ضيفه من الإمارات و محتاجه مساعدتكم ضروري =)

[حور الأعيان]

السلام عليكم ورحمة الله وبركاته



بدايه أهنيكم بمرور 50 سنه استقلال و 20 سنه تحرير و ربي لا يغير عليكم و يحفظكم إن شاءالله

شخباركم خواتي

عزيزاتي ،، الصراحه انا جريب بزور الكويت و بتكون هالمره الثانيه لي فيها ،، لـ اللأسف المره اللي فاتت ما قدرت اتسوق كلش ،، و صديقتي الكويتيه ما فهمت علي وين ابى اروح و شوه اشتري فـ قضيتها فر فالأسوقه الين طاحت ريولي ههههه و رجعت تعشيت و اليوم الثاني رجعت بلادي

خواتي ،، انا حابه اشتري مجموعة جلابيات اممم اللي تكون قطعه وحده تسمونها دراعه اتوقع

بس بغيت الشغل يكون حلو و مرتب و بسيط مااحب الشغل الأوفر ،، بغيت اشتريهم هدايا لـ خواتي و خوات زوجي ،،

بس مااعرف وين اسير ! ،، و اتمنى احصل اسعار مناسبه لأنه ميزانيتي مو كبيره وبعد ابى اشتري هدايا للصغار البنات و الأولاد بس مااعرف مافي شي في بالي ،،

ابغي مكان فيه الدراريع + بجايم + بلوزات ،، محلات بسعر الجمله و اتمنى تكون خامات حلوه مش اي كلام


و ابغي اعرف محلات الحلويات عندكم ،، الحلويات الكويتيه بس تكون مضبووطه و تقريبا ً لو ابغي اشتري بالعلبه او البوكس ،، كم يكلف ! و شوه احلى شي اقدر اشتريه كـ هديه !


شوه بالنسبه لـ المشاغل عندكم ! هل هي غاليه او رخيصه ! انا رحت مشغل أنسام الخلف و كان غااالي و ما خذت منه شي شفت انه الآسعار مبالغ فيها و ما حسيت في شي يناسب ذوقي مع كل احترامي لشخصها الكريم ،،

فـ شوه المقترحات بالنسبه لـ المشاغل !

و هل بيكون في هالفتره شي معارض أقدر أزورها ! انا بيكم لمدة 3 أيام فـ أتمنى احصل شي يناسب وقتي


شوه اقتراحاتكم لـ الهدايا !

بعد اممم ،، انا عندي بزنس صغير تغليف هدايا و توزيعات وين بلقى عندكم محلات تخص هالأشياء بس تكون اشياء حلوه و بسعر الجمله !

زيارتي بتكون من تاريخ 11 الى 13 مارس

أتمنى تردون علي ،، ما باقي شي على سفرتي

أنتظركم خواتي

أختكم أم عبدالله

 

[طيفك يناديني]

رد : ضيفه من الإمارات و محتاجه مساعدتكم ضروري =)

والله يا اختي مو في بالي شي الحين
ان شاء الله البنات يفيدونج
واذا ذكرت شي ابشري برجع للموضوع
وتنورين الكويت ياقلبي

 

[eng^^zozo]

رد : ضيفه من الإمارات و محتاجه مساعدتكم ضروري =)

حبيبتي والله الكويت صايره غاااليه حيييل ..

يعني اذا بتاخذين لليهال اخذيلهم لعبه .. بدله .. سوالف جذي

والدراريع شوفي المعارض عندنا ماشاء الله البنات مو مقصرين كل يوم وحده طالعتلنا تصمم دراريع شوفيهم ان شاء الله يعجبونج ..

