[
b]بسم الله الرحمن الرحيم
و الصلاة والسلام على خير الانبياء والمرسلين
اللهم اني اكتب موضوعي خالصا لوجهك لمساعدة حبيباتي فيك اللهم فبارك فيه و اعنا على نفسنا بكثرة طاعتك
بنات اول شي السلام عليكم
بعدين قولو ماشاء الله تبارك الرحمن ولا حول ولا قوة الا بالله العلي العظيم
انا وصلت تقريبا لل35 الا كم شهر
ولا متوظفه ولا شي
و اغلب وقتي بالبيت
بس الحمد لله احس اني اسعد انسانه بتعرفون ليش؟؟
الرضا
ايه راضيه و مقتنعه و ابذل الاسباب و بكل روحه اتكشخ و حاطه اسمي و اسم اخواني واختي عند كذا خطابه و يجون خطاب بس فيهم عيوب قوية و للحين النصيب ما اذن و لما اطلع احط احتمال اني انخطب بس ما ابرمج روحي اني اتكشخ عشان انخطب لا عشان نفسي يعني فيه بنات اياسو و قاطعو حتى الطلعات قالو شالفايده لا ننخطب ولا شي؟؟؟؟
بس سر سعادتي بختصرها باشياء
1- مبرمجه عقلي مو كل من تزوجت انسعدت و هذي المحاكم شاهده على المطلقات و المعلقات و الي ماذينهم ازواجهم و بس يتمنون النحشه منهم
2- اول ما يقول الله اكبر اترك كل شي و اصلي ماشاء الله حتى احيانا اتوضا قبل الوقت و اتعطر بالصلاة لاني بقابل ربي الكريم الي ادري فيه يحبني و خاش لي خوش زوج صالح و فيه كل المواصفات الي ابيها و غصبن عليه يجي لانه مكتوب لي
كلمة الشيخ الشعرواي الله يرحمه اثرت فيني لما قال الله اكبر من اي شي دنيوي يعني حتى لو انا بنص مسلسلي المفضل اقحص ههه
3- الصدقه لو بريال للعمال بالعثيم و غيره
4- اقضي وقت فراغي بالقراءة و النت و كتابة المواضيع الهادفه و العبادات و بطاعة الوالدين و مساعدتهم
5- اساعد بنات بالنت عندهم مشاكل بما افاض الله علي من العلم البسيط و من معلوماتي الي استقيها من قراءاتي المتواضعه
مسكت حالتين الاولى الحمد لله طابت و عندها رهاب اجتماعي
و الثانية للحين مستمره فيها و الله يشافيها تحس انها ما تحب زوجها و تفكر من جد تطلق و انه مو رومانسي فقاعده ابرمجها شلون تفكر صح و الله كريم
6- تعلمت احب روحي لاني اكتشفت قبل وش كثر انا غبيه لما احاتي امور بزياده و اذبح روحي من التفكير هذا ليش سوا كذا هذي ليش سوت كذا فعلا تعلمت احب روحي لان القلق ماجابلي الا الشيب
7- قمت اطنش من قلب و الهمني الله تعالى بنظرية او قانون سلة المهملات و ان شاء الله افرد له موضوع لحاله
طبعا التطنيش من قلب ما جا بالساهل لا بعد محاولات و تمرينات لنفسي و اقناعي لذاتي ان من احد اسرار سعادتي و راحتي التطنيش و مع الدعاء ان الله تعالى يخليني اطنش من قلب الامور الي تستحق التنطيش لقيت ربي الحمد لله استجاب لي
8- حاطه ببالي خطا مقولة نصفي الثاني يعني الله تعالى خلقنا باحسن تقويم ماله داعي اربط سعادتي بالزواج او لازم احد يجي يكملني لان خلقتي من الله كامله و هذي قالها الله تعالى بمعنى الايه و لقد خلقنا الانسان باحسن تقويم يعني شيلو من بالكم اني نص و انطر نصي الثاني
و هذي شفتها بحلقة باوبرا و ناقشتها و فعلا اقنعتني
يا بنات احنا مو محتاجين لزوج عشان نحس بالسعاده تراها بيدنا بس نفهما صح و الله بنعيش بسعاده
و الدليل ان السعاده مو مرتبطه بالزواج ان فيه متزوجات و تعيسات
