شنو المطعم اللي تطلبين منه ؟

[أم الشيخ 2010]

السلام عليكم ورحمة الله وبركاته..


تعرفون موضوع الأخت الخنساء ( طلبتي صنية حلو أو فطاير....)

هذا الموضوع مشابه له ولكن من نوع ثاني...

كلنا نحتار بعض المرات من أي مطعم نطلب وبالذات إذا كان عندج ضيوف..
فنبي تجاربكم بالمطاعم ( مانبي حريم) وشنو الشيء المميز اللي طلبتيه وبجم سعره ورقم المطعم..



مثلا ...

مطعم عيال بو سالم مربينهم حلو وب 3 وهذا رقمهم 24882202

ومطعم شهريار عندهم كلوب ساندويش حلو ب4 و 6 و 7 و8 و9 وهذا رقمهم 1888800


نبي تفاعل .. وياليت بالصور ... وبالعافية مقدما...:gathering:

 

[أم الشيخ 2010]

رد : شنو المطعم اللي تطلبين منه ؟

أنا أقصد نطلب للعشا أو الغدا .. مو حلا أو فطاير..

 

[ام دليار]

رد : شنو المطعم اللي تطلبين منه ؟

مطعم الدومري بحولي

 

[أم الشيخ 2010]

رد : شنو المطعم اللي تطلبين منه ؟

مطعم الدومري بحولي

شنو تطلبن منه وبجم ؟؟؟

ويوصل..؟

 

[*ماي الورد*]

رد : شنو المطعم اللي تطلبين منه ؟

للعشا ممكن شاميات من التنور الشرقي بالسالمية
للغدا المشويات من تركش جرل هم بالسالمية
عشاي الخاص ممكن اطلب صمونة عزوز من مطعم الديوان بالسالمية عبارة عن شاورما مع كتشب و ميونيز و بطاط
و عندهم بعد عصير جعيص مو زين للي مسوين رجيم لوووول

 

[(كويتيه عسل)]

واااااااايد مطاعم على حسب شنو مشتهين اللي متذكرتهم


مطعم ناز عيوش واكل ايراني واحلى شي العيش الاخضر بالخضره نسيت شسمه واكله نظيف ويهبل
عندهم فرع بالجابريه

بهار بالسالميه اكل ايراني احلى شي جلو كباب واللبن مالهم يهبل وهالمطعم كلا زحمه عندهم

هاشم هاشم بحولي كبابه موووصج نظيف ولذيذ وفريش مو بايت
ويحطلج الخبز المقصص محموس بالطمام والبصل والثوم عجييييب

ميس الغانم مشويات

ديك الرومي كبه باللبن مالهم مووصج لذيذه يعطونج معاه عيش بالشعريه
ومشويات احلى شي شيش كباب ودياي مسحب مشوي يعني دياي بدون عظم مع صلصه
ومجبوس دياي مالهم عجيب بس من زمان طلبت منهم مجبوس دياي ماادري نفس المستوى ولا تغير
وترى ديك الرومي مايوصل اطلبه واروح آخذه او اروح اطلب على مايخلص اروح مشوار وارد

قصر النخيل الورق عنب مالهم حامض وناااطع والتبوله حلوه والمشويات بعد

اكل ياباني روك اند رول كلا اطلب سوشي المايكي بالبقصماات بدون قبقب

الباستات من مطعم باستا مينيا تطلبين نوع الصلصه وانتي تختارين نوع المعكرونه اللي تبينها
احب السبغتي بالربيان بس اطلبها بدون محار والتراميسو مالهتم لذيذه كلا اطلب
منها 4 ..3 اموت عليها وعندهم عصاير غريبه وعجيبه
ملوت المطعم اللي يبيعونهم على شكل بطل مسكر يايبينهم من مصنع باستا مينا من برا

فطاير تايم اوت اللي بالسالميه صوب محل سابليه ودونت والخبار نفس الشارع المحل صوب الاشاره
فطايره نظيف ويهبل كلا نطلب فطاير جبن باللحم ولحم بالبطاط ولبنه بالفلافل

المطاعم العاديه بيتزا كنتاكي شرينبي .. هالسوالف

 

[نارنجه]

رد : شنو المطعم اللي تطلبين منه ؟

مشكورة اختي على الموضوع ...
والله خوش موضوع يبيله نغيررررر خاصة لما اخترب موضوع خنساء
عمومااا
احلى ورق عنب ذقته من تركش جرل و فطايرهم تهبل خفيفة حيييييييل مودسمة .. و المشويات مالتهم بعد حلوة خاصة الكباب التركي ..
و سندويشة الكباب مالتهم بعد تهبل كبيرة واسعارهم زينة ... يعني اكبر علبة ورق عنب عندهم بدينارين و800 فلس .. غيرهم يبيعها على 5 دنانير ..


مطعم ابن الوزير شاورمة الدياي و اللحم مالتهم بخبز الصاااااج مووووو صج .. حتى الفتوش و سلطة الشمندر يهبلون

الديك الرومي مثل ماقالت الاخت .. فعلا الكبة عندهم غيررررررر اخذ منهم لرمضان كبة برغل مثلجه
و كبة اللبن مالتهم صج مزاااج ..