والله انا مو فبالي شي الحين كلش بس ان شاء الله البنات يفيدونج

 

[ذكرياتي غير]

رد : ضيفه من الإمارات و محتاجه مساعدتكم ضروري =)

مرحبـــآ حبــوبـه

بتنـور الكــووويـت بوجودج

شوفي حبـوبه

بالنسبــه للدراريـع المعارض يفتح معرض ويسكر معرض يعني لا تحاتين وفيها شغلات تجنن :eh_s(7):

وعنـدج معرض الروضان بمنطقة المنقف هذا على طول مفتوح وفيه الرخيص والغالي

وهم تفتح معارض من وقت لي وقت بس ماادري على حزة جيتج تكون مفتوحه ولالا مثل معرض افكاري ومعرض الرقعي وهم عندج سوق البلوكـآت بالمباركيـه خاماته حلوه وفوق بالطابق الثاني فيه خياطين شغلهم كله مثل المعارض وارخص ..

وعنـدج بالنسبة لمحلات تغليييف الهدايا والتوزيعات اللي تنباع بالجمله عنـدج محل اسمه بياع الورد محل كبيير بالسرداب بمنطقة حولي وفي محل ارخص منه بعد اسمه مركز السرير بالسرداب ..

وعندج محل حلويات اسمه لاكاشيت بمنطقة الفحيحيل بالسرداب مال المحل فيه تغليفات وتوزيعات هدايا بس شوي غالي ..


وإذا تبييين بلايزوبجايم وشغلات حلوه وبنفس الوقت رخييصه محل سيتي ماكس بالأفنيوز وبالفحيحيل

وبالنسبه للحلويات ما اشتري من المحلآت كل من الحريم وفي موضوع هني مصورين الحلويات اللي شارينهم من الحريم وحاطين الارقام تقدرين تاخذين منهم بس ما ادري باي قسم الموضوع ان شاء الله البنات يحطونه لـج وإذا حصلته بحطه لج ..

وحيــآج الرحمـن بديــرتج الثانيه والعيـن أوسع لج من المكان يا بنت خليييفـه ^ـ^

وبصراحة أول مره هالسنه أشوف هالعدد الكبييير من الاماراتيين عندنا بالديره
ويفرحنا انهم يشاركونا افراحنا والله نستانس لا شفنا سيارات دول الخلييج بالديره :ggdw:

واي شي تبيينه لا يردج الا الكيبووورد

( لاتنسيـني من دعـآئج بالنسبه العالية اللي تفرحني وتفرح أهلي ) ​

 

[ذكرياتي غير]

رد : ضيفه من الإمارات و محتاجه مساعدتكم ضروري =)

ونسييييييييت اقــولج بيفتـح معرضالعطور والمكياج بأرض المعارض بمشرف حيييل حلو وتقدرين تاخذين منه هدايا

لان يسوون عروض ع العطور والمكياج وفيه كل محلات العطور حتى اللي مو موجوده بالكويت

وهو راح يفتح بشهر مارس واحتمال يكووون بالفتره اللي بتجين فيها

استفسري عنه اذا فاتح ولالا إذا وصلتي الكويت

وبنـآت اللي تعرف متى يفتح تكتبلنا هنــي ...@...

إن شاء الله أكون أفدتـج

 

[Business Girl]

حياج الله بديرتج الثانيه الكويت

بالنسبه حق الدراريع ( الجلابيات ) انصحج تروحين البلوكات بالديره شوفي كل المحلات وصعدي فوق راح تلقين اللي يعجبج انشاءالله واسعارهم معقوله واغلب المعارض ياخذون منهم

وبالنسبه للمشاغل نوعا ما اسعارهم غالية صراحه ..

وانشاءالله البنات يفيدونج

 

[راعية الخير]

هلا حيبتى وحياج الله بالكويت....الدراريع الحلوه بالبلوكات فوق عند الخياطين وبعد فى بمجمع العربيد بالفروانيه بس الاحلى بالبلوكات / البجامات موجودين فى سوق السالميه الاحمر / الحلويات عند الشمالى والوطن بسوق الديره وفى محل بالمطار للحلويات الكويتيه / احلى المعارض بالنسبه لى المعارض اللى يم المستشفى الاميرى وتقدرين اطلعين عناوين من جريدة الوطن متروسه اعلانات معارض / مجمع الحمرا مول - مغاتير مول بالفروانيه / مجمع النقره الجنوبى والشمالى فيهم اشياء وايد حلوه وعمليه واسعاره مناسبه / ممكن اتحصلين اغراض التغليف فى محل بالرى عند لولو ماركت كبير ومتنوع وبعد فى محل يمه اسمه سيتى ستار بالسرداب وايد حلوه اتمنى اني افدتج وحياج الله يالغاليه

