مرحبا بنات
اليوم يايتكم ومعاي اول رواية اكتبها
هي رواية واقعية صارت لبنات قراب مني حيل .. بس طبعا غيرت في بعض الاحداث وزدت بعض الاحداث ونقصت بعضها لزوم ان محد يعرفهم
وان شاء الله تكون بداية زينة بإذن الله ثم بتفاعلكم
---------------------------------------------------------------------------------------------------
في البداية هذي الرواية تخص مجموعة صديقات (تقدرون تقولون خوات) هم من اعز الناس على قلبي
واهم ابطال الرواية
بالأول بعرفكم على كل وحدة من ناحية الشكل والشخصية عشان وانتو تقرون تقدرون تتخيلون
لمياء: قصيرة، جسمها مناسب لطولها ، حنطية، عيونها ماشاء الله وساع وهذا الي مميزها ، وخشمها صغير
لمياء عنيدة وايد وصريحة زيادة عن اللزوم ،، تقول الحق في كل الاحوال حتى لو هالشي بيزعل الي جدامها ،، بس حنونة واي احد يحتاجها يلقاها يمه
روان: طولها متوسط ، مليانة شوي بس هم وزنها مناسب لطولها ، بيضة، وشعرها بني كيرلي، وعيونها عسلية واسعة
روان وايد طيبة وعلى نياتها ، وهالشي ممكن يصل لحد السذاجة في بعض الاحيان ، اتداري الكل وتهتم في الكل لدرجة ان لمياء دايما اتقول لها انتي أُمنا
رؤى: هم طولها متوسط ، ضعيفة، بيضة ، شعرها قصير وناعم ولو بتسألوني في ذيج الفترة لونه بقولكم اني ماذكر لأن كل جم شهر كانت تصبغه ، عيونها سودة ومرسومة
رؤى كوميدية وايد ، الي يقعد معاها مايحس بالملل كلش ، دايما تحسس الي معاها ان الحياة سهلة وبسيطة حتى لو في امور صعبة يعني تستسهل كل شي
عقلها كبير ونصيحتها في وايد من الاحيان تكون في مكانها
عليا: طولها متوسط ، وجسمها ما شاء الله حلو (رشيقة) ، بيضة ، شعرها كستنائي ناعم وطويل ، وعيونها بنية
عليا عكس كل بنات القروب ، وااايد حساسة ، وااايد خجوولة ، طيبة حيل ، وشوي فهمها بطيء وهذا الي تعاني منه لمياء بالذات عشان جذي كله يتناجرون
ريما: قصيرة ، ضئيلة ، يعني الي يشوف جسمها يقول عنها بالابتدائي لكن ملامحها كلها انوثة ، بيضة ، شعرها اسود لنص ظهرها ، وعيونها سودة
ريما شخصيتها شخصية استهبال وضحك ،، طيبة لدرجة الغباء والسذاجة وتصدق اي شي ينقال لها (يعني ينقص عليها بسرعة) ،، وهوايتها انها تواسي الناس ، يعني الي متضايق ويروح يفضفض لها يرتاح ، روحها وايد حلوة واحلى شي فيها انها ماتزعل ابد .. الا طبعا من المواقف الي تتطلب الزعل
والحين .. تبتدي قصة هالبنات .....
في احدى المدارس الثانوية بالبحرين .. وبالتحديد سنة 2005
بعد مارن الجرس معلن عن وقت الطابور
لمياء: اوووف شهالملاقة كل يوم موقفينا بالشمس من صباح الله هذا غير الاذاعة الي بيصكون راسنا فيها
عليا: اي والله صاجة .. عسى بس مايسوون تفتيش وانا اظافري طول ويهي
لمياء: عاد مصخوها .. عسى ما استانست انهم طولو ردينا قصيناهم
الابلة : بس انتي وهي الحين بتبتدي تحية العلم
بعد ماخلصت تحية العلم .. يات روان متأخرة ووقفت بالطابور
لمياء: صباح الخير حجية .. توج مشَرفَة حضرتج .. واحنا من ساعتين واقفين بالشمس
روان : وي قلعتكم محد قالكم اتييون امبجر
في الاذاعة البنت قاعدة تلقي كلمة ومحد داري عن هوا دارها ..
عليا: ريما ورؤى وينهم ليكون بيغيبون لأن عندها اختبار اليوم؟
روان : لا ماتعرفينهم .. كله متأخرين ذولي
الابلة في الاذاعة : والحين تفتيش على البنات المخالفات
لمياء : ياصبر أيوب على بلواهـ .. لازم يعكرون مزاجنا من الصبح
.. بدو الابلات يفتشون على ألوان الجواتي ( وانتو بكرامة) والاظافر وألوان الشباصات وطبعا على الموبايلات
الابلة: عليا ولمياء وبعدين معاكم انتو وسالفة هالاظافر لازم كل مرة نعيد نفس الحجي يعني .. انتو بآخر سنة فارقونا بذكرى طيبة ع الاقل
عليا ساكتة ( هي طبعها ماتعرف ترادد وخجولة) عكس رفيجاتها
لمياء: ابلة عاد ماصارت .. احنا حياتنا مو كلها بالمدرسة .. خو احنا نعيش برة بعد نبي نصبغهم نبي نخليهم حالنا حال البنات
الابلة : بس انتو طالبات لا تنسون هالشي .. لحد يناقشني بتقصصونهم والا توقعون تعهد
لمياء : ها علوي شرايج؟
عليا: انا اقول نكسر الشر احسن
لمياء: زين ابلة عطيني المقراض ( قصاصة الاضافر) شنسوي بعد حكم القوي
روان : تستاهلون .. اشوى ان اضافري مايطولون بسرعة ههههههههههههههههه
بعد ماخلص الطابور والتفتيش رجعو الطالبات لصفوفهم ..
