيت جدة وافي صاحيه...فرحت يمها وجلست انا وياها نتقهوى...كنت اتكلم واتظاهر اني سعيده...لكني كنت كارهة نفسي بقوة..ليش عاملت وافي بقسوة؟؟..ليش رديت له الصاع صاعين؟؟... انا عمري مافكرت ارد لحد الشيء اللي سواه فيني... حتى ريم ومساعد وكل اللي اكرههم..ماافكر آذيهم...فليش صبيت كل زعلي على وافي...
تحركت بملل وانا اغمض عيوني واسوي مساج لجبيني بسبب الصداع اللي احسه...
سمعت صوت جدة وافي عرفت ان في احد جا... فتحت عيوني ببطء...شفته.. كان واقف يطالعني ببرود...صديت عن نظراته اللي تقتلني وتطعني وتدمي قلبي... ما احب ان احد يكرهني..ما احب ان احد يحقد علي...
صبيت له فنجال قهوة....فأخذه بدون ما يطالعني وهو يسولف مع جدته بامور المزرعه.. وفهمت من كلامهم ان الجده عايشه بالمزرعه...مو بمكان ثاني...ووافي قاعد يقنعها تجي تسكن معه...
الجده: المكان ياله يكفيك انت ومرتك.."
: بالعكس يا جده..إذا ما شالك المكان انا نشيلك بعيونك.."
وافي بإصرار بدون مايطالعني: يا ميمه... الله يهداك وش ذا الحكي...انت مانتب مثقله علينا...بعدين الرياض ادفى من ذا المكان اللي كله صقيع..."
الجده: بس انا احب اشوف الخيل والابل.... ما اقدر اجلس بوسط المدينة وانحرم من هالمكان الزين..."
:طيب...ياجده نقدر نجيبك هنا كل ربوع وخميس وجمعه..."
الجده وهي تشرب فنجالها وتمده لي: لااااء..ليش اضيق عليكم والمكان هنا واسع..."
وافي بزعل: وإذا لا قدر الله مرضتي...احتجت لينا.."
الجده وهي تحسم الكلام: الاعماار بيد الله..."
ناولتها فنجال القهوة...ولاحظت فنجال وافي المليان مثل ما هو...ارتفعت نظراتي ببطء..وشفت عيونه كيف مخيفه... كان يطالعني وكأن وده يقتلني...ماقدرت اواجه نظراته اكثر فتركت القهوة وقمت بروح اي مكان بس موب عنده...
مر الوقت سريع الصباح..وكنت انا مع مهاا وابتسام وحنان طول الوقت...جالسين عند النخيل نسولف ونشرب شاهي...وفي قمة الوناسه....شوي يوم طلعت مهاا من شنطتها البوم صور..
مهاا: اسمحي لي يا ملكه..ما قدرت اوريك الصور من قبل لأني نسيتهم..."
قطبت جبيني اي صور؟؟!!...
شفت الالبوم على شكل قلب...فتحته بتردد..وطالعت بالصور حقت زواجي...
كانت مرتبة على شكل قصة....فيها صور لي وانا صغيرة مرة..وصور لوافي.. وبعدها صورنا بالثانوي...واخيرا صور الزواج...
كنت اطالع بالصور وكأني قاعده اطالع بصور زوجين ما اعرفهم...الصور او يمكن مهارة المصورة بالاصح....خلت الصور تجي بشكل حميم..حمار خدودي...نظرات وافي...لمعة عيونا...اشياء كثيرة...
حنان برومانسية: يارب اتزوج واحد مثل خالي وافي...يا ناس كل ملح ورمانسية الدنيا مجتمعة فيه"
مهاا: ياااااااااه...صوركم يا ملكه تجنن...مو مثل صور العرسان الثانين....فيها شجن.. حب.. شوق..رومانسية"
ابتسام وهي تآخذ صورة وافي: يا ملحه رجلك يا ملكه....مشاء الله عليك..محظوظة.."
مهاا: سمي على خالي...وبعدين عيـــــــــــب...عندك رجلك وصاجتنا.."
ابتسام وهي تضحك: ههههههههه..الله يخليلي متعب..عن كل رجال الدنيا والله...رغم ان مافيه زين..."
وكملت وهي تتنهد: تصدقون بنات..الحب مايعتمد على الشكل...الحب اشياء اكبر... مشاعر...سامية مالها شغل لا بمراكز ولا بفلوس..."
وكملت وعيونها تدمع: شوفوني اناا...لاني بمركزكم الاجتماعي...ولا اهلي مثل اهاليكم.. انا عشت طفولة معذبة عند زوج ام مايرحم...عشت اسوأ ايام حياتي...ليما جا متعب وخطبني....اهلي مافكروا يرفضونه لأنه غني...وماكنت اعتقد اني راح احبه بسرعه.. كنت اشوفه منقذ.. وكنت دوم اعامله باحترام..لأني اعتبره هبة من الله لي...لكـــن..الحياه معه وضحتلي...انه لولا قدر الله صار له شيء..راح امووت...انا بعده على طول.. ودوم ادعي ربي..انه يآخذني قبله لأني ما اتحمل اني اشوفه يتألم.."
حنان بنعومة: يعني إذا تزوجت راح احب زوجي مثلك؟؟..ياااااااااااااااي.. متى اعرس؟؟"
ضحكنا كلنا على براءة حنان بس انا ضحكتي ماكانت من قلب...كلام ابتسام حسسني بنقص كبير ....خلاني اغار غصبا علي.. شوفوا الفرق بين حياتها وحياتي...اهو ماكان يعرفها مع هذا حبهاا.. اما انا يعرفني ومع هذا يكرهني..
ابتسام: اكيد ربي راح يسعدك بانسان ماكان لا على البال..ولااا على الخاطر.."
مهاا وهي تمد بوزها: وانااا؟؟...ياحظي مغصوبة على ولد عمي..اللي ما اطيق شوفته.."
ابتسام بحماس: شوفي اعظم الحب...جاا بعد كره شديد...وهالنظرية معظم الحريم بيثبتونها لك..."
مهاا وهي تناظرني: اناا مابي مثل اللي تقولين....انا ابي مثل خالي وافي وملكه.."
وكملت وهي تمسك ايدي: قصة زواجهم من اروع قصص الحب بالعالم..."
قطبت حواجبي مستغربة...حب...قصة زواج؟؟..وش مهاا قاعده تقول..وانصت لها باهتمام انتظرها تكمل0000
إلى متى ياسيدي ابقى هناا؟؟؟
ابعثر روزنامة الايام والاحلام؟؟؟
ابوح في الوقت الضائع
واحلم في الوقت الضائع
واحب في الوقت الضائع
واخلص في الوقت الضائع
واعيش انتظر...فرحة الوقت الضائع...ولا تأتي!!
انا وقفت مكاني لحظات..مو مستوعبة الدعوة اللي دعتها علي البنت...كانت وقحه بشكل غريب...
وافي: مرااام!!!....
: آهاااا..مرومه المشهورة!!
وابتسمت لها ابتسامه واسعه اهي فهمتها زين...كانت ابتسامة تحدي واضحه..
حطيت ايدي بايد وافي وقربت منه كثير...
: هاا حبيبي... ما تعرفها علي!!
لمس وافي خده للحظات..وطالع فيني وابتسم ببرود...وكأنه يقول لعبتك واضحه وضوح الشمس...
وافي وهو يجرني ويتقدم ناحية البنت المفجوعه واللي فاتحه عيونها على الاخير تطالعنا...
: هلا مرااام....كيفك؟؟...
وتصورا قدام عيني صافحها بشكل جدا عادي ولا كأنها وحده من محارمه...الخد بالخد ... واليد باليد..
مرومه وهي تطالعني بغرور: اشتقتلك كثييييييير...
رفعت عيوني للسماا وكأني اقول معقولة وافي مجنني على كل كبيرة صغيرة وبنات خالاته بالشكل هذا..
وافي وهو يطالعني منحرج: ماعرفتك على ملكه...زوجتي!!..
هزيت راسي لها وانا ابتسم: فرصه سعيده اني اشوفك يا مرومه..!!
مرومه بنعومه ودلع بايخ: هاا..وانا الاسعد...خصوصا ان وافي موجود...
وطالعت فيه بهيام زايد..ياربي ودي اقلع عيونها...بمكياجها الكثير...وملابسها الانيقة جدا..وشعرها اللي يتطاير بنعومه حول وجهها وجسمها...آآآآه ياليت شعري طويل...!!
