عملية شد البطن

[بنفسج]

أعضاء المنتدى الغالي ياليت تفيدوني بأي معلومات عن عملية شد البطن أنا موعدي قريب عند الدكتور خالد العنزي في المستشفى الأميري

هل الألم بعد العملية محتمل ؟

شكثر المدة اللي احتاجها للتعافي من العملية وممارسة حياتي الطبيعية ؟ نتائجها تستاهل التعب اللي فيها لأن انا عندي ترهل من الولادة وهذا ما يروح برياضة

في أحد عنده اي معلومات عن الدكتور خالد العنزي يقدر يفيدني فيها ؟

صدقوني اي معلومة ولو بسيطة تساعدني في اتخاذ قراري المناسب
هل
ولكم مني جزيل الشكر

 

[Q8stylle]

up up

 

[رمانه كويتيه]

ان شاءالله تقومين بالسلامه وتعطينه نتايج العمليه

 

[ام الجميل ناصر]

العملية حالها حال اي عملية ثانية
فيها الم والالم فيها محتمل ويروح بالمسكنات
وتستاهل النتيجة التعب
باول اسبوعين يبي لك راحه مع مشي خفيف
المتعب فيها انك ماتفردين ظهرك عدل شوي ينحني عشان بس الشد والخياط الداخلي يبرا
والباقي سهالات
الله يسهل لك وما علي شر
لما تشوفين ان مافي بطن ...وواااي .. وبس

 

[أم حوور]

الله يقومج بالسلااااااااااامه انشاءالله


ودكتور خالد العنزي وااااااااايد ناس يمدحونه



وانا بطريقي له عن قريب انشاءالله

 

[ii DareeN ii]

دكتور خالد يمدحونة وايد خوش دكتور

 

[قمرشمر]

الله يقومج بااسلامة ,,

 

[توتا5]

الله يقومج بااسلامة ,,

 

[^^المهره^^]

والله تسوى وتسوى
توكلي على الله وسويها حياتج راح اتغير اصلا عقبها
والالم عادي
الله يعافي المسكنات
وعشان تردين حق حياتج يبيلج 10 ايام اسبوعين
وعقبها جنج البخت

 

[معا الى القمه]

اختى توكلى على الله انا مااقدر افتيك فى الدكتور لانى مو من الكويت بس
انا سويت عمليه شفط وشد لبطنى من تقريبا 5اشهر
ومع ان الجرح التهب والدكتور ماكان بذيك الشطاره بس بس ابدا ماني ندمانه وفرق كبير عن اول فى الشكل واللبس
بس نصيحه خليه ينحت الخواصر زين ويشد العضلات حقت البطن
واذا الضهر فيه شحوم خليه يشفطها علشان يطلع الخصر اجمل
الله يسهل عليك
وانا من تجربه انصحك فيها

 

[just-me]

انا بيصير لي شهر من سويتها عند دكتور خالد

نحن السابقون و انتم اللاحقون

حياج بتجمعنا و أي سؤال لايردج الا أصابيعج



http://www.q8yat.net/showthread.php?t=539405

 

[miss.doll]

اب جم العملية لوسمحتو

 

[راعية الذيب]

انا بصراحه متردده حيل في اني اسويها

اذا سويتي العمليه علمينه

والله يقومج باالسلامه يا رب

 

[carrot^cake]

والله العمليه زينه
يعني مافي الم منها لانه كله بيعطونج مسكنات
اللهم الا الحركة الي ما تقدرين تنامين على جنب على طول
كله على ظهرج
وعقب 4 ايام تقدرين شوي تلفين عالجنب
وعقبها بجم يوم تنامين على بطنج
يعني شوي شوي ترد عافيتج
واهم شي انج ما تشيلين شي ثقيل عشان الخياط

بس صدقيني النتيجه بتعجبج لانه فرررررررررررق
والفرق تشوفين من اول ما تقعدين يبين انه بطنج مشدود سيده وعقبها بعد بيرد يستعدل احسن

 

[أم مياسة]

