شكاوي أولياء الامور:( :( خفوا علينا أمهات

[miamy]

هلا امهات شلونكم مع الدوام

انا اليوم منبطه جبدي من اولياء الامورالشكايين :eh_s(14):

يعني احنا قاضبين اليهال من بداية السنه ومعتنين فيهم ومتحملينهم ونعلمهم ونأدبهم حتى خشمهم انظفه ونداري الكل

وماشالله عدد كبير بكل فصل.. وهم تيينا شكاوي

عندي بنت مدللينها على الاخر لأنها خوش بنت بس امها اللهم يا كافي، اذا يوم البنت ما حطينالها نجمه تعفس الدنيا، خير يا طير مو كل يوم نجمه!!!! والله من كثر الشكاوي يخلونها مو مشتهين عيالهم

وشكاوي على اقل شي، ليش ولدي ما يبي المدرسه؟ ليش فلان يطق فلان انزين يظلون يهال يعني في بيت يدهم ما يتهاوشون!!

واذا الياهل طاح انتي وينج يا ابله؟؟ سوبر مان انا!!!

خفو علينا امهات وابهات عفيه

وتقبلي مروري:eh_s(6):

 

[ReeMaN]

ههههههههه ضحكتيني اى والله صاجه لا المره الثانيه الشغاله اتروح معاه المدرسه بس حطو لهم كراسي ورا

صح هالشكاوي مبالغ فيها بس ساعات غصبن عليج تروحين تراجعين وتسالين الاداره او الابله فيها يعنى لو ولدج فجاه كره المدرسه ونوعه مايتكلم معاج شتسوين بالله ؟؟ او ياهل حاط دوبه دوب ولدج او بنتج هم ماتسالين فيها ؟؟؟ او او او كثير من الاوااات بس مو معناته ان نتناجر مع الابلات او الناظره او الاداره

 

[miamy]

ريمان انا وايد امهات عسل والله ايوني يكلموني بكل ادب واحترام وعلى راسي

واحب الامر اللي تسأل عن ولدها وبنتها بشكل دوري

بس في اسلوب سنع وفي اسلوب كللش الصراحه

والله مرات احس اني خدامتهم، اتيي الام لا سلام وتقولي أكل اليوم؟ بجى اليوم؟؟

انزين قولي الله يعطيج العافيه، شي...

والله احنا نتعب بالروضه تعب نرجع البيت عيالنا مالنا خلقهم

مشكوره حبيبتي على الرد

 

[^SwEeTa^]

هههههههههههههههه

سمعي القنبلة

أحلى شكوى بالتاريخ

انا مدرسة حاااااامل .. و فيني نقص هيموجلوبين و أنيميا و هبوط في الضغط

غبت يوم عن المدرسة .. و يوم الإدارة ضيعت حصتي بالغلط (غلطة من الادارة مو مني)

تدرين شنو الشكوى اللي وصلتني

ولية أمر داقة على الإدارة تقول صف بنتي ضاعت عليهم حصتين علوم .. ليش ما درسوا هالاسبوووووع؟؟؟ ترى انا اشتغل بالمنطقة و بشتكي عليكم هناك ههههههههههههههههههههههههههههههههههههههههههه

صج صج صج ضحكتني .. يعني قمة المسخرة

و انتي شكو؟؟ المشكله الادارة ما رضت تعلمني منو وليه هالامر .. و لا جان عرفت شسوي فيها .. و الله لاشتكي عليها

و من تدخل فيما لا يعنيه سمع ما لا يرضيه .. لا و المشكله ان صف بنتها كان مجدم عن باجي صفوفي حصتين

شنو تبين بالضبط؟؟ بتحاسبيني على مرضي و غيابي بعد؟؟ منو انتي و من تكونين؟؟ والله عاد انا وحده ما أسكت عن حقي و حزتها ما أرد على اكبر راس .. تبين تحاسبين روحي حاسبي الوزارة ليش معطتنا الحق انا نستمرض و نغيب غياب مرضي .. و لا تبين تحاسبين ريلي ليش مرتك حملت؟؟ و لا تبين تحاسبين منو بالضبط؟؟؟؟ فيج خير انتي لا تغيبين عن دوامج بعد .. لا تستمرضين