قربت من وافي...ومسكته بقوة مع ايده الثانية...وهي تبتسم له...وكأنها قاعد تقولي هذا لي..انا حسيت الدم قاعد يغلي بعروقي..اهو زوجي ولا زوجها.. انا عمري ماسلمت عليه ... ولا عمري كلمته بهالدلع الزايد عن الحد.. صدق بنات ماعاد فيهم حياا!!!
قلت لوافي يوم بدينا نمشي: حبيبي!!..
طالعني وافي: هلاااا...
قلت وانا اتكلم بدلع زايد اقلد الاخت اللي وراه: الاغرااااض....ما اقدر اشيلهم..اخاف المناكير يخرب ويتخدش...
قطب حواجبه للحظات وكأنه مو مستوعب اني قاعده آمره بطريقة غير مباشرة...وكنت قاعد ادعي ان وافي مايفشلني قدامها...
هز وافي راسه وجا يسحب ايده من الآنسه المدلـله...بس هزت راسها رافضه ومشت معاه راجعه للاغراض..
شال الاغراض اللي طاحت من ايدي ورجع وهي ماسكة بايده بقوة...كنت راح اضحك لولا ان الموقف ما يناسب الضحك...فعشان كذا ابتسمت له بطريقة اهو فهمها...زين...فهز راسه وكأنه يقولي مو مثل ما تفكرين...لكني طنشته..وسبقتهم راجعه على المطبخ...وانا اسمع ضحكاتهم العالية...
في المطبخ..لقيت حصه وصيته..ابتسموا اول ماشافوني...كانت خدودي محمرة..وكنت فحمانه...ناولتني حصه كاسة ماء...
حصه وهي تبتسم وبحنان: عساا ماهبلتبك مهاا...تراها مستخفه من عرفت انك بتجين...
: يا حبيلهاا..الله يخليها لك...قمر مشاء الله..
صيته وهي تشوف بنتها الصغيرة تصيح: هااا يا بعد قلب امك...وشووو؟؟..مين اللي طقك عشان اكسر له راسه؟؟..
ابتسمت للبنت الصغيرة...كانت تزنن..نعومة..وكيوت...ببشرتها المحمرة وشعرها الناعم القليل...
اعطيتها الحلاوة اللي سويتها للاطفال..وانبسطت وراحت تركض برى عشان تعلم البزران الثانيين...
قالت حصه: والله انك تعبت نفسك...يا شيخه جيتك لنا تكفي...
: لااا تعب ولا غيره.. الحمدالله كلها شوية فطاير وصينية حلاا...
حصه وهي تحط ايدها على كتفي: صدق ان وافي عرف يختار...
صيته وهي تطالع بره من الشباك: مرااام مع واافي...
حصه طالعتني وبعدها راحت بتشوف مع صيته..
صيته وهي معصبه: اااه يا قليلة الحياا...لو هي بنتي كان ذبحتها وشربت من دمهاا...ولا كفاني..
حاولت اني ما افكر بكلامهم وانا اعطي البزران اللي تجمعوا عند باب المطبخ الخارجي واعطيهم من الحلويات..
حصه: الغلط على وافي..مفروض يعطيها كلمه يحبها قلبك...لكن اخوي رهيف..ما يحب يجرح احد...
صيته: يا شيخه!!...هي ليش ما تستحي؟؟..الحيا منفصخ منهاا..واحد عمره مافكر يتزوجها ولا يبيها..بس اهي مصرة عليه...
حصه وهي تلفت لي: ملكه..ترانا تعمدنا نقول هالحكي قدامك..
طالعت فيهم وحاولت اثبت صوتي: ليش؟؟..
ابتسمت صيته بشراسه وبأعلى صوت: لأنها راح تحاربك بكل الطرق...
رفعت حواجبي وكنت بقولهم..ياليت تقولون غير هالحكي...لأني تعبت من الحروب اللي خضتها بحياتي..
: انا واثقة من وافي!!..وعارفه انه يحترمني حيل...
ابتسمت حصه: وافي يحبك يا ملكه...لكن ان كيدهن عظيم..
وافي..يحبني!!..مين قال كذا؟؟..وليش متأكده؟؟..كان ودي اسالها..استجوبهاا لكن قررت اني اسكت وانا اسمع صوت وافي قريب من المطبخ...
دخل وافي المطبخ لوحده....ووقف يطالعني فترة شوي طويله..حتى اني حسيت ان الدم بيتفجر من اذاني...بس كنت اتظاهر اني ما اشوفه...
وافي:كاسة ماء...يا حصه..
طالعت بحصه اللي كانت مشغولة...فرحت صبيت له كاسة ماء...وطبعا مايحتاج اقولكم انه في البيت...يكب كاسة الماء لو لمستها...
ناولته الكاسه...بس كان رافض يآخذهاا...
ببراءه مطلقة: هاا حبيبي..الموية!!
اخذ الكاسه وهو يبتسم لي بتكشيرة انا عارفتها...
صيته وهي توقف قباله: وافي..وش المصخرة اللي نشوفها؟؟..
وافي وهو فعلا مو فاهم وش تكلم عنه: وشو؟؟..اي مصخره؟؟...سوت ملكه شيء؟؟..
صيته: حاط حرتك بالضعيفه...لااا يا حبيبي...إلا الاخت مرام...
وافي وهو يمد بوزه: صـــــيته!!...
صيته وهي ميب مهتمة بنبرة التهديد الواضحه: لااا صيته ولا غيره...ياخي توك معرس..ارمي عليها شيلتها إذا اقبلت لك...
وافي وهو يطالعني: صيــــــته....ما تشوفين انه مو وقت هالموضوع...؟؟..وهالقمر واقف هناا يطالعنا ببراءه...
طالعتني صيته وبدل ماتسكت كملت: ايه الموضوع كله عشان ملكه..ياخي احمد ربك.. صدق انكم الرجال ما يملا عينكم إلا التراب..
تنهد وافي بملل وجاا يطلع: تراك ذبحتينا...بنت خالتي واعرفها من كناا صغار...وشفيها.. بعدين ملكه راضيه...اشتكت لك؟؟..
صيته وهي تلحقه: وإذاا هي راضية..انا ماارضى..لو انها بنتي كان ذبحتها يا شيخ!!...
طنشها وافي وراح..ابتسمت غصبا علي ابتسامه غريبة...تقدرون تقولون ابتسامة نصر.. لأني عرفت ان اهل وافي موب راضيين عن هالعلاقة...
رجعت انا وصيته واللي هي على فكره اكبر مني بس بتسع سنين...للصاله من جديد... كنا شايلين القهوة وصواني الحلى اللي انا مسويتها..
واول ما دخلت لاحظت ان كل اللي كانوا يتكملون سكتوا...فعرفت وتاكدت اني كنت محور الموضوع...
حطيت القهوة على الطاولة..ومسكت الفناجيل..ودرت على الحريم وانا اصب لهم..حسيت بنظرات خالات وافي الحسره..وكأني موب عاجبتهم!!..بينما جدته اشرت لي اجلس جنبها يوم خلصت..جيت وجلست جنبها... والصراحه تنقال...حرمه جدا قوية ومتسلطه.. لكنها طيبه حيل..يعني صدق اللي مايعرفك ما يثمنك..
كنت اسمع لسواليفهم بدون ما اعلق...انا مرة صغيرة...ما ادري شلون امي تزوجت وهي بعمر 15سنة...كيف كانت تصرف مع الحريم هاذولي..
يعني صيته تقريبا كانت اهي اصغر المجموعة... ووحده جنبي..وكانوا يتصرف مثلهم بالضبط...الحرمه الصغيرة الي جنبي..كانت ماسكه جوالها تقرا فيه....
ابتسمت لي: ممكن طلب؟؟...
رديت لها الابتسامه: آمري..خلص فنجالك؟؟..تبين حلى؟؟...اجيبلك شيء..
ضحكت الحرمه بنعومة: لااا يا قليبي...ابيك بس ترسلين لي رساله جديدة على جوالي إذا ماعندك مانع...
:...............
كملت الحرمه: وتكون رسالة حب قوية..عاااد انت عروس...مثلي!!
ابتسمت لها: آآه عروس...انت...ابتسام؟؟؟..( وكنت احاول اتذكر اسمها لأن صيته عرفتني على القروب كله)..
ابتسام: ايه..توني متزوجه لي ست شهور...زوجي يصير ولد خالة وافي...
: آآه..ياهلااابك....حضرتي عرسي؟؟...
ابتسام وهي تعتذر: لاااا لاسف...كنت مسافرة عند اهلي....
: حلووو...مشاء الله...
وكملت وانا حاسه اني بموت من الفشيله: للاسف ماعندي جوال يا ابتسام..