أنا أتمنى أسويها بس متردده لأن يقولون بعد مده إذا ما تحافظين ترد الكرشه وتتجمع الدهون في أماكن ثانية مثل الزنود والخواصر وهذي معلومه أكيده لأني شفت ناس بهذي الحالات،، أنا بصراحه خفت على خواصري لأن ما شاءالله أحلى شيء فيني بس بكرشه إذا في وحده مرت على عمليتها سنين إتخبرنا شو صار معاها بالضبط عشان تكون الصوره واضحه للكل لأن إلي سألتهم كانوا مسوينها من سنين

وسلامتكم،،،

 

[ممرضة كويتية]

تقومين بالسلامة

تقومين بالسلامة

د. خالد العنزي ممتاز وشغله زين
من ناحية العملية.. لازم تكونين منزلة وزن و مومتينة وقت العملية لأن ما راح تستفيدين من الشد وانتي مو منزلة وزن وبالعادة يلزمج سنة لتخفيض الوزن ويكون معامل الوزن لكتلة الجسم أقل من 40 أو 35 اذا كنتي تعانين من امراض الضغط والسكر

والعملية سهلة جدا لكن تاخذ وقت من ساعتين الى ثلاثة ساعات.. والألم مقدور عليه من خلال المسكنات القوية...بعد العملية لازم تتمين شهر ما تقومين بمجهود ولازم تلبسين نوع خاص من الأحزمة أو مشدات البطن وراح يحدد لج الطبيب نوعها وقياسها لإرتدائها بعد العملية .. وراح تلتزمين بوضعية معينة للجلوس والنوم وهي النوم والرأس مرفوع بدرجة ثلاثين بالمئة لمدة عدة ايام، و يفضل ان ما يكون في حمل خلال السنة الأولى من بعد العملية خاصة اذا تم شد البطن باستخدام طريقة (كييل ريبير) و يمكن تسألين عن تفاصيل هذي العملية للدكتور خالد و هل سيقوم بالشد فقط أم اجراء عملية شد مع (كييل ريبيير) و هذي العملية يقوم خلالها طبيب الجراحة بشد عضلات البطن و تقليل المسافة بين عضلتي البطن المسماة (ريكتس أبدوميناس).. طبعا راح يكون في بربيش لتصريف الدم الزائد في الغالب اثنين واحد لكل جهة يوضع في الخاصرة ويتم ازالته بعد يومين أو ثلاثة.. واحتمالية التهاب الجرح بعد العملية واردة جدا.. بل هي شائعة و يخشاها الأطباء.. لذا ينصح بالاهتمام بالجرح و راح يقول لج الطبيب شنو الإجراءات اللي تكفل ان الجرح ما يلتهب.. وإلا راح يكون في ندبة ومعاناة طويلة حتى يلتئم الجرح خاصة اذا كنتي تعانين من مرض السكر.. الغرز المستخدمة في الغالب هي الغرز المخفية أو ما يسمى الغرز التجميلية.. والتي تذوب من نفسها ويمتصها الجسم بعد عدة أيام..
ربي يحفظج ويقومج بالسلامة..

ولأي استفسار أنا بالخدمة​

 

[b6ooo6a*_*]

توكلي على الله وكل شي ربج كاتبه بصير و لا تحاتييين و دكتور خالد ماشاء الله علييه شاطر وانا بعد بحطلي موعد عنده ...
ومشكوووووووووووووووره يا ممرضه كويتيه عسى الله يطمن قلبج ويريحه نفس ما طمنتينه كلامج روعه فديتج على هالمعلومات

 

[Glamour_85]

بنات شلون احط عنده موقع
في ناس يقولون ان اهو يبيله واسطه عشان يسويها للمريض لانه العاده يخلي الطاقم والمتدربين اهم اللي يسوونها

 

[Glamour_85]

سؤال حق ممرضه كويتيه
شلون يتم عملية شفط الدهون اللي عرفته يكون شق 2 ملم وعن طريق شغله مثل الابره
واذا بس سويت عملية شد الصدر وتكبيره وشفط الظهر والبطن والفخذ شلون بيكون وضعي اتحرك عادي ولا لا
وهل هناك خطوه اذا سويت كل هالاشياء مع بعض
الدكتور خالد يسوي شد وتكبير الصدر سواء بدهون الجسم او السيليكون

 

[طير الحب]

الله يسهل عليج

بس اشلون ناخذ موعد عنده