طفلي عمره 4 شهور .. أعطيه كمام

[ام الغزال]

بنات ولدي عمرة 4 شهور عسى الله يحفظه ..
صدره مليان بلغم لدرجة إن تنفسه كأنه في ورق داخل صدره ..

عطيته كمام يومين شوي تحسن بس الكل يقولي لا تعطينه .. بنات عطوني من خبرتكم ..
في دكتور زين ..

أو في طريقه لسحب البلغم ؟@

 

[Maneena Manaana]

دكتور زين عندج غسان العثمان مال جهاز تنفسي

 

[زيـنـه]

للبلغم يعطون تحاميل تسحب البلغم .

 

[bedour18]

واااااااااااااااي بعد عمري نفس حمود حبيبي ، تمرمرنا مع المستشفيات و الكمام .

سمعي نصيحه مجرب ، اول شي خلي عنج حجي الناس . اللي يناسب ياهل ممكن ما يناسب الثاني.

ثاني شي لا تسكتين عن الولد ترى كلش مو زين اسم الله عليه ممكن يختنق اذا ظل بدون علاج.

انا ما بقى مكان ما وديت ولدي و ما نفعني بعد الله سبحانه الا عياده دكتور خالد بوحيمد عند استشاري اسمه د.احمد

صج صج دكتور محترم و يخاف ربه و يشوف مصلحه الياهل قبل كل شي.
عطاني حق حمود تحاميل للبلغم و ادوية حساسية توسع الشعب الهوائية و ما بغى كمام الا عقب مرة رحنا له و كانت حاله الولد متأزمة كلش ( الله لا يبارك في الأميري لعبوا بحسبة الولد)
عاد وقتها عطاني كورس كمام اسبوع بالأوقات و عطاني كورس ابر لا اله الا الله وحده بوحده

و الله الولد كان صدره جنه قرقاشة من الاصوات و الطبيبة في الأميري تقول لي : اذا حسيتي ويه الياهل ازرق يبيه الطوارئ !!!!! أنا راح انطر لين ويهه يزرق يعني ؟؟؟؟؟؟؟؟؟؟؟

 

[!! شوق !!]

حبيبتي خلييييييييج من الادويه والكمام ,,

عطي ولدج (( ينسوووووووون )) روووووعه ويمنع تكون البلغم وعالاقل شي طبيعي ..

 

[ii DareeN ii]

مايشوف شر انشاء الله بس حبوبه سالي طبيب استشاري

 

[um_fahad]

حبيبتي لاتهملين ولدج وما عليج من كلام الناس... لازم تعطينه كمام...لانه هو الحل الوحيد اللي جدامج... لاتصيرين مثل وحدة اعرفها .. ما عطت ولدها الكمام .. وزاد عليه صدره... تتوقعين اشصار فيه....وقف عنده التنفس واختنق وصار فيه نقص اكسجين في المخ...بعدين انقلوه للعناية المركزة..واهو اسم الله على ولدج كبره.. ....... صج ان الكمام يقولون انه مو زين .. بس افضل حل لولدج...يعني اذا ما عطيتيه الحين واهتميتي فيه ...راح يصير فيه حساسية صدر وربو..وبعدين راح يكون علاجه الكمام وراح يستعمله على طول...........وانا عن نفسي ولدي فهود يوم كان عمره شهرين تعب على وصار فيه التهاب بصدره ونومته بالمستشفى وعطيته كمام..والتزمت بعلاجه وصار زين... وهذي هي المرة الوحيدة اللي خذا الكمام فيها... اسم الله عليه الحين عمره ست سنين

 

[دكتوراة بالذوق]

شوفي انتي بالاول ولدج والمكان اللي هو فيه ؟؟؟


اقصد يمكن يحوشة برد فجأة من دخلة السرير لانة توه صغير وكلة بالفراش فديري بالج اذا شلتية وعطيتية حليب يعني لفحة الهواء فجأة مو زينة + العطورات + كل يوم حطي له شوي ينسون وشوي كمون + سكر نبات وكل يوم على هالحال+ اخذي تحاميل مالت المستوصف لانها اخف تأثير على الاطفال .


واذاصار زين عقب هالتحاميل والكمون عطية بين اليوم والثاني حلبة .

انا هذي طريقتي الخاصة .

وديري بالج من المستوصفات الخاصة ترى ادويتها حييييييييييييييييييييييييييييييل قوية على الصغار ..