فتحت فمها وكأنها مو مصدقة...واعتذرت بسرعه: سوري..حيل مصدومة..فيه احد ماعنده جوال؟؟..
سمعتنا الجده فقالت: وش هوله الجوال؟؟...ماغير مضرة واذى...ويطنطن طول الوقت.. والله...هذا جوالي طول وقتي راميته...ولااا كل بعد فترة يآخذون يغيرون جهاازه..والله انها ماتفرق عندي كل ابوهم...
وكملت وهي تدور جوالها بجيبها: ودامك يا ابتسام تقولين انه موهييم..اجل انتي احق فيه من غيرك يا ملكه!!يامرت الغالي اللي مايرد لنا طالب...
سمعت كلمات متفرقة من اللي جالسين: آآآآآآآآآآآآه..وشهوله؟؟..ماله داعي..يا جده خليه معك..وافي بيشتري لها غيره..
قلت وانا اهز راسي باعتراض: ابداا يا جدتي..لا يمكن آخذه...
الجده وهي معصبة: ترفضين الهدية يا مره!!
قلت وانا خايفه ومرتبكة: ماا قصدي...
سفهتني وحطت الجوال بشنطتي الصغيرة..وغيرت الموضوع...: يا ووويلي...ما ادري وش تحطن بهالشناط الصغيرة...ياله الواحد يدخل يده...
صيته من آخر المجلس وبأعلى صوت: الموضه يا ميمتي...
الجده: والله ان هاليهود اثروا علينا بكل شيء...قالوا الموضه قالوا...
ابتسام وهي تهمس لي: مشاء الله عليك..كسبت الجده...انا ياما حاولت لكن المحبه بالقلوب..
ابتسمت لها منحرجه...واشرت لي نطلع نتمشى..فستأذنت من الحريم ومن الجده اول.. وطلعت مع ابتسام..
ابتسام وهي تغمزلي: يله..دقي على زوجك!!
: هااا...ليش؟؟...مايحتاج؟؟...
ابتسام وهي تضحك:ههههههه... إلااا..بوريك شلون يخافون من جدتهم..بتشوفين كيف بيرد عليك بكل الرسمية اللي بالدنياا...
طالعت بابتسام ومسكت الجوال بتردد..وكأني تذكرت شيء...: ما اعرف رقمه...
ابتسام وهي تطالع معي بشاشة الجوال: والله؟؟...طيب...اكيد مسجل هناا...
فتحت قائمة الاسماء....ادور ببطء ليما لقيته وافي...يا الله اسمه يجنن...
ابتسام : اسم رجلك يجنن..اما انا الله يخليه لي..اسمه يفجع..بس مع هذا اموووت فيه.. ولا اتخيل حياتي بدونه لحظة وحده...
كل العرايس مثلك يا ابتسام إلا اناا!!..
: اممم..هذا رقمه...طيب..وش اقوله؟؟...
ابتسام وهي تفكر: بس اسمعي صوته!! وبعدين بنرسل له رسايل غزل قوية..
هزيت راسي وانا ادق بتردد..واحس حلقي بدا يجف..عااد كنا بعيدين مرة..فحولناا في هدوء غريب..وكنت اشوف البزران وهم يسبحون..مع البرد...داخل الغرفة الزجاجية...
تعالت دقات قلبي اكثر اكثر..وانا اسمع صوت الرنات...رنه ورا رنه..
اخير رد وافي....صوته يجنن بالتيلفون...صوته حلو بكل وقت..
وافي بثقل: يامرحباا مليون ولا يسدون...
وافي: الوووووو...يا السلطانه ردي علينا!!...
ابتسام قاعده تسمع معي..وميتة ضحك..
وافي وهو يكلم احد جنبه: شكلي جدتي كالعاده نايمه فوق جوالها...كخخخخخخخ...
واسمع صوت واحد جنبه وشفت ابتسام ميتة به الصوت فعرفت انه رجلها: يا حبيلها جدتي.. والله ان الحظاره حرام فيهاا....
اشرت لي اقفل..فقفلت الخط..وانا قلبي ينبض بقوة فضيعه..
ارسلت لي رسالة..قريتها نهبلت...
: ابتسااام..لآ يمكن ارسلها..هاذي مررة قليلة ادب...
ابتسام وهي تهز كتوفها: عاادي...وش فيهاا؟؟..تراك زوجته...
: لااااا...مرررة استحييييي...شلون راح اشوف وجهه وانا مرسلة له كلام زي كذاا..
سكتت ابتسام..وهي تدور رسالة ثانية وارسلتها لي...وعييت ارسلها...وبالاخير ارسلت لي آخر رسالة...وهي اللي قررت ارسلهاا..
(( صاحبي محتـــــــــــــــاج لك شعر وشعور...واحتياجي شي ماكان باختياري...في غياب الشمس وش ذنب الزهور؟؟...والمطر لا شح وش ذنب الصحارى؟؟..اللقا لحظات والغيبة شهور...تقصر الخطوات ويطول انتظاري!!))
وضغطت على الارسال وقعدت انتظر....اما ابتسام فأخذت ترسل لزوجها رسايل...فدق عليها وقاموا يسولفون..حسيت بالم بقلبي...هذا هو الزواج...مو الحياه اللي اعيشها... يا قلبي تعبت من قوة احاسيسك..ما ادري متى تموت وارتاح من هالعذاب؟؟...مارد وافي
الرسالة..واستغربت اناا..وبعدها بخمس دقايق تقريبا...دق على الجوال... اشرت لابتسام .. لكنها كانت بعالم ثاني مع متعب حبيب القلب..
توهقت..وبالاخير قررت ارد بس واسمع صوته...
وافي وهو معصب: الووووووو...
خفت وتوقعت شر..صوته كان معصب موب مثل قبل شوي...
وافي: ملكه...ردي علي!!
وافي: ملكه ردي علي...بسررعه!!
: هلااااء...
وافي وهو يآخذ نفس عميق: وينك؟؟؟..
: ااااااه..مع ابتسام مرت متعب....قريب من المسبح..
وافي وشكله مولع: طيب...تعاليلي ورى المسبح....بتلاقيني واقف هناك بالركن.. بسرررعه...
ودعت ابتسام ورحت ببطء امشي ...انا عارفه انه بيهزئني وبيتكلم علي...لكن هالمره ماراح اسكت له...انا مو عبده له...انا حره بنت احرار...وافي بالذات من بد هالبشر كلهاا لازم يعرف اني اقدر عليه وعلى عشر مثله..
قعدت اقوي قلبي بهالكلام وانا اقراا بعض الاذكار حق لقاء العدو..
وصلت اخير للمسبح فلفيت من ورا الغرفة الزجاجية..ولقيت وافي واقف مثل ماقالي بالركن...بس كانت عنده مرومه!!
لا يكون ناوي يهزئني على حسابها...
ابتسمت وانا اقرب منه..ولاحظت ان مرومه الدلوعه التافهه كانت تطالعني بتحدي...
: هلاااا حبيبي..شبيك لبيك ملكه بين ايديك...
حسيت وافي ارتبك..وكنت راح اضحك على وجهه...بس اكتفشت بابتسامه عذبة...
وافي وهو يحك شعره: هلاااا..آآآه..اممم...
وطالع بمرومه منحرج ما يدري وشيقول...
مرومه وهي تطالعه بغرام: وافي..توعدني اسوق الجيب حقك بعدين...!!
وافي وهو يبتسملها: اكيد حبيبتي...!!
انا حسيت بغثيان قال حبيبتي قال...حبك برص وهم وغم يا حمار...بس تصدقون رغم اني مولعه من جواتي لكن اللي يشوفوني يقول حيل مبسوطة وتبارك هالشيء اللي قاعد يصير...
: مرومه عيوني..ليتك تخليني انا ووافي شوي...ابيه بكلمه!!..على انفراد..
مرام فتحت عيونها للاخير...ورفعت خشمها بغرور وصرخت بدلع وعيونها تدمع: واااااااااااافي!!!
وافي وهو شكله كاره هالشيء: آسف مرام...بس اوعدك انها كلمتين...وارجع لك عشان نركب السيارة!!
هزيت راسي بنعومة وانا مبتسمة بتريقة....يا حياتي على الحب المتدفق..لو كان معي مسدس كان فرغته فيهم هالحين...بس لاااا..انا اوريكم...وما اكون ملكه!!
مرومه اللي انصدمت ان وافي صرفها بهالطريقة..امتلت عيونها دموع..وتركتنا وركضت بسرعه وسمعنا صوتها وهي تصيح..وشفناها وهي تروح عند مجموعة بنات شفناهم يطالعون فيناا كلناا...
