عندما تسقط الرسميات و يكون الزواج فرحة للعروسين

[Leann]

السلام عليكم

في وقتنا الحالي و بالاخص في ديرتنا العزيزه اصبحت حفلات الزفاف مكان للتفاخر بالفساتين و المجوهرات

و نشوف الكل يتسابق لتقديم اخر " فنتق" بالعروس

نسينا شنو اهيا حفلات الزفاف و ليش صار فيه حفل زفاف من الاساس

نسينا جوهر العرس و جوهر الحفلة


وين ايام زمان اللي كان العرس بسيط و ملموم بس فيه روح و بركة؟؟

عشان جذي قررت انزل هالموضوع .. ودي اعرض لكم صور من مختلف بلدان العالم عن حفلات زفاف بسيطة بس فيها روح و حيوية ممكن تستفيدون منها يا عرايس

ودي ابين لكم ان البساطه و الذوق اهمه اللي يحكمون العرس و العرس الناجح عمره ما ينقاس بفلوس الكوشة او المصمم

ودي ابين لكم ان الناس لما اتيي العرس و تحس بألفه و راحة راح تحب عرسكم اكثر لما اتيي و تشوف فناتق بس يكون عرس جامد ما فيه روح و حيوية

في موضوعي هذا راح احط صور حفلات زفاف من مختلف بلدان العالم و خل نشوف ويا بعض عشان نستفيد و نغير من عروسنا شوي .. يمكن نقدر نغير ويا بعض ..




عروستي الاولى اسمها alix فرنسيه تعيش في باريس .. اليكس لها مدونتها الالكترونيه و تشارك قرائها بكل شي و جميع القراء عاشوا معاها لحظات الخطوبة و الزواج

العروسه تحب البساطه و تحب هالنوعيه من الخام و كونها مصممه ازياء اهيا اللي صممت نفنوفها و الكل حضر عرسها كان يقول عن الفستان ان فيه من روح اليكس

اليكس تحب البلونات الملونه وايد و من جذي حرصت على ان تكون قاعة الاستقبال فيها بلونات

المعرس و العروس من فرنسا .. بلد الماكارون و الشوكلاته .. شي طبيعي ان الكيكة تكون جذي

العروسه عندها شغف بالسيارات الخضراء ففضلت انها تركبها بدال الليموزين

الحين


هل اليكس فقيرة؟؟
لا اهيا مصممه ازياء عند دار كلوي و تقدر تقط فلوس الدنيا

زين ليش البساطة؟؟؟

لانها تدري ان نجاح العرس يكون لمن المدعويين يحسون بالفه و يقدرون ياخذون راحتهم.. ما كانت محتاجة انها تبهر ضيوفها .. كافي ان العرس كان فيه روح و حيوية و هذا الشيء الاهم تحسوون ان العرس لايق على العروسه و متميز بطريقه راقيه و حلوة


يالله اشوف تفاعلكم و الموضوع متجدد يعني كل مشاركة راح احط عرس و عروسه يدد :fun:*

 

[نوال علي]

مشكور اختي على موضوع انا عندي قناعه وحده هاذي ليله العمر كل وحده تسوي اللي بنفسها سواء كان غالي او رخيص شغله ترد على ذوق وحده
يمكن شي انا اشوفه حلو غيري يشوفه مو شي ناس اذواق اهم شي عندي اني اسوي اللي بخاطري وبنفسي اذا بقعد ارضى اذواق الناس مستحيل اسوي شي
وارد اكرر شي مو بالبهرجه بالاقتناع يمكن وحده يكون ذوقا بشي الغالي يعني مو قاصده تتفاخر بس يعجبها هل شي ويمكن وحده ثانيه تكون مو غنيه مليارديره بس شي رخيص بسيط يعجبها مسالت ذوق لا اكثر ولا اقل ونصيحتي كل وحده تسوي اللي نفسها فيه
ومشكوره حبيبتي على موضوعج الرائع