السلام عليكم ورحمة الله وبركاته
صراحه انا توني ماتخرجت عشان ادخل هالكلية وحتى ماتخصصت علمي ولا ادبي
بس انا سمعت عن الكلية ومدحولي اياها وانا صراحه لحيين ما اعرف شي عنها
والشي والوحييد الي ودي اعرفه الحييين فيها في تشريح ولالا
وشلون على الكل صراحه
ابي مساعدتكم بكل شي تعرفونه حتى لو كان بسيط
لان لو شفتها نفس قدراتي راح اشد حيلي عشان اخذ نيبت القبول الفوري واشد حيلي بالانجليزي
وما ابيكم تحقروني ترى والله ابي مساعدتهم
اي الكلية فيها مادة تشريح بعض التخصصات ياخذون كورس واحد و بعضهم 2
كلية الطب المساعد كلية علمية طبية مسميات الخريجين فيها اخصائي علاج مهني او اخصائي مختبر سايتولوجي او جينيتكس و هكذا
و الكلية ما تخرج ممرضات و لا سسترات
فيها 5 تخصصات
العلاج المهني و يهتم بالمرضى جسدياً و نفسياً اللي فقدوا القدرة على اداء حركات معينة بسبب حادث او اصابة
العلاج الطبيعي يتعلق بالمرضى اللي عندهم اصابات او كسور او كبار السن و المعاقين اهتمامهم بالجانب الجسدي
العلاج المهني و العلاج الطبيعي عبارة عن اعادة تأهيل للمريض مجالات العمل في المستشفيات و مدارس ذوي الاحتياجات الخاصة
المختبرات الطبية يدرسون 8 أنواع من المختبرات و بعد التخرج يختارون
علم الدم و الميكروبيولوجي و الكيمياء الحيوية و السايتولوجي و الوراثة و الجينات و غيره
دورهم يسوون الاختبارات و التحاليل على العينات اللي توصلهم و يشخصون الحالة
هالتخصص يبيله صبر و طولة بال مثل ما قلت يدرسون 8 انواع من المختبرات
مجالات عملهم المستشفيات و معهد الكويت للأبحاث العلمية و بنك الدم
للعلم السسترات اللي يسحبون لكم الدم و هالسوالف مو خريجين طب مساعد
الطب النووي و الاشعة طبعا محد يستغنى عنها مهمتهم ياخذون اشعة للمريض بأكثر من نوع من الاجهزة من ابسطها وهو الاشعة السينية الى اصعبها و هو الاشعة المقطعية و يشخصون الحالة
ادارة المعلومات الطبية تخصص اداري ماله علاقة بمعالجة المرضى
يتخرجون رؤساء اقسام سيدا على الموظفين بإدارة السجلات بالمستشفيات اغلب دراستهم عالكمبيوتر
مجالات عملهم المستشفيات و احيانا الشركات و البنوك
الدراسة طبيعية مثل باجي الكليات الطبية و مو بالتعقيد اللي يقولون عنه
مثل الطب لا اسهل و لا اصعب
و الكلية مكانها بالجابرية مبنى مركز العلوم الطبية اللي يضم كلية الطب و الاسنان و الصيدلة و تعتبر من التخصصات النادرة
المعاشات و الكوادر حلوة و كل مالها و ترتفع
خريجين الكلية يتوظفون خلال شهر من تقديمهم مو مثل باجي الكليات سنة و فوق
الطب المساعد جزء أساسي من الفريق الطبي الدكاترة و الاخصائيين غيره
و ما في مستشفى يمشي بدونهم
اتمنى استفدتي من المعلومات :eh_s(8):
