عقب ماكنت بطاليه توظفت وياليتني مـــــــــــــــــــــا ..؟

[ريـ 1985ـم]

السلام عليكم
.













بنات بقولكم سالفتي من اول ماتوظفت حتي ماصارلي سبوع انا بالاول بطاليه
وانطر متي بس اتوظف ولما توظفت من سبوع واحد بس كرهت الدوام ... اول ماتوظفت
الله قطني عند وحده الظاهر طرمه منزله راسهاااا وماتحاجيني خير شر قلت ياربي بغرفتي بروحي
وهم بالدوام بروحي صج ماكو حظ قلت يمكن اول يوم ماتعرفني وانا من طبعي احب اتكلم واسولف
واسال ماحب اكون ساكته شنو "سجن" نطرت سبوع وانا ع هالحاله اكلمها تقول مادري
احترت والله بالاخير عرفت انها ماتبيني تخاف لا اتعلم الشغل واخذه منها او حب تقعد بروحها
عشان لاطلع خياسها انا والله يابنات لو الله قاطني عند وحده عندها تسولف جان خليتهاا
وسولفت بذمتكم الواحد قاعد من الصبح بس مبطل هالاوراق شغل ولاماكو شغل راسك ماتشيله من الكتاب
شنو امتحانات احنا...؟
انا خواتي متوظفات وكل مادق عليهم الصبح اسمع صوت رفيجاتهم اللي تضحك اللي تسولف اسمع صوت
اختي بس تضحك وكل يوم تقول فلانه يابت ريوق فلانه مادري شنو انا هذا شغله اعرفه
بتقولون يبا توج مع الايام وين هذي من اول يوم عرفت اهيا شنو نيتها والله يابنات
مادري شفيني كرهت نفسي ماتسوا ع هالنطره واخرتها جذي قولولي شسوي انتقل من المكان؟
وحتي لو رحت مكان ثاني اخاف نفس هالنوعيه القي شلون اتعاامل معاهم...؟؟

 

[om-a7madeno]

عاد انا عقب باجر بداوم و حسيت البنات شوي نفسيه و نفس النوعيه اللي قلتي عنهم بس انا قلت حق المسؤول انه اذا ما ارتحت ينققلني و قالي اوكي لانه صراحه صج الووحده اجابل اطوف يعني و لا ماتتحجى صراحه زهقه و حطي بالج بتمين العمر كله ترى و الله يستر و يوفقج و يوفقنا كلنا

 

[LaRa CrOfT]

ماعليه بنات تحملو انتم رايحين عشان لقمة العيش والمعاش.. وماتدرين يمكن هالساكته احسنلج من غيرها .. واذا كلش بالمره مو قادره تتحملين انقلي لمكان ثاني يكون مناسب لج وترتاحين مع اللي معاج

 

[pure feminine]

اهم شي بالدوام انج ترتاحين بمكانج
نص اليوم يرووح بالدوام موو شووييه

فاذا انتي شايفه نفسج مو متحمله نقلي وان شاء الله تطيحين بناس تستانسين معاهم

 

[ريـ 1985ـم]

مشكورين بنات ع الردود والله يوفق اللي بداوم باجر ..
وانشاءالله احط بمكان زين والله يابنات اهم شئ عندي المكان لازم الوحده ترتاح فيه
عشان تقدر تعطي اما اداوم مغصوبه لا فا عاد مو كل يوم بينقلوني بيزهقوني
مني من اولها عاد تصدقون المكان اللي كنت فيه حييل مرتاحه فيه والشغل مووايد بس شسوي بسبتها
بروح اغيره لو شيصير لو انكرف بمكان ثاني وعسي الله يعينا ويبعدنا من هالبنات النوعيه

 

[معلمة_منكوبة]

لاتحكمين بأول أسبوع !! صعبه الواحد يرتاح ويعرف اللي يشتغل وياهم بأول اسبوع... نطري فتره اكيد راح تتكيفين بالشغل .. عندج الادارات الثانيه تقدرين تمرينهم تسولفين وياهم وتتريقون مع بعض.. الله يوفجج انشالله بس نصيحة اخت لج حاولي تتكيفين وعطي نفسج فرصه شوي .. انا مدرسه وماتأقلمت مع اللي وياي اللي على اخر الكورس الثاني !! كنت مو طايقتهم .. وفي ناس ماكوفايده لانه الحسد والغيره موجوده بكل مكان .. كوني علاقات وخلج ناجحه بشغلج ... وتقبلي مروري )

 

[غلاي امي وزوجي]

الله يعينج عاد انا طفارتي لما يكون عندي احد وساكت

 

[ألماس q8]

وااااااي الله يعينج ايي والله

حاولي تدورين نقل داخلي وانقلي لمكان ثاني وان شاء الله ترتاحين

 

[^q8ia^]

نطري عليها شوي يمكن اهيا من النوع اللي ماتتأقلم بسرعة !!

 

[شقرديـه عالطل]

ميخالف عادي اقابلها بس خل يوضفوني افيييييييييييه

 

[رمال من ذهب]

الله يعينج
انا بطاليه وتحبطت ابصراحه

 

[نونه العنونه_H]

حراام عليج يمكن اهيا نوعيتها جذي ما تحب تسولف..
مافيها شي اهي حره كل واحد وكيفه
يمكن الحين اهيا متضايقه منج لانج تسألين وايد
بعدين شلون تبينها تعطيج الامان من اول اسبوووووووع؟؟
وشلج بعوار الراس وهذي قالت وهذي سوت وهذي البست وهذي خلصت القهوه مالتي وهذه خلصت ريوقنااااااا
وسوالف ما تنتهي..........

 

[samsmeya]

والله ماتدرين لا تحكمين بسرعه
يمكن هالبنت طبعها جذي هاديه وما تتاقلم بسرعه او عندها مشاكل محد يدري عنها
لا تحكمين عالناس بسرعه والله خوفح تنتقلين وتلاقين اللي اخس منها اللي تحش وتقرض واللي ماعندها الا المشاكل
صبري شوي عطي نفسج فرصه

 

[توفـــا]

لا تستعيلين نطري علي الاقل شهر مااشفتي فايده انتقلي يمكن نوعيتهاا مو بسرعه تتأقلم مع الوضع

 

[قمر2009]

نطري شوي يمكن مستحيه البنت منج بعدين تقط الميانه ماتدرين شنو ظروفها

 

[shai5at al3arab]

صبري شوي توج متوظفة

ولا تسيئين الظن باللي وياج

يمكن هذي من كثر ما انقرصت قررت ما تحتك باحد نهاااائي

وايد ترى جذي

عطيها فرصة يمكن ييبون احد حق قسمج ..

توج متوظفة ما يمديج تحكمين على الدوام

 

[LuLiTa]

7bebty 5alich chethy aryaa7 min ilmishakil ,,,shooofay ilmwa'9ee3 ilbnat 3an mashakil ildwan,, illy etrab6 39a3i9 o illy entaqil 7achy <<<< i.e chethy aryaa7 min do5at ilraas

 

[ريـ 1985ـم]

مشكورين بنات ع الردود..
بنات انا كتبت الموضوع وماقلت لكم شاليبي صار بالضط اختصرت عشان جذي قلتو
يمكن مستحيه او نطري عليها ع ماتاقلم او انقرصت لالالا
اقولكم البنت ماتبيني تبي تكون بروحها وهذا اللي صار خليت لها المكان
بقولكم شاللي صار والله اني ماظلمتها والله شاهد علي وانتو حكمو
تخيلو اول يوم قاعده مكتبهاا حلو؟؟ انا انا رحت لهااا تخيلو المفروض تكون عندي تعلمني
لا المهم رحت واقولها شنو الشغل علمتني شوي وحتي ع الطاير ماتخليني اطبق جدامها
عشان ماانسي او اتلخبط ثاني يوم هم ساكته عاد شسويت انا موحلوه كل شوي اقولها شنو وشنو
البنت كلش كارهتني جني متهاوشه وياها قبل عاد قمت اكتب بروحي المهم ولا ادخلت رفيجتها؟؟
جان تفز وترحب فيها وتبين جاي قهوه تبطل ثلاجه وتقولها قعدي ؟؟
انا سبوع معاج حتي ماساليتني سؤال واحد؟؟؟؟
وين تتاقلم هذي تبي تكون بروحهاااا عاد غلطت شوي جان تصارخ؟ تقول سالي قبل كل شئ؟؟
بذمتكم هذي شلون اقعد معاها عاد انا موقليله شر بس ساكته مابي من اولها اخربها
المهم رحت مكان ثاني فيه بنات اشوه طقطقت ع الكمبيوتر البنات يحاجوني يعبروني يعلموني الحمدالله
ان شاءالله ع طول جذي..
تخيلو جان تييني وتقول منو قالج نقلي اهني قلت المدير اقدر ارد واقولها شكو بس موحلوه جدام البنات
جان تقول وليش ماعلميتيني؟ تقول عطينا خبر؟؟ قلت عاد المدير ماقالي عطي خبر لاحد
احس انها ماتت شافتني بمكتب وكبيوتر وبيدي اوراق والبنات صوبي؟؟
ادري طولت وانا اكتب بس شسوي سبوع اقهرتني صنم هالبنت عاد ادعولي اتوفق مع هالبنات

 

[mi corazon]

يابنت الحلال الحين كنتي تبين وظيفه وشغل والحين لمن يالج الشغل تبين وحده تسولف وتقرق .. شلج بعوار الراس باجر بتملين

دام جذي السالفة اخذي لابتوبج وانشغلي فيه وبالشغل .. تخيلي نفسج بمكتب بروحج جنج مديره .. شبتسوين؟؟

موفقه حبيبتي ومبروك عالوظيفه والفال للبطاليات الامورات

 

[ريـ 1985ـم]

الله يبارك فيج حبيبتي
بالعكس والله انا ابي الشغل بس خل يعلموني وعن السوالف يبا والله مابي اسوولف عقب اللي شفته
بس ابي بنات يتحجون جدامي ابي احس ان احد ىوياي موقاعده بروحي ..