و فيه مطلقات و بنات سعيدات و الله صديقة اختي مطلقه و من عايله كبيره باحد سفراتها شرت 40 دراعه عشان كشختها ما قالت ما اصير سعيده الا بالزواج جربت الزواج و شافت التعاسه منه يعني شتسوي تقطع حالها من الهم عشان تتزوج مره ثانية و بعدين تصير سعيده؟
نعم السعاده بتزيد اذا الواحده تزوجت من الصالح الي يحبها و يعزها بس بدونه ممكنه و مثل ما قلت لكم هي تزيد معاه بس مو مرهونه فيه
ومو كل صالح صالح
فيه صالح و دجاجة امه او اخته ماله شور ولا راي اخته او امه تمشيه
فلما تدعون ادعو بالزوج الصالح والرجل القوي الي ما ياثر فيه الا الخوف من الله و يعطيني كامل حقوقي
9- احاول بقدر المستطاع استمتع بحياتي باكلي بلبسي بنومي يعني اتلذذ
10- سلامة النية والصدر انا ما امدح روحي بس من باب واما بنعمة ربك فحدث قاعده اقولكم شلون الي نيته سليمه يعيش سعيد
قسما عظما قريبات لي تزوجو و هم اصغر مني بكثير اطير من الفرحه لما احد يبشرني بالخبر و ادعو لهم و ادعي لنفسي و اقول الفال لي و الي عطاهم بيعطيني اكثر و احضر عرسهم و ارقص و افلها
يعني فيه بنات حسودات يحترون و يبين على وجيهم؟؟؟ يعني ليه الحسد انتي لك نصيب و بتاخذينه بعد
و ما انكر اني على نياتي مره و اني اكون ساذجه احيانا بس ايجابيات النية الزينة اكثر من سلبياتها بكثير
11- شايله من بالي تماما العقده اني للحين ما تزوجت فلما اقعد بين الحريم افلها و اضحك يعني امنع عقلي انه يحس بالنقص و اذا حسيت للحظه غصبا عني بالنقص او الاحراج اني للحين ما تزوجت ارفع راسي و ابتسم و اقول داخلي الحمد لله بقعد نفس هالقعده و انا متزوجه بعون الله
لان الشعور اختيار ذاتي و هذا اسم كتاب بجرير
يعني عبي عقلك بافكار ايجابية تحسين احاسيس حلوه والعكس صحيح
واحاول بيني و بين نفسي ادور اجابه حلوه و دبلوماسية اذا احد تليقف و سالني ليش للحين ما تزوجتي يعني ارفض اكون دفشة و قليلة ادب بردي مثل مالك شغل اهتمي بحالك هذا اسلوب العوبه الي ما عندها اسلوب مع الناس
لان حتى الملاقيف المفروض نلتزم بالادب معاهم
نعم للحين ما تجرأ احد و سالني بس حاطه الاحتمال ببالي و ببالي كذا اجابه
ابتسم و اضحك بعد و اقول ولا يهمك غلاتي تراه قريب و انا صادقه عند ربي كل يوم يقرب نصيبي اكثر
او و الله يتقدم لي كثير بس للحين النصيب مو مهم متى تزوج المهم منو اختار و هذا الصدق لو على الزواج كان تزوجنا من زمان بس بنات الحمايل الي اهلهم اتعبو عليهم ما يعطون روحهم لكل من يطق الباب احنا درر يا نروح للصالح ولا فلا
يعني يشهد الله علي تقدم لي كثير الي غني مره و الي مدير و راتبه 25 الف بس امه متحكمه فيه و مطلقته من زوجته وزوجته اخذت شايب بس عشان يحللها لزوجها والي يشرب والي ما يصلي والي و الي
يعني عيوب قوية مقدر اتساهل فيها
ولا عندي شروط ولا شي المهم صالح و اخلاقه طيبه فقط و للحين صاحب هالمواصفات ما تقدم لي
12- دايما احس اني احسن البنات واني طالعه الاولى بكل شي بالترتيب والتنظيم و الشياكه و السناعه و الثقافه احس هالشي بس ما اقوله و اجرح غيري و دايما عندي قناعه لاتتزلزل ان مبخوت من بياخذني و امه داعية له بليلة القدر
و بس خل اتزوج و اسويها موال لزوجي و اقوله طوابير تمنوني و قلت لا احمد ربك وافقت عليك ترا كسرت خاطري و قلت لابوي ايه ولا انا اخب عليك كثير هههه و هذا الصدق انا اخب على أي رجال بالارض و هذي و الله قناعتي وشوفتي حق روحي مو من باب الكبر من باب معرفة النفس
