شوفي أختي
بالنسبة لي زرت الهند ..صحيح دولة نائية و وصخة و فيها نسبة فقر كبيرة جداً ، بس عجبتني..حسيت روحي كأني من اللي يسافرون مع قناة ديسكفري يكتشفون حضارات دول ثانية :dddds:
زرت فيها ثلاث مناطق حلوين :
تشناي ، قعدت فيها يوم و ليلة في فندق شيراتون.. وهي منطقة بسيطة جداً جداً.. بالنسبة لسوقها و مافيها أماكن سياحية ، عندهم الصخرة اللي معلقة على تلة ما تطيح ..وحديقة الحيوان.. و تقدرين ب 300 ربية تاخذين باص كامل داخل الحديقة يوديج لقفص الأسود..وتصير رحلتكم كأنها سفاري.
طبعا حجزنا الباص كله لنا عشان ما نشم عطورات خايسة و نختق
_03BA:
المنطقة الثانية كانت بومبي أو مومبي مثل ما يسمونها الحين...
قعدت فيها يومين في فندق أوبروي (البرج اليديد) و يمه فندق أوبروي القديم في مركز تسوق زين وفيه شغلات.
طبعاً عجبتني وايد .. بس مشكلتها زحمتها والمطر
أسواقها زينة بس معظمه لبسهم الساري و البنجابي..وإذا لقيتي قطعة حلوة يكون مخرب عليها شك أو تطريز لونه غير القطعة اللي تبينها
في مصممين و عندهم ابداعات..لكن أسعارهم مو هينة على هنود.. و أشيائهم حلوة لكن ما تحضرني أسمائهم
ولا تنسين تزورين المتحف المائي و بوابة الهند والمزار اللي حاطينه بنص البحر..وذيج السنة ما وصلنا للمزار داخل البحر..يقولون ممنوع دخول النساء !!
وثالث منطقة رحت لها نيودلهي..قعدت فيها ثلاث أيام..في فندق أمبيريال ...عجيب حده حده حده الفندق والديرة واااااايد حبيتها و أعجبتني حيل حيل..نظيفة وراقية حيل حيل..سواء في شوارعها أو أسواقها.. أو الناس اللي عايشينها.. عندهم بوتيكات الماركات العالمية..تلقينها في شيراتون..وعندهم بعد المصممين..لكن نفس ما قلت شغلهم غالي..
أول ما تطلعين من مدخل الفندق و تاخذين شمال بمية متر تقريباً تلقين أسواق تراثية تبيع فضياتهم و جلديات و اكسسوارات وأشياء تونس.. وهالسوق ما يسكر لين 12 بالليل قاعدين .
وفي سوق مفتوح و يسكر حوالي الساعة 6 المغرب.. ماني ذاكرة أسمه..تدفعين قيمة تذكرة و تدخلين السوق.. و السبب في ذلك عشان ما يبون الطرارين يدخلون و يأذون اللي يشترون ..
وتقدرين تاخذين من نيودلهي طيارة تروحين فيها أجرا (agra) منطقة تاج محل ، توديكم رحلة الساعة 12 الظهر..وتردكم رحلة الساعة 6 المغرب..والرحلة طولها نص ساعة بالطيارة..
بس على فكرة ممنوع دخول الكاميرات لتصويره
تحطينها بسيفتي بوكس و يفتشونكم قبل لا تدخلون له..واذا عن الوجبة في فندق اهناك اعتقد يا ميريديان أو شيراتون أو ماريوت..صج مو ذيك الفخفخة اللي متعودين عليها..ولكن تقدرين تاكلين فيه على ما تردين دلهي.
طبعاً لا تستغربين من منظر الفقارى اللي قاعدين بالشارع..أو اللي يتسبحون بالنهر الوصخ..هذولا يتعمدون يقعدون بالشوارع يبون أحد يدعمهم عشان يطالبون بفدية !
اذا تبين التوك توك تقدرين تاخذينه بره دلهي.. لأنه ممنوع تجوله داخل دلهي عشان التلوث
بالنسبة للمأكولات .. تقدرين تاكلين في مطاعم الفنادق أو المطاعم العالمية طقة ماكدونلدز و برجر كنغ و غيره، واذا خايفة من البهارات طلبيه بدون بهارات .
والمشروبات تقدرين تشترين من اهناك كرتون ماي صحة.. مع العلم إن الفنادق الخمس نجوم..يوميا يحطون لكم بطول ماي اثنين للي في الغرفة و اثنين للكتل عشان تسون شاي و قهوة
تقدرين تروحين لكشمير فيها طبيعة واتينن و جبال و أشياء حلوة ...بس على وقتي كان فيها منازاعات بين باكستان و الهند .. و صراعهم الأزلي على منطقة كشمير!
الجو العام للديرة رطب وحار نفس جو البحرين تقريباً.. و أمطار متفرقة.. أخذي معاج شمسية صغيرة و حطيها بجنطة اليد أحتياطاً .
على فكرة أنا زرتها في شهر 9 من قبل جم سنة..يعني نفس الحزة اللي بتسافرين فيها تقريباً.
أنا بالنسبة لي حبيتها و من الدول اللي محطوطة بالقائمة عندي عشان أكرر لها الزيارة بإذن الله.. :ggdw:
وأتمنى أكون فدتج بالمعلومات :eh_s(8):