وافي: كان لازم تكلمينها بهالطريقة!!
: لااا ابدا..كان مفروض بس آخذها بالاحضان واقولها الف مبروك عليك الرجال اللي مفترض يكون رجلي...
مسكني بقوة مع كتفي: خلك ساكته دام النفس عليك طيبه!!..
صرخت: مانيب ساكته...وبعد ايدك عني...بكل بساطه..تبوس خدها...وتمسك ايدهاا...ليش واحنا عايشين ان شاء الله؟؟..هاااا...تكلم...قووووووووول...
وافي وهو منقهر: كاااافي..لا تخلين اتوطى ببطنك!!..
رفعت راسي ومشيت من قدامه: ما تقدر...ولا راح اسمحلك فااهم؟؟..انا موب لعبة عندك ... كافي اهانات وصياح وتعب نفسي ومعنوي....انا اقبل اي شيء...إلااا انك تهيني قدام الغرب يا وافي!!..
مسكني وجرني بقوة مع كتفي...وانا اصرخ فيه واحاول اني اضربه بقوة..عشان يتركني.. ورجعت ضربته مع كتفه بقوة....فمسك ايدي ولفهاا...
صرخت بالم: وافييييييييي...يا حمااااااااار!!!...آآآآآآآآآه اهىء اهىء...
وقعدت اصيح بسبب الالم اللي حسيته...
قال واهو يدور مفتاح الغرفة اللي معاه: ابيك تنطقين هناا..مفهوم...!!
قلت بعصبية: لاااااااء...ماراح اجلس هنا..والله لاسويلك فضيحه..انا مانيب كلب عشان تحبسني هناا...
وضربته بقوة على كتفه وصرخت: انا انحبست شهرين اثنين بغرفة قذرة..اتجرع انواع الضرب والتحرش...وانت!!...بالذات من بد هالبشر كلهم...ماراح تحبسني فاااهم؟؟...
سكت يوم حسيت ان صوتي عالي مرة...وان في هدوء غريب حولناا...وافي كان يطالعني بطريقة غريبة...فمه مفتوح...وحواجبه مرتفعه بذهول...
مسحت دموعي اللي نزلت بسرعه عشان تغطي وجهي..
: اكرههههههههك....اكررررررهههك...انت ولااا شيء...فاااهم ولا شيء...
اكتسى وجهه تعبير غريب..تعبير صدمه بذهول بحزن بلا مبالاة..باشياء كثيرة اجتمعت..
دخل المفتاح بالباب وفتحه..واشر لي ادخل..حطيت ايدي على رقبتي...كان حلقي يعورني بسبب الصراخ....
سمعت صوت حركه وانتبهت للحركه من تحت الاشجار...وكأني شفت رجول...يعني فيه احد سمع حوارنا الرومانسي الجميل!!
دخلت الغرفة مستسلمه ودخل وافي وراي...
فتحت المكيف على الحار...وفسخت الفرو اللي لابسته..كان وافي واقف ورا الباب ومتكي عليه..يناظرني بنظرات غريبة...
: وشفيك؟؟..اطلع برااا...ما ابيك..ولا ابي شوفتك...قفل الباب بعد..مايهمني...احرررقني.. ما اهتم....انت عديم احساس...انت من وشو مخلوق؟؟...قووووووووول...
وافي وهو يبلع ريقه: ملكه!!...خلااااص...
: لاااا موب خلاص...عمره ماخلص...ليش تكرهني يا وافي؟؟..لييييييش؟؟..وش يدريك وش الي كان بيني وبين مساعد؟؟..على اي اساس حكمت اني احبه؟؟..ليش قررت وادعيت وحكمت وقضيت وخلصت..
فتح فمه بسرعه بيرد بيتكلم..لكن بدل من هذا كله..
وافي بكآبة: مو هذا المهم...المهم انك بدل ما تاكدين لي انك شريفه...رحت وخنتيني معاه..ولااا حطيتها بجارتك المسكينه اللي عندها اطفال...
:اطلع براااا...ما ابي اشوفك هالحين...اطلع برااااااااااا روح معى مرومتك الصغيرة الدلوعه...
وكملت وانا ارتعش: سؤال صغير بس؟؟...بس؟؟..ليش تزوجتني؟؟..ولا تقولي علشان تحمي بدرية مني؟؟....لأن هاذي اكبر كذبه بالعالم...
مسكني مع كتوفي واخذ يهزني بقوة: كذااا...تزوجتك عشان اريح هالبشر منك..تزوجتك لأني مابي سلطان يتزوجك....ولا ابيك تهربين مع مساعد..ولااا ابيك....لغيــ...
: وشووووو؟؟..كمممممممل...اجرحني اكثر...هيني اكثر...يا حقيييييير...انت حشرة تااافه..
ضربته بقوةعلى صدره..لدرجة اني شكيت إذا يحس..رماني بقوة على السرير وطلع بعد ما قفل الباب حق الغرفة...
بعد ساعه من الصياح المتواصل فتحت علي مهاا باب الغرفة بس الداخلي...قمت على طول من السرير وفيني نية خناق مع هالوحش الدب الحيواااااااااان وافي...
شافتني مهاا وهي بعد كانت عيونها حمرر: شفتكم وانتم تهاوشون!!...."
وحطت يدها على فمهاا وقامت تصيح...وهي تسكر الباب اللي وراها...
كملت مهاا وهي ترتجف:" توقعتكم تكونون مثل متعب وابتسام...لكن...صدمتووني.."
بلعت ريقي ومسحت دموعي :" مهاا حبيبتي...الحياه مو مثل ما انت معتقده..الحياه فهي تشابكات كثييييييير..."
مهاا وهي تطالعني وتمسح دموعي:" بس خالي وااافي....وعدني انه راح يعااامل زوجته برقة..."
مافهمت شيء من اللي تقوله..
كملت مهاا وهي تصيح اكثر:" كل الرجال مثل بعض...رغم انه دوم كان يحلف لي انه غير عن ابووووي..."
وقفت وضميت مهاا بقوة: "مهاا حبيبتي...اي رجال يختلف مع زوجته...واللي صار بيني وبين وافي شيء عاادي..."
مسحت خشمها بمنديل انا اعطيتها اياه وقالت وهي ترتجف: ليش قفل عليك البااااااااب؟؟.."
ابتسمت لها: لأني طردته وكسرت له راسه وقلت له مابي اشوفك..."
وكملت وانا احاول اضحك: فأدبني بطريقته...!!"
ابتسمت مهاا وكأنها تحاول تصدقني: يعني خالي وافي طيب معك؟؟.."
: طبــــــــعاا..صدقيني ان احلى ايام عمري مع خالك...بس انا عصبت عليه عشان الهبلة بنت خالتكم ذي.."
مهاا وهي تمسح دموعهاا:" مرااام؟؟.."
وقلدتها انا:" مروووووومه!!"
قمنا نضحك ومسحت دموعي...ورحت اعدل مكياجي عشان اطع معاها...
مهاا وهي تشوفني اعدل مكياجي:" تصدقين....اني حلفت ما اتزوج ابد...بس خالي وافي هو اللي اقنعني اني اتزوج..وقالي ان اصابيع ايدي موب سواا..."
وكملت وهي توقف وراي: "لمن شفت متعب وابتسام..انبسطت بس كنت اقول لنفسي خالي وافي هو اللي راح يثبت لي هالشيء...خصوصا بعد تجربته مع خطيبته الاولى...ومع عفااري..بنت خالتي نوراا.."
رفعت راسي بسرعه: عفااري...ليش؟؟...وش السالفه؟؟.."
مهاا بارتباك: ماقالك عنهاا؟؟.."
: "لااا...بس اللي اعرفه ان بينهم مشكله كبيرة...لكن نسوها بعد قضية جاسر الله يرحمه ويغمده الجنه..."
مهاا وهي ترجع شعرها ورا اذنها: "يا ستي السالفه عاادية...انت تعرفين بيت خالتي نورا مشاء الله قصر..."
هزيت راسي ولفيت اسمعها باهتمام...
كملت وهي تجلس على التسريحه: "وله عدة بوابات ... يا ستي كان خالي وافي زايرهم... المهم خطيبته الاولى كانت موجوده في ذاك اليوم... وكانت متفقة مع اللي تحبه انه يجي يشوفها هنااك...طبعا عفاري ما كانت تدري عن الموضوع نهائي....لكن لسوء حظ عفاري ان الرجال يوم نط السور...كانت هي بذاك المكان...وسمعته وهو ينادي اسم خطيبة وافي ... من الصدمه...ما قدرت تسوي شيء..وهو يوم شافها ارتبك وحاول يهج...لكن اللي شافه وهو ينط السور وعفاري واقفه..."
