فاشله بتدريس ولدي

[غلاي عزوزي]

السلام عليكم

انا وريلي فاشلين بتدريس ولدي بجر وماعندنا غيره

10 دقايق او ربع ساعه ملينا منه واخرتها طق وبجي

شسوي الياهل تعقد منا توه بأولي ابتدائي المشكله انه ذكي اسم الله عليه بس تركيز بالصف ماكو ولابالبيت بأييب درجات زفت عزكم الله حتي الاملاء مايركز الابله اشتبي مع انه يعرف الاجابة

اعترف اني مو طويلة بال ولا اقدر امسك اعصابي


شالحل

وينج ام عبود حلم الطفوله

الامهات الشاطرات
تهقون ادخله نادي تقويه والا اييبله مدرسة اتحمله شوي واحسن ​

مني

 

[ريماا]

رد : فاشله بتدريس ولدي

من راى اشترى راااحتج وجيبيلة مدرسة وتكونين عاارفة انة بالها وسيع وعندها قدرة عالتأسيس عدل
لاتعتمدين على المعااهد اغلبها فااشلة

 

[غزالي وبس@@]

الله يعينج انا احس انه بيكون عندي نفس المعاناه مع ولدي ماعرف ادرس جيبي له مدرسه بالبيت احسن

 

[om al ghaleen]

لا حبيبتي شنو طق ؟؟ اصلا اذا طقيتوا تعقدونه
ولا حتي تحطوله مدرس خصوصي لانه بالصف الاول !! باجر لا راح ثانيه وثالثه
راح يتعود عليهمٌ وترا منهج اولى سهل مايحتاج تعقدينه
امشي معاه درس بدرس واهم 3 مواد الرياضيات والعربي والانجليزي
اشتري له قصص و كلمات وسبوره وشجعيه
ميخالف طولي بالج معاه وصدقيني راح ترتاحين انتي


\\

 

[شووكولاته]

حبيبتي مالج الا الحلبيه دخليه انجلش ورياضيات وعربي

انا نفسج ماحب ادرس مرا اهدي اعصابي ومرا ازف

الله يرحم ايامنا نكتب الواجب وبس

الحين تدريس اليهال صعب

 

[عشق]

رد : فاشله بتدريس ولدي

انا حدي عصبيه بس تعلمت مع بنتي طولت البال
وخاصه في الدراسه
وممنووووووووووع الطق
بس التهديد مسموح فيه
ههههههههههه

اذا ما تقدرين يبي لج مدرسه

خلي دراسته وناسه يعني زيني دفاتره
حلي معاه واجباته
خلصي وديه الجمعيه اشتري له اي شي يبيه
روحي بو 100 فلس واشتري له بو دينارين او ثلاث دنانير كل شي
وحطيهم بجيس او علبه
وكل ما خلص من دراسته طلعي الجيس وعطيه شي

 

[غلاي غير]

يووووووووووووه معاناتي ماعرف شدرس وشخلي المناهج صعبه ووايده

القرآن صاير صعب اياته يالله الياهل يستوعبها اقصد 2 ابتدائي والانجليزي ما ادري شلون يدرسهم
والاملاء ما ادري شلون والعربي مخربطيني يدخلون بشي وينطون على شي ثاني

الرياضيات يطلبون من الياهل مساله كتابيه انه يقراها ويحله وشنو المطلون منها ياربي ما ادري مدارسكم جذي والا بس احنا معقدينها

 

[شقرديه كيوت]

رد : فاشله بتدريس ولدي

المناهج الجديده فااااااشله حرام عليهم كرهوا عيالنا بالدراسه وجابوا الاعصاب للامهات

 

[smilmoon]

رد : فاشله بتدريس ولدي

صراحه التدريس يبيله طولت بال ،وخصوصا اذا ما تعرفين التدريس بتحسين انج ضايعه اول شي بس بعدين راح تعرفين لولدج وشلون توصليله المعلومة ،فلا تحطين فبالج انج تجيبيله مدرسه او معهد خصةصا انه اولى .
وقبل لاتبدين معاه الدرس قولي لنفسج انج مراح تعصبين عليه وانج هاديه ،وتذكري برائته واهو نايم صدقيني مراح طقينه

 

[قلبي القرآن]

رد : فاشله بتدريس ولدي

حرام عليج لا طقينه لأنه راح يكره الدراسه
ابتدي معاه شوي شوي طولي بالج عليه
لأن اولى تأسيس بلشي حبه حبه لأن اذا أسستوه بأولى بترتاحون بعدين
لا تعصبي عليه خلي الدراسه وناسه له شجعيه وانا ما أيد الدروس الخصوصيه
ولا المعاهد اسهل طريقه خلي عقلج قد عقله عشان تفهمون بعض

 

[غلاي عزوزي]

تسلمون خواتي
وفعلا قمت اتعوذ من ابليس
واحببه بالدراسه
انا لعصب لاني تعبت عليه سنه اسسته قبل الابتدائي
من دش المدرسه تدهور
والابلات يبون الولد فلته مافيهم صبر وسريعين بالشرح وعمره مايابلي الاملاء درجه كامله
هذا وانا مأسسته بالحلبيه وبالبيت