 

[قمر الكويتية]

بالنسبة للنقطة هذي

(( انا عندي بزنس صغير تغليف هدايا و توزيعات وين بلقى عندكم محلات تخص هالأشياء بس تكون اشياء حلوه و بسعر الجمله ! ))

عندك محل بياع الود بحولي عندي شغلات وايد و فيه مديلات حلو ،،،، بسر سعره مو رخيص لا أسعارة عادية ،، بس ممكن تحصلين أشياء عنده أسعارها مناسبة

وصح نفس ما قالو البنات لكويت كلشي فيها غالي

 

[ام التاريخ]

اب اب اب

 

[حور الأعيان]

مشكورين خواتي والله ما تقصرون

إن شاءالله ألقى اشياء جاهزه للشراء لأني مااحس إنه عندي وقت أفصل وانا أفكر أشتري الدراريع بالجمله عشان يطلع أرخص علي بس عاد بيعطوني بالجمله في المعارض !

أخاف عقب كل ها ريلي يكشت فيني و ما يوديني المعارض هههههه


بالنسبه للمعارض وين أقدر استفسر عنهم و عن اوقاتهم !

و موضوع الأكل اللي تشترون من عند الحريم وين بلقاه ! في اي قسم


و مشكورين للرفع ،، و أتمنى المزيد من المعلومات =)

 

[ديناا كوليكشن]

حياج الله عندي بالمشغل في البيت

دراريع مميزة وراقية وراح يعجبج السعر اي استفسار رقمي بالتوقيع

 

[qa6wa_q8]

بتنـور الكــووويـت بوجودج

 

[قمر الكويتية]

موضوع الأكل اللي تشترون من عند الحريم وين بلقاه ! في اي قسم


روحي فوق أول شي أسم القسم

قسم بيع المنتجات الغذائية والهدايا و التوزيعات

 

[حور الأعيان]

هلا خواتي والله ما تقصرون و هذا العشم فيكم =)

الغاليه ديناا في مجال اشوف صور من الدراعات اللي عندج !

,

الغاليه قمر ،، رحت القسم بس ماعرفت اي موضوع ياريت اسم الموضوع


،

خواتي شوه بالنسبه للمعارض عندكم ،، المعرض السوري متى يفتح !

 

[<miss botamba>]

الدراريع الجاهز و الرخيص نوعا ما بالفروانيه مجمع العربيد بجانب جمعيه الفروانيه

هذا انا كنت اروح له بس ما اشتري منه انا اوديله الخام و التصميم واهوا يخيط و يطرز لي

الجاهز عنده تلاقين على 10 و فوق مادري اذا اسعاره زادت لان من زمان مارحت

تلاقين عندهم الزين والشين لول الصراحه اهوا حسب الذوق

روحي يمكن يعجبج




عندج بعد مثل ماقالوا البلوكات ومكانهم بالصفاه بجانب البنك الاهلي المتحد

هذا مكان كله خامات و خياطين وكلف والي تبين بلوازم الخياطه تلاقينه هناك واذا صعدتي فوق كله خياييط و عندهم بدل جاهزه نفس اوقات الي تنباع عند المعارض

للامانه انا ماشفت بس سمعت ومره اختي قالت لي



الحلويات الكويتيه

من وجهه نظري الافضل بدون منازع حلويات الوطن

تلاقينهم بكل مكان تقريبا والافضل تروحين لهم بالمباركيه

ممكن تشترين منهم بالكيلو سواء للزلابيه او الرهش او الحلوى .. الخ

او عندهم علب او طاسات ستايل اول ينفع للهدايا و اسعاره مناسبه


او انا مره رحت بالمباركيه عند سوق السلاح في محلات تبيع مواعين قديمه باسعار مناسبه شريت و انا رحت مال حلويات الوطن و قلت له يحطلي فيهم وشريت صواني و سويت شغلي بنفسي