سكتت..فكملت اناا وانا حاطه ايدي على قلبي: يااا ويلي وافي...هو اللي شاف عفراا وحسبها تعرف الرجاال؟؟..."
هزيت راسي متأثرة..ياربي وش ذا الحظ؟؟...إذا ماصدق عفاري والسالفه من سنين فمعقولة راح يصدقني والسالفه مالها ايام؟؟..
مهاا وهي تحلفني: بس الله يخليك لا تقولين لأحد...ترى والله ماحد يدري بذا الموضوع غيري انا وعفاري..."
تنهدت وانا اقوم : مسكين وافي...وش هالصدمات اللي يشوفها في اللي يقربون له...عفاري كانت تقولي انها ياما حلفت له انها بريئة بس ماصدق"
مهاا وهي تأيدني بهزة راس: صح...خالي حمل عفاري كل سبب تعاسته خصوصا بعد ظنه ان عفاري بنت تمشي مشي بطاال.."
: بس لازم نعلمه..حرااام..لازم يعرف انه ظالمهاا"
مهاا: ياما حاولت اني اقوله...بس عمره ماعطاني وجه..."
كملت مهاا وهي تغير الموضوع: طيب..دامني مبسوطه على خالي..ودامك تحبينه... امشي اوديك للبدروم..تشوفين صور رجلك يوم كان صغير..وكل ذكرياته..كتبه دفاتره.. ملابسه..العابه..كل شيء يخصه."
دخلنا البدروم الكبير بس نوعا ما مظلم...وكان بااااااااااااااارد..لدرجة اني سمعت صوت طقطقة اسنان مهاا وهي تشد الكوت حقها بقوة على جسمهاا...راحت للكراتين مغبرة بالركن ولحقتهاا بسرعه...
حسيت بخوف فضيع مع ان عندي مناعه من الحشرات والفئران...لأني تعودت عليهم بالمستشفى...
مهاا وهي تأشر لي بالكشاف: هنااا...
جيت وراها وجلست قريب منها..وكان فيه صندوق خشبي كبير فيه اغراض كثيرة... طالعت بالاغراض..وحسيت بمشاعر غريبة تخنقني بقوة...
تأملت اللعب الصغيرة..سيارت مغبرة...سوبرمان وسبيدر مان..مجلات باسم..لقيت تي شيرت قديم ازرق وابيض..غصبا علي حظنته بقوة...ما اتخيل شكل وافي وهو صغير... اكيد قمر...
مهاا: ياعيني على الحب!!"
بتأثر رديت عليها: ودي آخذ كل اغراضه.."
مهاا: تحبينه؟؟..."
سكت ماعرفت وش ارد...وهزيت راسي بصراحه: لسه!!"
ابتسمت وحط ايدها فوق ايدي: اقدر صراحتك...لكن صدقيني راح تحبينه...خالي ينحب.. خالي غير!!.."
:ههههههههههههه...لااا يا شيخه..اظن الغرور صفه متوارثة بالdnaعندكم"
مهاا وهي تمسك كتاب جلدي كبير وتعطيني ياه: وانت الصادقة"
فتحته بتردد...وافي...هذا البوم لصوره...كان يبتسم ببلاهة وهو ماسك كورة ولابس لبس الهلال...وشعره الاسود الكثير منتفش...وركبته مجروحة..وعيونه تلمع..ماكان جميل.. كان عادي..لكني حبيت الصورة غصبا علي...حسيتها تمثل وافي الحقيقي...وافي الطيب.. اللي كان قبل لا يتزوجني...مثل مساعد...اللي صار مجنون لمن عرفني وحاول يدمرني.. مثل سلطان اللي فقدت الحياة بهجتها عنده..لمن تزوجت غيره...
قلبت الصفحات...صور مختلفة لمراحل زمنية متغيرة...وافي وهو واقف مع اصحابه قبال مدرسته.. وافي وهو يسوق السيارة.. وافي وهو يفرش اسنانه ومصورينه اصحابه بامريكا ... وافي وهو ماسك ثعبان كبير وحاطه حول رقبته..
اعطتني مهاا البوم صور ثاني..وقامت تشرح لي كل صورة وش مناسبتها.....وهاذا الالبوم كان صور متنوعة للعائلة...صورة لحصه وهي شايله وحده من بناتها الكبار بين يدينها....صورة للجدة وهي واقفه في المرزعه جنب الغنم...صور لاحداث كثيرة ومهاا تذكرها وهي جدا مبتسمة...وكنت استمع باهتمام...
: مهااا...ممكن طلب؟؟.."
مهاا وهي تسكر الالبوم: آمري..."
: امممم...ابي صورتين لوافي...وابي التي شيرت حقه...واللعبة حقته..."
مهاا وهي تبتسم: اكيد...هاذي كلها حلالك...اساسا اغراض رجلك...المزرعه كل شبرها فيها لك..."
: ولا تعلمين احد عنها..خصوصا وافي"
مهاا وهي مستغربة: انن..شاء الله.."
طلعت صورة وافي وهو ماسك الكورة..وهو لاف الثعبان على رقبته ودخلتهم بالشنطه.. و اخذت لعبته السوبر مان الصغيرة..وحطيتها بالشنطه...واخذت التي شيرت وضميته بقوة ... وكأني احاول اضم وافي من خلاله...لا تسألوني ليش سويت كذاا؟؟؟.. غصبا علي والله.. مع اني ما احبه...بس حسيت ان ودي اضم هالطفل بكل القوة اللي عندي...
مهاا وهي تبتسم: خلااااص...لو درى خالي عن كل هالغرام والمشاعر كان ما ترك دقيقة..."
طقيتها على كتفها بمزح: دبـــــــــه..عيب عليك...!!
مهاا :ههههههههه..ولااا تقول لسه ماحبيته...وهي..."
سكتنا انا ومهاا نسمع رنة الجوال القوية...
: مهاا...جوالك...
مهاا طلعت جوالها من جيبها وهزت راسها بمعنى لااا موب حقي...
تذكرت ان معي جوال انا الثانية..فتحت شنطتي وطلعت منها الجوال..وكان وافي هو اللي يتصل...خفت...
مهاا: مين؟؟...خالي؟..."
: ايـــــــه...مهاا خايفه..احد درى انك فتحتي الباب علي؟؟..."
مهاا بارتباك: لااااء...محد درى..اخذت المفتاح بدون محد يدري وجيت فتحت عليك الباب..."
سكت الجوال..وخفت وعضيت على شفايفي ووقفنا انا ومهاا..
مهاا: اكيد فتح الغرفة ومالقاك... يا ويلي منه...بيكسر لي راسي"...
: آآه..اممم..طيب...وش السواة؟؟"
رجع الجوال يدق بالحاح اكبر...وطاح من ايدي من شدة الخوف والربشة...وتمينا انا ومهاا مكانا نطالع مصروعين بالجوال...
بالاخير ما عدت احتمل...فشلت الجوال وضغطت على الزر الاخضر...
: الو...ووو...وو..."
وافي وهو صوته منبح وقاعد يلهث:آآآه...وو...وينك؟؟...."
:آآه...هنااا...قررريبه..."
وطالعت بمهاا...اللي اشرتلي عشان نطلع بسرعه فوق...عشان ارجع لغرفتي...
هزيت راسي ولحقتها...
وافي واهو يآخذ نفس عميق: وووووووينك؟؟.."
روعتني صرخته واشرت لمهاا بخوف...
سحبت مهاا مني الجوال...: الوووو..___ايه يا خال___لااا عادي...___أنا اللي فتحتلها الباب___لا تصرخ علي____طيب..اهي جايه تستان.._____ان شاء الله___ولا يهمك"
طالعت بمهاا وهي تقفل وعيونها مليانه دموع...وشفايفها ترتجف...
: مهاا حبيبتي..وش فيك؟؟.."
صرخت فيني وهي تبكي: يقول انه مايبي يشوف وجهي ولا يبيني ادخل باللي ما يخصني.."
وركضت تطلع الدرج...لحقتها وانا حاسه ان قلبي بيوقف...طالعت بالاماكن من حولي... ومالحقت مهاا...رحت لمجلس الحريم بسرعه..ابي اهرب من مواجهة وافي..خلني ااجلها ليما اقدر...
بس يا فرحه ماتمت...حسيت بايدي شوي وتنكسر...كانت يد وافي قابضة علي لدرجة اني حسيت ان لحمي بيتقطع من قوة مسكته...كنت راح اصرخ بوجهه..بس خفت يوم شفت شكله...سحبني معاه لغرفتنا اللي كانت قريبة من البدروم...
