طريقتي بالتوفير 100%

[سمراء كالخمري]

السلام عليكم حبايبي ...
انا وايد ادش هلقسم من قبل لا اتوظف كنت اخطط شلون بوووفر فلوسي وافكر بربح ثابت بس انا مو صووب التجاره ولا لي خلق لها ...
عشان جذي قررت اني اوفر من معاشي نص الراتب

المهم نقول مثلا معاشي 650

اشيل منهم 300 واحطهم بالتجوري ..

والباجي مصروفي الشخصي 350
يتقسم على (بانزين - ضروريات الجمعيه - ملابس ) إلخ... بس بالمعقول مو اروح السوق واكوود جنه ماكو هدوم بالكبت لالاء كلش كلش اشياء بسيطه واحاول مااروح السوق علفاضي والمليان عشان لا اشتري اشياء مالها داعي واخر شي قاطتهم بالكبت مادري عنهم خخخ :eh_s(22):

المهم لو نحسب ال300 على جم سنه بالضبط ,,,

اول سنه ...... 3,600 د.ك
ثاني سنه ..... 7,200د.ك

عاد كملو الحسبه بالمده الي تناسبكم :rerrerek:

الي ماعندها التزامات مثلي
تجرب التوفير شي حلووو اذا احتدتي شي عندج ماله داعي تاخذين قرض


بلا فوايد البنوك بلا بطييخ ...:eh_s(9):

ناطره ردودكم بعد قلبي ..

 

[جروح ودموع]

خووووش طريقه والتزمي فيها الله يكملج بعقلج باين عليج انسانه متزنه وعقلج كبير لانج فكرتي بالتوفير قبل الوظيفه وهالطريقه بتخليج مليونيييره وما تحتاجين لاحد ولا القروض اللي تكسر الظهر وبالتوفيق ان شالله

 

[(ميادة الحسن)]

الله يبارك لك ويرزقني من واسع فضله

 

[سمراء كالخمري]

مشكورين حبايبي ماتقصرووون انا حاليا متبعه التوفير هذا من الشهر الي طاف وناويه اكمل عليه لانه ايام الدراسه كانت الاعانه 100 وتكفيني طوول الشهر
الحمدالله يارب

 

[الشيخة@]

انانفسش الحين عندي 11الف
قولوماشاءالله

 

[سمراء كالخمري]

ماشاءالله عليج حبيبتي عاد استثمريهم بشي مربح لا تفسفسينهم على شي بعدين تتحسفين
انا توني اول سنه عقبال مااوفر مبالغ كبيره ياااااارب

 

[هيفو777]

حبيبتي حبيت اظيف شغله انتي ناسيتها لازم تحطين مبلغ لطوارئ عشان اذا صار عندج ظرف طارئ ماتحبين كل اللي يمعتيه خصصي مبلغ 50 دينار يمعيهم كل شهر تنفعج يمكن تطلع لج سفره فجأه او تخترب سيارتج

 

[أم سيف وسلطان]

خووووش طريقه والتزمي فيها الله يكملج بعقلج باين عليج انسانه متزنه وعقلج كبير لانج فكرتي بالتوفير قبل الوظيفه وهالطريقه بتخليج مليونيييره وما تحتاجين لاحد ولا القروض اللي تكسر الظهر وبالتوفيق ان شالله

 

[بطه حمراء]

ماشاءالله طريقتك حلوه

 

[هيبهـ ملكيهـ]

ماشاء الله عليج ان شاء الله استفيد منها

 

[نور الفلك]

ما شاء الله خوش طريقة

ودي اغير تفكيري واوفر

بس مشكلتي من اشوف المعاش اقوله ياللللللللللله بمردك بيومين

 

[اغادير الكويت]

الله يجزااااكم الخير

 

[هيفو777]

رفع

 

[هيفو777]

يلا بنات نبي افكار عن التوفير

 

[بنت الاحلام]

انا احب التوفير صراحه بس

عندي التزامات لا تعد ولا تحصي يعني
بس مسويه حصاله كل ما حسيت زاد شي قطيت فيها
وماراح ابطلها الا اخر السنه وبشوف كم جمعت فيها بعد هالتعب

 

[Y.H.Q.]

مشكورة وايد
حلوة طريقتج
وانشالله تستمرين عليها

 

[العفاسيه وبس]

هم انه بعد موفره الحمدالله بس بنات لا تنسون الصدقه

 

[دلع الشمال]

فكره حلوه اتمنى من كل البنات يلتزمون فيهااا

 

[Miss Cherry]

طيب ليش ما تحطين استقطاع بالبنك على حساب توفير وتخلين بطاقة السحب مو تحت ايدج .. اهي منها تصير شهريا امر دائم يعني مايحتاج انتي تسحبين وتخشين اهو من نفسه كانه قسط عليج غير جذي تاخذين فوائد سنوية صج انها بسيطة بس تنفع

ولا تنسين حبيبتي تزكين عنهم

الله يبارك لج بمالج ويزيد رزقج

 

[غموض الصمت]

ما شاء الله تبارك الرحمن
الله يزيد و يبارك
احسن شي انك بديتي مبكر