شلون اغلب ريلي ؟

[طموحــة]

ابي احد يقولي وين الغلط بحياتي لاني تعبت وماعاد فيني اتحمل اكثر من جذي دايم يحسسني اني موفاهمه وماعرف شي وانه هو الصح وهو الفاهم واللي لازم كلامه يمشي بالاول قلت اوك عشان يبي يفرض شخصيته وريال يحب يكون هو السيد بكل شي بس الحين حسيت ان الموضوع تفاقم وزاد عن حده
هو يشوفني عنيده واكرر الغلط ( من وجهة نظره غلط) وماتعلم من اغلاطي
وانا احس انه داش الحياه الزوجيه حرب وهو اللي لازم ينتصر
مثال بسيط وقيسو عليها الامور الكبيره
لما كنت اشرب الشوربه من حافة القفشه قال ترا محد يشرب جذي قلت امبلا واصلا من الاتيكيت ودشينا سجال وانتهي انه هو الصح ( مااخفيكم ذكاءه وفطنته انه شلون يخلي نفسه هو الصح ) لانه محاور ذكي وعقبها فتحت اليوتيوب ووريته مقطع اتكيت شرب الشوربه وقلتله اصلا حتي بالمدرسه تعلمت جذي وقام يرقع حق عمره بطريقه طلعتنا احنا الاثنين صح طبعا سكتت وماحبيت افشله

مثال ثاني يوم كسرت الخدامه الطاوله قال انت الرفله اللي ماعلمتيها شلون تشيلها مع انها كل يوم تنظف وتعرف شلون تشيل الطاوله وطلعني انا الغلطانه
مثال ثالث لما خر ماي الحمام قال ليش خليتي السخان شغال 24 ساعه اذا تبينه بس شغليه وتالي طفيهرشفتي شلون رفالتج خربت علينا السخان قلتله دايم ببيت اهلي مانطفيه طول الشتا جذبني وقال كلمي امج عشان تعلمج رحت دقيت وقلتله شفت شلون امي نفس كلامي قال اي توكم مغيرينه اكيد امج ناسيه ، حتي لما يبت بنتي كله محذرني ماامس مهادها عقب قلتله احس ريولها طول الفتره نفس وضعيتها ببطني وامي تقولي لازم تمسينها عشان تتعود تفرد ريولها قال خلاص سوي اللي قالته لج امج ........
وسوالف وااااااااايد يبط جبدي دايم انا الرفله والغلطانه واللي ماافتهم اخرها عندي موعد تحليل ولازم قبل ما احلل ساعتين كامله مااكل شي قلتله يلا بسرعه لازم اييهم عالتايم قال لا مولازم شنو تعلميني سكتت وتالي لما رحنا قالو مايصير لازم ساعتين ليش تأخرتو قام يتفلسف شلون مايصير وقلب ويهه وتالي قال عادي النتيجه تكون قريبه من النسبه الصجيه عادي اهم شي مايكون مرتفعه وبالنهايه طلع نفسه موغلطان

انا مرات اتمسك برايي واعاند بس مومعناته اني بكل شي غلط حسيته خلاص حكم علي بكل الامور اني انا الغلط صارت حياتي معاه ازمه ماصرت اتحمل


شتشوفون بنات وين الغلط وشنو اسوي عشان اقدر اغير اللي براسه ناحيتي لان خلاص شكلي بغير طريقتي وادش الحرب معاه:eh_s(14): لان خلاص تعبت اسمع كلمة رفله

 

[سـٌگر معـقـود]

لووول من العنوان حسبت في حرب وطلع صج حرب بارده الله يعينج
حبيبتي ريلج يبيله من يطول باله اهو يدري انه غلطان وانه معلوماته غلط
من جذي جداله يطول لا تعطينه مجال يستمتع بفرد عضلات لسانه عليج ��
قطعي الطريج قولي اي صح او موقف الطبيب كنتي تقدرين توصلينله لو طالعتيه بنظره توصل احساسج بدووون كلام
عشان مايشغل الكاسيت مال التبرير والترقيع يحس بذنب بروحه ولو تكلم مايمسك عليج ممسك لانج فعلا ماقلتي شي

نوعه يحب يسولف وايد لاتاخذينها تحدي بس طنشي وطبليله على قولتهم عشان يمل من هالنقاشات
والله يعينج

 

[خابت هقواتي]

شوفي احنا حريم ونعرف بعض ...

اول شي تقبلي الي بقوله برحابة صدر .. ونوصل بعدها للحل بالطريقه الي صج بعد الله راح يتغير ريلج ..

انتي ليش تناقشينه ؟؟

ليش كل شي يقول لج فيه انج غلط تقولين الا صح انا صح ؟؟؟

تدرين ان ريلج يحبج ؟ .. ومنقهر انج اذكى منه ويغير انج افهم منه ..