دخلني اغرفة وسكر الباب...انهار على الكنبة جالس..وقام يتحسس جيبه بتعب...يدور عن سيجارة...
طلع سيجارة..اخيرا وحيده يتيمة مثلي..لقاها بجيبه....ولعها بارتباك وايده ترتجف...
وافي واهو يطالعني وانا ماسكه التي شيرت بايدي: حق مين؟؟.."
طالعت بالتي شيرت القديم وضميته بقوة لصدري: حق ولد صيته..."
قطب حواجبه: وليش معك؟؟.."
: لللل..لأني اخذته منهاا..عش..عاشن اعطيــه...الشغالات"
وافي وهو يفرك راسه بعصبية: صرخت على مهااا..انت السبب"
: بكت بسببك!!..طلبت منهاا انها ما تتدخل فينا؟؟...ليش يا وافي؟؟.."
وافي بعصبية: مايحقلها تفتح لك الباب بدون ما تقولي؟؟.."
ووقف ورمى السيجارة وفركها بقوة برجله...حسيت بالعطف عليها..مسكينه..ماتت..تفتت .. انتهت...
وافي وهو يحط يدينه على الجدار اللي وراي ومحاصرني بشكل مخيف!!: توقعتك هربت..."
:................
غمض عيونه بقوة: حسبت..ان..احد من العمال آذاك!!..
:...........
وافي وهو يفتح عيونه الحمر وينتفض:كنت راح اقتلهم...عارفة وش يعني اقتلهم؟؟..يعني انهي حياتهم بكل بساطه...
: واااااااااافي...اهىء اهييييييء..
حطيت ايدي على صدره...
قال لي وهو متعذب ويضحك في نفس الوقت: لكني تذكرت..اي حقيرة خاينه بايعه لسمعتها انا تزوجت!!
صرخ فيني بقوة: آآآآآآآآآآآآآآآآه...ليش انت؟؟...ليييييييييش؟؟..ليش حبيت مساعد؟؟...ليش غررت بسلطان؟؟...ليـــــــــــــــــــــــــه؟؟.."
سحبني بقوة له...ضمني بقوة لصدره... يدينه كانت تعتصرني بقوة...حسيت انه يعذبني بهالطريقة..وقعدت ابكي مو عارفة وش اقول...كل مافيني يتنافض...انا ندمانه.. على كل شيء...وعلى اي شيء..بس ما احب ان احد يتعذب بسببي!!...انا اللي فيني كافيني..
بعدني عنه بقوة فجأة..وكأنه تذكر فجأة مين انا؟؟.. حسيت بظهري يتكسر...لأني انصفقت بالجدار بقوة...ابتعد عني ببطء..قعد يطالع بوجهي بألــــــــــــــم..
وبالاخير اطلق رصاصته الاخيرة علي: ما ابي اشوفك خارج هالغرفة..مفهوم؟؟"
حطيت ايدي على فمي ومارديت عليه واهو يطلع ويقفل الباب علي.
كنت راح اطق...من الطفش اللي فيني وانا ادور بالغرفة وماعندي غير التلفزيون اتفرج عليه..اقلب من قناة لقناة النوم مجافاني..ولاني قادره افكر غير بوافي...ردة فعل وافي.. كلام وافي...افكار وافي...احاسيس اللي تنعفس وتتغير من تشوف هالوافي؟؟..
حسيت بضيقة فضيعه وانا ارجع اضم التي شيرت بقوة لصدري...آآآآآآآآه..وش اللي قاعد يصير فيني يا رب؟؟..ياليتني ما رجعت من المستشفى ابدا...اقلها عيشة المجانين ازين من عيشة الناس العاقلة...
فصخت ملابسي..ولبست بنطلون بيجاما..ولبست التي شيرت حق وافي..مشاء الله كان واسع علي...رغم انه لطفل عمره عشر سنوات...مشاء الله على وافي...جسمه عريض من يومه..
دخلت تحت الفراش..بعد ماقفلت اللمبات...كنت اشوف البطل شلون قاعد يهين البطله بالفيلم...يضربها بقسوة بحزامه...ويجرها من شعرها للدرج...ارتجفت..على قسوة وافي...ألا اني لا يمكن اتصور انه يضربني بهالطريقة...وحتى الكف اللي صفقنياه قبل... كان كف لأنه طلع عن طوره للحظات..ولااا ما اتوقع انه راح يعيدها مرة ثانية...
شفت البطلة وهي تهج وتقفل الباب بوجه البطل...وتروح للشباك..مجنونة بتنتحر..كنت اعصابي مشدودة مع الفيلم لآخر درجة..وما انتبهت للباب اللي انفتح ولكن اللي شدني ريحة الاكل...فالتفت ادور مصدرها...كان وافي..
التقت نظراتنا...وجمدت حركتي...اتذكرت اليت شيرت اللي انا لابسته...غطيت جسمي بسرعه...
طالعني وافي...يكن مستغرب من حركتي...وحط الصينية حقت الاكل بالطاولة اللي قريبه من الكرسي...
ثواني ودخلوا خدامتين شايلين كنبة صغيرة ثانية...حطوها محل ما اشرلهم وافي..
وافي وهو يقرب مني: يله قومي كلي...!!"
:..........
وافي وهو يحط ايده على الجدار فوق راسي على طول: وش فيك؟؟...كأنك مخترعه؟؟"
:.........لااااء...
وقلت وانا اغطي نفسي اكثر: اطلع بره شوي...ابي..اغير ملابسي...
وافي وهو مستغرب: وش هوله؟؟؟..نص اللي بالبيت ناموا ماعندا البنات...
احترت وش اقوله؟؟...وبدون اي تفكير: صراااحه..لابس لبس..شوووي..خااالع..فياليتك تطلع بره...عشان اغير..!!
ابتسم بسخرية وقام يضحك وكتوفه تهتز..ورجع راسه على وره...
: قلت شيء يضحك؟؟...هاا؟؟.."
وافي وهو يجلس على الكنبة: لااا ابدااا...ماقلتي شيء يضحك...خلك منسدحه على هالسرير ليما يصبح الصبح...الصراحه مافيني اتحرك..تعبان ابي آكل وانووم!!"
انتظرت دقايق...وبطني تعورني بسبب الجوع....وكنت شوي واصيح بالاخير...قمت من على السرير..وجيت جلست على الكنبة اللي قبالته..
طبعاا ما يحتاج اقولكم شلون وجه وافي قايل وهو يطالع بالتي شيرت...حتى اللقمة اللي كان يآكلها وقفت في حلقه..وقام يكح...
صبيت له كاسة ماء وناولتها اياه..شرب الكاسه كلها...وطالعني وهو يهز راسه...
قلت وانا اعض شفتي: الغرفة حيل دافية..وانا كل ملابسي ثقيله...عشان كذاا...."
وهزيت كتوفي..ومديت ايدي اخذ الملعقة اللي قدامي...
وافي وهو يحك رقبته: هذا التي شيرت...آآه..حق ميـــن؟؟.."
ابتسمت وانا آكل بسرعه: حق ولد صيته...نظيف وصيفي...هههه..."
وافي وهو غير مقتنع: كأني شفته قبل!!...بعدين غريبه على صيته تجيب هالتي شيرت معهاا في عز البرد!!.."
ابتسمت ابتسامة بكش كبيرة: هاا حبيبي...غلطت...الشغاله وحطته...كل...ليش ما تآكل؟؟.."...
حرك الملعقة في الصحن حقه..وقام يطالعني ويرجع يطالع بصحنه...بس من غير ما يآكل..
وافي فجأة وانا قاعده آكل بسرعه: مكتوب على جبيني هندي؟؟.."
:حبيبي...ليش تقول كذاا؟؟.."
حمرت خدودي...انا قلت حبيبي..وش سالفتي؟؟..حسيت بحرارة فضيعه تزحف باوصال جسمي...بلعت ريقي كذا مرة...
وافي وهو يبتسم: وش قلت؟؟.."
طالعته بتردد..وهزيت راسي بمعنى ماقلت شيء..وحسيت نفسي انسدت عن الاكل..قمت ببطء عن الكنبة...وكان لازم امر من قدام وافي عشان اروح السرير...مسكني وافي بقوة من يدي...شهقت بقوة..وسحبت ايدي منه...ما اعرف ليش ارتبكت مرة..
وافي وهو يمد بوزه شوي: لايق عليك..."
طالعته للحظات مو فاهمه وش يقصد...وحمرت خدودي يوم فهمت انه يقصد التي شيرت ...
