صدقة إطعام الطعام

[سارة راشد]

لما كنت عايشة مع جدتي ايام كتير كان اوقات بيمر علينا ظروف صعبة
ان مافيش فلوس مثلا خالي مبعتلناش الشهر ده عادي زي كل البيوت بيجي وقت مافيش فلوس
مكنتش اعرف هي بتتصرف ازاي طبعا و لا عندي فكرة
بس في يوم فاكراه كويس قوي
كان كيس فلوسها اتسرق في السوق باللي فيه و مكانش في البيت كله غير 5 جنيه
بصراحة و هي بتبص في الدولاب عنيها دمعت لدقيقة كده و بعدين عملت حاجة كانت هتجنني !!
قالتلي انزلي اشتري ربع كيلو عدس و عشر بيضات
نزلت و انا فاكرة ان ده اكل لينا ..
بس هي اخدت العدس طبخته و عملته حلو قوي ريحة الزبدة كانت طالعة منه و سلقت البيض
و حطت معاه ورقة فيها ملح و فلفل و سخنت كام رغيف كانو عندنا
وخدت ده كله و نزلت الشارع ادته لجماعة غلابة
كنت هتجنن و اقولها طب كنتي سيبيلي بيضة حتي ..
انتي مش بتحبيني 
قالتلي اصبري شوية
و خدتني و طلعنا البيت كنا وقت قبل العصر نمنا شوية و صحينا علي خبط جامد علي الباب !
واحد صاحب خالي رجع من السفر و جايبلنا معاه فلوس و حاجات كتير حلوة
عشر دقايق عدو كمان و الباب خبط تاني ..
عيل من اللي بيقعدو في السوق قالها ان كيس الفلوس بتاعها وقع قدامه و مكانش يعرف بيتها
يومها جدتي قالتلي اللقمة تزيح النقمة ..
كل ما تضيق بيكي و تلقي روحك مخنوقة اطعمي فقير او محروم
طيب اشمعني العدس يا ستي ؟!!
العدس ربنا ذكره في القرأن للي ماشبعوش من اكل الجنة
و كمان انا بقدمه للناس علشان انا بحبه
قدمي للناس من اللقمة اللي بتحبيها علشان ربنا يحلي زادك و يفك كربك
جدتي في الشتا كانت بتسلق بيض و توزعه سخن علي عساكر المرور اللي بيقفو في الشارع و الراجل اللي بيكنس
و الله ما شفت متعة اكتر من اني اعمل أكل بإيدي و اقدمه لحد
جربوها و انتو مخنوقين و هتتفاجئو من النتيجة
إطعام الطعام صدقة
#جدتي

 

[حديث الروح]

ياه. قصة جميلة لها وقع على القلب
الله يجعل عمل جدتك في ميزان حسناتها ويغفر لها ويرحمها
صحيح الله يفك ضيق كل من يفرج عن مسلم كربة
حياك الله في المنتدى

 

[المحاميه ن]

رحم الله جدتك وغفر لها ومرحباً بك معنا في كويتيات

 

[رونق ضحى]

اهلا بك أختي في كويتيات
وجزاك الله خيرا
ورحم جدتك وجزاها خيرامن فضله