الريال اذا حس ان مرته اذكى منه او تتشطر عليه يحترق وينقهر يقوم يدش معاج مرحلة منافسه

يعني الا يكسر خشمج انه هو صح ولا ما يسكت ..

الغلط انج تاخذين بخاطرج كل شي .. خلاص الرياييل يسوون نفسهم فاهمين بكل ششششششششششي

وانهم يعرفون بكل شي ..

واذا هالشي طلع غلط وانه غيره صح .. ينقهر ,

ترى انتي تحرجينه بس ماتحسين ,

هو يحس معاج انه غبي مايفهم عشان جذي كل شي يعلق عليه ويتفلسف < والله صج

خلاص طلعت الشغله الي قال عنها غلط خلاص سكتي مو لازم تقولين ترى انت غلط !

الحين شنو الحل ؟

تسكتين ...

يعني اذا قال او علق عليج شفتي شلون الطوفه .. طنشي

او اذا قال شغله وانتي تدرين بقلبج انها غلط ... خو لا تقولين لا غلط .. قولي اي يمكن مادري والله ..

كل شي مادري مادري <<

حسسيه انك صح وانك اذكى < خليه يوصل للي يبيه عشان تفتكين

اذا راح على كل كلمه او تعليق تحسين انه عدوج ولازم تردين عليه جذي ماراح تستفادين شي ,

اذا عطاج اكثر من تعليق باليوم ..تحملي ,

اخر شي هو بيحس على نفسه ويبطل هالسالفه

ولو تصيرين ماتسولفين معاه كلش فتره يعني اسبوع .. راح يحس انج ماتسولفين معاه راح يستغرب ,

انتي عاد اذا سالج قولي لان كل الي اقوله ما يعجبك فاسكت احسن ,

واهو اهني راح يحس ويتفشل ... وبيداري خاطرج بعد ,

تفاهمي معاه ع الي مضايقج بصوت حنون وقلب يحتويه ..

واذا تقدرين ماله داعي تدخلين ( امج ) بكل شي يخصكم ,

لانه راح يتاحشى بعد يتكلم معاج عن مواضيعه الخاصه لانه ع باله انج كل شي تقولينه لامج ,

انتبهي .. لاتيبين طاري امج وايد ,

حاولي تطولين بالج وتطنشين ...

الله يوفقج ياقلبي بحياتج ويسخر ريلج لج .

 

[امـ خــزامـى]

٨٨٨٨٨٨ماشاءاللع عليك كفيتي ووفيتي



حبيبتي لاتعبين نفسك اي شي يقوله
قولي اممم صدق انت ادرى

او ماشاءالله عليك ثقافتك واااسعه

طنشيه من ناحية لاتعاندينه وتدخلين بحوارات مالها داعي وتلفهه وبس تزيد الحقد بقلوبكم

وانفخي فييييييه يعني امدحييييييه


وصدقيني بيتغير

تدرين ليش

مثل ماقالت الحلوه اللي فوق هو معجب بذكااائك

يتفلسف عليك ويتناقش حتى بطريقة شرب الشوربه دليل انه بيوضح لك شوفيني
انتبهي لي
ترى حتى انا فاهم
انعجبي فيني

امدحيييي.


ترى هذا اللي بيوصله لك

 

[BubbLe87]

عادي الرياييل عقد
اخذي و خلي

 

[أم مهره وميثاء]

الله يهديه...
احس عنده نقص... ومب واثق ف نفسه

 

[MisCongeniality]

ماشاء الله مبين من أسلوبج و طريقة سردج للمشكلة انج ذكية و بنفس الوقت تشيلين بقلبج
الحل: تغافلي بترتاحين

 

[طموحــة]

مشكوووورين بنات والله انكم نعم الخوات

بس لاتقولون سايريه وقولي صح وتغافلي صرت مثل الثوله اقول صح وان شالله وانت صح لدرجة انه اهتزت ثقتي بنفسي صرت احس اني انا الغلط وانا الرفله صج من كثر مايتعامل معاي جذي صرت وايد خانعه واحس صرت اشك بعمري ماكنت جذي احس معاه حياتي صارت وايد ضعيفه وهو يتعمد انه يهمش دوري بوايد شغلات لدرجة انه الشاي يخلي الخدامة هي اللي تسويه يقول تعرف شلون تسويه انت ماتعرفين

بنات احس كل شي اسويه مايعجبه اي قرار اتخذه ينتقده حتي سيارتي يقول بالله فيه احد ياخذ هالسياره ودايم ينتقدني عليها مع انه خذاني وسيارتي معاي وانا اللي ادفع اقساطها