وافي وهو يسرح بزمان مضى: كان واسع علي كثير....اذكر اني قعدت زعلان يومين يوم عيا ابوي يشتريه... كنت ابيه بالذات...اصحابي ضحكوا علي وقالوا لي ان يوسف الثنيان موقع عليه..."
ابتسم بحزن وهو يكمل: يوم مااات ابوي....الله يرحمه ويغفر له... حلفت اني ماعاد البسه ابد...ورميته بالصندوق ولا عااد فتحت الصندوق مرة ثانية.."
ارتعش صوته شوي: كنت اعتقد انه مات بسببي...."
دمعت عيوني...وحطيت ايدي على فمي...ولاحظ وافي اهتزاز كتوفي...والدمعات اللي تساقطت على يده..وقف..وحسيت انه ضاق صدره... وشال صينية الاكل وراح...بينما انا قفلت التلفزيون...ورحت تمددت على السرير وغطيت نفسي وحاولت انوم...
ماقدرت انوم..الوقت متأخر ووافي مارجع لي مرة ثانية...رحت لبستلي جاكيت دافي وشبشب وطلعت من باب الغرفة الخارجي...
سمعت نباح كلب...فارتجفت بقوة...وحاولت اني اكون قوية وامشي اكثر..بس ماقدرت فجلست عند الباب ارتجف بسبب البرد..وادق على وافي اللي ماكان يرد علي!!
غفيت بمكاني للحظات..بس قمت على هزة يد وافي...فتحت عيوني على وسعهم..ودخل الغرفة وسفهني..
تركني بمكاني لوحدي..غرقت عيوني دموع...ورفعت راسي اناظر للسما...اناجي ربي بصمت.. حاسه بضعف وخوف من كل شيء..واولهم وافي...هالغامض الغريب...اللي دوم يتركني وحيده..ما ادري متى بيحس فيني؟؟...انا مابيه يحس فيني..انا ابيه يحن علي.. كافي يتم..ما استاهل يتم اكثر...
دخلت الغرفة بعد مامسحت دموعي..شفت وافي منسدح على السرير وكان صاحي يقرا حاجه بالجوال...سكرت الباب وقفلته..
: وين انام؟؟.."
وافي بلامبالاة: شافيه مكان غير السرير...."
: وانت؟؟"
وافي: انا بنوم بعد على السرير..الصراحه جسمي متكسر...ومافيني على نومة الارض.."
انسدح على بطنه ودخل راسه تحت المخده..
ترددت بمكاني للحظات...ثمن رحت فصخت الجاكيت..وجيت تمددت على السرير انا الثانية...كنت نايمة بآخر طرف السرير..يعني اي حركة بسيطة مني واطيح على الارض ...
كنت عارفة انه ما نام..واغلب الظن انه يراقبني..وانا ماكنت قادرة انوم.. كنت زعلانه من نفسي..كنت عتبانه على حالي... ليش اركض وراه؟؟... ليش ادور رضاه؟؟...ليش انا افكر إذا هو اكل او شرب؟؟..وهو..؟؟..جاوبوني هو..وافي...القاسي عمره مافكر فيني...
اعتقد اني من الاشياء اللي لمرت على باله ازاحه مثل ما يزيح اي ذبابه تزعجه بالجو... هذا انا بحياة وافي..فاهمين مجرد ذبابة..
جاني هالسؤال: وهو...القاسي...وش مكانته بحياتك؟؟...ليش مهتمة فيه؟؟
تقلبت مرتين بملل على سريري... ما ادري...اللي اعرفه اني اكرررههههه كثير...بس اشفق عليه...يحزني.. ما احب الانسان اللي عايش بعالمه الخاص...
تردد علي سؤال ثاني مزعج..انت متأكده من كرهك له؟؟...
كان ودي اصرخ بنفسي...اكيد اكرررههههه انا اعرف مشاعري اكثر من اي احد ثاني في هالدنيا....بس هذا زوجي..عيلتي...ماعندي احد غيره...لو طلقني وين راح اروح؟؟... اروح لعمي اللي رماني مرتين...مرة بمستشفى المجانين...ومرة عند وافي؟؟..
وافي بصوت نايم:خلاااااااااص كافي تقلب على السرير..."
انفجعت ماتوقعت انه لسه صاحي...جلست وطالعت فيه..كان نايم..مغمض عيونه بنعومة.. شعره الاسود متناثر حول وجهه بخشونة..مثل نسر اسود.. ملامحه...خشمه فمه عيونه.. كله كله يجنن...مديت ايدي بتردد...كان ودي بس المس الجرح اللي بحاجبه...بس بالاخير اكتفيت اني هزيت كتوفي ورجعت نمت..
الساعه 5:30ص
تمغطت بكسل على سريري...كنت اسمع صوت الماء في الحمام...طالعت بجهة وافي.. لمستها بتردد كانت لسه دافية...قمت من على السرير...ورحت للشنطه ادور لي لبس..
طلع وافي من الحمام...وهو لابس روب الحمام..جلس قريب مني...فقام يطلع اغراضه.. اخذت لي بنطلون جينز وبلوفر ناعم احمر ريفي...وقمت دخلت الحمام...
اخذت لي شاور سريع..ابي اطلع اتمشى مع وافي..كنت متأكده ان معظم الناس نايمه في ذا الوقت وحسيتها فرصه..لا تسألوني فرصه لايش؟؟..انا نفسي ما ادري؟؟...خصوصا ان النور توه بدا يشعشع...
خلصت لبس ومشطت شعري بسرعه وطلعت من الحمام... كان وافي على وشك يطلع..
: وافي.."
التفت علي: هلاااء.."
: صباح الخير" وابتسمت بنعومة.
وافي وهو مستغرب: صباا..ح النوو..ر"
: ابي اطلع معك اتمشى...ممكن؟؟.." وناظرت فيه ببراءة متعمدتها...
هز راسه بفتور: ممــ...كن.."
حطيت عطر خفيف وروج على الطاير ولحقته على برا..
: تبي تآكل شيء؟؟.."
وافي وهو مدخل يدينه بجيوب الترينق:لاااء..مو مشتهي..تبين؟؟.."
: لاااء..."وسألت بعد لحظات: فيه حيوانات؟؟...هنا؟؟.."
وافي وهو يهز كتوفه: ايــــــه..."
سكت شوي...بعدها كمل: تبين تشوفينها؟؟.."
هزيت راسي بحماس...إذا معي وافي ما راح اخاف من الحيوانات ابدا...
رحنا جهة الحيوانات اللي بعيدة مرة...عن البيت...
اخيرا وصلنا لصندقة الحمام...
صرخت بحماس: حمااااااااااااااااااام"
ورحت فتحت الباب بدون ما افكر ودخلت جوه...
: وااااااااااااااو...شوف من كل شكل؟؟...شوف الرقاص؟؟..."
وجيت اخذت حمامه كانت منعزله بمكانه ما تمشي...يا حياتي كانت رجله مربوطة بخيط مو واضح...ويألمها كثير...
: وااااافي..." وعضيت على شفايفي..
جاا وافي وجلس جنبي على اطراف رجوله مثلي بالضبط..
: هااتي عنك.."
شرحت له وانا اتألم:شوف...رجلهااا..اوووه يا حياتي..."
اول مرة اشوف وافي يبتسم من قلبه واهو يتألمني: لااا تبكين..."
: اصلااا ماكنت راح ابكي...بسس..."وحطيت ايدي على خشمي وكنت خلاااص على وشك اصيح من شكل الحمامه المسكينه..
وافي وهو يحاول يفك الخيط بمهارة وبسرعه: هدي اعصابك ملكه.."
: خلني امسكها وانت فك الخيوط عنها..."
عطاني ياها فمسكتها بنعومة..وقعدت اداعب راسها وهي تتخبي مني وتهدل بصوتها الحلوو..
اخيراا قدر وافي يحررها من الخيوط اللي ناشبة برجلها...
: تقدر تطير؟؟.."
وافي وهو يمد يده يمسكها: تعالي نشوف..."
: خلها معي..الله يخليك.."
هز راسه موافق وطلعنا من الصندقة وقفلنا بابها...مديت ايدي للمسا ابي الحمامه تطير..وعيت تطير واستغربنا انا ووافي...
وافي بعد لحظات: هاذي ملكه...."
طالعته مستغربة وش قصده...
ضحك: مثلك...ترددين مية مرة قبل لاتسوين الشيء اللي فعلا تبينه..."
: من خااف سلم..."
وابتسمت بنعومة وانا ارجع اضم الحمامه لصدري..