ما أقول إلا حسبي الله على اللي يدور الزلة و السبة على المدرسات

غيابي هذا انا محاسبة عليه .. راح ينزل في تقريري و راح ينخصم من معاشي اذا زاد عن حدة.. يعني انتي مالج شغل .. مو انتي اللي تحاسبيني

الشرهه علي انا اللي ما قدمت على مجلس طبي ذيك الأيام .. كله عشان صفوفي لأن قلبي عليهم .. مادري منو راح يمسكهم من وراي .. و أخاف نفسيتهم تتعب اذا تغيرت ابلتهم .. ولا انا مستحقة للمجلس الطبي من بداية حملي .. جان 9 أشهر قاعدة ببيتي و حاطة ريل على ريل و معاشي يوصلني كامل مكمل

لكن بعض اولياء الامور ما يستاهلون التعب و لا الحشيمة

كاني قدمت على مجلس طبي الحين و خليت القرعة ترعى .. كيفهم .. الزم ما علي صحتي و صحة اللي ببطني .. ليش انا ذابحة نفسي؟؟ كل هاللي اسويه و اخرتها ايونج ناس ما تقدر .. و المشكلة ادارتنا المهزوزة تخاف ترد على أولياء الأمور .. الحمدلله و الشكر

ما تسوى علي و انا كل يوم و الثاني طايحة على البنات بالصف .. و رادة من المدرسة على المستشفى على طول

حسبي الله و نعم الوكيل

 

[رفرف]

ضحكتوني والله اي والله صاجين في شكاوي اتضحك ..

مرة ولية أمر متعنية لي المدرسة تشتكي .. أبلة الحاسوب ولااااااااااااااااااااااا حصة قعدت بنتي على جهاز بروحها ؟؟
المختبر فيه 25 جهاز .. والصف فيه 25 بنت .. يعني بخش الجهاز عن بنتج مثلا ؟؟
وبعدين من وين قاعدة احط لها درجات عيل من اول الكورس ؟؟ من مخباتي ؟؟

يمكن يوم فضيل واحد اختبر جهازها وخليتها تقعد مع طالبة ثانية شااطرة لأن بنتها ضعيفة .. وخليت الشاطرة تشتغل اول وهاذي تشوفها .. تالي تاللي خلصت تقوم وبنتها شتغل بروووحها ..

وعاد لما بنتها تقعد على جهاز بروحها مسكينة البنية ضعيفة ما تجيس الجهاز ولا تشتغل ولا تسوي شي .بس تطالع ..
وانا اعيز منها طول الحصة اشتغلي يا فلانة في شي مو فاهمته ؟ وابطل لها البرنامج واقولها سوي مثلي ولا في فايدة ..
يعني حتى الجهاز اللي ياية تشتكي علشانه .. مو مستفيدة منه


انا اقول يا امهات ..
بتيون تسألون عن مستوى عيالكم ؟ شي حلو ياحلات ولية الامر الحريصة ..
تبون تستفسرون عن شي ؟؟ هم حياكم الله ..
تبون تشتكون على مدرسة طقت عيالكم او تلفظت بلفظ سيئ ؟ من حقكم
بس كل يوم يايين على سبب تافه ترا والله مصاخة ..