مليت من طريقته كله ماخذني منافس مو زوجة

احس من كثر ما اقول اوك انت صح او اسكتله بوايد شغلات قاعد يستغل هالضعف بس مايدري اني مالي خلق مشاكل واني متعمده اعطيه جوه عشان اشوف اخرتها معاه بس للاسف السكوت معاه ماياب الا تفاقم المشكله وزادت حدته بالتعامل

واللي تقول امدحيه وانفخيه ترا سويتها وليلحين امدحه بس تبط جبدي ردوده عسا مامدحته الا قال ادري من زمان ماقلتي شي يديد

عفيه بنات دلوني الطريج لان خلاص احس انعميت مع انه بالدوام انا اللي احل مشاكل رفيجاتي بس للاسف مثل ماقالو باب النجار مخلوع

 

[dreamY nono~]

سسبحااان الله نفسي انا وزوجي بالضببببببط

و دايما اقول عنه انه عباله داش حررب

 

[طموحــة]

اذا انت نفسي كله تسايرينه امانه موحسيتي انه تغيرت شخصيتج وقلت ثقتج بنفسج؟

 

[ماكواسم2]

حبيبتي ما في مشكله انتي مكبره الموضوع لان الريال ما يحب يصير اقل من زوجته فوضعه اقل من الطبيعي .
تدرين ويانه يالدوام موظفه مصريه اخوها دكتور ومشهور بالكويت زوجته شهادتها ثانويه اقولها اشلون تقول شرطه كان بالعروس انها ثانويه لان يبيها اقل منه واتشوفه دايما هو الفاهم والعارف ولا اتناقشه بشئ لانه هو الفاهم وهي ولا شئ

 

[طموحــة]

حبيبتي ما في مشكله انتي مكبره الموضوع لان الريال ما يحب يصير اقل من زوجته فوضعه اقل من الطبيعي .
تدرين ويانه يالدوام موظفه مصريه اخوها دكتور ومشهور بالكويت زوجته شهادتها ثانويه اقولها اشلون تقول شرطه كان بالعروس انها ثانويه لان يبيها اقل منه واتشوفه دايما هو الفاهم والعارف ولا اتناقشه بشئ لانه هو الفاهم وهي ولا شئ

صح كلامج وانا معاج ماختلفنا

بس مو معقوله كل الناس صح وانا غلط

اذا قلت شغله مايثق فيها واذا سمعها من غيري يقول صح

 

[boliana_q8]

ريلج مخه صغير
انتي اخذيه على قد عقله
لاتحطين دوبج ودوبة الند بالند
استهبلي عليه لاتورينه انج فاهمة بكل شي واهو الغلط
لانج تحسسينه بصغر عقله وتفكيره

بعد شتسوين اذا تفكيره محدود وصغير انتي كبري مخج وترفعي عنه

 

[صحكة الايام]

ارسل ع الخاص طرق مجربه للزوج ومضمونه

 

[طموحــة]

ارسل ع الخاص طرق مجربه للزوج ومضمونه

اوك

 

[Om_Ksha]

قوليله اشكره اسلوبك معاي مايعجبني انت زوجي وحبيبي وكلمة رفله مو حلوه بحقي ويحقك خاصة اني مو مقصرة بشي واحنا بنعيش العمر كله ان شاءالله حلاته الاسلوب والتعامل يصير احسن من جذي ادري انك طيب وماتقصر بس أنا يحز بخاطري هالاسلوب تقدر تعارضني بطريقة أحلى من جذي

 

[Sosota_20]

ايي صح ريلج عقله صغير والله جنج تتكلمين عن اخوي

اول شي جربي طريقة ام كشا اذا ماظبطت معاج

دشي معاه خرب الخباثه هههههاي
شوفي ريلج فيه نقص ويدور الي اضعف منه يقزرها عليه
ولقاج انتي تردين عليه ويفرض نفسه لين يطلعج غلطانه واهو فوقج واحسن من مستواج ويصدق نفسه يملي النقص عليج
لو اهو انسان مو ناقص جان مو 24 ساعه يطلع فيج عيوب واهو كامل

والله هذا كوبي اخوي يتعامل مع البيت كله جذي اهو الي يعرف كل شي اهو الي شكله وجسمه احلى شي واهو الي سيارته زينه و و و مانخلص

انا اقولج شنو حرب الخباثه صدفيني هذا مايتساير راح يطلع روحج اذا ماعرفتي نقطة ضعفه لانه اذا قلتيله صح كلامك تعلمت منك بيطلع شي ثاني يقولج ماتعرفينه

مثلا اذا قالج مو جذي يشربون قوليله يلا اشرب بشوف اذا شرب ولا علمج قوليله وااو والله معلومه حلوه وسكتي بعد لاتكثرين كلام ينقص ويها
واذا قالج انتي رفله ماعلمتي الخدامه قوليله اي شدراني عادي عادي اقصاها فازه وسكتي خلج برووود
اذا قالج عن السخان قوليله ماعرف انت كيفك سو الي تبي وبسرعه قومي سوي روحج مشغوله بأي شي ماتعطينه مجال يغثج