: حمامتي...ملكه...بتشوف راح تطير.."
ورفعت يديني مرة ثانية للسماا...فطارت الحمامه من يدي وراحت للسما...تتبعتها بعيوني..ولحقتها...بس بالاخير وافي خلاني ارجع من جديد...
: ابي اطعمهاا....الله يخليـــــــــك..."
وافي وهو يعطيني كيس الحب: يلـــه"
ابتسمت بشكر ودخلت القفص وحطيت بيدي حب كثير ونثرته بكل مكان وخليت بعضه بايدي...فتزاحمت الحمامات على ايدي..وبالاخير بعد ماخلصت..وطلعت لوافي... لقيته واقف يدخن ويطالع بالسما ...بملكه...
تركت باب الصندقه مفتوح...فطار الحمام كله مرة وحده بشكل افواج... كان منظر روعه ...
وقفت جنب وافي نتأمل السماا بصمت...حسيت ببرد فضيع يدخل جسمي...لأن شعري مبلول..بس مع هذا ماكان ودي اتحرك من جنب وافي...جنبه يدفيني...احس تطلع منه اشعاعات حااارة... احس نفسي جنبه مثل ورقة سلطوا عليها ضوالمشس من خلال عدسه مكبره...حرارة قصوى...تشعلني...
سمعت صوت الكلب فطلعت مني آهة خوف....وما اعرف ليش تذكرت بوبي...تذكرت شلون وافي ذبحهه..تذكرت اشياء كثير..
وافي وهو يحاول يمسك ايدي عشان يهديني: لا تخاافين بعيد مرة.."
حسيت باصابعه تلامس اصابعي بس بعدت عنه بسرعه: لااااء...الصوت قريب..."
وكملت وانا ابعد عنه: انا لازم ارووح..برجع البيت...يمكن جدتك صاحيه.."
وافي وهو يوقفني ويلفني اقابل وجهه: ملكه؟؟... وش فيك؟؟...قلتلك بعيد..."
حسيت باحاسيس مجنونة وغريبة...فقلت بتمرد وكأني انتقم من وافي: لو سمحت... ابعد ايدك عني...لأنها تقرفني...روح لمرومتك.. وخليني لحالي..."
وتركته وهو واقف مصدوم بمكانه..
لقيت جدة وافي صاحيه...فرحت يمها وجلست انا وياها نتقهوى...كنت اتكلم واتظاهر اني سعيده...لكني كنت كارهة نفسي بقوة..ليش عاملت وافي بقسوة؟؟..ليش رديت له الصاع صاعين؟؟... انا عمري مافكرت ارد لحد الشيء اللي سواه فيني... حتى ريم ومساعد وكل اللي اكرههم..ماافكر آذيهم...فليش صبيت كل زعلي على وافي...
تحركت بملل وانا اغمض عيوني واسوي مساج لجبيني بسبب الصداع اللي احسه...
سمعت صوت جدة وافي عرفت ان في احد جا... فتحت عيوني ببطء...شفته.. كان واقف يطالعني ببرود...صديت عن نظراته اللي تقتلني وتطعني وتدمي قلبي... ما احب ان احد يكرهني..ما احب ان احد يحقد علي...
صبيت له فنجال قهوة....فأخذه بدون ما يطالعني وهو يسولف مع جدته بامور المزرعه.. وفهمت من كلامهم ان الجده عايشه بالمزرعه...مو بمكان ثاني...ووافي قاعد يقنعها تجي تسكن معه...
الجده: المكان ياله يكفيك انت ومرتك.."
: بالعكس يا جده..إذا ما شالك المكان انا نشيلك بعيونك.."
وافي بإصرار بدون مايطالعني: يا ميمه... الله يهداك وش ذا الحكي...انت مانتب مثقله علينا...بعدين الرياض ادفى من ذا المكان اللي كله صقيع..."
الجده: بس انا احب اشوف الخيل والابل.... ما اقدر اجلس بوسط المدينة وانحرم من هالمكان الزين..."
:طيب...ياجده نقدر نجيبك هنا كل ربوع وخميس وجمعه..."
الجده وهي تشرب فنجالها وتمده لي: لااااء..ليش اضيق عليكم والمكان هنا واسع..."
وافي بزعل: وإذا لا قدر الله مرضتي...احتجت لينا.."
الجده وهي تحسم الكلام: الاعماار بيد الله..."
ناولتها فنجال القهوة...ولاحظت فنجال وافي المليان مثل ما هو...ارتفعت نظراتي ببطء..وشفت عيونه كيف مخيفه... كان يطالعني وكأن وده يقتلني...ماقدرت اواجه نظراته اكثر فتركت القهوة وقمت بروح اي مكان بس موب عنده...
مر الوقت سريع الصباح..وكنت انا مع مهاا وابتسام وحنان طول الوقت...جالسين عند النخيل نسولف ونشرب شاهي...وفي قمة الوناسه....شوي يوم طلعت مهاا من شنطتها البوم صور..
مهاا: اسمحي لي يا ملكه..ما قدرت اوريك الصور من قبل لأني نسيتهم..."
قطبت جبيني اي صور؟؟!!...
شفت الالبوم على شكل قلب...فتحته بتردد..وطالعت بالصور حقت زواجي...
كانت مرتبة على شكل قصة....فيها صور لي وانا صغيرة مرة..وصور لوافي.. وبعدها صورنا بالثانوي...واخيرا صور الزواج...
كنت اطالع بالصور وكأني قاعده اطالع بصور زوجين ما اعرفهم...الصور او يمكن مهارة المصورة بالاصح....خلت الصور تجي بشكل حميم..حمار خدودي...نظرات وافي...لمعة عيونا...اشياء كثيرة...
حنان برومانسية: يارب اتزوج واحد مثل خالي وافي...يا ناس كل ملح ورمانسية الدنيا مجتمعة فيه"
مهاا: ياااااااااه...صوركم يا ملكه تجنن...مو مثل صور العرسان الثانين....فيها شجن.. حب.. شوق..رومانسية"
ابتسام وهي تآخذ صورة وافي: يا ملحه رجلك يا ملكه....مشاء الله عليك..محظوظة.."
مهاا: سمي على خالي...وبعدين عيـــــــــــب...عندك رجلك وصاجتنا.."
ابتسام وهي تضحك: ههههههههه..الله يخليلي متعب..عن كل رجال الدنيا والله...رغم ان مافيه زين..."
وكملت وهي تتنهد: تصدقون بنات..الحب مايعتمد على الشكل...الحب اشياء اكبر... مشاعر...سامية مالها شغل لا بمراكز ولا بفلوس..."
وكملت وعيونها تدمع: شوفوني اناا...لاني بمركزكم الاجتماعي...ولا اهلي مثل اهاليكم.. انا عشت طفولة معذبة عند زوج ام مايرحم...عشت اسوأ ايام حياتي...ليما جا متعب وخطبني....اهلي مافكروا يرفضونه لأنه غني...وماكنت اعتقد اني راح احبه بسرعه.. كنت اشوفه منقذ.. وكنت دوم اعامله باحترام..لأني اعتبره هبة من الله لي...لكـــن..الحياه معه وضحتلي...انه لولا قدر الله صار له شيء..راح امووت...انا بعده على طول.. ودوم ادعي ربي..انه يآخذني قبله لأني ما اتحمل اني اشوفه يتألم.."
حنان بنعومة: يعني إذا تزوجت راح احب زوجي مثلك؟؟..ياااااااااااااااي.. متى اعرس؟؟"
ضحكنا كلنا على براءة حنان بس انا ضحكتي ماكانت من قلب...كلام ابتسام حسسني بنقص كبير ....خلاني اغار غصبا علي.. شوفوا الفرق بين حياتها وحياتي...اهو ماكان يعرفها مع هذا حبهاا.. اما انا يعرفني ومع هذا يكرهني..
ابتسام: اكيد ربي راح يسعدك بانسان ماكان لا على البال..ولااا على الخاطر.."
مهاا وهي تمد بوزها: وانااا؟؟...ياحظي مغصوبة على ولد عمي..اللي ما اطيق شوفته.."
ابتسام بحماس: شوفي اعظم الحب...جاا بعد كره شديد...وهالنظرية معظم الحريم بيثبتونها لك..."
مهاا وهي تناظرني: اناا مابي مثل اللي تقولين....انا ابي مثل خالي وافي وملكه.."
وكملت وهي تمسك ايدي: قصة زواجهم من اروع قصص الحب بالعالم..."
قطبت حواجبي مستغربة...حب...قصة زواج؟؟..وش مهاا قاعده تقول..وانصت لها باهتمام انتظرها تكمل0000