اذا تذكرت شي رجعت لكم

 

[أم حمودي**MALL**]

مطعم ميس الغانم مشويات

مطعم مهراني عيوش برياني ومرق بتر جكن ممممم لذيذ

مناقيش العم درويش بحولي يم نادي القاسيه كل فطايره عجيييييبه

بيتزا بابا جونز خفيفه ولذيذه

مطعم بابك بالجابريه

 

[tt2tt]

رد : شنو المطعم اللي تطلبين منه ؟

واااااااااو اموت في المطاعم كل ما شفت مطعم زين روح

 

[-Angel-]

رد : شنو المطعم اللي تطلبين منه ؟

موقع طلبات مايقصر طبي وتخيري ولا بعد تقدرين تدفعين بالكي نت

 

[Tender Heart]

رد : شنو المطعم اللي تطلبين منه ؟

واي انا هم غرامي المطاعم

اطلب برياني دياي من تال

بيتزا سوبر سوبريم من بيتزا هت

تركي مع اتاليان ساندوتش من سب واي

صمونه بيض مع خضار من البطريق بالجابريه

مرتديلا بالجبن من شموع الافراح

شاورما لحم مع بصمون مصري من فيرست شاورما

هذا الي اطلبه بس انا هم طبعي احب اروح اكل بالمطاعم اكثر من لا اطلب وثانكس على الموضوع النايس

 

[ام الدرر]

احم احم
<<<<تخصص مطاعم
مطعم السرايات
مطبق سمج زبيدي وشعوم لذيذ بس عيبه العيش شوية 24711174
مطعم الفايز شوربة ذرة بالدياي اكل صيني وهندي 24766720
فرح جاط مشويات العايلة عجيب 25312229
كشري تو الليل له فرع بجمعية الخالدية وجمعية السرة والتوصيل 22622725
مستر صب الزهراء 25242871
فريج العزايم مجبوس لحم 25650501
وبث​

 

[جوك احلى جو]

بابا جونز بيتزاتهم حلوووه انا احب بيتزا الخضار اسمها جاردن سبيشال واحب الجكن وينجر بصوص البافلو سبايسي )

فريج صويلح مجبوس اللحم او الدياي وسلطاتهم زينه

بيت ديكسون يوصل وهم تروحين له قعدته حلوه طلبي مجبوس اللحم وعيش مرق باميا

شرمبي وجبه بحار غنيه عن التعريف

مطعم جريلو ساندويش الستيك وبطاط

كابوريا حلاته تاخذينه من المطعم مو اهم اييبونه لانهم احيانا بطيئبن احب منهم الستيك (قوليلهم الستيك المدور )ووماعون كباب وحمصهم حلووو وساندويش الربيان وكالفورنيا ستيك وماعون شيش طاووق وورق عنبهم حلوو بس تاكدي ان تاريخ اليوم لول

الكلحه الحمص وجبده بدبس الرمان بشكل عام مقبلاتهم حلوه

تكا وجبه شيش طاووق او الدجاج سبايسي

سبارو كنت احبه لكن الحين اخترب مو نفس قبل كنت اطلب باستا بيستو بالريحان

ميس الغانم لازم تطلبين وايد عشان يوصلون

مطعم بافالو احب اصابع الجبن وهم اكله حلوو

مطعم ناز ايراني حلووو

كبابجي احب ساندويش كباب عنتبلي بس قوليله بدال الحمص يحط ثوم داخل الساندويش الذ وفتوشهم عجيييييييييييب وهم تبولتهم زينه

بيرجر كنج جكن رويال حلوو وابر برجر وجبه سامبلر تييج قطه من مازارولا ستك اصابع الجبن وتيي حلقات بصل وتيين قطع من السبرينج رول واصابه الدياي حلوووووه + صلصتين انتي تختارين انا اختار جارليك سوس

سب واي احب الجيز ساندويش او سستيك جيز ساندويش وانتي تختارين شنو تحشينها من خضرا وصوص

جربت بيج بويز عادي وجربت شاورماتي عادي

فطاير الصاج الكويتي حلو

فطاير كتكوت عادي بس لاتطلبين فطاير الفلافل لايحووووووووووووشك موحلوه بكل ماتحمله الكلمه من معني

فطاير قاصد خير احب السبانخ روووعه

تذكرت فرايديز يوصل بس انا اروح له ماطلبت منه ليلحين ديليفري وهم مايوصل لكل المناطق

في مطاعم وايد حلووه بس ماتوصل

ولي عوده

 

[*ماي الورد*]

رد : شنو المطعم اللي تطلبين منه ؟

همبرغرات مطعم ساسو حلوة
احلى دياي شواية من مطعم بهار لازم تحجزين
مطعم الغدير بسلوى صمونة بطاط لبنة لذيذة و بيض بالنقانق و الشاورما هم حلوة
مطعم الضيعة بس عنده شاوما دياي المنيو كلها شاوما دياي لطيفة جدا