عمرة بعطلة اليوم الوطني,,,,, ويا عيالي

[الغضى]

السلام عليكم
مثل ماقريتوا العنوان
ان شاء الله مسافرة لمكة بعطلة اليوم الوطني
ويا عيالي وبالسيارة
أول مرة أخذهم للعمرة
اذا سفر سياحة يروحون ويلعوزوني
اشلوووون العمرة
بنات تكفون اللي عنها خبرة اشلون اتصرف ويا عيالي؟؟
وشنو أخذ وياي أغراض لهم؟؟
واشكثر أخذ ملابس للعمرة؟؟؟
حبايبي اللي ما تعرف على الأقل ترفع الموضوع ضروري
السفرة بعد يومين.
​

 

[غيدآء]

السلام عليكم

الله يسهل عليكم العمره عاد السياره تعب ..يمكن تاخذون 12 ساعه من اهني لي مكه !

اول شي حبيبتي...اذا عيالج كبار ويفهمون يعني اخذي معاج العابهم الالكترونيه علشان لا ياذونكم بالطريج...ولي وصلتوا مكه وابتديتوا عمرتكم حاولي انكم تسوون قروبين نصهم مع زوجج ونصهم معاج علشان تخلصون بسرعه وما تتعبون..!

لانه الطواف سهل لكن المسعى صعب وتعب!

بالنسبه للتبديل اخذي معاج لاربع ايام !

ولا تنسين الاسعافات الاوليه تاخذين وصابون ومناديل معطره وبندول وهالشغلات!

وخليهم يلبسون دلاغات قطن واخذي فازلين او اي كريم للارجل علشان لا تصير فيه تشققات !

ولا تنسين خفايف من الاكل والمشروبات علشان الطريج واهم شي انتهبوا للطريج واذا تعب رب اسرتكم اللي يسووق خليه يرتاح لا يسوق واهو تعبان!

يعني اخذوا بريك كل 3 الى 4 ساعات..حتى لو عند استراحات المطاعم!

وتقبل الله منكم صالح الاعمال

 

[هذا اناا]

الله يتقبل منج ويعينج بصراحه العمره مع اكثر من طفل احس صعبه بس اهم شي اذا عندج طفل اقل من 3 سنين بالسعي اخذي لج عربانه وحطيه فيها عن التعب حرام اذكر معانا صغار والله انهم يبكون من التعب احنا الكبار ناخذ مسكنات بس الاطفال صعبه علشان جذي لايمشون كثير وان شاءالله تتسهل من ربج

 

[meera15]

انا ما عندي خبره بالاطفال
بس اول امس رجعت من العمرة
وما شاالله زحمه وبشر من كل الجنسيات
لا تنسين أدويه الاطفال وملابسهم لان حر وتحتاجون تبديل مستمر

وبالنسبه للطريق اخذي معاك العصاير والحليب اللي يتسكر مثل البطل
هاذي نقطة مهمه لأن الاطفال يشربون شويه بعدين تتوهقين فيه وينكب عليكم
اخذي معاك كوشيات صغيرة ولحف خفيفه عشان ينامون

والله يحفظكم ويتقبل منكم يا رب

 

[الغضى]

غيداء
مشكوووره ياقلبي
وتم عمل اللازم،،،،،،،، بيض الله وجهج.

 

[الغضى]

هذا أنا


عيالي اصغر واحد عمره ٣ سنين ونص
بس أول مره يروحون عمره
شكلللي بحوووس أنا وياهم.


يعطيج العافيه ع الافادة

 

[الغضى]

ميييرا


قالي ريلي انه حر مكه اخذي صيفي او قطن
بسً جذيه اخاف يستبردون
وتغير الجو يأثر عليهم.


حبيبتي ماقصرتي ويااااي

 

[الغضى]

بنات جزاكم الله خير
ع الدعوه الحلوه

 

[جنوبيه07]

اهم شي انتبهي لا يضيعون منك اذا فيه منهم واحد كبير ويفهم اعطيه رقم جوالك والله يسر لك

 

[دلوعة أبوهآ]

آلله يتقبل منكم يآرب ..

 

[Sahar ~]

حبيبتي خذي لهم مجلات اذا كبار و خذي لهم اجهزه تسليهم اذا عندهم ايبود او ايباد و اذا ما عندهم اشتتري لهم قيم بوي مرا يونس و رخيص

ولاتنسين شاحن السياره .. خذب مخدات و بطانيات ايكيا احتمال ينامون وافلام اذا فيه دي في دي ولا تنسين تاخذين لهم الاكل اللي يحبونه


الملابس بالنسبه لك كثير من قمصان القطن و البسي تحتها بنطلون استرتش لان اغلب الوقت بتكونين بالعبايه و قمصان القطن مرا عمليه و خذي لك كم لبس كشخه لك بالفندق و لهم خذي لهم اهم شي لبس مريح و ترا جو مكه الحين مو بارد انا توني ماخذه عمره قبل شهر كنا نلبس اولادنا نص كم


واذا للحين ما حجزتوا فندق انصحك بابراج الميريديان اكثر من روعه جديده و توصيل للحرم مجانا بالباصات ما ياخذ اكثر من ٤ دقايق و نظافه نظافه نظافه و البوفيه نظيف و لذيذ


و عمره مقبوله حبيبتي ولا تنسيننا من دعواتك

اتمنى اني افدتك و لو بشي بسيط*

 

[Sahar ~]

حبيبتي نسيت اقولك

اذا بيسعون معاك تقدرين تسعين بالدور الثاني لان فيه عربيات ايجارتسوقينها بنفسك ب ٥ دينار


مريحه مرا و تقدرين تركبين عيالك معاك لانه تقدرين تشبكين عربيتين او ٣ مع بعض و تسوقينها انتي زي السياره صراحه مرا مريحه والمسعى فوق فاضي يعني مافيه خوف عليهم

*