غريب حكي الناس مـا عـاد ينطـاق
غصب(ن) يجيني منه لو مـا بغيتـه
ناس(ن) تبث حلوجهم جمـر حـراق
ودايم على قـول الحكـي مستميتـه
قالوا علامك يا بدر ما انـت عشـاق
وبيت الغـزل مـا قـط مـره بنيتـه
غافل وقلبـك بالقفـل مغلـق اغـلاق
ودرب المحبه يـا بـدر مـا مشيتـه
قالـوا ونـا باقـول والقـول ميثـاق
والصدق في قـول الحقايـق هويتـه
الكل من كـاس الهـوى جـرّب وذاق
ولـو انبـش قلـوب الاوادم لقيـتـه
لكن انا ما اعشق طويـلات الاعنـاق
الفاتنـات اهـل العيـون المميـتـه
اللي لهن صوله وجولـه بالاسـواق
خيالهـن لا مـر قـدمـي وطيـتـه
عشقي ترى الاخلاق .. يا زين الاخلاق
والدين يـوم انـي عشقـت انتقيتـه
وحب النبي في قلبـي زهـور واوراق
نبـت(ن) نمـا وبـدم قلبـي سقيتـه
ورضا الابو والام يجلـب لـي ارزاق
وربي ليـا زعلـت احدهـم عصيتـه
ما قولهـا قصـدي مـراءات ونفـاق
الله عليـم وعـارف اللـي نويـتـه
واحب خـوة رجـل للطيـب سبـاق
رجل(ن) تنومـس فزعتـه لا نخيتـه
رفيق وقـت الضيـق للقلـب تريـاق
اللي ما ينسانـي لـو انـي نسيتـه
هذا هو العشق الـذي فيـه الاوفـاق
وعشق البني ان جـا بقلبـي محيتـه
حيث ان عشق اليوم كـذب وتلفـاق
والقلب عن عشـق المفاسـد نهيتـه
العشق راح اللي مثل نـور الاشـراق
قفّـى زمانـه وانطفـى نـور ليتـه
من قبل كان عهـود وسلـوم واذواق
لـو ينشـرى عـزالله انـي شريتـه
صافي وفيه الصدق منبعـه الاعمـاق
عشق(ن) قضى عمره وعاني رثيتـه
ومن ثم صار العشق توزيـع الاوراق
رسايل(ن) فيهـا حـروف(ن) مقيتـه
فيها رقم عاشـق تعـذّب بالاحـراق
ومكالمـاتـه دوم حــزة مبـيـتـه
واليوم تِرسـل بالبلوتـوث الاشـواق
وضـع(ن) يكدّرنـي لربـي شكيتـه
عشق(ن) سخيف ووجهته يم الاغراق
يغرق ببحر(ن) فيـه الاخـلاق ميتـه
ما يقبلـه يـا كـود فاسـد وبـواق
والفاسـد البـواق مـهـدوم بيـتـه
واللي ابتعد عنّه لـه الخيـر ينسـاق
يصف مـع صـف الرجـال البخيتـه
تمت وصلوا عـد مـا نـاض بـراق
على الـذي بيـن البشـر ذاع صيتـه
