عمرها 29 وتقدم لها مطلق عمره 37 .. تشوفوه مناسب او لا

[مدام الباشا]

السلام عليكم ورحمة الله وبركاته

عندي اختي عمرها 29 سنة كانت مملكة وانفصلت وطبعا بكر
اختي ماشاء الله جميلة ومتعلمة وعاقلة

اتأخر زواجها لحكمة يعلمها الله مع انو بعد طلاقها فية حوالي 6 اشخاص بس رفضتهم
وطبعا فية اسباب
اختي فية امور كثيير تهمها تكون موجودة بالزوج
مثلا التعليم .. الوضع المادي يكون زينا .. الاصل والفصل

المهم
دحين اتقدم لها شخص
ممتااااااز من كل النواحي ومناسب لها وعاجبها مررررة

لكن اللي مخوفها انو مطلق .. وانو اكبر منها ب 8 سنين عمرة 37
زواجة استمر سنتين وما عندة اطفال
وصارلة مطلق خمس سنين

طبعا سئلنا عنه وشافوة بابا واخواني مرررة عجبهم
واختي شافته وشافها
ومرررة عجبته اختي الحمدلله
واختي كمان عجبها شكلة وارتاحت له

بس زي ما قلت لكم موضوع طلاقة وعمرة مخوفها

انا حبيت اكتب لكم هنا وياريت من خبرتكم تعطو اختي نصايح
هي دحين متابعة تقراء ردودكم

 

[ناتشوو]

من ناحية السن مناسب لعمرها
الله يوفقها

بس في سالفة صغيرونة
ليش ماعنده عيال بعد زواج سنتين؟
كانو يعالجون ولا فحصو ولا اساسا ماقي استقرار
يخليهم يبحثون في تأخر الحمل؟

 

[امـ خــزامـى]

الله يوفقها ويسخرلها ويرزقها اللي يسعدها ويريحها

انا اشوف جداا مناسب والحمدالله ماعنده عيال بعد
والعمر هو الزين بنظري

بس اللي لازم تعرفونه سبب الطلاق واذا تقدر تكلم زوجته الاولى وتسمع من الطرفين يكون احسن
عشان تطمئن وترتاح اكثر وتكون عندها خلفيه


كثير اعرفهم يسألون الزوجه الاولى عن سبب الطلاق ويحلفونها تقول الصدق
والاغلب كانت اسبابهم ان مافي توافق بينهم


موفقه حبيبتي

 

[أطيب بنت]

أختي
نصيحة لا تضيع اختك الفرصة اسالو عنه زين وشوفو سبب الطلاق اذا كان مافي شي يعيبة

لاتضيع الفرصة خصوصا انه ماعنده اطفال

الله يكتب لها الخير والصالح

 

[حبيبي مالكني]

الطلاق مو عيب لا للمراة ولا للريال هاي نصيب والله كتبه
ودام اهلج اسالوا عنه وطلع خوش ريال يعني الحمدالله يعني سبب طلاقه انه ماله نصيب مع طليقته
والعمر كلش عادي ترى مافي فرق بينهم يعني شي جدا طبيعي
خل تستخير وتتوكل على الله
والله يهنيها ان شاء الله

 

[english muffin]

العمر مب مهم

 

[om deaj]

العمر مو مهم

انا رفيجتي وصلت 33
تزوجت واحد قريب بالعمر لها ومطلع ماصارله سنتين وعنده 3 يهال

 

[#laloo]

اذا مرتاحه له واهلج شايفين ماعليه قاصر خل توافقالعمر مناسب وايد لها واذا عن سالفة مطلق يمكن ماتفقو
بس لا تضيع الفرصه منها وباجر تندم واذ وايد مخوفها طلاقه سالوه عن سبب الطلاق مافيها شيءبالعكس جذي بترتاح اكثر

 

[سمو النفس]

مافي فررق بالعمر ،، واتووقع العمر مناسب حييل

خليها تستخير وان شاء الله ربي يكتبلها اللي فيه الخير

 

[طيبة83]

اذا ريال وزين

خل توكل على الله والعمر جدا مناسب لها

ترا هل وقت مافي ريايل زينه وبالمواصفات اللي قلتيها

 

[نفـــائس]

العمر مناسب 29 مابقي شي علي 30 والعمر يركض
والطلاق مافي توافق مو معناها عيب بالشخص وسوء اخلاقه
انا مع الاخت اللي قالت سنين ما جاه عيال اسالو عن الموضوع ربي يوفقها

 

[كارلوفي فاري]

العمر مناسب لها والطلاق مو عييب واكيد كانت عنده اسبابه. واذا كل هالمواصفات فيه. تتوكل على الله وتقبل. وترا هي ماعد هي صغيره ولازم تعرف كل ماتتقدم بالعمر كل ماتقل معاها الفرص الجيده

 

[دلع بآبي]

8 سنوات مو كثييييير لانها ناضجة

اما تجين تقولين هي عمرها 20 وهو 28 هنيه يبيله تفكيييير

يعني يا اختي خل تصلي استخارة وتتوكل ع الله وسالفة انه مطلق مو عيب

 

[الأميرة جوري]

العمر مناسب وخليها تستخير

 

[الريم_85]

الاستخاره هي الحل
والله يوفقها يارب

ام خالد

 

[مدام الباشا]

اختي قرئت ردودكم وارتاحت كثييييير
جزاكم الله خييير جميعا
والله يختارلها الخير ويوفقها ويسعدها ياارب

 

[دلوعة أبوهآ]

منآسب لعمرهآ ومافي فرق بينهم ..
تستخير احسسن
وآلله يكتب لهآ الخير ...