طالعه شقه يديد وماعندي خبره ساعدوني

[أم سارا]

صباح الخير توني مأجره شقه وقاعدين نأثثها ونتشرى المهم امس كنا بيوركا وحدي احترت بالثلاجه ريلي يقول ناخذ اكبر حجم ونستغتي عن الفريزر وانا اقول ناخذ وسط وناخذ فريزر طبعا اختلفنا وما شرينا وحتى الجوله احترت بحجمها انا ابي 6 عيون واهو يقولي اخذي 4 عيون شدعوه وايد صغيره طبعا انا شاريه فرن كهربائي ما استغنى عنه بصراحه متعوده عليه فهو يقولي عندج فرن اشتري جوله صغيره ساعدوني بنات ما ابي اشتري واتوهق للعلم احنا عايله 5 افراد وخدامتين

 

[Killer^Girl]

الفريزر مهم
اول ماسكنت كنت ماخذه ثلاجه بس وتوهقت الفريزر مايكفي وكنت كل اسبوع اييب الماجله تعب علي
اخذي ثلاجه وسط وفريزر وسط
الجولة انا مثلج ماحب 4 عيون احس ضيجه حيل
خذيت 5

والله يبارك لج انشالله

 

[أم سارا]

مشكوره ياقلبي

 

[الأمل لحظه]

احس لازم فريزر لان المثلجات اذا بتشترين كميه وانتم عايله مو صغيره ماراح تكفي فريزر الثلاجه ولويه اذا كل اسبوع بتروحين للجمعيه
ومبرووك الشقه الجديده

 

[&موناليزا&]

عزيزتي رفع لعيووووووووونج

 

[مذهلة 78]

حبيبتي مهما كانت الثلاجه كبيره فريزرها ما يكفي انا ثلاجتي كبيره بابين نص ثلاجه ونص فريزر ومع جذي شريت فريزر كبير الفريزر راح تحتاجيه وباجر رمضان وعندج مفرزنات مثل الكبب والسمبوسه وغيره وغيره بالنسبه لي الفريزر شي ضروري صراحه والجوله لازم 6 ارهى واوسع ام 4 عيون ضيجه ما تقدرين تحطين لجدور يم بعض

ومبروك الشقه الجديده

 

[Hello_kitty]

اذا شقه صغيره وانتو ماعندكم ذيك العزايم الكبيره افضل ثلاجه فيها فريزر كافي تغني عن الفريزر..لأن الفريزر يبيله
مكان ومطبخ خارجي عالأقل..والجوله مثل ما قلتي افضل ام ست عيون

 

[Q8_QT]

الثلاجة ماتغني عن الفريزر انا عندي ثلاجة وسط وفوقها الفريزر ماتكفي الصراحة واحنا ٣ وخادمة فأفضل تاخذين فريزر وثلاجة والجولة ٦ عيون احسن

 

[قنــــــــــوت]

فريزر وثلاجه ..

لا تغامرين ابدا وتخلين الفريزر

والجوله انا اأيد ريلج 4 كافي .... مادام عندج شوايه ....

 

[ام نواااف]

اسكتي انا متلعوزه بس ثلاجة ولا بس انا وزوجي ماتكفي كلش

الدياي
مرات اييب شوية لحم
السمبوسه
الخبز<<<<<< مسويلي زحمه
الهمبرجر
الشبس

ومرات ابحط شغلات مجمده ماتكفي

قاعده اقنع زوجي اييب لي فريزر رافض كلش يقولي شحقى جايب ثلاجه كبيره اف قهررررر

 

[أم سارا]

مشكورين بنات وايد استفدت انا احب الشي الراهي دام بشتري اشتري شي يكفيني للمستقبل باجر تكبر العايله وباجر رمضان لازم فريزر حتى لو ضغير

 

[مرت بوعلي]

:


up


:

 

[هونها يارب]

والى انصحج فيه الفريزر الطوالى اريح وتعرفين وبن تحطين اغراضج

 

[ديانا سبنسر]

جولة ٤عيون لاتاخذينها عن تجربة اخذي ٥ او ٦عيون

 

[الشيخه فطامي]

حبيبتي قصدج ثلاجه كبيره بدون فريزر شلون

لا تستغنين عن الفريزر في ناس عندهم الفريزر اهم من الثلاجه كل شي يجمدونه

انا عندي ام 4 عيون برمضان من اللويه تحوسين ودي اغيرها مادري انه في بو 5 عيون

بس اشوف ام 6 عيون الغالبيه ما يستخدمون اللي بالنص يكون كبير او يحرق الجدور النار عاليه

اذا لقيت 5 عيون كلهم صغار مو طواليه احسن

 

[أغلى حبيبه]

منزل مبااارك حبيبتي

اول شي لااازم الفريزر وثلاجه وسط

والجوله اخذي ٥ او ٦ عيون ياايج رمضان الجوله ماراح تكفي ضيييج

 

[صمت المرافئ]

أول شي مبروك الشقة اليديدة
اخذي ثلاجة كبيرة
وسط ما تسوي شي
خاصة انكم عايلة من خمس اشخاص
وراح تكفيج لسنوات جدام ان شاء الله
بدون لا تضطرين تشترين أكبر بعد جم سنة
واخذي فريزر وسط يكفيج خصوصا مع فريزر الثلاجة
بالنسبة للجولة اخذي أم 5 أو 6 عيون
الأصغر راح توهقج بالطبخ
وما تخلصين طبخ بسرعة
​

 

[om MaRyooM]

مشالله انتو مو شخصين عشان تاخذون كلشي حجمه صغير

كل شي اخذوه كبير ان كان فرن ولا ميكروويف ولا غسالة ونشافة

عشان بعد فترة لايظيج عليكم وتضطرون تشترون مرة ثانية حرام




ومنزل مبااارك ان شاءالله

 

[البرنسيسه77]

بالنسبه للجوله اكيد اخذي الكبيره 5 عيون لكن الثلاجه علي حسب مساحة المطبخ عندج
اذا يكفي فريزر وثلاجه اكيد اخذيهم اثنينهم واذا ما يكفي اخذي الثلاجه اللي فيها فريزر

 

[رحيق]

عن تجربتي الفريزر مهم على حسب عددكم ما اتكفي ثلاجه وحده لازم ثلاجه وفريزر

والجوله الافضل 6 عيون