خلج كله جذي بارده كا اخوي الحين مزهق مرته وامي وانا من قمت اتعامل معاه بهالطريقه ابرود وكل شي قوله اي صح صح وجنه مو هامني صح ولا غلط كله واحد تسنع معاي ومل ما قام يغثني
اي وقت يبي يطلعج غلطانه ردي رد بسيط بكل برود وضحي انه مو هامج وسيده سوي نفسج تدورين شي انشغلتي بشي
لانه هالنوع اذا لقو احد يناجرونه بيفرغ كل الي فيه فيييج خل يدور غيرج يناجره لوول لين يمل منج

خلج ذكيه وشوفي نقاط ضعفه لانه صج اذا استمر على هالحال شخصيتج جدامه يتنعدم حتى لمه بتاكلين بتشكين بنفسج بتقولين الحين بيعلق علي

 

[هيبة ملك]

ياربي. نفس. زوجي تعبت. منه ومن الجدال معاه لين وصلت لحل

مادري. كيفك. على. راحتك


وافتكيت من. كلامه
على الاقل عشنا في هدوء

 

[نـعـومـه]

لاتعبين عمرج اهوه صح ولا غلط اهم شي توصلين المعلومة اللي رايج فيها وخلاص

 

[طموحــة]

ايي صح ريلج عقله صغير والله جنج تتكلمين عن اخوي

اول شي جربي طريقة ام كشا اذا ماظبطت معاج

دشي معاه خرب الخباثه هههههاي
شوفي ريلج فيه نقص ويدور الي اضعف منه يقزرها عليه
ولقاج انتي تردين عليه ويفرض نفسه لين يطلعج غلطانه واهو فوقج واحسن من مستواج ويصدق نفسه يملي النقص عليج
لو اهو انسان مو ناقص جان مو 24 ساعه يطلع فيج عيوب واهو كامل

والله هذا كوبي اخوي يتعامل مع البيت كله جذي اهو الي يعرف كل شي اهو الي شكله وجسمه احلى شي واهو الي سيارته زينه و و و مانخلص

انا اقولج شنو حرب الخباثه صدفيني هذا مايتساير راح يطلع روحج اذا ماعرفتي نقطة ضعفه لانه اذا قلتيله صح كلامك تعلمت منك بيطلع شي ثاني يقولج ماتعرفينه

مثلا اذا قالج مو جذي يشربون قوليله يلا اشرب بشوف اذا شرب ولا علمج قوليله وااو والله معلومه حلوه وسكتي بعد لاتكثرين كلام ينقص ويها
واذا قالج انتي رفله ماعلمتي الخدامه قوليله اي شدراني عادي عادي اقصاها فازه وسكتي خلج برووود
اذا قالج عن السخان قوليله ماعرف انت كيفك سو الي تبي وبسرعه قومي سوي روحج مشغوله بأي شي ماتعطينه مجال يغثج

خلج كله جذي بارده كا اخوي الحين مزهق مرته وامي وانا من قمت اتعامل معاه بهالطريقه ابرود وكل شي قوله اي صح صح وجنه مو هامني صح ولا غلط كله واحد تسنع معاي ومل ما قام يغثني
اي وقت يبي يطلعج غلطانه ردي رد بسيط بكل برود وضحي انه مو هامج وسيده سوي نفسج تدورين شي انشغلتي بشي
لانه هالنوع اذا لقو احد يناجرونه بيفرغ كل الي فيه فيييج خل يدور غيرج يناجره لوول لين يمل منج

خلج ذكيه وشوفي نقاط ضعفه لانه صج اذا استمر على هالحال شخصيتج جدامه يتنعدم حتى لمه بتاكلين بتشكين بنفسج بتقولين الحين بيعلق علي

بعد عمري والله علي كل اللي كتبتيه ويهديلكم اخوكم ويسخره لكم ترا جربت اسوي نفسي موهامني لقيته يزيد اكثر من الاول بس جد لما حسيت اني اشك بعمري قلت استنجد فيكم خواتي وحبيباتي

ياربي. نفس. زوجي تعبت. منه ومن الجدال معاه لين وصلت لحل

مادري. كيفك. على. راحتك


وافتكيت من. كلامه
على الاقل عشنا في هدوء

صح لسانج والله اذا قلت جذي اعيش بهدوء بس موراضيه عن حالي احس من داخلي مكسوره مومعقوله كل حياتي معاه اسوي شي موراضيه عنه

لاتعبين عمرج اهوه صح ولا غلط اهم شي توصلين المعلومة اللي رايج فيها وخلاص

نعومة حياتو عساج ماتجربين بس ترا توصيل المعلومه او الراي له ضريبته هههههه