يعني اذا عندج وقت سوي نفسي يطلع اكشخ من شغلهم بس اهما طاساتهم زينه بس اذا تبين شي كشخه اشتري صوانيج بروح




المشاغل و المعارض ما اعرف




البجامات احسن شي روحي سوق بيروت فاشن ميل هذول كد ومد مايخربون مع الغسيل
او عندج سوق السالميه هم عنده بجامات وعندهم هدوم حلوه باسعار مناسبه
وبنفس السوق في آلدو و ناين ويست يبيع ستوكات الجواتي باسعار رخيصه


هدايا اليهال اشتريها من المباركيه بعد عندج سوق بو 100 خمطي منه الي تبين اشكال و الوان وعندهم العاب اسعارها مناسبه

في بعد بو 100 بسوق السالميه



انصحج بعد تروحين سوق الجمعه موجود في منطقه الري خلف المشاتل عند سوق الحمام و المستشفى البيطري

هذا كل شي فيه باسعار رخيصه

تلاقين اشياء للهدايا بما ان ميزانيتج مو كبيره


عندج بعد البلوزات والبجامات النقره الشمالي و الجنوبي موجودين في حولي




هالاماكن اكثر شي انصحج فيهم علشان مايضيع وقتج و كله اذا زارونا ضيوف من بره و تكون ميزانيه مو كبيره نوديهم الاماكن ويكيفون عليها

 

[ديانا سبنسر]

الدراريع الجاهزة وسعرها معقول وتصلح هدايا عندج محل شحليلة وسارا بالخيمة مول بمنطقة الجهرا

والحلويات الوطن

 

[حور الأعيان]

مشكورات خواتي

انا ميزانيتي 4500 درهم إماراتي بالكويتي كم يصيرون !

و هل هالميزانيه بتكفيني !

 

[<miss botamba>]

تقريبا 340 دينار

اممم ممكن تكفيج اذا رحتي الاماكن الي قلت لج عنها

النقره الملابس عندهم على 5 - 6 اوقات 10 دنانير

نفس الشي سوق السالميه

لان خياط الكويت


الهدايا انصحج عيل تروحين سوق الجمعه

الحريم والبنات الكبار اشتري لهم ساعات او اكسسوارات من هناك وممكن تكاسرينهم


عندج بالمباركيه شالات خفاف مقبولين



شوفي اول يوم روحي سوق الجمعه اهوا يسكر الساعه 7 على ما اعتقد حوسي فيه كله

واذا خلصتي روحي المباركيه

اليوم الي بعده الصبح روحي النقره حق الملابس و بعده مجمع بيروت حق البجايم هذول بحولي طلعي منهم وروحي سوق السالميه

واليوم الاخير خليه للفروانيه

روحي العربيد و في مولين هناك تحصلين ملابس رخيصه (الحمرا و اكو مول ثاني بعد يمه)

 

[حور الأعيان]

زين أختي بالنسبه للفنادق ،، شوه من الفنادق الأوكيه و اسعارها مقبوله ! و تكون صدق نظيفه

انا المره اللي فاتت حجزوا لنا في فندق قريب من السوق و شارع المطاعم اللي اذكره يوم كنا ننزل تحت نروح نمشي الستي سنتر اتوقع كان جدامنا على ما اذكر

بس ما حبيت الفندق كان قديم و رخيص و ابدا ً ما كان مريح وايد ضايقني انا اهم شي عندي النظافه خصوصا ً الحمام وانتوا بكرامه

 

[<miss botamba>]

والله ما اعرف بالفنادق بالكويت

روحي قسم الاستفسارات السياحيه او روحي قسم السياحه في وطني الطويت هناك يفيدونج

او روحي منتدى العرب المسافرون قسم الكويت