انا اقولج كوني فريت على صالونات الديرة كلها :
1- تختارين مكان سنع اهم شي منطقه سنعه يفضل بالعاصمه جان زين صالون ذرب بمناطق الداخليه اريح من البعيدة صراحه واهم شي في مصافط
مو بس اسمي فتحت صالون والسلام ؟؟؟ يعني في صالونات حلوه بس الزباين ما يلقون مصافط ولا مكانها غلط ونص الزحمه
2- الاسعار وااايد غاليه صارت بصراحه الاغلب يروحون حق بعض المناطق
مثل رقعي ولا حولي ولا العاشره يبون الرخص وفي صالونات ما اقولج
شغلها حلو ورخيص بس تكون اعمال صالون معينه
مثلا صالون اللي سعره رخيص يكون شاطرين بس بالحف وصبغ شعر وباقي الاعمال مو ذاك الزود عرفتي
3- الحمام المغربي هذا اتوقع شغل شاغل البنات يفضل يكون شرح ووسيع من داخل
ويكون حمامين مو بس واحد ويصفون دور عليه
وتكوونين يابه الخلطات المغربيه الصح مو اي كلام مثل اهني بكويت
تحط لج 3 خلطات ورا بعض ولا تقعد الزبونه نص ساعه بالبخار
لما تختنق وتموت وهالسالفه صارت بالجابريه اللي ماتت وحده داخله ويموها
سكروا كل المغربي اذا ما خاب ظني عندهم
4- الحف تختارين هنديات سنعات يعني اللي تحف الحاجب الشاطره
تخلينها بس للحاجب وتخلين ثنتين للوجه
انا استغرب لما تكون وحده شاطره بحف الحاجب والناس طبعا يقعدون ينطرونها
لما تخلص
شنو العيب انها تمسك وحده وحده وتحف لها ويها كامل ولا تشقر
وبجذي يصير زحمه ويضيع الوقت
يعني الشاطره بالحف وعليها طلب وايد ما تخلينها تحف ويهم تخلين غيرها
5- الشيره توفرين نوعين هنديه وغيره وغرف للاعمال
6- والله حلو لو تسوين الحركه اللي محد يشوف الثانيه بالبديكير تخلص شغلها الوحده واهي مرتاحه
وفي صالونات حتى تنسيقهم بالجنسيات يعني تحط لج هنديات للحف
وفلبينيات للبديكير والمنيكير
والمغربيه للشعر والقص والحمام المغربي
مثل العربي يعني عطي الخباز خبزه ،،
7- بالنسبه للاستشوار الشعر اتمنى صالونات توحدون السعر استغرب من بعض الصالونات
لا دقيتي بتسألينهم بجم تستشورون تقولج حسب طول الشعر ؟؟؟
هالمصطلح من وين يايبينه بعرف ؟؟؟
حسب طول شعر واااي اتنرفز من هالكلمه
اي من الاول القصير بسعر كيت
والطويل بكيت
خلصونا ينرفزوني واللي يشتغلون خاصه بصالون معين ماني قايله اسمه ،،،
8- بالنسبه للقعده الدور توفرين مكان يقعدون فيه الزباين مو على بعض كل وحده ما تدرين وين تقعد وتحط اغراضها
9 - وبالنسبه للادوات هذي ما يحتاج انتي شغلتج انج توفرين الاجود والاحسن من ماركات
شامبو الغسيل وغيره وكريم وانبولات شعر قبل الاستشوار وحماماات و شي يجذب الزبونه و كريم بعد الحف وادوات الحف نظيفه وغيرها حتى
اذكر الصالونات الرخيصه اللي يستشورون وعادي بس امشاطهم الله وكيلج شنو هذي اللي بحولي ورقعي اذكر مره رحت لهم وخذت مشط الرول
شاريته من النسايم معاي ههههه مو بس اندقوا انقهروا قتلهم شنو هالامشاط كلها شعر ومتنتفه اسنانها استغفرالله لازم تحرجينهم علشان
يتسعنون لما رحت لهم مره ثانيه اشوف يابوا يدد من بعد ضغاط ههههههههه
10 - في شغله بس بالصالونات اللبنانيه مره شفتها كانت لما تبي تقص حق شعر وحده مسويا لها
برنامج بالكمبيوتر تحط الصورتها وتحط شكلها شلون مع القصه بس يبي وحده شاطره بالمجال
حتى الاستشوار اللي على حسب قصة الشعر حلو مو بس سيده واي كلام مثل اللي عندنا
11- بالنسبه للاهم النيل الاظااااافر ياليت توفرين ادوات خاصه لكل زبونه تقولين لها من البداية
تبين ادواتنا اللي احنا معقمينها ونستخدمها لكل زباين
ولا كل وحده تشتري الادوات لها وتحتفظ باسمها وترتاحين من التذمر اللي يصير
لان وايد صالونات احس يعرفون يسوون ويشتغلون بس العتب على صاحبة الصالون اللي
مالها خلق توفر شي نظيف بس تبي تربح وبس
12 - وصبغ الشعر انا عن نفسي ما اعطي شعري الا حق لبنانية لانهم ذويقات مع احترامي لباقي الجنسيات بس على مستوى الوطن العربي
اهما بالمركز الاول يحبون ويعرفون يطلعون الشي المناسب للوحده مو بس تحرق وخلاص و يفضل اللي تختارينهم يكونون خبره ومتابعين للموضه
وينصحون ويتكلمون بنفسيه حلوه مع الزبونه مو لما تيي وحده تبي تقص شعرها وتكون محتاره شنو تقص يقولون لها
انتي شوفي شنو تبين و انا اقص يعني شوي تعامل واسلوب حلووو يكسب الزباين
وبس اتمنى لج التوفيق لان هذي بعض الاشياء اللي وايد صالونات غافلين عنها
