شوفوا نظرتنا شنو قالت لي؟؟؟

[مزون الحب]

السلام عليكم ورحمته الله وبركاته



شخباركم؟؟؟؟؟؟؟؟؟؟؟؟


كل عادة لازم نجهز دروسنا يوميا ورتين المعتاد لازم في حضور؛ جهزت حلقتي كانت الأهداف روعه وجهزت شغلي حيل حلو ومنبهي حلو باختصار شغلي كامل وحلو
قعدت في بداية الحلقة دخلت علي مشرفة بتحضر والوضع عندي عادي وحضور مشرفه حلو وخفيف؛؛ بعدها دخلت الناظرة (( الناظرة جديدة)) والوكيلة ومدرسة حددددددددددددددددددددددددي انصدمت ماكنت متوقعه نهائيا الحضور عندي.

ارتبكت وماعرفت اتكلم وايدي ترجف واحس بحرارة وجهي احمر ودرسي مقطع وشغلت الحاسوب يساعدني
المهم خلص الدرس وكان فاشل بسبب خوفي
الناظرة موعاجبها نهائيا وشقت ورقة حضوري وقالت راح احضر لج مرة ثانية واجبرررررررررررررتني اقدم درس نموذجي للمدرسات عشان الخوف يروح مني
المشرفة دافعت عني وقالت عني وشاطره ودرسي حلوه وعندي أفكار حتى ورتها دروس قديمة لي ومافيها ولا نقد
وهم الوكيلة امدحتني ودافعت عني
بس الناظرة ماغيرت رايها وقالت الأسبوع الجاي تقدمينه
المشكلة اني اخاف حيل ولا احب اواجه ولا احب الأضواء علي وارتبك واخرب الدرس

شنو أسوي؟؟؟؟؟؟؟؟؟؟؟ أبي حل؟؟؟؟؟؟؟؟؟؟؟؟؟؟؟؟
بليز ساعدوني............
ابي دروس نموذجيه وابي افكار حلوه؟؟؟؟؟؟؟؟؟؟
لا تأخرون علي ............


:0bee2e8d89:

 

[تااضي]

الله يعينج بس الدرس في اي خبرة وشنو بالضبط

 

[lolowawa1234]

ياحلوج
عااادي هونيهاا وبتهووون
الله يلوم اللي يلومج
حضور فجاه مشرفه ووكيله وناظره
بس ردة فعلج عاديه شصااير يعني
اهي الناظره نفسهاا لو ايي ضيف من المنطقه يزور الروضه بترتبك حييل وبتخاف وبترجف
يعني المفروض عذرتج
نصيحتي لج لا تخافين من احد محد يستحق تخافين منه غير ربج
وانتي الحمدلله مرتبه شغلج ومجهزته بس الخوف غلبج هالمره
حاولي انج تراوين الناظره انج خوش معلمه مثلا بالنشاط الصباحي سوييلج مطويه وزعي سيدي خصوصا الخبرات اللي يايه فيها ابداع وحدها حلوه حق هالسوالف او سوي مجله مثلا
اما الدرس النموذجي قويه شوي
من رايي اتحاجين المشرفه..
والناظره نطريها بتحضر لج هاليومين وفجاه فزهبي عمرج
بصراحه بصراحه ينخاف منها دام احضرت لج بالفتره هاذي اللي محد له خلق يجهز درسه والاطفال غياب
بس انتي عن اي خبره تبين ؟؟ وشنو اهدافج؟؟

 

[مزون الحب]

مشكورين حبيباتي انكم رديتوا علي

انا اثبت وجودي جدام الناظرة من زمان وتدري اني شاطرة والكل يمدح فيني وروضتنا شاركت في مسابقة انفلونزا الخنازير وكان شغلي حلو حيل وفزنا بالمركز الأول وشاركت في مناسبة من قبل وشاركت في احتفالات العيد الوطني وصفي حيل حلو ودايما كامل ومرتب حتى مخزن حيييل مرتب وسويت ورشة