 

[miamy]

سويتا ماتشوفين شر مشكلة الادارات بالمدارس انهم يخافوووووووووون من الشكاوي وكله على راسنا

رفرف الله يعينكم ابلات الابتدائي اشوه ما عندنا درجات:eh_s(6):

احنا اذا قلنا حق الام عن مستوى ولدها او بنتها ضعيف ماترضاااااااا

ويطلع العيب منا احنا اللي ماعرفناله! وتكون ماخذه فيه مقلب

الحين تعلمت ان كل ما يسألوني عن عيالهم كله اقول انهم فلته:dddds:

شسوي بعد

 

[um hamed]

الله يعينكم
اناا ولية امر ما ارووح اذا ابي شيء ادز ورقه حق الابله وبس
حتى قبل فترة ولدي يايني والا القى بايده جرح يقولي ابلة العربي ماتدري بتاخذ القلم وشمختني قلت له اكيد ما تدري جان يقولي اي والله ماتدري
انا اعرف ابلة العربي حبوبة ومو قاصدتهاا علشاان جذي عذرتها وماكبرت الساالفه

 

[ام دودو المزيونه]

يا الأبلات شويه شويه علي اولياء الأمور تري حتي المدرسات في منهم التحف والعجب الي ما لهم علاقه بالتدريس والتربيه تطلع مشاكلها علي عاليهال المساكين وتزعل لحاسبتها وليه الأمر يعني انا اتعب بتربية عيالي وتييلي مدرسه تسب وتذل الياهل علي اقل شيئ
مثل ما في اولياء امور جاهلين في مدرسات للأسف جاهلين

 

[هنويا]

المدرسات يكسرون الخاطر
الله يعينهم فوق الكرف مظلومين

 

[miamy]

يا الأبلات شويه شويه علي اولياء الأمور تري حتي المدرسات في منهم التحف والعجب الي ما لهم علاقه بالتدريس والتربيه تطلع مشاكلها علي عاليهال المساكين وتزعل لحاسبتها وليه الأمر يعني انا اتعب بتربية عيالي وتييلي مدرسه تسب وتذل الياهل علي اقل شيئ
مثل ما في اولياء امور جاهلين في مدرسات للأسف جاهلين

اي والله يا ام دودو انا معاج 100% اني في تحف:0bee2e8d89:
وانا عانيت مع ابلات بنتي بالروضه

بس في ابلات ما يستاهلون الشكاوي وتنهل عليهم شكاوي

 

[QUMAR]

فيه اولياء أمور صج فاضين بمعني الكلمه
ما عندهم غير كل يوم يطلون بويهج
أبله شويه لو سمحتي
نعم خير
تري ولدي ما يحب فلان لا تخلينه يقعد يمه
تري بنتي بردانه صكرو التكييف
ههههههههههههههههههههه
شتقولين بذمتج شتردين
هذا غير الشديد سيدا علي الناظره
وتلاقين الموضوع غلط والا الياهل خاف من أهله وجذب وأيونج يتهمونج
وعقب شوفي الفشله بعيون الام والا الابو أذا طلع الياهل جذاب
يقولون ياااهل ميخالف خياله واسع
زين شحقه ما تقولون لعمركم هالحجي
الله يعيننا
أنا أشد وأحيي علي أيد كل معلمه مجتهده وتخدم ديرتها وتراعي الله يعيال الناس
لأن الله بيحاسبها علي عملها
وشكرا للكل
ههههه الميكرفون حق اللي بعدي ( ;

 

[سيدة الكويت]

الله يعينكم الصراحه ..........

 

[مجنونة]

ابلااتنا فيكم الخير والبركه


عيالنا عياالكم ما تفرق وايد .. حتي عياالكم بيكونون بنفس الموقف بيوم من الاياام ماحد يرضا بالغلط ..


الله يستر علينا وعلي اعياالنا


لكن الحق يقاال .. فيه بناات اعرفهم ... الله يعين الي بدرسونهم .. من ملووت البفاات والذي منه >>> مالنا شغل لبسها ولها مطلق الحريه


عيل اشتبين :tomato2: ..مادري بس حبيت اذكر راايي :eh_s(6):



بعدين اي مدرس له الحشيمه .. كويتي مو كويتي ,,

كافي كونه معلم .. و كاد المعلم ان يكون رسولاا ..


واكبر غلط انه كل ما قال الياهل يما ابله .. رحنا ركض ..!


ترهم بشر مثلنا

الله يوفق كل من حافظ علي الامانه وصانهاا الي اهم عياالنا


لكم مني كل الود ابلاتي ...