 

[حلم الطفولة]

حبيبتي غلاي طولي بالج عليه وكل ماعصبتي تذكري إنه أمانه من الله مو مالج مال رب العالمين أمانه وعطانا إياها وأي لحظه يرد يستلمها وياخذها (( اسم الله على ولدج الله يخليه ويحفظه ويطول بعمره )),,

الي تسوينه إن طولي بالج عليه ،، فهم أوكي مافهم مو لازم .. الأبله خل تعصب ماردهم ينجحونه وماكو سقوط
كثري من الرسوم المتحركه التعليميه اللي يبيعونها بالفيديوات
اشتري له بطاقات من المكتبه وهالسوالف .. ولازم تشترين له لحين الحين ياللله قومي شناطره ؟؟ << لازم تشترين كتب جمعية المعلمين من المكتبه وايد يفيدون
وهالأشياء بعد راح تفيدج وايد :
1- سويله جدول بأيام الأسبوع وكل يوم يخلص واجبه ويركز حطي بالخانه نجمه وقولي له إذا كملت طول الأسبوع نجوم كل يوم بنهاية الأسبوع لك هديه .. أو لك مفاجاه .. أو بوديك ألعاب وملاهي

2- هالفكره تهبل والله سويتها لبناتي يوم صغار .. بس ماكان عن الدراسه كان عن أمور أخرى : خليه كل ما ركز معاج يحصل على فلوس (( انتي قصصي أوراق وكتبي عليهم نقود دولة ماما )) وانتي تكونين شاريه معاه شغلات و بعد ضيفي شغلات مفاجأه .. وحطيهم بأي صندوق كبير عندج )) كل مايمع مبلغ يشتري فيهم منج من الصندوق

3- دام هو ماله خلق يركز : أهم شي لاتبدين معاه أول مايرجع .. عطيه مجال يتغدى ويطلع طاقته ونشاطه ويلعب ساعه . بعدين ابتدي معاه .. وحطي ساعه كبيره جدامه .. فهميه إن بتقسمين الوقت .. لما يوصل عقرب الساعه الكبير هنيه راح ناخذ بريك استراحه خمس دقايق ..
وخلي الدراسه ماتطول عن ربع ساعه أو ثلث ساعه .. وبعدها خمس دقايق راحه ..

ان شالله أكون نفعتج حبيبتي
دعائج لي بظهر الغيب برفع إيدج لله راح يكون أحلى شكر احصل عليه

 

[قلب عشتار]

الله يعينك ويعينى نفس الحاله

 

[q8tyah]

حبيبتى هذا من الدلع يبيله مدرسين وريحى مخج عالاقل المدرس يعرف يوصل المعلومه بطريقه العاب او اغنيه ويحببه بالدراسه

اما احنا ليه درسنا الياهل ندرسه بجد وصراخ واعصابنا مشدوده

 

[غلاي عزوزي]

مشكورين حبايبي
والله الوحده شتلحق علي شنو والا شنو

وام عبود جربت معاه العاب وتسليه بالتدريس
يوم يومين وامل منه والله الوقت يركض ومخج يتشتت بينهم مع انه عندي اثنين اسم الله عليهم والثانيه صغيره يعني هذا بجري وهمن ماكو وقت



الام تكافح وتناضل وتحارب عشان هالاسره والبيت والعيال ويالله تلحق علي شي بسيط
الله يكون بالعون

 

[مدرسة84]

الله يعينج حاسه فيج

عندي أسئلة ياريت تجاويني عليهم وتبعثينهم على الخاص لاني ما ارد على المواضيع اللي ادخل عليها بعدين.

1- ولدج اسم الله عليه عنده مشكلك عدم التركيز بس في مواد معينه ولا كل المواد
بمعنى المواد الادبية والعلمية اهم تحسين انه مايركز فيهم.

2- عرفت من كلامج انج مأسسته قبل المدرسة هل كان مستواه تمام ولما دخل المدرسة صار معاه ارتباك .

3- تحسينه يحب المدرسة ولا نافر بس من المواد.وهل عنده اصدقاء . وهل ولدج بطبعة خجول .او يغار.

ويعطيج العافية.

 

[تباريك]

حلم الطفوله كفيتي ووفيتي

حلوه افكارج

 

[om.7madiiin]

رد : فاشله بتدريس ولدي

الله يعيييني انا شبسوي >>> 2 شكلي بذبّحهم لوول
الله يعييينج يا قلبي

 

[حلم الطفولة]

حلم الطفوله كفيتي ووفيتي

حلوه افكارج

تسـلمين

 

[بنت العمدة]

رد : فاشله بتدريس ولدي

الله يعينك نفس المعاناة واحد مافي باله الا الكورة ونادي القادسية والثاني متى اصير ضابط ويحطولي نجمة وتاج ويعطوني دورية شرطة
اه اه اه اه اه
حلم الطفولة ماقصرتي افكار حلوة