كلمت المشرفة وقلت لها الناظرة ماغيرت قالت لا ولازم تقدمينه
على فكرة العام توظفت والسنة هاذي حاطيني مدرسة أ والي معاي قديمات وحدة ب والثالثة ج قلت لناظرة ليش أنا أ والي معاي قديمات قالت انتي قديرة وشاطرة نبيج أ حتى موجهة تبيج أ
والعام الموجهة كانت تبيني امتياز بس ناظرتنا القديمة اظلمتني وحرمتني من الأمتياز (( الله يسامحها ))

ناظرة تبيني اقدم درس نموذجي والمشرفة في خاطرها اقدم درس نموذجي للموجهة وروضاتها بس تدري اني خوافه

انا ابي اجهز نفسي اخاف تجبرني اكون جاهزة؛؛؛ ابي اقدم لاصفي مبتكر وحلو

على فكرة جدولي ثابت اقدم لاصفي واحد الي هو حركية بس قالوا نلغي حركية منج عشان درس نموذجي

 

[Eva-SS]

جم سنة خبرة انتي ؟


انا زمن الخوف ولى بلا رجعه مع اني مو قديمة حيل بس خلاص تعودت هروووونا دخول

بعدين لاحظت اذا محضره نفسي عدل ودرسي حلو استانس اذا دش علي احد حزتها اكون واثقة من نفسي والعكس صحيح

 

[مزون الحب]

العام توظفت (( صار لي سنة ))

انا اخاف واستحي ومااعرف اتكلم من ربكة حتى احيانا يضغوطوني بالشغل ولا اقول شي وامسك فتراتي ووقت راحتي يعطوني احتياط

العام اول سنة كانت بالنسبة لي مأساة ماادري شلون تحملتها

 

[خفايا جرح]

شوفي حبوبه فكري بنفسج محد راح ينفعج ...وعطي طاااااااف ولا كأنه في أحد قاعد جدامج وقبل كل شيء أذكري الله وقولي اللهم أجعل من بينهم سد ومن خلفهم سدا<<<الله يوفقج

 

[مزون الحب]

مشكورة حبيبتي خفايا
احاول اغير شخصيتي واصير جريئة واشيل الخوف بس كل موحاولاتي فشلت
ألحين ساعدوني بالمشكلة ابي درس نموذجي

 

[^ليلاس^]

لا تخافين ولاشي دام ان شغلج حلو واوكي ماله داعي هالرهبه لما تشرحين لا تطالعينهم وجنهم موجودين

ودرسج تبينه عن اي خبره وشنو لاصفي ولا حلقة؟

 

[مزون الحب]

بحاوووووووووووووووول قد ماأقدر أشيل الرهبة

أبي لاصفي حر موشرط مرتبط بالخبرة
أنا عندي أفكار بس من صدمة درس نموذجي أحس عقلي وقف

 

[عبارات العيون]

السلام عليكم ورحمة الله وبركاتة

حبيبتي مزون الحب بما انج واثقة من نفسج وواثقة من دروسج وطريقت تقديمج هذا شي حلو

وثاني شي منو تكون الناظرة ولا الوكيلة ولا حتن المشرفة شنو بقصون راسج قدمي اللي عليج والباجي علي رب العالمين

حبيبتي انا ما عاد يهمني اي شي تدرين ليش لان مافي شي يستاهل اتعبين عمرج وتخوفين نفسج علي شانة كلها وزارة تربية واذا لاحضرو لج جنهم مو موجودين جدامج ولا تهتمين بوجودهم

حبيبتي القلب متروس خليها علي الله

 

[مزون الحب]

وعليكم السلام ورحمته الله وبركاته
مشكوره أختي عبارات العيون على الكلام الحلو وكلامج صحيح بس ناظرتنا شكلها رعب وصوتها حيل عالي بكل أحوالها وانا اكره صوت العالي اخاف منه
الشغل الي علي اسوي باكمل وجه بس الحين لازم اقدم درس عشانها اجبرتني

 

[المسك2]

اهم شي الثقه بالنفس هذي بروحها لها تقييم تدربي قبل لا تقدمين

 

[مزون الحب]

شكرا أختي المسك

شدعوا ولا وحده عطتني فكرة ولا درس