روان : ريموووو ، رؤى .. فاتكم شكل علوي ولموي واهم يقصصون اضافرهم ههههههههههههههههههههههه
لمياء: انتي جب احسن لج
رؤى : كان تفتيش؟
عليا: اي قطيعة
رؤى : اشوووووى الحمد لله ييت متأخر وتسحبت للصف بدون مايجوفوني الابلات.. جوتيي فسفوري ههههههههههه
ريما : اناااااا الي اشوى ييت متآخر .. يايبة موبايلي معاي
رؤى: انتي متى تيوزين .. ليش اتييبينه معاج عندج اياه بالبيت 24 ساعة
ريما : مادري قلت اذا فضيت بالفسحة ادق على عمر
لمياء: قطيعة ياكرهي له
ريما : اوووهـ لموي حرام عليج .. ولا تقولين قطيعة ترى ازعل
لمياء: اقووول جب زين
عليا: وانتي كله اتجبـبـين الاوادم
لمياء : (خزت عليا) وتووها بتتكلم ...
عليا: زين زين انا اسفة
لمياء: اي عبالي بعد
رؤى: لموي .. تصدقين دايما احس روان تضحك بس متضايقة .. تهقين صاير معاها شي؟
لمياء: مادري ياختي .. بعدين بكلمها
بالفسحة....
لمياء: روان خلج لا تطلعين بكلمج شوي .. بنات روحو شوي ولاحقينكم
الكل طلع من الصف .. وبقو روان ولمياء بروحهم
لمياء: روان حبيبتي شفيج ليش احس مالج خلق حتى اذا تضحكين مو من قلبج
روان: (بدت الدموع تتجمع بعينها) لموي مليت من وضعي بالبيت .. مليت من ابوي ومرت ابوي .. مليت من اني ماقدر احس اني في بيتي
لمياء: زين حبيبتي ليش ماتروحين تقعدين عند امج
روان : ( بجت زود) لأني مابي اكون في نفس المكان مع ريل امي
لمياء: ليش انزين؟ ريل امج مو طيب؟
روان: (سكتت وجنها تذكرت شي ) ورمت روحها بحضن لمياء وقعدت تبجي
لمياء: روان قوليلي الصج اهو سوالج شي صح؟
روان: مادري لموي مادري شنو يقصد من تصرفاته بس بديت اخاف منه .. حتى اذا اسلم عليه يلمني بطريقة تخلي شعر يمبي كله يكش يلزق جسمه بجسمي .. أوهـ لموي مادري مادري
لمياء : (وهي مصدومة) انزين انتي ماقلتي حق امج؟
روان: مرة حاولت ابين لها قالت لي يتراوى لج ويتهيأ لج .. يعني يا تجذب علي يا على روحها يا مو مصدقتني
لمياء: والحين مرت ابوج شفيها معاج؟
روان: تبي كل شي يصير بالبيت على كيفها وتحت امرها .. مو كأن انا لي حق في هالبيت .. وأبوي متعبني زود مو قاعد يسويلها شي .. وانا كله بين اربع طوف في هالبيت
لمياء: خلاص حبيبتي لا تتعبين نفسيتج وحطي حيلج بالدراسة الميد تيرم جريب
روان : (وهي تمسح دموعها) ان شاء الله
توهم بيطلعون لمياء وروان من الصف الا بدخلة ريما
لمياء: ريمو شعندج رجعتي ماكليتي؟
ريما: ها؟ اي امبلى كليت
لمياء: عيل شحقه رجعتي
ريما: بتصل حق عمر دام ماكو احد بالصف
لمياء: تبين تتكفخين اليوم؟
ريما: اووهـ لموي شوفي باجي البنات الكل اييب تلفونه معاه .. نص الصف يكلم يات علي
لمياء: بس مو نص الصف يدق للسعودية
ريما: شالمشكلة البحرين والا السعودية
لمياء: ريما لو هو صج يحبج ع الاقل بيدق عليج .. اذكر مادري من جم شهر اخر مرة هو الي دق
ريما : (تضايقت): ماعليه انا راضية انتي شعليج
لمياء: شنو راضية ليكون مصروفج ألف انتي عشان كل يوم تدقين للسعودية
ريما: خلاص لموي .. خليني على راحتي
طلعو روان ولمياء للساحة ..
ريما تدق على عمر ..
ريما : صباح الخير حبيبي
عمر: صباح النور حياتي
ريما : نايم ؟
عمر: اي والله نايم
ريما: انا يبت موبايلي معاي للمدرسة عشان بس اسمع صوتك الصبح
عمر: فديتك انا .. شخبارك؟
ريما: الحمد لله .. مشتاقة لكـ
عمر: وانا اكثر
نأسف لقد استنفذت المبلغ الموجود في حسابك حاليا .. يرجى اضافة مبالغ جديدة اليه .. شكرا
ريما: حبيبي بيقطع الاتصال خلص رصيدي .. بس انا احبكـ وايد وايد
عمر: وانا بعد احبك مرة
طوط طوط
ريما: (والله احبه بس ليش احس اني احبه اكثر مما هو يحبني؟ ليش مايدق علي ولا يسأل عني؟ ليش دايم انا ليش؟ ) الله كريم
.. لهني خلص اول بارت .. هو صج قصير حيل بس ان شاء الله البارتات الياية تكون اطول وطبعاً على حسب الاحداث بعد
انطر ردودكم
التعديل الأخير:
