عندي انذارين ولازم اخذ As ومعنواياتي وايد نازله

[السنافر]

السلام عليكم بنات
انا ورفيجتي نزلنا انذار ثاني وانا توني اكتشف هالشي امس
معنوياتي وايد نازله مع ان الدوام عقب باجر ووايد خايفه اني ما اقدر اشيل الانذارات
بليز قولولي شلون لازم ادرس نصحوني واالله حدي متحبطه وهي حالتها كلش ماتسر تقول بروح طبيب نفسي حايشها اكتئاب :eh_s(2):
ووايد شفت بنات نفسنا بالمنتدى عندهم انذارات حبيت احط هالموضوع والنصايح اللي بتحطونهم فيه حق الكل على شان يستفيدون بعد وحتى اللي بيرفعون معدلاتهم
وانشالله تكون في ميزان حسناتكم

 

[توته حتوته]

اولا ليش الاحباط ؟

ثانياا كل شي يعتمد عليكم

بيدكم ترفعون معدلاتكم وبيدكم اتمون على هالحال

لا طبيب نفسي ولاشي .. والله نصيحه درسو اول باول وافهمو الشرح

بالمحاضرات عدل .. ولا تفوتون ولا محاضره لان كل محاضره تعتمد عاللي قبلها


والله بيدكم هالشي


انتي ورفيجتج انصحكم بيوتيوب فيه محاضرات عن التفوق الدراسي

كتبي بس : التفوق الدراسي يوسف الخاطر

واهو دكتور مسوي محاضره عن التفوق ولانه طويل في ١٣ بارت له

والله والله نصيحه تابعوه كله

راح يكون الصوت شوي لج عليه بسبب التصوير ولاتملين من المقدمه


راح تتعلمين شنو تسوين بالضبط ويعطيج الخطوات عن شنو تسوين

اثناء تواجدج بالمحاضره

ووقت المحاضره

ووقت الامتحان


نصيحه لله تابعوه للاخر


والله يوفقكم يارب ​

 

[لعنبآك دهورتني!]

بصرااااحه تووته ماادري شنوو اقوولج

جد استفدت من هالمقااطع وان شاء الله بطبقه من اليووم وراايح

وجزااج الله الف خييير وفي ميزاان حسناااتج

 

[ѕαrαн]

آب :*

الله يوفقج ويوفق الجميع يآرب

 

[KelyAmanii]

شوفي حبيبتي ..

هذي ثاني سنه لي ..

معروف انذار المعدل يكون بعد نهايه كل ثاني كورس !

وكان عندي انذار معدل ..

تبين ترفعين معدلج ؟ وتشيلين الانذار ..؟!

جيبي اقل شي b


مهما كانت المواد اللي ماخذتها دسمه !

انا كنت ماخذه ( جماليات + علم نفس + حضاره + اجتماع )

وفيهم رفعت معدلي كلهم ( بــي ) .. الا ماده ( ايــه ) ..

والحمدلله ارتفع ..

ضغطي على نفسج شوي ودرسي

وفكري باجر الله لا يقوله لا صار عندج انذار ثالث ؟!
بعده فصل .. ومستقبلج خلاص ؟

بينج وبين نفسج فكري بهذا كله ..
وصدقيني بيصير لج دافع قوي وتدرسين عدل

عسى ربي يوفقج حياتي ويروح عنج الانذارات ..

:**

 

[اسيل الصمت]

الله يسسهل عليج حبيبتي

 

[غ ـُــטּـج ..๓}]

.*






آخذي مؤآد آختيآريه و لآ تغيبين آبببد و يرتفع إنشآلله =)
موفقه :*

 

[al_sheikha]

انااا بعد عندي انذار وهمن لازم ارفع معدلي :eh_s(2):

بس اناا سامعه ان اللي عندها انذار او انذارين ورفعت معدلهاا ينشال الانذار :bbbiu:

 

[اخت خالتهم]

حبيبتـي ..
الـ a و الـ b
سهليـن اذا قعدتـي جـدام هذي نقطـة
و النقطـة الثـانية تشاركيـن مع الدكـتور
و النقطـه الثـالثـة سئليـه عن أي سـؤال بالمكتـب " اذا الدكـتور محتـرم طبعـا روحيلـه "
و وريـه انج حييييل مهتمـه و الأهـم خل يحفـظ اسمـج
و بالمدتيرم درسـي قبلـه بيـوميـن أو ثـلاث
لخصـي بإسلـوبج و فهمـي
لا تخليـن شـي
والشي اللي مو حـابة تحطيـنه بورقـة التلخيـص بس حددي عليـه بالكتاب عشاان يركـز بمخـج

و دايمـا سوي كل شي عليـه بوونس
و اخر شي لما تطلع درجتج اذا مو عاجبتج روحي حق الدكتـور كلميـه و وريه انج مصدومه
و قوليله عن ظـروفج



و الاهم من كل هذا
" حسـي إنـج شااااااااااااااااطـره "

والله يوفقـج يـارب

 

[السنافر]

مشكورييين وايد وايد استفدت من ملاحظاتكم
وتوته يعطييييج الف عافيه على المحاظره حدها عجييبه
الله يوفقنا جميعا

 

[مولاي الفرج]

عادي يبا كلنا سقطنا اول سنتين

بس يبيلكم تختارون دكاتره زينين وتشدون حيلكم من حضور ومشاركه ودراسه

واذا يبتو قريدات حلوة يرتفع المعدل وينشال الانذار

خصوصا ان معدلكم قليل يعني لو تييبون b بمادتين بتلاقون المعدل يطير بالسما

حاولو هالصيفي كلها مادتين ولا ثلاث

 

[Tuma cba]

بناااااااااااات بالصيفي ينزل انذار ولا لا؟

 

[kndora]

حبيبتي شوفيلج دكاترة زينين

عندج ماده اختياريه مفتوحه للكل تعليم اساليب تفكير عند علي الهولي صج شوي الدكتور مادري شلون ويطرد وقوانيه ويع

بس ترى يرفففففع حييل انا عطاني a- لان عندي غيابات ولا يكون عبالج اني شاطره ترى كسلانه ادرس الا حزت الامتحان واهوا امتحانه اوبن بوك بس هم لاازم دراسه لان اييبلج اشيااء فهم

واذا انتي بالتربيه عندج الدكتور عادل النجار تربيه فنيه ورسوم اطفال سويي الي يبييه وقدمي زين بالامتحان يعطيج a وحدها سهله مذكرته ويحاسب ع العملي اكثر

 

[أبله أريج]

درسي هذا حلج

 

[miss.42]

بناااااااااااات بالصيفي ينزل انذار ولا لا؟

لا ما ينزلون انذارات بالصيفي

 

[نعم نعم شنو]

والله اقولج اياها الحل

(( اللجوء لربج )) كل ماحسيتي معنوياتج نازله ادعي وادعي انه ربي يساعدج

لما ربي يفرجها صج راح تحسين بطمأنينه وسكووون وودج تدرسين وتجتهدين

وشي ثاني فكري بأهلج اذا لا سمح الله انفصلتي شنو بتكون ردة فعلهم وشنو بكون موقفج اتجاه نفسج

شدي حيلج الحين احسن ما يصير عندح انذار ثالث وتقعدين على اعصابج

الله يوفقج وانتي قدها وقدود ويبين عليج شطوره بس يبيلج شوي تشدين حيلج الله يحفظج ان شالله

 

[بآشة الخود]

بقولج شغلة انا وحدة توني متخرجة ولله الحمد والمنة
وكان عندي 3 انذارات !!

3 تخيلي وع حافة الطرد خلااااص

ويعتبر هذا اخر كورس لي

طبقت كل اللي قالوه البنات شديت حيلي
وضغطت ع نفسي وخليت الاهمال اللي مانفعني بشي
وتوكلت ع الله والحمدلله تخرجت وانشالت الانذارات الثلاثة
صج معدلي مو شي بس الحمدلله راضية بالنجاح

شدددددي حيلج انتي ورفيجتج وفكروا بمستقبلكم والشهادة
والله حتى بالاخر النجاح له طعم ثاااني

والله يوفقكم