ترا الرجال يحب الواثقه من نفسها والي تتعزز و تتغلا
13- مسوية مجلدات بلاب توبي شي للطبخ و للاناقه حافظه موديلات ان شاء الله اذا الله كتب بخيطها عارفين الجاهز مافيه كل شي و شي فيه مواضيع الزوجه الذكية طبعا من كتابات البنات بارك الله فيهم اقرى الموضوع و اذا اعجبني احفظه يعني دايما اتعلم طبخة جديده مهارات جديده
14- مهتمه بجمالي و شبابي مو للهوس بس لشعري حنه و كثيره و سدر و حمامات زيوت و اكلي صحي و اذا زدت كم كيلو اسوي ريجيم معقول
15- زبونه دائمه لجرير يعني احاول اثقف روحي دايما
فعلا الكتاب روحي كثير اشياء تتعدل بنفسي تلقائيا من القراءة و احس بالرقي لما امسك الكتاب ما احس اني تافهه او وجودي عدم اعبي عقلي بالمعلومات الي بكره بفيد فيها غيري بعد و بتعيني شلون اكون ام و زوجه ذكية و صالحه
16- فيني كبرياء و هذا شي محمود المسلم لازم يكون عنده كبرياء مو كبر لان الكبرياء تمنع الواحد يسوي اشياء غلط
يعني مثلا لما امشي احس اني ملكه رافعه كتوفي و راسي و احس اني احسن واحده حتى عمر بن الخطاب رضي الله عنه مدح ان الحرمه تكون فيها الخصله هذي عشان لاتماشي حريم السوء
17- لازم ادلل روحي و اثقفها و اطالع البرامج الهادفه بالتلفزيون
18- ومن اقوى الاسباب اني احيانا تجي هبات علي اتزم بسورة البقره و الاستغفار
الاستغفار عجيب و الله اول كنت احاتي تاخر زواجي نوعا ما بس والله مع الاستغفار ولا ذرة هم اقولكم ولا ذرة هم ماشاء الله تبارك الرحمن
19- المنطق انه ما فيه بنت ماجربت الزواج بحياتها على الاقل مره واحده شوفو حواليكم فيه بنت ما تزوجت طول عمرها؟
فكل حي بياخذ نصيبه
و حاليا استمر برقية العين القصيره بس للاسف احيانا اهمل روحي ثم ارجع لها الله يعيني على نفسي
20- الدعاء و تحري اوقات الاجابه بالاذان و بالمطر و بثلث الليل
21- حاطه قناعه براسي اهم شي بالدنيا العافيه والستر و الطاعه و برالوالدين و غيرهم زيادات
22- اي مشكله اصغرها و تصغر غصبن عنها و اذا تدخلي شر اطلع من المكان فورا لاني عارفه عيوبي
23- المحافظه على اذكار الصباح و المساء فعلا تمنع عني شر كثير
24- و ختامها مسك و اعتقد هذا اقوى الاسباب حسن الظن بالله اني واثقه ان السيل كلما تاخر كبر يعني كلما تاخر نصيبي كبر حظي وواثقه راح اخذ واحد تتمناه كل حرمه و هذا الشي اشوفه بعض ال بنات تزوجو صغار ولا توفقو تاذو و بنات تاخرو بس توفقو
وبس سوري للي يحبون المختصر لاني احب التفاصيل و طبعا هذا كله من فضل ربي فانا بلاحول ولا قوة الا منه سبحانه و الفال لكل واحده شايله هم الزواج او الوظيفه او أي هم
مره شايب نصحني قالي احيانا الشي اذا فكرنا فيه كثير ما يجي بس نتركه يجي
يعني اسعو للزواج من الالتزام بسورة البقره و غيرها بس لاتعلقون حياتكم على هالامر فلوها ترا و الله هالايام من اعماركم و بتندمون اذا قضيتوها بهم و تعاسه
مافيش احلا من العزوبيه لاحقين على هم العيال و الطبخ و البيت و ابو الشباب و الله لاحقين
نقطه مهمه: اكيد الانسان مهما حرص يعيش سعيد تجي لحظات او مواقف يحزن فيها بس يتدارك روحه و يرجعها للوضع الطبيعي و تمنياتي للكل بالحياة السعيده و احلا عرسان لاحلا بنات:ggdw:
