سقاك السيل يا عشقن هجرته قبل سبع سنين
ومن يومه وانا اللي مبتعد ومصفي النيه
ولكن مر بالبال وتذكرته قبل يومين
واحس انه بدا يرجع غلاه اشويه اشويه
ومريت المكان اللي نجيه وزاد دمع العين
ولكن ما لقيت الا بقاياه الحديديه
زواياه وكراسيه الخشب راحت ولدري وين
وغطو منظره بعض المشاريع الكويتيه
ورحت وكن في صدري طعون السيف ابو حدين
وتجريح الغياب ورغبت الحب الجنونيه
احبه.. ايه.. واحلفله براسه بأننا احلا اثنين
تعدينا الصعاب بمرحله خطره وجديه
وتهنا في متاهات الغلا بين القسا واللين
وعشنا الحب كله بين سلوى والرميثيه
عفى الله عن مشاريه الغرام وغفلة الساهين
وتعذيب الوداع وكلمة الحسم النهائيه
ودمعن بلل اطراف الشوارع في مسا الاثنين
وفي صبح الثلاثا زدته من اشواقي الحيه
انا شاعر واهيم بكل وادي واتبع الغاوين
ولي نظرات مقصوده ولي نظرات عفويه
ولي قلبن خضر صادق ولا يلعب على الحبلين
بعد عندي ترى في ذمتي نفسن هواويه
وابو غمازتين اللي محلي منظر الخدين
ليامني طريته ثارت جنوني بطاريه
طرالي يوم جيت وقلتله.. قوه.. وقال اهلين
وخدر صوته اذني يوم كلمني بحنيه
اهو مني تعلم للتشرره والتغلي زين
وانا منه عشقت احلا العطورات الفرنسيه
فديت امه وابوه وخاله وعمه مع الجدين
هذاك اللي نوى حفظ العلاقات الثنائيه
اهو سيد طموحاتي واحبه من هذاك الحين
وهو وحده مغيرلي القناعات الاساسيه
لاني شايفه كوكب وهو كوكب وبه نهرين
ولكن ما مشى وسط المجرات الفضائيه
عليه الله وامانه لا سمع شعري يقول امين
عسى الله لا يورينا العذاب ويبعد السيه
وانا ماني براجعله عقب ما غبت سبع سنين
ولكن بذكره وانساه والنيه هي النيه
